MÁKHI 2
2
Jezwi tɛ lephan bɛn abhu kathé phɔ jan
(Ɔ́n wú Mat 9.1-8; Ɔ́n wú Lwik 5.17-26)
1Ámɔn ɔɔ, áli ńcíbhí mɔ́nbɛn, lótɛ Jezwi saji bha Kapɛnaúmɛn khúbhɛ́, ló wo ye salé ńma bháthó. 2Ápasá bhróbhrobhé gba bhurɛhɛ́n, áchɛ́se álepɛ si bhrií aka, ńgbophro khúmɛ́n lɔ le pɛ si npɔhɔ́n, ló Jezwi élie wo yí. 3Néphan dɔnbɛn lɔ bha. Wo hromɛn néphan bhwelí hɔn sɛ bɛn abhu kathé pɛ, ló wo hɔn nkɛ bha wo esé Jezwi. 4Ápasá aphusi ya hɛ́nthé, wo le wúsi khɔ́ hɔ́n nkɛ di Jezwi hɛ́nmɛn. Lótɛ ákhúthé hrómɛn si Jezwi ya ɔn, wo dɔn lóne tho thwa, ló wo hɔn lephan abhu kathé khɛ́n ala ntɛ́trɛ tho priman khɔ lónɔn lókɔn hromɛn dithé. 5Jezwi ka awu néphan lókɔn mímíbhú apɛ, lótɛ ńkránman lephan abhu kathé salé:
– Mɛn mi, wo yɔ hɛ ne phɔ́ hɛ.
6Ló bidíyɛ́nmán kpɛ́bɛn akhwa lóne étɔ wo hromɛn mɛn sa: 7“Bítɛ khɛ́n lephan lókɔn étɔ bhwe yábhɛ nɛn ɛ, nkɛé Yankan hɛ́n nɔn ánnɔ? Abɛn nɔn ágɛ yɔ́ ne phɔ́ lephan ɛ? Nkɛé Yankan míbrɛ khɛ́n gɛ tɛ!” 8Lónian mɛn khɛ́n lóyámɛ́n Jezwi yɛn nkɔn hɛ́nphe yábhɛ nkɔn ebhú, lótɛ ántɔ sa:
– Bítɛ hɔ́n ebhú hɛ́nphe yábhɛ nɛn ɛ? 9Ló obhá tɔ sé lephan abhu kathé lée: “Oyɔ hɛ ne phɔ́ hɛ”, le ló óbha krɛnmɛn lée: “Chanfe tho, hɔn hɛ ntɛ́trɛ ló ɛnɛnsi ɔn, lóbɛn nɔn akhɔnman ɛ.”? 10Khɛ́n mɛɛ́n nɛn mɛn chɛ́ hɔ́n yɛ́n salé Lephan Mi pɛ mɔ́nsi ayɔ́ ne phɔ́ lephan áyíta lókɔn tho.
Ló ńkránman lephan abhu kathé sa:
11– Mɛɛ́n kranmán hɛ lée, tɛmɛ ɛchánfe hɔ́n hɛ ntɛ́trɛ, ló ɛsáji ló hɛ hwan!
12Lóyámɛ́n, néphan khúnbrɛn ya enɛ́n nkɛ, khɛ́n ńhɔn mɛ́n ntɛ́trɛ, ló ńno. Lóbhwe etán wo khúnbrɛn hɛ́nmɛn, áchɛ́se wo élri Yankan hwa, ló wo étɔ sa:
– Lo ka wu áyí yábhɛ lókɔn bhrɔ́ɔ́!
Jezwi che Levi
(Ɔ́n wú Mat 9.9-13; Ɔ́n wú Lwik 5.27-32)
13Jezwi saji lo khɔ Galile duphé mɛ́n. Ápasá bhróbhrobhé bha gɛ, ló ánnie nkɔn yí. 14Lóka anhɛ́n, ńwu Alfe mi Levi chre ási osɔ́n la-npho, ló Jezwi krɛnmɛn sa:
– Gɛ mɛn thá!
Levi chanfe, ló ńgɛ nkɛ thá.
15Lómánji, Jezwi le mɛ́n yíchwɛmán ɔ́nmɔn elí nɛn Levi hwan. La-nphodómán búdúbúdú le néphan phromɛn phromɛn ɔ́nmɔn lɔ gɛ wo ɔ́nmɔn elí lónɛn. Átɛsalé néphan phromɛn phromɛnhɔn yábhɛ lókɔn nɔn ágɛ Jezwi thá thúbhɔ. 16Ló bidíyɛ́nmán khɛ́n abha Fariziɛnnɛ́n gbe hrómɛn ɔn, wo wu salé Jezwi gɛ néphan phromɛn phromɛn le la-nphodómán ɔ́nmɔn elí nɛn, ló wo ébhi nkɛ yíchwɛmán sa:
– Bítɛ khɛ́n Jezwi gɛ la-nphodómán le néphan phromɛn phromɛn ɔ́nmɔn elí nɛn ɛ?
17Lónian mɛn khɛ́n Jezwi ye wo bhwe wo étɔ, ló ńkránman nkɔn sa:
– Néphan áphɔ ékhɔnman ɔn, wo-ɛ, wo lé nɛn phɔtɛ́wo, lókhɛ́n lɔ́phɔmán nɔn ánnɛn phɔtɛ́wo. Mɛn nɛn ma mɛɛ́n che néphan apriman, khɛ́n mɛn ma mɛɛ́n che néphan phromɛn phromɛn.
Jezwi étɔ mɛ́nji phɔ bhwe
(Ɔ́n wú Mat 9.14-17; Ɔ́n wú Lwik 5.33-39)
18Cíbɛn, Jan-Nduhɛ́nháwo yíchwɛmán le Fariziɛnnɛ́n yíchwɛmán ɔ́nmɔn éjimɛ́n, lótɛ néphan bha ébhi Jezwi sa:
– Bítɛ khɛ́n Jan-Nduhɛ́nháwo yíchwɛmán le Fariziɛnnɛ́n yíchwɛmán ɔ́nmɔn jimɛ́n, lókhɛ́n hɛ yíchwɛmán le tɛ́ ɛ?
19Ló Jezwi kranman nkɔn sa:
– Kasé odo néphan bha nɛn lí ákhúchre mɛ́n, khɛ́n bhiepɔ nca bha wo thethé ɔn, wú wo bhá yɔ́ nɛn ká jimɛn? Chɛchɛ, wo bha lé tɛ́ nɛn! Lóka khúnbrɛn khɛ́n bhiepɔ nca bha mɛpɔ́ chre wo thethé ɔn, wo bhá lí nɛn. 20Khɛ́n ácí ebhá, lóka wo bhá hɔ́n bhiepɔ nca yɛn wo thethé, lócí lókɔn ɔn, lónɔn wo bhá jimɛ́n.
21Álepɛ lephan ábha bhó ádɛgɔn phɛ́n pɔ́pɔ́ lá ádɛgɔn lɔ́lɔ́. Kasé otɛ́ nɛn, ádɛgɔn phɛ́n pɔ́pɔ́ tí ádɛgɔn lɔ́lɔ́ nran háne npɔ. 22Lóyábhɛ brɛ, álepɛ lephan ábha hɔ́n divɛn pɔ́pɔ́ há ńpɛ́ nɔ́nɔ́ hrómɛn, kasé otɛ́ nɛn, ńpɛ́ nɔ́nɔ́ thruman nran, ló áchɛ́ ńpɛ́ le divɛn ɔ́nmɔn liá. Khankhan mímí, óle tɛ́ nɛn a. Áyɔn se salé ohɔ́n divɛn pɔ́pɔ́ sahá ńpɛ́ pɔ́-npɔ́ hrómɛn!
Saba phɔ bhwe khɛ́n Jezwi tɔ
(Ɔ́n wú Mat 12.1-8; Ɔ́n wú Lwik 6.1-5)
23 Saba cí bɛn, Jezwi bhurikhɔ ble gɔn ehɛ́n, ló mɛ́n yíchwɛmán bho sitó pɛ ebhú ble mí. 24Lótɛ Fariziɛnnɛ́n ékranmán Jezwi lée:
– Wu a, bítɛ khɛ́n saba cí, hɛ yíchwɛmán etɛ́ áyí lo bidí le se mɔ́nsi lée otɛ́ ɛ?
25Ló Jezwi kranman nkɔn sa:
– Cíbɛn, Davi le mɛ́n hwannɛ́n ɔ́nmɔn ka áko ehɔ́n, mɛ́n yí ńtɛ ɔn, wú ɔ́n ne kan lóhrɔ́ bhrɔ́ɔ́? 26Nkɛé ká ńka Yankan-khúthé, ló kpánhɔn khɛ́n okhwɛn ha npha se Yankan, ńkhwɛn ntha! Lóka lókɔn nɔn Abiata li nphaháwo bhrɔ́khó. Khɔ́ nphahamán míbrɛ pán nɔn le bidí se mɔ́nsi lée otha kpánhɔn lókɔn, lótɛ khɛ́n Davi-ɛ khwɛn tha, ló ńse mɛ́n hwannɛ́n lɔ tha!
27Ló Jezwi cu tɔ se nkɔn sa:
– Lephanmi mwá hɛ́nthé nɔn otɛ saba, lókhɛ́n ole tɛ lephan se saba. 28Lóhɛ́nthé nɔn achɛ Lephan Mi li saba bɛn nbrɛn óthe.
Markert nå:
MÁKHI 2: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
