MÁKHI 3
3
Sɛ khɛ́n ńmɔ́n khu
(Ɔ́n wú Mat 12.9-14; Ɔ́n wú Lwik 6.6-11)
1Lómánji, Jezwi saji lo hɛ́nbhúrɛ si. Sɛ bɛn bha lóne, mɛ́n mɔ́n khu. 2Néphan abha lóne, lónian mɛn khɛ́n wo énɛn wo phɛ́ bhwe há Jezwi tho hɛ́nthé, wo chre jɛɛn wo éwɛsɛ́ nkɛ, ló wo wú, kasé nkɛ bhá tɛ́ sɛ lókɔn phɔ jan saba cí. 3Lótɛ Jezwi kranman sɛ khɛ́n ńmɔ́n khu sa:
– Chanfe tho ya néphan khúnbrɛn hɛ́nmɛn.
4Ló ńmi néphan akhwa enɛ́n nkɛ sa:
– Saba cí, wú lo bidí se mɔ́nsi salé otɛ́ lephan mwá, lée nka otɛ́ nkɛ ne? Wú lo bidí se mɔ́nsi odo lephan ká, lée nka owɛn? Khɛ́n wo le ká nkɛ mɛ́n. 5Lótɛ Jezwi enɛ́n wo khúnbrɛn thɛ́nyan mɛn, ló wo nfɛkhuwú khɛ́n wo le pɛ, lólɔ élri mɛ́n thɛ́n gbre. Lóso ńkránman sɛ lókɔn sa:
– Tia mɔ́n.
Ńtia mɔ́n, lótɛ mɛ́n mɔ́n tɛ mwá. 6Ló Fariziɛnnɛ́n chan hɛ́nbhúrɛ si thandi. Lóyámɛ́n, wo lo gɛ Erɔde gbemán, ló lósi wo bhá khɔ́ wɛ́n Jezwi ɔn, wo ésri lóphɔ bhwe.
Ápasá búdúbúdú ebhá Jezwi yé
7Jezwi le mɛ́n yíchwɛmán ɔ́nmɔn sa lo chre Galile duphé mɛ́n, ló ápasá bhróbhrobhé bho wo mánji lo lóne. Wo chan Galile le Jude ɔ́nmɔn gotho, 8wo chan Jeruzalɛ́mɛn, Idume abha Judɛn dubhɛ mánji phɛ́nta le ágotho agbali Thire le Sidɔn ɔ́nmɔn khúbhɛ́. 9Lótɛ Jezwi kranman mɛ́n yíchwɛmán salé, nkɔn nɛn ahran bhri bɛn se, ochɛ́sé ápasá ole srɛn. 10Lónian mɛn khɛ́n ńtɛ néphan búdúbúdú phɔ jan ɔn, lɔ́phɔmán khúnbrɛn khɛ́n álɔ́ élri wo gbre ɔn, wo wa mɛhɛ́ngɛ́ mɛn wo ebhá nkɛ yé, sa wo pá nkɛ pɛ. 11Lóka nánnánmi phromɛn phromɛnhɔn wu Jezwi, wo halé nkɛ nta mɛn, ló wo lukhwɛ́ tɔ sa: “Hɛ nɔn ɛli Yankan Mi!” 12Khɛ́n Jezwi di wo bi mɛ́n khrákhrá mɛn salé mɛ́n lephan yábhɛ mɛ́n ni, nkɔn le tɔ lóphɔ bhwe.
Jezwi esán Krisi-mranchɛ́mán áwɔ́-mɔn
(Ɔ́n wú Mat 10.1-4; Ɔ́n wú Lwik 6.12-16)
13Lómánji, Jezwi lo ábhóbhó tho, ńche néphan khɛ́n ánnɛn, ló wo bha gɛ. 14Ńsan néphan áwɔ́-mɔn nkɔn hromɛn, ló mɛ́n hɛ́n ńse nkɔn nɔn ali Krisi-mranchɛ́mán. Ńsan wo salé wo bhá mɛ́n phɔ ákakhúnbrɛn, anchɛ́ nkɔn lo tɔ Yankan bhwe, 15ló ansé nkɔn sɛ́npɛ́ nkɔn tranmán nánnánmi phromɛn phromɛnhɔn. 16Áwɔ́-mɔnmán ńsan nɔn ali: Simɔn (khɛ́n Jezwi éche Piɛ), 17Jakhi le mɛ́n hɔnsɛ́n Jan ali Zebede miɔn, (wo pasá hɛ́n Jezwi se wo nɔn ali Boanɛgɛsi, lóthé nɔn ali “Néphan atɛsa ágbánkhran ”), 18Andre, Filíphu, Batelemi, Mathie, Toma le Jakhi ali Alfe mi, Tade, Simɔn khɛ́n ali lephan ákhúbhɛ́ bhwe phé 19le Judasi Iskariɔthi aphɛ Jezwi li.
Jezwi bháthónɛ́n énɛn ado Jezwi ɔ́nmɔn lo
20Jezwi cu saji bha hɛn bháthó. Ápasá dɔnbɛn cu bhurɛhɛ́n, áchɛ́se mɛ́n le mɛ́n yíchwɛmán ɔ́nmɔn le wúsi khɔ́ lí nɛn nwɛ́ lɔ. 21Mɛ́n bháthónɛ́n ka áyé lóbhwe, wo hɛn sitó wo élo dó nkɛ, ló wo étɔ sa: “Wú ńfan etɛ!”
Ábhwe wo ephɛ́ há Jezwi tho, ántɔ lóbhwe
(Ɔ́n wú Mat 12.22-32; Ɔ́n wú Lwik 11.14-23; 12.10)
22 Bidíyɛ́nmán khɛ́n achan Jeruzalɛ́mɛn bha étɔ sa:
– Bɛzebu ali logbo bha mɛ́n phɔ!
Dɔnbɛn étɔlé:
– Nánnánmi phromɛn phromɛn-óthe nɔn ase sɛ́npɛ́ ńmo ántranmán nánnánmi lókɔnhɔn!
23Lótɛ Jezwi che wo bha, ló ńkhɔ yandran mɛn ántɔ bhwe sé nkɔn sa:
– Kalósi Abhɔsɛ́mɔ́n gɛ khɔ́ tranmán mɛ́n bɛn nbrɛn e? 24Kasé bhringbi khúbhɛ́ bɛn, néphan ya wo nbrɛn hrómɛn ekhú tha ɔn, lóbhringbi khúbhɛ́ lókɔn bha lé gɛ gɛlé tré, ábhɔ́, 25ló ámándo brɛ hromɛn, kasé néphan ya wo thethé éswan ɔn, lómándo lókɔn bha lé gɛ gɛlé tré, ábhɔ́. 26Kasé Abhɔsɛ́mɔ́n bho tha gɛ mɛ́n bɛn nbrɛn, kasé mɛ́n bhringbi khúbhɛ́ hrómɛn néphan bhuriya, mɛ́n sɛ́npɛ́ bha lé gɛ gɛlé tré, ábhɔ́.
27– Lephan apɛ sɛ́npɛ́, álepɛ lephan ábha ló mɛ́n bháthó lo khwɛ́n mɛ́n yí sído, kasé ńnɛn phrɛ thwasi gɛ sɛ́npɛ́wo lókɔn mɛ́ kálé khɛ́n, ló lóka ńgɛ nkɛ mɛ́ ka, lónɔn ánman gɛ khwɛ́n nkɛ bháthó yí khúnbrɛn phú.
28– Mímí mɛɛ́n kranmán hɔ́n: ńne khúnbrɛn tɛɛ néphan bha tɛ́, le ábhwe phromɛn phromɛn khúnbrɛn tɛɛ wo bhá tɔ ló Yankan tho, óbha yɔ́phɔ́ wo. 29Khɛ́n lephan ábha tɔ bhwe phromɛn phromɛn ló Nánnánmi Créncré tho ɔn, mɛ́n-ɛ, obha le yɔ́phɔ́-ɛ bhrɔ́ɔ́. Átɛsalé ńtɛ ńne bɛn atre godo!
30Lónian mɛn khɛ́n Jezwi lɛ ncan yábhɛ lókɔn se wo ɔn, lóhɛ́nthé nɔn achɛ wo étɔlé: “Nánnánmi phromɛn bɛn bha Jezwi phɔ.”
Jezwi mɛ́n man le Jezwi mɛ́n hɔnsɛ́nhɔn
(Ɔ́n wú Mat 12.46-50; Ɔ́n wú Lwik 8.19-21)
31Lóka lókɔn nɔn Jezwi mɛ́n man le mɛ́n hɔnsɛ́nhɔn ɔ́nmɔn bha lóne. Wo ya ngbophro, ló wo chɛ lephan bɛn lo éche Jezwi. 32Néphan búdúbúdú jekhali nkɛ ɔ́nmɔn khwa, ló lephan bɛn ékranman nkɛ lée:
– Khɔ́ hɛ man le hɛ hɔnsɛ́nhɔn ɔ́nmɔn ya ngbophro éche hɛ.
33Ló Jezwi kranman nkɔn sa:
– Abɛn li mɛn man, ló bánnɛ́n li mɛn hɔnsɛ́nhɔn?
34Lómánji, ńmo mɛbhí tre annɛ́n néphan ajekhɛli khwa, ló ántɔ sa:
– Ɔ́n wu a, mɛn man le mɛn hɔnsɛ́nhɔn ɔ́nmɔn nɔn akhwa krɛn. 35Átɛsalé lephan khɛ́n etɛ́ Yankan thɛ́npɔ́ yí, mɛ́n nɔn ńni mɛn hɔnsɛ́n, mɛn hɔnmia le mɛn man.
Markert nå:
MÁKHI 3: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
