MATHIE 8
8
Jezwi tɛ khokhóbhé-phɔ́wo bɛn phɔ jan
(Ɔ́n wú Mák 1.40-45; Ɔ́n wú Lwik 5.12-16)
1Lóka Jezwi chan ábhóbhó tho diathé, ló ápasá bhróbhrobhé gɛ thá. 2Khokhóbhé-phɔ́wo bɛn tigbɛli, ńmɔ ntráhɛ́nlé nkɛ hɛ́nmɛn, ló ńkránman nkɛ sa:
– Yíliéwo, kasé ɛpɔ, ɛ́gɛ tɛ́ mɛn phɔ chán.
3Jezwi tia mɔ́n pa nkɛ pɛ, ló ńtɔ sa:
– Mɛn pɔ, tɛmɛ hɛ phɔ ochán!
Lóyámɛ́n, khokhóbhé ya mɛ́n phɔ lia. 4Lómánji, Jezwi krɛnmɛn sa:
– Ábhwe lókɔn ɔn, ɛlé tɔ sé lephan brɛ oyé bhrɔ́ɔ́. Khɛ́n tɛmɛ ɛhɔ́n hɛ nbrɛn lo lie nphaháwo owú hɛ phɔ si akhɔ chan. Lómánji, ɛha ńpha khɛ́n Moyízi tɔ lóbhwe, ló olie néphan khúnbrɛn salé hɛ phɔ jan.
Jezwi tɛ Rɔ́mɛn ngbumán-óthe bhrɔ́khó nɛnkhwɛ́nwo bɛn phɔ jan
(Ɔ́n wú Lwik 7.1-10)
5Jezwi lɛ Kapɛnaúmɛn khúbhɛ́, lóka lókɔn nɔn Rɔ́mɛn ngbumán-óthe bhrɔ́khó bɛn tigbɛli ébhi nkɛ sa nkɛ dɔnmɛn mɔ́n, 6ló ántɔ sa:
– Yíliéwo, mɛn nɛnkhwɛ́nwo bha bháthó, ńmu kathé, ló áyí édri phɔ kpɛ́ɛ́n.
7Ló Jezwi krɛnmɛn sa:
– Mɛn mán no tɛ́ mɛ́n phɔ jan.
8Khɛ́n ngbumán-óthe bhrɔ́khó krɛnmɛn sa:
– Yíliéwo, mɛn nɛn ni lephan khɛ́n ɛ́gɛ lɛ́ mɛn hwan. Lóhɛ́nthé tɛmɛ ɛtɔ bhwe brɛ pán, ló mɛn nɛnkhwɛ́nwo phɔ bha jan. 9Mɛn lɔ, ápɛ néphan atre mɛn lé, ló ngbumán khɛ́n mɛn tre wo lé, wo lɔ wo bháne. Kasé mɛn chɛ́ bɛn lée: “Lo!” ló ánno, kasé mɛn che lójɔ lée: “Bha!” ló anmá. Ló kasé mɛn kranman mɛn nɛnkhwɛ́nwo lée: “Tɛ yí lókɔn!” ló antɛ́.
10Lóka Jezwi ye bhwe lókɔn, ákhwɛ hɛ́nmɛnlé kpɛ́ɛ́n, ló ńkránman néphan agɛ thá salé:
– Mímí mɛɛ́n kranmán hɔ́n: Izraɛ khúbhɛ́ hrómɛn, álepɛ lephan brɛ apɛ mímíbhú yábhɛ lókɔn bhrɔ́ɔ́. 11Mímí mɛɛ́n kranmán hɔ́n salé, néphan búdúbúdú bha chán áliémɔn le ámránkhu phɛ́ntha ɔ́nmɔn bhá, ló wo bhá gɛ Ábrahámɛn, Izakhi le Jakɔ́phu ɔ́nmɔn chré tábrɛ mɛ́n, Átho Bhringbi khúbhɛ́. 12Lókhɛ́n néphan nbrɛn ayɔn se salé Yankan Bhringbi khúbhɛ́ olí wo ékɛ ɔn, wo-ɛ, óbha da wo khwá ngbophro dubhlékhu hromɛn, lóne nɔn wo bhá thɔ́n hɛ́ndu, ló wo bhá chrui nɔ́thá.
13Lómánji, Jezwi kranman ngbumán-óthe bhrɔ́khó sa:
– Tɛmɛ ɛló bháthó, ló hɛ mímí ɛbhu ɔn, lóyí bha tɛ́ sé hɛ.
Lóka hromɛn brɛ tɛɛ nɔn, ngbumán-óthe bhrɔ́khó nɛnkhwɛ́nwo phɔ jan.
Jezwi tɛ lɔ́phɔmán búdúbúdú phɔ jan
(Ɔ́n wú Mák 1.29-34; Ɔ́n wú Lwik 4.38-41)
14Lómánji Jezwi lo Piɛ hwan, ńwu nkɛ grobhie la lé, ágbalɔ́ ehɔ́n-ɛn. 15Ńpa nkɛ pɛ, lótɛ ágbalɔ́ chan mɛ́n phɔ féne, ló ńchánfe ánkhwɛn Jezwi hɛ́nmɛn nɛn.
16Lóka ácí hɛn njuka, wo khwɛn néphan búdúbúdú khɛ́n nánnánmi phromɛn phromɛn bha wo phɔ bha se Jezwi. Ńkhɔ mɛ́n bhwetɔ́ mɛn tɛɛ tranman nánnánmi phromɛnhɔn lókɔn, ló ńtɛ lɔ́phɔmán khúnbrɛn phɔ jan. 17Ńtɛ nɛn, ochɛ́sé bhwetɔ́tréwo Ezayi bhwe atɔtre, lóyí otɛ́ símɛ́n sa: “Ńdo lo lɛnɛ abha lo phɔ npɛ, ló ńswa lo yɛn lo lɔ́ khúnbrɛn hrómɛn.”
Néphan apɔ sa agɛ Jezwi thá
(Ɔ́n wú Lwik 9.57-62)
18Lóka Jezwi wu ápasá mɛ́n phɔ, lótɛ ńkránman mɛ́n yíchwɛmán lée wo bhuriká dúji. 19Bidíyɛ́nwo bɛn tigbɛli, ló ánkranmán nkɛ sa:
– Yíliéwo mán gɛ hɛ thá ɔ́nmɔn nó ási khúnbrɛn tɛɛ ɛ́bhá lo.
20Ló Jezwi krɛnmɛn salé:
– Ńkrɛ́ pɛ nɔn, ló ńkɔ́cran lɔ pɛ wo nkhú, khɛ́n Lephan Mi-ɛ le pɛ si atré mɛ́n hɛ́nphe lé, khɛ́n áfikhwá.
21Sɛ nankhɛ bɛn aphrɛ li mɛ́n yíchwɛ́wo ékrɛnmɛn sa:
– Yíliéwo, tɛmɛ ɛsé mɛn mɔ́nsi mɛn no mrwɛn mɛn nthe phú khɛ́n.
22Ló Jezwi krɛnmɛn sa:
– Tɛmɛ ɛgɛ mɛn thá, ló ɛyɔ́ khúmán khwá omrwɛn wo néphan akhu.
Jezwi chɛ ádúgran khwalé jɛɛn
(Ɔ́n wú Mák 4.35-41; Ɔ́n wú Lwik 8.22-25)
23Jezwi ka hran mɛn, ló mɛ́n yíchwɛmán lɔ gɛ ɔ́nmɔn élo. 24Lótɛ ádúgran khrákhrá bɛn ya lóne éjan duphé tho, ló ńdu ebhú hɛ́n hran mɛn, khɛ́n Jezwi-ɛ eláná. 25Lótɛ yíchwɛmán tigbɛli, wo éfre nkɛ, ló wo étɔ sa:
– Hwánthe, do lo ka kpɛ! Lo ebhá khú phú!
26Ló Jezwi kranman wo sa:
– Bítɛ hɔ́n esókhú ɛ? Bítɛ hɔ́n mímíbhú lé thubhɔ ɛ?
Lótɛ ńchanthé fe, ńtɔ bhwe mɛ́n khrákhrá mɛn se áphɛ́phrɛ le duphé ɔ́nmɔn, lótɛ lókhúnbrɛn khwalé jɛɛn. 27Lóbhwe etán yíchwɛmán khúnbrɛn hɛ́nmɛn, ló wo étɔ sa:
– Ébí lephan yábhɛ bɛn li lókɔn, khɛ́n áphɛ́phrɛ le duphé ɔ́nmɔn nwɛ́ lɔ éji ɛ?
Jezwi tɛ ńsɛ mɔn khɛ́n nánnánmi phromɛn phromɛn bha phɔ phɔ jan
(Ɔ́n wú Mák 5.1-20; Ɔ́n wú Lwik 8.26-39)
28Lóka Jezwi di Gadara khúbhɛ́nɛ́n gotho dúji, lótɛ néphan mɔn chan matho thandi bha ywɛnli. Néphan mɔn lókɔn ɔn, nannánmi phromɛn phromɛn bha wo phɔ. Wó ha thɛ́nyan kpɛ́ɛ́n, áchɛ́se néphan lé dɛn khɔ́ lóne thethé. 29Ló wo elúkhwɛ́ tɔ sa:
– Yankan Mi, bí bhwe bha lo le hɛ ɔ́nmɔn thethé ɛ? Wú bhá ɛbha ɛtɛ́ yí dri lo phɔ khɛ́n osé lóka nbrɛn wo ha tre?
30Ńgbróko go bɛn ya wo hɛ́nmɛn tɛɛ énɛn wo nɛnlí. 31Nánnánmi phromɛn phromɛnhɔn éla Jezwi, ló wo étɔ sa:
– Kasé ɛ́nɛn ɛtranmán lo ɔn, tɛmɛ ɛchɛ́ lo lo hɛ́n ngbróko go lókɔn hromɛn.
32– Ló Jezwi kranman wo sa, ɔ́n no a.
Nánnánmi phromɛn phromɛnhɔn chan néphan mɔn lókɔn phɔ thandi lo hɛn ngbróko hromɛn. Lóyámɛ́n, ńgbróko chan ábhóbhó muthé wa lo hɛn duphé hrómɛn, ló wo khúnbrɛn wo khu du.
33Néphan ébo ngbróko wa féne, ló wo lo ákhúbhɛ́ hrómɛn. Ló áyí khúnbrɛn atɛ néphan mɔn lókɔn khɛ́n nánnánmi phromɛn phromɛn bha wo phɔ, le áyí si akhɔ tɛ, wo tɔ lóbhwe khúnbrɛn se néphan ye. 34Lótɛ ákhúbhɛ́nɛ́n khúnbrɛn chan khúbhɛ́ hrómɛn thandi lo éywɛnlí Jezwi. Lóka wo wu nkɛ, lótɛ wo éla nkɛ sa nkɛ chán wo gotho féne.
Markert nå:
MATHIE 8: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
