MATHIE 9

Jezwi tɛ lephan bɛn khɛ́n abhu kathé phɔ jan

(Ɔ́n wú Mák 2.1-12; Ɔ́n wú Lwik 5.17-26)

1Jezwi ka hran mɛn, ló ńsáji muri duphé no mɛ́n nbrɛn khúbhɛ́. 2Lóne wo hɔn lephan bɛn abhu kathé la ntɛ́trɛ tho bha se. Lóka Jezwi wu néphan lókɔn mímíbhú apɛ, lótɛ ńkránman lephan abhu kathé salé:

– Mɛn bhi tɛmɛ ɛkhɔnmán phɔ! Oyɔ hɛ ne phɔ hɛ!

3Lótɛ ábidíyɛ́nmán mɔ́nbɛn étɔ wo hromɛn mɛn sa:

– Lephan lókɔn élɔ Yankan hɛ́n!

4Lónian mɛn khɛ́n Jezwi yɛn wo hɛ́nphe wo ebhú, lóhɛ́nthé ńtɔ sa:

– Bítɛ khɛ́n ɔ́n pɛ hɛ́nphebhú phromɛn yábhɛ nɛn ɛ? 5Ló óbha tɔlé: “Wo yɔ hɛ ne phɔ hɛ,” le ló óbha tɔlé: “Chanfe tho ló ɛnɛnsi ɔn, lóbɛn nɔn akhɔnman ɛ”? 6Khɛ́n mɛɛ́n nɛn mɛn chɛ́ hɔ́n yɛ́n salé Lephan Mi pɛ mɔ́nsi ayɔ́ ne phɔ́ lephan áyíta lókɔn tho.

Ló ńkránman lephan abhu kathé salé:

– Ɛchánfe tho, ɛhɔ́n hɛ ntɛ́trɛ, ló ɛló hɛ hwan!

7Lótɛ lephan lókɔn chanfe, ló ńsáji annó mɛ́n hwan. 8Ápasá ka wu lóyí lókɔn, wo esókhú, ló wo élri Yankan hwa, ńsɛ́npɛ́ yábhɛ lókɔn khɛ́n nkɛ se néphan hɛ́nthé.

Jezwi che Mathie

(Ɔ́n wú Mák 2.13-17; Ɔ́n wú Lwik 5.27-32)

9Jezwi chan lóne élo, ńwu sɛ bɛn óche Mathie chre ási osɔ́n la-npho, ló ńkránman nkɛ sa:

-Gɛ mɛn thá! Mathie chanfe, ló ńgɛ nkɛ thá.

10Lóka Jezwi le mɛ́n yíchwɛmán ɔ́nmɔn chre Mathie hwan elí nɛn, lótɛ la-nphodómán le néphan phromɛn phromɛn búdúbúdú ɔ́nmɔn lɔ bha gɛ wo ɔ́nmɔn khwa tábrɛ mɛ́n. 11Fariziɛnnɛ́n ka awu nkɔn, ló wo ébhi mɛ́n yíchwɛmán sa:

– Bítɛ khɛ́n hɔ́n hwánthe gɛ la-nphodómán le néphan phromɛn phromɛn ɔ́nmɔn elí nɛn ɛ?

12Lónian mɛn khɛ́n Jezwi ye wo bhwe wo étɔ, ló ńtɔ sa:

– Néphan áphɔ ékhɔnman ɔn, wo-ɛ, wo lé nɛn phɔtɛ́wo, lókhɛ́n lɔ́phɔmán nɔn ánɛn phɔtɛ́wo. 13Yankan hrɔ́ bhwe atɔlé: “Mɛɛ́n nɛn áyíbhwátɛ́, lée nka léli ńbranmán okhwɛn ha npha,” ábhwe lókɔn ɔn, ɔ́n no nɛn lóthé. Átɛsalé mɛn nɛn ma mɛɛ́n che néphan apriman, khɛ́n mɛn ma mɛɛ́n che néphan phromɛn phromɛn.

Jezwi bhwe atɔ ńmɛ́nji phɔ

(Ɔ́n wú Mák 2.18-22; Ɔ́n wú Lwik 5.33-39)

14Lótɛ Jan-Nduhɛ́nháwo yíchwɛmán tigbali Jezwi, ló wo ébhi nkɛ sa:

– Bítɛ khɛ́n lo le Fariziɛnnɛ́n ɔ́nmɔn lo jimɛ́n khúnkhu, lókhɛ́n hɛ yíchwɛmán le tɛ́ ɛ?

15Ló Jezwi kranman nkɔn sa:

– Kasé odo néphan lo ákhúchre gɔn, khɛ́n bhiepɔ nca bha wo thethé chre ɔn, wú hɔ́n ebhú salé ábhwe bha phé wo? Chɛchɛ, léliló! Lókhɛ́n ácí ebhá, lóka lókɔn khɛ́n wo bha hɔ́n bhiepɔ nca yɛn wo thethé ɔn, lóka lókɔn nɔn wo bhá jimɛ́n.

16Álepɛ lephan ábha bhó ádɛgɔn phɛ́n pɔ́pɔ́ lá ádɛgɔn lɔ́lɔ́. Kasé otɛ́ nɛn, ádɛgɔn phɛ́n pɔ́pɔ́ tí ádɛgɔn lɔ́lɔ́ nran háne npɔ. 17Lóyábhɛ brɛ, álepɛ lephan ábha hɔ́n divɛn pɔ́pɔ́ lɔ sahá ńpɛ́ nɔ́nɔ́ hrómɛn. Kasé otɛ́ nɛn, ńpɛ́ thruman nran, ńdɛ khúnbrɛn sakhwálé, ló ńpɛ́ lɔ lɔ. Lókhɛ́n ńdɛ pɔ́pɔ́, ohɔ́n sahá ńpɛ́ pɔ́-npɔ́ hrómɛn, lótɛ lókhúnbrɛn gɛ tré.

Jwifunɛ́n-óthe bɛn mi bhie, le bhie apa Jezwi ntráliɛ́ mɛ́n pɛ

(Ɔ́n wú Mák 5.21-43; Ɔ́n wú Lwik 8.40-56)

18Jezwi bhwe tɛɛ aya étɔ sé wo yé, lótɛ Jwifunɛ́n-óthe bɛn bha, ńmɔ ntráhɛ́nlé Jezwi hɛ́nmɛn, ló ántɔ sa:

– Thénthé tɛɛ nɔn mɛn bhi bhie khu, khɛ́n tɛmɛ ɛbha bhó mɔ́n tré mɛ́n tho, ló anmá mɛpɔ́!

19Jezwi chanfe, ló mɛ́n le mɛ́n yíchwɛmán ɔ́nmɔn wo gɛ nkɛ thá ɔ́nmɔn lo.

20Lótɛ bhie bɛn khɛ́n agɛ ńjɛchrélɔ́ elí npá áwɔ́-mɔn tigbali Jezwi, ló ńkhɔ mánji pa nkɛ ntráliɛ́ mɛ́n pɛ. 21Lósi akhɔ tɛ ɔn, bhie lókɔn étɔ mɛ́n hrómɛn mɛn sa: “Kasé mɛɛ́n gɛ npá mɛ́n ntráliɛ́ nwɛ́ pɛ, lótɛ mɛn phɔ bha jan.”

22Jezwi saya, ńwu bhie, ló ántɔ sa:

– Mɛn mi bhie, tɛmɛ ɛkhɔnmán phɔ! Lée hɛ mímíbhú tɛ hɛ phɔ jan.

Lóka yábhɛ brɛ tɛɛ nɔn, bhie lókɔn phɔ jan.

23Jezwi ka adi Jwifunɛ́n-óthe lókɔn hwan, ńwu sɛ́nmán abhra ya ebhá lo bhó lephan le ápasá akhwa élu nkhwɛ́, lótɛ 24ńtɔ sa:

– Ɔ́n chan krɛn thándi, lée bhiebhri le khu, ńná wrɛ́ pán anná.

Lótɛ wo éha nkɛ lia. 25Lóka wo tranman ápasá khwa ngbophro, Jezwi ka khúthé, ńhɔn bhiebhri mɔ́n pɛ, ló bhiebhri chanthé fe. 26Lóbhwe lókɔn lehɛ́n do lóne gotho khúnbrɛn.

Jezwi tɛ mɛphumán mɔn phɔ jan

27Jezwi chan lóne élo, lóka anhɛ́n, lónɔn mɛphumán mɔn bho mɛ́n mánji pɛ elúkhwɛ́ ɔ́nmɔn bhá, ló wo étɔ sa:

– Davi Mi, wu lo nfɛkhu kpɛ!

28Lóka Jezwi di bháthó, mɛphumán tigbɛli ló ńmi nkɔn sa:

– Wú hɔ́n ebhú salé mɛɛ́n gɛ tɛ́ yí yábhɛ lókɔn?

Wo kranman nkɛ sa: “Hwánthe, ɛ́gɛ tɛ́.”

29Lótɛ Jezwi pa wo mɛbhí pɛ, ló ńtɔ sa:

– Hɔ́n si ɔ́n khɔ bhu mímí, tɛmɛ lóyí okhɔ́ lóne tɛɛ tɛ́ sé hɔ́n!

30Wo mɛbhí phwan. Ló Jezwi tɔ bhwe mɛ́n khrákhrá mɛn se wo sa:

– Ɔ́n ne dɛn lephan brɛ oyé ábhwe lókɔn bhrɔ́ɔ́!

31Lótɛ khɛ́n wo lo tɔ Jezwi phɔ bhwe do lóne gotho khúnbrɛn.

Jezwi tɛ sɛ bɛn khɛ́n ńmɛ́n phusi phɔ jan

32Lóka wo fe wo élo, néphan hɔn sɛ bɛn bha se Jezwi. Sɛ lókɔn, ánnɛn gɛ tɔ bhwe, nánnánmi phromɛn abha mɛ́n phɔ hɛ́nthé. 33Jezwi ka atranman nánnánmi lókɔn, lópán mɛ́n phɔ jan, ló ántɔ bhwe. Etán ápasá khúnbrɛn hɛ́nmɛn, ló wo étɔ sa:

– Izraɛ khúbhɛ́, oka wu yí yábhɛ lókɔn bhrɔ́ɔ́!

34Khɛ́n Fariziɛnnɛ́n étɔ sa:

– Nánnánmi phromɛn phromɛn-óthe nɔn ase sɛ́npɛ́ ántranmán nánnánmi phromɛn phromɛnhɔn lókɔn!

Ápasá bhwe eká Jezwi phɔ

35Jezwi khɔ ákhúbhɛ́ khónkhó le ákhúbhɛ́ chɛ́-nchɛ́ khúnbrɛn ɔ́nmɔn hrómɛn. Ńnie yí wo hɛ́nbhúrɛ si, ńtɔ Ábhwe Bhwábhwá ali Yankan Bhringbi khúbhɛ́ bhwe, ńtɛ álɔ́ yábhɛ yábhɛ khúnbrɛn féne néphan phɔ, ló ńtɛ lɛnɛ-phɔmán phɔ jan. 36Lóka ńwu ápasá bhróbhrobhé aya elí gbre, khɛ́n áphɔ gbɔn, atɛsa ńgbankhran alepɛ wo bówo ɔn, lótɛ nkɔn bhwe ekɛ phɔ. 37Ló ńkránman mɛ́n yíchwɛmán sa:

– Ńyámí obhú thúbhɔ kábrɛ, khɛ́n júmánmán ábha khwɛ́n ló bháthó-ɛ nɔn ale ban. 38Tɛmɛ ɔ́n na nyámí-óthe sa anchɛ́ júmánmán bha khwɛ́n nyámí ló bháthó.

Markert nå:

MATHIE 9: ENT96

Marker

Del

Kopier