MATHIE 22
22
Ákhúchre nɛn khóo ohɛn, lóphɔ yandran obhu
(Ɔ́n wú Lwik 14.15-24)
1Lómánji Jezwi cu khɔ yandran búdúbúdú mɛn étɔ bhwe sé nkɔn, ló ántɔ sa:
2– Áyí Átho Bhringbi khúbhɛ́ khɔ nɔn ali: Bhringbi bɛn hɛn ákhúchre nɛn se mɛ́n bhi. 3Ló ńchɛ mɛ́n nɛnkhwɛ́nmán lo éche néphan khɛ́n ńdo lée obhá ákhúchre nɛn lókɔn mɛ́n, lókhɛ́n wo le dɛn bha. 4Ló ńcu chɛ nɛnkhwɛ́nmán nánkhɛ lo éche néphan khɛ́n ńdo. Lóka nɛnkhwɛ́nmán élo, ábhwe ńtɔ se nkɔn nɔn ali sa: “Ɔ́n kranmán néphan mɛn do lée: Thénthé mɛn hɛn nɛn phu, wo hɛ́nthé mɛn wɛn mɛn ndwa nsɛ le mɛn nbranmán áphɔ yɔn, mɛn cɔ áyí khúnbrɛn tɛ́tre phu. Tɛmɛ ɔ́n má ákhúchre nɛn mɛ́n!” 5Khɛ́n lóbhwe khúnbrɛn lókɔn le tɛ wo yíɛkɛ bhrɔ́ɔ́, ló wo bhosi lo wo etɛ́ wo yí akhu wo mwa: bɛn bhosi lo mɛ́n bithe, lójɔ bhosi lo mɛ́n mátra lí, 6lókhɛ́n dɔnbɛn khwa nɛnkhwɛ́nmán tho, wo tɛ nkɔn yí phromɛn phromɛn, ló wo wɛn nkɔn. 7Ńthɛ́nyan khóo bɛn wa ka bhringbi hromɛn, ló ńchɛ mɛ́n ngbumán lo wɛn khokhrohamán khúnbrɛn lókɔn, ló wo ha nkɔn khúbhɛ́ tɛn. 8Lómánji, ńkránman mɛ́n nɛnkhwɛ́nmán sa: “Wo cɔ ákhúchre nɛn khúnbrɛn tɛ́tre phu, lókhɛ́n néphan hɛ́nthé wo hɛn nɛn ɔn, wo le di lómɛ́n bhá. 9Lóhɛ́nthé tɛmɛ ɔ́n nó ásitó ngrɛmɛ́n ngrɛmɛ́n, ló néphan khúnbrɛn tɛɛ ɔ́n gɛ, ɔ́n do wo bhá nɛn mɛ́n.” 10Nɛnkhwɛ́nmán lɔ lo ási ngrɛmɛ́n ngrɛmɛ́n, ló néphan yábhɛ yábhɛ khúnbrɛn tɛɛ wo gɛ, néphan mímí o, néphan phromɛn phromɛn o, wo gba nkɔn bha, ló ákhúchre gɔn khúnbrɛn si nɛn cɛ́ɛ́.
11Lótɛ bhringbi ka khúthé ékpra néphan akhwa nɛn mɛ́n, ló ńwu lephan bɛn ale sɔ ákhúchre ntráliɛ́. 12Ló ńkránman nkɛ sa: “Mɛn jɔ, kalósi ɛkhɔ ka krɛn khɛ́n ɛle sɔ ákhúchre ntráliɛ́ e?” Lókhɛ́n lephan lókɔn le wú bhwetɔ́ si. 13Ló bhringbi kranman mɛ́n nɛnkhwɛ́nmán sa: “Ɔ́n gɛ mɛ́n nta le mɛ́n mɔ́n ɔ́nmɔn, ló ɔ́n hɔ́n-ɛn fɔ́nká ngbophro dubhlékhu hromɛn, lóne nɔn ánman thɔ́n hɛ́ndu ló ánman chrui nɔ́ thá.” 14Lóbhwe Jezwi tɔ lómánji nɔn ali sa, mímí nbrɛn, wo che néphan búdúbúdú-ɛ bha khɛ́n, néphan kpɛɛ́ nɔn wo san wo hromɛn.
La-npho khɛ́n osɔ́n sé athe khó
(Ɔ́n wú Mák 12.13-17; Ɔ́n wú Lwik 20.20-26)
15Ló Fariziɛnnɛ́n bhurɛhɛ́n, ló wo énɛn wo bhi Jezwi bhwe bɛn khɛ́n wo bhá khɔ́ lóphɔ tɔ bhwe tú nkɛ. 16Ló wo chɛ wo hromɛn yíchwɛmán le Erɔde gbe hrómɛn néphan fe lo ékranmán Jezwi sa:
– Yíliéwo, lo yɛn salé hɛ ɔn, ábhwe mímí nɔn ɛtɔ: ábhwe mímí hrómɛn, lósi khɛ́n Yankan énɛn salé lo khɔ́ bhá mɛpɔ́, lóyí cɛ́ɛ́ nɔn ɛ́lie. Ɛ́le só lephan hɛ́nphebhú, ló lephan mɛ́n lephan yábhɛ ńni, lóbhwe lɔ le tɛ́ hɛ yíɛkɛ. 17Ńthé nɛn ábhwe bɛn o, lo hɛ hɛ́nphe khɛ́n ɛbhú lóphɔ ɔn, ɛtɔ sé lo yé, ló ábhwe lókɔn nɔn ali salé: wú lo bidí se mɔ́nsi salé osɔ́n la-npho sé Rɔ́mɛn khúbhɛ́-óthe bhrɔ́khó, lée nka ále se mɔ́nsi?
18Lónian mɛn khɛ́n Jezwi yɛn nkɔn hɛ́nphe phromɛn phromɛn nkɔn ebhú, ló ńkránman nkɔn sa:
– Ńmɛ́n mɔ́nmɔnmán, bítɛ hɔ́n énɛn ɔ́n sú mɛn wú ɛ? 19Jɛtɛn khɛ́n obhó sɔ́n la-npho ɔn, ɔ́n mo bɛn bha sé mɛn wu a.
Wo bho fránkhi bɛn bha se. 20Lótɛ Jezwi bhi nkɔn sa:
– Abɛn lephan hɛ́nmɛn le ńhɛ́n ɔ́nmɔn nɔn atre fránkhi lókɔn tho ɛ?
21Ló wo nkɛé:
– Athe bhrɔ́khó ékɛ.
Ló Jezwi kranman nkɔn sa:
– Áyí khɛ́n ali athe bhrɔ́khó yí, tɛmɛ ɔ́n mó sé athe bhrɔ́khó, ló saji áyí khɛ́n ali Yankan yí, tɛmɛ ɔ́n mó sé Yankan.
22Lóka wo ye Jezwi bhwe lókɔn atɔ, etán wo hɛ́nmɛn kpɛ́ɛ́n, ló wo yɔ nkɛ kalé bhósi lo.
Ákhúnɔn mɛn chánfe phɔ bhwe néphan ébhi
(Ɔ́n wú Mák 12.18-27; Ɔ́n wú Lwik 20.27-40)
23Lócí brɛ lókɔn, Sadusenɛ́n mɔ́nbɛn bha gɛ Jezwi. (Wo lókɔn ɔn, wo nɔn wo nkɛé mɔngumán bha le chán khúnɔn mɛn fe.) Ló nɛn lósi wo khɔ 24bhi nkɛ bhwe o:
– Yíliéwo, Moyízi nkɛé: “Kasé lephan phɛn bhie, ńnɛn ho miɔ́ khɛ́n ńkhu, áyɔn salé mɛ́n hɔnsɛ́n ophɛ́n grwanya lókɔn, ló mɛ́n le nkɛ ɔ́nmɔn wo hó miɔ́ tré lephan akhu phɛ́nmɛ́n.” 25Khɛ́n lo hromɛn ɔn, hɔnsɛ́nhɔn ákhwache dɔnbɛn bháne. Sithwáwo phɛn bhie, mɛ́n le nkɛ ɔ́nmɔn wo le ho miɔ́ lɔ khɛ́n ńkhu, ló ńyɔ grwanya lókɔn ka mɛ́n hɔnsɛ́n lé. 26Hɔnsɛ́n adɔngba phɛn grwanya lókɔn, khɛ́n mɛ́n le nkɛ ɔ́nmɔn lɔ wo le ho miɔ́, hɔnsɛ́n asi bhwaliá, mɛ́n lɔ lóyábhɛ brɛ, kábrɛ kábrɛ ápi wo hɛ́n khwache. 27Wo khúnbrɛn ka wo khu phu, lómánji, bhie lɔ khu. 28Ńthé lóka mɔngumán bha chán khúnɔn mɛn fe, hɔnsɛ́nhɔn hɛ́n khwache lókɔn hromɛn ɔn, abɛn nɔn bhie lókɔn bha lí mɛ́n bhia ɛ? Khɔ́ wo khúnbrɛn wo phɛn nkɛ dilé!
29Ló Jezwi kranman nkɔn sa:
– Hɔ́n ékhrɛ phɔ. Lósi akhɔ tɛ ɔn, ɔ́n ne yɛ́n ábhwe Yankan hrɔ́ étɔ, saji ɔ́n ne yɛn Yankan sɛ́npɛ́. 30Tɛmɛ ɔ́n yɛ́n salé lóka mɔngumán bha chán khúnɔn mɛn fe, lóka lókɔn, abha lé pɛ sɛphɛ́n le bhiephɛ́n ɔ́nmɔn npɔhɔ́n, lókhɛ́n wo bhá tɛ́sa Yankan-mranchɛ́mán abha átho. 31Ńthé ló ali mɔngumán khɛ́n ábha chán khúnɔn mɛn fe ɔn, ábhwe Yankan tɔ se hɔ́n, wú ɔ́n ne kan lóhrɔ́ bhrɔ́ɔ́? Yankan nkɛé: 32“Mɛn nɔn mɛn ni Ábrahámɛn, Izakhi le Jakɔ́phu ɔ́nmɔn Yankan.” Ló Yankan cu tɔ sa, mɛn nɛn ni néphan akhu wo Yankan, lókhɛ́n mɛn ni néphan abha mɛpɔ́ wo Yankan.
33Ló ápasá khɛ́n agɛ Jezwi thá, ábhwe lókɔn ńtɔ, etán wo hɛ́nmɛn kpɛ́ɛ́n.
Ábidí khɛ́n akhɔnman brɛn ábidí khúnbrɛn
(Ɔ́n wú Mák 12.28-34; Ɔ́n wú Lwik 10.25-28)
34Lóka Fariziɛnnɛ́n ye salé Jezwi tɔ bhwe phu Sadusenɛ́n mɛ́n si, lótɛ wo bhurɛhɛ́n. 35Ló wo hromɛn, bidíyɛ́nwo bɛn énɛn atɔ bhwe tú nkɛ, ló ánmi nkɛ sa:
36– Yíliéwo, lóbidí bɛn nɔn abanbrɛn ábidí khúnbrɛn ɛ?
37Ló Jezwi kranman nkɛ sa:
– “Tɛmɛ ɛpɔ́ hɛ Hwánthe Yankan, hɛ thɛ́n khúnbrɛn mɛn, hɛ hɛ́nfan khúnbrɛn mɛn le hɛ nánnánmi khúnbrɛn ɔ́nmɔn mɛn.” 38Ábidí lókɔn, lónɔn ali ábidí khóo le ábidí abanbrɛn ábidí khúnbrɛn. 39Ńthé ábidí asi ńdɔnmɔn mɛn khɛ́n akhɔnman sa ásithwá ékɛ, lónɔn ali salé: “Ɛpɔ́ hɛ jɔ sa lósi ɛkhɔ pɔ hɛ bɛn nbrɛn.” 40Moyízi bidí le bhwetɔ́trémán bhwetɔ́ ɔn, ábidí mɔn lókɔn nɔn ahɔn lókhúnbrɛn pɛ.
Mesi le Davi ɔ́nmɔn phɔ bhwe
(Ɔ́n wú Mák 12.35-37; Ɔ́n wú Lwik 20.41-44)
41Lóka Fariziɛnnɛ́n bhúrɛhɛ́n, lónɔn Jezwi bhi wo bhwe lókɔn sa:
42– Bí hɛ́nphe hɔ́n ebhú Mesi phɔ ɛ? Abɛn mi le ɛ?
– Ló wo nkɛé Davi mi.
43Ló Jezwi kranman nkɔn sa:
– Ló kasé áli nɛn ɔn, kalósi akhɔ tɛ khɛ́n Davi ali lephan Nánnánmi Créncré bha phɔ, ácu éche nkɛ “Hwánthe e?” Átɛsalé Davi phrɛ tɔ sa:
44“Hwánthe kranman mɛn Hwánthe lée:
Bha chré mɛn liémɔn si,
kábrɛ kábrɛ, odi lóka mɛn khwɛ́n
hɛ mɛsamán há hɛ nta thé.”
45Ló kasé Davi éche nkɛ “Hwánthe” ɔn, kalósi Mesi bha cu khɔ́ lí Davi mi npɔ e?
46Ló wo hromɛn, álepɛ lephan brɛ khɛ́n acu wu bhwetɔ́ si npɔhɔ́n, lóhɛ́nthé achan lócí lókɔn élo, álepɛ lephan khɛ́n acu bhi nkɛ bhwe npɔhɔ́n.
Markert nå:
MATHIE 22: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
