MATHIE 21
21
Jezwi ka Jeruzalɛ́mɛn
(Ɔ́n wú Mák 11.1-11; Ɔ́n wú Lwik 19.28-40; Ɔ́n wú Jan 12.12-19)
1Lóka wo gbali Jeruzalɛ́mɛn phɔ phu, khɛ́n wo ebhá di ákhúbhɛ́ bɛn óche Bɛthifaje abha Olive-nyá bhóbhó tho, lótɛ Jezwi chɛ mɛ́n yíchwɛmán mɔn yí, ló ńkránman nkɔn sa:
2– Tɛmɛ ɔ́n nó ákhúbhɛ́ atre hɔ́n hɛ́nmɛn. Lóne ɔ́n ma gɛ frímú bhie mi bɛn wo di bhɛ́ le frímú mi abha mɛ́n phɔ. Ɔ́n hrwɛn wo, ló ɔ́n khwɛ́n wo bha sé mɛn. 3Kasé lephan bɛn ébhi hɔ́n bhwe, ɔ́n tɔlé: “Hwánthe nɔn énɛn.” Lótɛ wo bhá yɔ́ nkɔn khwá, ló ɔ́n ma khwɛ́n wo ɔ́nmɔn bhá.
4Lóyí lókɔn tɛ, ló bhwetɔ́trémán bhwe atɔ ásimɛ́n sa:
5“Tɛmɛ ɔ́n kranmán Ziɔn khúbhɛ́nɛ́n lée:
Wu a, hɛ Bhringbi ebhá hɛ yé,
ńpɛ thɛ́nnɔ́n, ńchre frímú bhie mi tho,
ńchre frímú mi tho.”
6Yíchwɛmán lo, ló Jezwi bhwe tɛ atɔ, wo tɛ lóyí. 7Wo khwɛn frímú mi bhie le frímú mi ɔ́nmɔn bha, wo khwɛn wo dɛgɔn fa nkɔn tho, ló Jezwi chre lótho. 8Néphan búdúbúdú ekhwɛ́n wo ntráliɛ́ fa sitó, ló fe lɔ éjan nbi fa. 9Néphan khɛ́n abha Jezwi hɛ́nmɛn, le wó wo bha Jezwi mánji, wo elúkhwɛ́ tɔ sa: “Ńguhá ogɛ Davi Mi! Lephan ebhá Hwánthe hɛ́n hrómɛn ɔn, tɛmɛ Yankan obhɔ́ nkɛ ndu. Ńguhá ogɛ Yankan abha átho!”
10Lóka Jezwi ka Jeruzalɛ́mɛn, néphan khúnbrɛn phɔ ehá.
– Ló wo ébhi sa, lólephan bɛn li lókɔn.
11Ló néphan étɔ sa, nkɛé bhwetɔ́tréwo Jezwi achan Nazarɛ́thi khúbhɛ́ abha Galile gotho nɔn.
Jezwi bha Yankan-khúthé
(Ɔ́n wú Mák 11.15-19; Ɔ́n wú Lwik 19.45-48; Ɔ́n wú Jan 2.13-22)
12Jezwi ka Yankan-khúthé, ló néphan khɛ́n abha lóne ephɛ́ jɛ, le wo khɛ́n wo ephɛ́ yí, ántranmán nkɔn khúnbrɛn. Néphan éjrɛn jɛtɛn le wo khɛ́n wo ephɛ́ la-ndrɛ́n lí, Jezwi khwɛn wo nyákhru le wo tábrɛ ɔ́nmɔn bhrwalé, 13ló ánkranmán nkɔn sa:
– Yankan hrɔ́ étɔlé: “Wo bhá che mɛn nkhú, yankanla-nkhú.” Lókhɛ́n hɔ́n-ɛ, ɔ́n hɔ́n tɛ sídomán nɔn!
14Mɛphumán le ntabhumán ɔ́nmɔn bha gɛ Jezwi Yankan-khúthé, ló ńtɛ nkɔn phɔ jan. 15Jezwi phɔgóyí khúnbrɛn lókɔn etɛ́, le ńmiɔ́ nkhwɛ́ élu khɛ́n wo étɔlé: “Ńguhá ogɛ Davi Mi ɔn, lóbhwe etɛ́ nphahamán-óthemánhɔn le bidíyɛ́nmán ɔ́nmɔn thɛ́nyan!” 16Ló wo ékranmán Jezwi sa:
– Wú ɛyé ábhwe wo étɔ?
– Ló Jezwi nkɛé, mɛn yé. Ló ábhwe khɛ́n Yankan hrɔ́ tɔlé: “Ńmiɔ́ chɛ́-nchɛ́ le wo pwɛ́-npwɛ nwɛ́ lɔ ebhó nguhá sé mɛn ɔn, wú ɔ́n ne kan lóbhwe lókɔn?”
17Jezwi yɔ wo khwa, ló ńchan ákhúbhɛ́ hrómɛn thandi no Betani, lóne nɔn ńna.
Jezwi ephiámɔ́n sé fígeyá bɛn
(Ɔ́n wú Mák 11.12-14,20-24)
18Lóka áyé lɛ, khɛ́n Jezwi saji ebhá ákhúbhɛ́ hrómɛn, lótɛ áko kɛ phɔ. 19Ló ásitó njɛ, ńwu fígeyá bɛn, ńtigbali lóphɔ, khɛ́n ńbi ánchán nɔn abha lótho, ló ńtɔ se fígeyá lókɔn sa:
– Ɛbha lé cu sómí brɛ npɔhɔ́n!
Lóyámɛ́n, fígeyá lókɔn wɛ.
20 Yíchwɛmán ka awu lóyí lókɔn, etán wo hɛ́nmɛn, ló wo ébhi Jezwi lée:
– Kalósi akhɔ tɛ khɛ́n fígeyá lókɔn wɛ yábhɛ nɛn e?
21Ló Jezwi kranman nkɔn sa:
– Mímí mɛɛ́n kranmán hɔ́n: kasé ɔ́n pɛ mímíbhú, khɛ́n hɔ́n thɛ́n lé sókhú, ɔ́n ma tɛ́ áyí yábhɛ lókɔn mɛn tɛ fígeyá, saji kasé hɔ́n ékranmán ábhóbhó lókɔn lée: “Chan krɛn fi lo tré gwe hromɛn,” lóyí bha tɛ́. 22Kasé hɔ́n ebhú mímí, áyí khúnbrɛn tɛɛ hɔ́n ébhi yankanla hromɛn ɔn, ɔ́n ma gɛ lóyí.
Jezwi sɛ́npɛ́ si achan
(Ɔ́n wú Mák 11.27-33; Ɔ́n wú Lwik 20.1-8)
23Jezwi ka Yankan-khúthé, ló ánnie yí. Lótɛ nphahamán-óthemánhɔn le Jwifunɛ́n hrómɛn mrɔ́khómán tigbɛli ló wo ébhi nkɛ sa:
– Lómɔ́nsi yábhɛ bɛn nɔn ɛgɛ khɛ́n ɛtɛ́ áyí khúnbrɛn lókɔn? Saji abɛn se hɛ lómɔ́nsi ɛ?
24Ló Jezwi kranman wo sa:
– Ńthé mɛn lɔ mɛn mán mi hɔ́n bhwe brɛ tɛɛ, kasé ɔ́n gɛ tɔ se mɛn ɔn, ló mɛn lɔ, mɛn mɔ́nsi mɛn gɛ khɛ́n mɛn tɛ́ áyí khúnbrɛn lókɔn ɔn, mán tɔ lóbhwe sé hɔ́n yé. 25Abɛn nɔn achɛ Jan bha ehá nduhɛ́n ɛ, wú Yankan lée nka néphanmiɔn?
Wo ya wo hromɛn tali bhwe ɔɔ, ló wo étɔ sa:
– Kasé lo étɔlé: “Yankan nɔn achɛ ńma,” lótɛ ánman kranmán lo lée: “Ló bí hɛ́nthé khɛ́n ɔ́n ne bhu nkɛ mímí?” 26Ńthé kasé lo étɔlé: “Néphanmiɔn nɔn achɛ ńma,” khɛ́n áyɔn salé lo só ápasá, lósi akhɔ tɛ ɔn, wo khúnbrɛn wo ebhú salé Jan-Nduhɛ́nháwo li bhwetɔ́tréwo.
27Lóhɛ́nthé wo kranman Jezwi sa:
– Lo le yɛn.
– Ló Jezwi tɔ sa, áyɔn! kasé hɔ́n nkɛé ɔ́n ne yɛn o, ló mɛn lɔ, mɛn nɛn yɛn lómɔ́nsi mɛn gɛ khɛ́n mɛn tɛ́ áyí khúnbrɛn lókɔn.
Ńmiɔ́ mɔn phɔ yandran
28Ló Jezwi tɔ sa:
– Nɛn bhwe bɛn o, ébí hɛ́nphe nɔn hɔ́n ebhú lóphɔ ɛ? Lephan bɛn pɛ miɔ́ mɔn. Ńkránman ló athwasi lée: “Ncɛ́n, tɛmɛ ɛló mɛn divɛn-nyá gɔn hromɛn lo lí júmán.” 29Lóyámɛ́n mɛ́n nkɛé: “Mɛn nɛn no,” lómánji ńcu mu hɛ́nphe, ló ńno divɛn-nyá gɔn hromɛn. 30Lómánji, ábhwe brɛ khɛ́n lephan lókɔn phrɛ kranman ásithwá yípɔ, lóbrɛ nɔn ńcu tɔ se mɛ́n bhi lójɔ. Ló yípɔ lókɔn dɛn sa: “Mɛn nthe mɛn ye,” lókhɛ́n ńnɛn dɛn no. 31Ńthé ńmiɔ́ mɔn lókɔn hromɛn ɔn, lóbɛn nɔn atɛ mɛ́n the thɛ́npɔ́ yí ɛ?
Ló wo tɔ sa:
– Sithwáwo nɔn atɛ mɛ́n the thɛ́npɔ́ yí.
Ló Jezwi tɔ sa:
– Mímí mɛɛ́n kranmán hɔ́n: la-nphodómán le gbakhreyá ɔ́nmɔn bha lili ká Yankan Bhringbi khúbhɛ́ khɛ́n ábha sé hɔ́n. 32Átɛsalé Jan-Nduhɛ́nháwo bha hɔ́n yé, ló ánnie hɔ́n ásitó apriman, khɛ́n ɔ́n ne bhui mímí; lókhɛ́n la-nphodómán le ńmie gbakhreyá ɔ́nmɔn-ɛ bhu nkɛ mímí. Lókhɛ́n lóyí khúnbrɛn lókɔn ka ɔ́n wu, lólɔ ɔ́n ne dɛn jrɛn hɔ́n yítɛ́ khɛ́n ɔ́n mui mímí.
Divɛn-nyá gɔn júmánmán bhúrɛmán phɔ yandran obhu
(Ɔ́n wú Mák 12.1-12; Ɔ́n wú Lwik 20.9-19)
33– Nɛn yandran bhwe bɛn npɔ o: Ábithe nthe bɛn ha divɛn-nyá, ńha nphá jekhali, ńjan nɔn ka lósi osrɛn divɛn mí, ló ńthan nkhú bɛn bha lóhrómɛn, lómánji ńhɔn divɛn-nyá gɔn lókɔn ha júmánmán mɔ́n mɛn, ló ńno hu. 34Lóka ádi divɛn mí bhú ka, ńchɛ mɛ́n nɛnkhwɛ́nmán lo divɛn-nyá gɔn júmánmán yé édo mɛ́n nyámí ékɛ bha se. 35Khɛ́n divɛn-nyá gɔn júmánmán khwa nɛnkhwɛ́nmán lókɔn tho, wo chrwa bɛn, wo wɛn lójɔ, ló bhwaliá hrómɛn ékɛ ɔn, wo ku mú dia nkɛ wɛn. 36Lóhɛ́nthé, divɛn-nyá gɔn nthe cu chɛ nɛnkhwɛ́nmán nánkhɛ lo, wo lókɔn ɔn, wo thubhɔ brɛn sithwámán; khɛ́n divɛn-nyá gɔn júmánmán tɛ nkɔn lóyí brɛ wo tɛ sithwámán. 37Ńthé lómánji, ńchɛ mɛ́n bhi lo, khɛ́n ńmu hɛ́nphe sa: “Mɛn bhi-ɛ, mɛ́n wo bhá pɛ ájí se.” 38Khɛ́n lóka divɛn-nyá gɔn júmánmán wu mɛ́n bhi ɔn, ló wo tɔ se wo bɛn nbrɛn sa: “Nɛn lephan ábha lí ja ácí abha hɛ́nmɛn ebhá. Ɔ́n ma owɛn ló odo mɛ́n ja lí!” 39Wo khwa nkɛ tho, wo ti nkɛ chan divɛn-nyá gɔn hromɛn thandi lo njɛ-áan, ló wo wɛn nkɛ.
40Ló Jezwi bhi wo sa, lóka divɛn-nyá gɔn nthe bha bhá ɔn, bí nɔn ánman tɛ́ divɛn-nyá gɔn júmánmán lókɔn ɛ?
41Ló wo tɔ sa:
– Anman nɛ́n wú divɛn-nyá gɔn júmánmán lókɔn nfɛkhu, ánman wɛ́n nkɔn khúnbrɛn, ló ánman hɔ́n divɛn-nyá gɔn há divɛn-nyá gɔn júmánmán nánkhɛ mɔ́n mɛn, wo khɛ́n divɛn mí bhú ka ábha bhá, nkɔn bha gɛ se mɛ́n nyámí ékɛ.
42Lómánji Jezwi kranman nkɔn sa:
– Ka ɔ́n kan ábhwe abha Yankan hrɔ́ hrómɛn khɛ́n étɔlé:
“Ábhú khɛ́n nkhúthánmán hɔn fɔnká bu
lónɔn ajrɛn ńkhú ngrɛmɛ́n bhú khóo.
Áyí Hwánthe tɛ ɔn, lónɔn ali lókɔn,
ló lo hɛ́nmɛn áli áphɔgóyí!”
43Lóhɛ́nthé nɔn Jezwi cu tɔ bhwe lókɔn npɔ sa, mímí mɛɛ́n kranmán hɔ́n: wo bhá thándo Yankan Bhringbi khúbhɛ́ yɛn hɔ́n mɔ́n mɛn, ló wo bhá hɔ́n há aféchwe nankhɛ mɔ́n mɛn, aféchwe khɛ́n ábha gɛ só lómí yábhɛ wo énɛn. [ 44Lephan khɛ́n ábha hálé ábhú lókɔn tho ɔn, ánman muri khúnkhu; lókhɛ́n lephan kasé ábhú lókɔn halé hɛ tho, ábha wɔyɔ́ hɛ.]
45Nphahamán-óthemánhɔn le Fariziɛnnɛ́n ɔ́nmɔn ka aye Jezwi yandran lókɔn abhu, wo yɛn salé wo bhwe nɔn Jezwi étɔ. 46Ló wo énɛn lósi wo khɔ́ hɔ́n nkɛ, khɛ́n wo esó ápasá, lósi akhɔ tɛ ɔn, ápasá khúnbrɛn ebhú salé Jezwi li bhwetɔ́tréwo bɛn.
Markert nå:
MATHIE 21: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
