MATHIE 16

Fariziɛnnɛ́n le Sadusenɛ́n ɔ́nmɔn énɛn hɛ́nmɛntányí bɛn awú

(Ɔ́n wú Mák 8.11-13; Ɔ́n wú Lwik 12.54-56)

1 Fariziɛnnɛ́n le Sadusenɛ́n ɔ́nmɔn tigbali Jezwi. Lósi wo bhá khɔ́ tɔ bhwe tú nkɛ, lóhɛ́nthé wo ébhi nkɛ sa nkɛ tɛ́ hɛ́nmɛntányí bɛn sé wo wú, ló wo khɔ́ lóphɔ yɛ́n salé nkɛ sɛ́npɛ́ chan Yankan yé. 2Lókhɛ́n Jezwi kranman nkɔn sa:

– Ńjuka, ɔ́n tɔlé: “Ácí ebhá yɔ́n, átɛsalé ácí tho tɛ nannan.” 3Ńjuju fítaan, lólɔ ɔ́n tɔlé: “Átho ndu ebhá khwálé, átɛsalé ácí tho tɛ gɔɔn.” Ɔ́n yɛn lósi okhɔ́ wɛsɛ́ átho, ló ɔ́n yɛ́n áyí dɔndɔn ebhá tɛ́, khɛ́n thénthé ka yí ebhá tɛ́ ékɛ-ɛ nɔn ɔ́n ne gɛ yɛ́n! 4Thénthé khúbhɛ́nɛ́n phromɛn phromɛn lókɔn khɛ́n ále lí mɛ́nbrɛ Yankan phɔ, énɛn hɛ́nmɛntányí bɛn awú. Khɛ́n obha le tɛ́ hɛ́nmɛntányí brɛ sé wo wú, kasé áleli Jonasi phɔ hɛnmɛntányí brɛ lókɔn khɛ́n wo wu.

Lómánji, Jezwi yɔ wo khwalé, ló ńno si nankhɛ.

Fariziɛnnɛ́n le Sadusenɛ́n ɔ́nmɔn mányan phɔ bhwetɔ́

(Ɔ́n wú Mák 8.14-21)

5Lóka yíchwɛmán eló dúji, kpánhɔn bhwe liali wo. 6Ló Jezwi kranman nkɔn sa:

– Ɔ́n há Fariziɛnnɛ́n le Sadusenɛ́n ɔ́nmɔn mányan phɔ mwanhɛ́n.

7Ló yíchwɛmán ya wo hromɛn étɔ sa:

– Kpánhɔn khɛ́n aliali lo ɔn, lóbhwe nɔn ántɔ.

8Jezwi yɛn nkɔn bhwe nkɔn étɔ, ló ánmi nkɔn sa:

– Bítɛ khɛ́n ɔ́n ya hɔ́n hrómɛn hɔ́n étɔlé: nkɛé kpánhɔn aliali lo hɛ́nthé? Bítɛ khɛ́n hɔ́n mímíbhú cha nɛn! 9Wú ɔ́n ne yɛ́n ábhwe lókɔn thé bhrɔ́ɔ́? Lóka mɛn muri kpánhɔn mwannán se ńsɛ akpɛn mwannán tha, lókhúnkhu akha, ńkrwɛbhɛ́ mɛ́n khɛ́n ɔ́n khwɛn ɔ́nmɔn lo ɔn, wú lóbhwe lé di hɔ́n mwanhɛ́n? 10Saji lóka mɛn muri kpánhɔn khwache se ńsɛ akpɛn bhwelí tha, lókhúnkhu akha, ńkrwɛbhɛ́ mɛ́n khɛ́n ɔ́n khwɛn ɔ́nmɔn lo ɔn, wú lóbhwe lé di hɔ́n mwanhɛ́n? 11Kalósi akhɔ tɛ khɛ́n ɔ́n ne gɛ yɛ́n salé léli kpánhɔn bhwe nɔn mɛɛ́n tɔ e? Tɛmɛ ɔ́n há Fariziɛnnɛ́n le Sadusenɛ́n ɔ́nmɔn mányan phɔ mwanhɛ́n.

12Lótɛ yíchwɛmán yɛn salé léli mányan ohá kpánhɔn hromɛn nɔn Jezwi étɔlé wo hámwanhɛ́n lóphɔ, khɛ́n Fariziɛnnɛ́n le Sadusenɛ́n ɔ́nmɔn yí élie ɔn, lóbhwe nɔn ántɔ.

Piɛ étɔlé Jezwi li Mesi

(Ɔ́n wú Mák 8.27-30; Ɔ́n wú Lwik 9.18-21)

13Lóka Jezwi di Sezare Filíphu gotho, lótɛ ánmi mɛ́n yíchwɛmán salé:

– Bí bhwe nɔn néphan étɔ Lephan Mi phɔ ɛ?

14Ló wo nkɛé:

– Néphan fe étɔlé hɛ nɔn ɛli Jan-Nduhɛ́nháwo, fe nkɛé hɛ nɔn ɛli Eli, ló dɔnbɛn nkɛé hɛ nɔn ɛli Jeremi, saji ɛ́gɛ lí bhwetɔ́tréwo nankhɛ bɛn lɔ.

15– Ló Jezwi bhi wo sa, ńthé hɔ́n-ɛ, bí lephan nɔn hɔ́n nkɛé mɛn ni ɛ?

16Ló Simɔn Piɛ tɔ sa:

– Hɛ nɔn ɛli Mesi, Yankan abha mɛpɔ́ mɛ́n Bhi.

17Ló Jezwi krɛnmɛn sa:

– Simɔn Jan mi, áphɔkhwálé gɛ hɛ, léli lephanmi nɔn achɛ hɛ yɛn ábhwe lókɔn, khɛ́n mɛn Nthe abha tho nɔn achɛ hɛ yɛn. 18Ńthé mɛn-ɛ mɛɛ́n kranmán hɛ sa: Ɛli Piɛ, ló ábhú lókɔn tho nɔn mɛn mán thán mɛn Yankan-nkhú tré. Ló ákhú bhwá nbrɛn lɔ bha lé pɛ sɛ́npɛ́ mɛ́n tho. 19Mɛn mán khwɛ́n Átho Bhringbi khúbhɛ́ sánfɛ há hɛ mɔ́n mɛn: ló áyí tɛɛ ɛ́bha díbi áthéji krɛn, lóyí lókɔn átho lɔ wo bhá dí bi, saji áyí tɛɛ ɛ́bha sé mɔ́nsi áthéji krɛn, lóyí lókɔn átho lɔ wo bhá sé mɔ́nsi.

20Ló Jezwi ha mɛ́n yíchwɛmán sa nkɔn le chɛ́ lephan brɛ oyɛ́n salé mɛ́n ni Mesi.

Jezwi étɔ mɛ́n khú le mɛ́n khúnɔn mɛn chánfe ɔ́nmɔn bhwe

(Ɔ́n wú Mák 8.31—9.1; Ɔ́n wú Lwik 9.22-27)

21Thénthé achan lóka lókɔn élo nɔn Jezwi étɔ bhwe gbée sé mɛ́n yíchwɛmán oyé, ló ántɔ sa:

– Áyɔn salé mɛn nó Jeruzalɛ́mɛn, ló mɛn ní gbre mrɔ́khómán, nphahamán-óthemánhɔn le bidíyɛ́nmán ɔ́nmɔn mɔ́n mɛn. Wo bhá wɛ́n mɛn, ló ńcíbhí bhwaliá cí, mɛn man chán khúnɔn mɛn fe.

22Piɛ do nkɛ saya njɛ, ánha nkɛ, ló ántɔ sa:

– Hwánthe, tɛmɛ Yankan obo hɛ! Ló ábhwe lókɔn ole ká hɛ tho bhrɔ́ɔ́!

23Lókhɛ́n Jezwi saya ló ńkránman Piɛ sa:

– Abhɔsɛ́mɔ́n, chan mɛn phɔ féne! Ɛ́nɛn ɛkhrɛ mɛn nta, hɛ le Yankan ɔ́nmɔn hɛ́nphebhú le li brɛ, khɛ́n ɛbhú hɛ́nphe sa néphanmiɔn a.

24Ló Jezwi kranman mɛ́n yíchwɛmán sa:

– Lephan kasé ɛ́nɛn ɛbha gɛ mɛn, ɛlé granmán hɛ bɛn nbrɛn, khɛ́n tɛmɛ ɛhɔ́n hɛ yábhletre, ló ɛgɛ mɛn thá. 25Átɛsalé lephan khɛ́n énɛn abo mɛ́n mɛpɔ́bhá, mɛ́n mɛpɔ́bhá bha liá, ló lephan khɛ́n mɛn hɛ́nthé ánnɛn anyɔ́ mɛ́n mɛpɔ́bhá ka oliá, mɛ́n lókɔn ánman gɛ mɛ́n mɛpɔ́bhá. 26Ló lephan, kasé ɛgɛ áthéji yí khúnbrɛn phu, lókhɛ́n hɛ mɛpɔ́bhá lia ɔn, bí nɔn ɛ́bha gɛ lóhrómɛn ɛ? Wú ápɛ yíbɛn lephan gɛ bhó swa mɛ́n mɛpɔ́bhá? 27Khankhan mímí, Lephan Mi le mɛ́n Yankan-mranchɛ́mán ɔ́nmɔn bha khɔ́ mɛ́n The nguhá hrómɛn má, ló lephan brɛ hɛ yí si ɛkhɔ tɛ ɔn, ánman khɔ́ lóne sɔ́n hɛ pɛn. 28Ló Jezwi étɔ sa, mímí mɛɛ́n kranmán hɔ́n: néphan lókɔn khɛ́n aya krɛn, wo hromɛn néphan fe bha le khú, lókhɛ́n wo bhá wú Lephan Mi bha bhá, ló ánman ní bhringbi.

Markert nå:

MATHIE 16: ENT96

Marker

Del

Kopier