MATHIE 15
15
Áyí lo jisɛmánhɔn lie
(Ɔ́n wú Mák 7.1-13)
1 Fariziɛnnɛ́n le bidíyɛ́nmán ɔ́nmɔn chan Jeruzalɛ́mɛn bha gɛ Jezwi, ló wo ébhi nkɛ sa:
2– Bítɛ khɛ́n hɛ yíchwɛmán lé dɛn ji lo jisɛmánhɔn yí alie ɛ? Átɛsalé wo le chó mɔ́n khɛ́n wo lí nɛn, sa ló obháne otɛ́ lo yankanla yítɛ́ hrómɛn a.
3Lótɛ Jezwi kranman nkɔn sa:
– Ńthé hɔ́n-ɛ, bítɛ khɛ́n ɔ́n ne dɛn ji Yankan bidí, khɛ́n ɔ́n ya hɔ́n nbrɛn yí hɔ́n élie tho tɛ́ hɔ́n thɛ́n yí apɔ ɛ? 4Khankhan mímí, Yankan tɔlé: “Ɛji hɛ the le hɛ man ɔ́nmɔn,” ló saji “Lephan kasé ɛtɔ bhwe phromɛn se khɔ hɛ the o, khɔ hɛ man o, hɛ lephan lókɔn áyɔn sa owɛ́n hɛ.” 5Khɛ́n hɔ́n-ɛ, hɔ́n yí hɔ́n élie nɔn ali salé, kasé lephan bɛn étɔ sé khɔ mɛ́n the o, khɔ mɛ́n man o: “Lée mɛn yí mɛɛ́n gɛ mó dɔnmán hɛ mɔ́n áli yíbɛn obho ha npha se Yankan,” 6lephan lókɔn, ánnɛn cu gɛ dɔnmán khɔ mɛ́n the o, khɔ mɛ́n man o, mɔ́n npɔhɔ́n. Lóyábhɛ nɛn, hɔ́n bɛn nbrɛn yí hɔ́n élie ɔn, élɔ Yankan bhwetɔ́! 7Ńmɛ́n mɔ́nmɔnmán! Ezayi bhwe li hɛ́n, lóka ńkhɔ Yankan hɛ́n hrómɛn ántɔ hɔ́n phɔ bhwe, khɛ́n ántɔlé:
8“Yankan nkɛé, aféchwe lókɔn bho bhwetɔ́ wrɛ́ mɛn pán
éha mɛn ngu, khɛ́n mɛ́n thɛ́n-ɛ le bha mɛn tho.
9Wo lá wo éla mɛn ɔn áli yí wrɛ́.
Átɛsalé néphanmiɔn yí élie nɔn wo hɔn pɛ,
ló wo bho lóyílie lókɔn tɛsa mɛn Yankan bidí.”
Áyí áha lephan nkrɔ
(Ɔ́n wú Mák 7.14-23)
10Lómánji Jezwi che ápasá bhurɛhɛ́n, ló ńkránman nkɔn sa:
– Tɛmɛ ɔ́ndi njɛlé, ló ɔ́n yɛ́n salé: 11Léli áyí áká lephan míthé nɔn áha nkɛ nkrɔ, khɛ́n áyí áchán lephan míthé thándi nɔn áha lephan nkrɔ.
12Lótɛ yíchwɛmán tigbali Jezwi, ló wo ékranmán nkɛ sa:
– Hɛ bhwe lókɔn ɛtɔ ɔn, wú ɛyɛn salé élri Fariziɛnnɛ́n thɛ́n gbre?
13Ló Jezwi tɔ sa:
– Áyá khúnbrɛn khɛ́n mɛn Nthe abha tho le ha ɔn, óbha fi ha. 14Hɔ́n yɔ wo khwa a: wo tɛsa néphan éyalí mɛphumán! Ɔ́n wu a, kasé mɛphuwo bɛn éyalí mɛ́n jɔ mɛphuwo ɔn, wo mɔ́nmɔn wo bhá hálé ńnɔn hromɛn.
15Lótɛ Piɛ bho bhwetɔ́ ló ńkránman nkɛ sa:
– Tɛmɛ ɛlɛ yandran lókɔn thé sé lo yé.
16Ló Jezwi tɔ sa:
– Wú hɔ́n lɔ ɔ́n ka ye ábhwe lókɔn thé? 17Wú ɔ́n ne yɛn salé áyí khɛ́n aka lephan míthé, áká mɛ́n lábhɛ hromɛn, khɛ́n lómánji ácu chán mɛ́n phɔ thándi? 18Khɛ́n áyí áchán lephan míthé thándi ɔn, áchán mɛ́n thɛ́n hrómɛn, lónɔn áha nkɛ nkrɔ. 19Átɛsalé hɛ́nphebhú phromɛn phromɛn khúnbrɛn khɛ́n áchán mɛ́n thɛ́n hrómɛn thándi ɔn, lónɔn ágɛ chɛ anwɛ́n lephan, anmɔ́ phɛ́n, anní gbakhre, ánsi sído, annítan, ló ántɔ mɛ́n jɔn bhwe phromɛn phromɛn. 20Áyí áha lephan nkrɔ nɔn ali áyí khúnbrɛn lókɔn! Khɛ́n yankanla yítɛ́ hrómɛn, kasé ɛle cho mɔ́n khɛ́n ɛlí nɛn, léli lónɔn áha lephan nkrɔ.
Thekhubhie bɛn bhu Jezwi mímí
(Ɔ́n wú Mák 7.24-30)
21Ńthé Jezwi chan lóne féne, ló ńno ágotho agbali Thire le Sidɔn ɔ́nmɔn khúbhɛ́. 22Kana khúbhɛ́ bhie bɛn abha lóne gotho bha gɛ Jezwi, ló annúkhwɛ́ ntɔ sa:
– Hwánthe, Davi Mi, wu mɛn nfɛkhu kpɛ! Nánnánmi phromɛn bɛn bha mɛn bhi bhie phɔ élri nkɛ gbre kpɛ́ɛ́n!
23Khɛ́n Jezwi le tɔ bhwe brɛ kɛlé. Mɛ́n yíchwɛmán tigbɛli ló wo ékranmán nkɛ sa:
– Hwánthe, thu bhie lókɔn thá a! Wu a, ńma lo mánji tɛɛ ánnu nkhwɛ́, ló mɛ́n mɛ́n le thú bhrɔ́ɔ́.
24Khɛ́n Jezwi tɔ sa:
– Mɛn ɔn, Izraɛ khúbhɛ́nɛ́n gbankhran khɛ́n eliá hɛ́nthé nɔn wo chɛ mɛn ma.
25Khɛ́n bhie lókɔn bha bhɔlé Jezwi hɛ́nmɛn ló ánkranmán nkɛ sa:
– Yíliéwo, dɔnman mɛn mɔ́n kpɛ!
26Ló Jezwi kranman nkɛ sa:
– Ńmiɔ́ chɛ́-nchɛ́ nɛn khɛ́n ebhá lí, áleyɔn salé okhwɛ́n kúkhwá ńgbamán miɔn lé.
27– Ló bhie lókɔn tɔ sa, Yíliéwo, ábhwe mímí nɔn ɛtɔ, lótɛ khɛ́n ńgbamán miɔn abha tábrɛ thé, ńnɛn nbie khɛ́n echán wo hwánthemánhɔn tábrɛ tho fɔ́khwá thé ɔn, lólɔ wo lí.
28Lótɛ Jezwi kranman nkɛ sa:
– Yípɔman! hɛ mímíbhú thúbhɔ kábrɛ! Lóhɛ́nthé hɛ yí ɛ́nɛn, áyɔn sa otɛ́ sé hɛ.
Lóka yábhɛ brɛ nɔn mɛ́n bhi bhie phɔ jan.
Jezwi tɛ lɔ́phɔmán búdúbúdú phɔ jan
29Lómánji, Jezwi chan lóne fe, ló ńno Galile duphé mɛ́n. Ńpha no ábhóbhó bɛn tho, ló ńchethé. 30Néphan búdúbúdú bha gɛ, ló wo sranman lɔ́phɔmán ali: ntabhumán, mɛphumán, ńnɛ́nɛ-phɔmán, wo khɛ́n wo lé gɛ tɔ bhwe le lɔ́phɔmán nánkhɛ búdúbúdú. Wo khwɛn nkɔn bha se Jezwi, ló ńtɛ nkɔn phɔ jan. 31Lóka wo wu sa njɛtɔmán étɔ bhwe, lɛnɛ-phɔmán phɔ jan, ntabhumán énɛnsi, khɛ́n mɛphumán lɔ ewú yí ɔn, lótɛ lóyí khúnbrɛn lókɔn etán néphan hɛ́nmɛn, ló wo élri Izraɛ khúbhɛ́nɛ́n Yankan hwa.
Jezwi se ńsɛ akpɛn bhwelí nɛn li
(Ɔ́n wú Mák 8.1-10)
32Lómánji, Jezwi che mɛ́n yíchwɛmán ló ńtɔ sa:
– Néphan lókɔn bhwe eká mɛn phɔ kpɛ́ɛ́n, átɛsalé ńcíbhí bhwaliá nbrɛn-áan nɔn wo chan bha mɛn phɔ, lókhɛ́n álepɛ yíɛkɛ bhrií wo lí. Khɛ́n mɛn nɛn pɔ salé mɛn yɔ́ wo khwalé lo áko mɛn, lósi akhɔ tɛ ɔn, wo sáji hromɛn, áphɔ bha bhé wo ásitó, ló wo bhá hálé.
33Ló yíchwɛmán bhi nkɛ sa:
– Ńthé ánánkhuthé wrɛ́ khrákhrá yábhɛ lókɔn lo bha ɔn, bánne nɔn óbha gɛ nɛn, khɛ́n ábha pí ápasá gbɛngbɛn lókɔn ɛ?
34Ló Jezwi bhi wo sa:
– Kpánhɔn bhɔbhé nɔn ɔ́n pɛ ɛ?
Ló wo nkɛé:
– Lo pɛ kpánhɔn ákhwache le ácɔn chɛ́-nchɛ́ mɔ́nbɛn.
35Ló Jezwi chɛ ápasá lée, wo chéthé yítathé. 36Lómánji, ńkhwɛn kpánhɔn khwache lókɔn le ácɔn ɔ́nmɔn, ńna Yankan nansi, ńthwɛ, ló ńkhwɛn se mɛ́n yíchwɛmán sa wo khwɛ́n lwa ápasá, ló yíchwɛmán khwɛn lwa wo. 37Wo khúnbrɛn wo tha ási wo mɛn kpɛ́ɛ́n. Ńthé lókhúnkhu akha ɔn, yíchwɛmán khwɛn si ńkrwɛbhɛ́ khwache, ló wo khwɛn ɔ́nmɔn lo. 38Néphan khúnbrɛn khɛ́n atha kpánhɔn lókɔn, wo li ńsɛ akpɛn bhwelí, khɛ́n wo le kan ńmie le ńmiɔ́ chɛ́-nchɛ́ ɔ́nmɔn ha wo hromɛn. 39Lómánji, lóka Jezwi se ápasá mɔ́nsi lo, ńka hran mɛn, ló ńno Magadan gotho.
Markert nå:
MATHIE 15: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
