MATHIE 14
14
Jan-Nduhɛ́nháwo khú phɔ bhwe
(Ɔ́n wú Mák 6.14-29; Ɔ́n wú Lwik 9.7-9)
1Lóka yábhɛ lókɔn, Erɔde li guvɛnɛ bha Galile gotho. Ńye Jezwi hɛ́n si akhɔ elé, 2ló ńkránman mɛ́n nɛnkhwɛ́nmán sa:
– Nkɛé Jan-Nduhɛ́nháwo nɔn: ńchan khúnɔn mɛn fe! Lóhɛ́nthé nɔn achɛ ńpɛ sɛ́npɛ́ antɛ́ hɛ́nmɛntányí khúnbrɛn lókɔn.
3Khankhan mímí, Erɔde chɛ wo hɔn Jan-Nduhɛ́nháwo, wo gɛ nkɛ mɛ́, ló wo ka nkɛ khúthé. Erɔde yí lókɔn atɛ ɔn, Herodiade ali mɛ́n hɔnsɛ́n Filíphu mia khɛ́n ńmo phɛn hɛ́nthé. 4Jan-Nduhɛ́nháwo ékranman Erɔde lée:
– Erɔde, ɛle gɛ mɔ́nsi ɛphɛ́n Herodiade a!
5Ló Erɔde énɛn lósi ankhɔ́ wɛ́n Jan-Nduhɛ́nháwo, khɛ́n ansó Jwifunɛ́n pasá, lósi akhɔ tɛ ɔn, wo khúnbrɛn wo bhu salé Jan-Nduhɛ́nháwo li bhwetɔ́tréwo bɛn.
6Erɔde cí wo ho ɔn, cíbɛn lópá mɛ́n si, anní lóphɔ fɛ́thi, ló néphan khɛ́n ńche ma mɛ́n fɛ́thi gɔn, Herodiade mi bhie ágbe bhi wo hɛ́nmɛn. Bhiebhri bhi lókɔn agbe, áníman Erɔde kpɛ́ɛ́n, 7ló Erɔde bhɔli mɛ́n phɔ tɔ sa, lóyí khúnbrɛn tɛɛ bhiebhri bha bhi ɔn, mɛ́n man sé nkɛ. 8Bhiebhri le mɛ́n man ɔ́nmɔn lo srwe, ló ńma ánkranmán Erɔde lée:
– Ɛhɔ́n Jan-Nduhɛ́nháwo hɛ́nphe ká agbán phrá bɛn mɛn bha sé mɛn krɛn!
9Ábhwe lókɔn chɛ Erɔde phɔ khu, lókhɛ́n néphan ńche ma mɛ́n fɛ́thi gɔn, ábhwe ńmɔ́li phɔ tɔ nkɔn hɛ́nmɛn hɛ́nthé, ńdɛn salé mɛ́n man sé nkɛ áyí nkɛ ébhi. 10Ńchɛ lephan bɛn lo khúthékámán-nkhú hrómɛn lo jan Jan-Nduhɛ́nháwo hɛ́nphe 11ka agbán phrá mɛn bha se bhiebhri, ló bhiebhri lɔ hɔn lo se mɛ́n man. 12Ló Jan-Nduhɛ́nháwo yíchwɛmán bha hɔn nkɛ nánmí lo bho; ló áyí khúnbrɛn lókɔn atɛ, wo lo lɛ lómɛ́n se Jezwi ye.
Jezwi se ńsɛ akpɛn mwannán nɛn li
(Ɔ́n wú Mák 6.30-44; Ɔ́n wú Lwik 9.10-17; Ɔ́n wú Jan 6.1-14)
13Lóka Jezwi ye ábhwe lókɔn, mɛ́n míbrɛ ńmo hran bɛn, ló ńchan lóne no ásibɛn ajanbu ká njɛ. Ló ápasá ka aye lóbhwe, wo chan ákhúbhɛ́hɔn hromɛn thandi, ló wo nɛnsi khɔ dumɛ́n wo élo gɛ Jezwi. 14Lóka Jezwi chan hran mɛn thandi, ńwu ápasá bhróbhrobhé, nkɔn phɔ etɛ́ nfɛkhu, ló ńtɛ lɔ́phɔmán abha nkɔn hromɛn phɔ jan.
15Lóka ácí égu, yíchwɛmán tigbali Jezwi, ló wo ékranmán nkɛ sa:
– Ácí lɔ gu, ńthé krɛ́nne lɔ li ásibɛn ajanbu ká njɛ. Lóhɛ́nthé tɛmɛ ɛchɛ́ ápasá lókɔn oló ákhúbhɛ́hɔn hromɛn lo nɛn nɛn phɛ́ lí.
16Ló Jezwi kranman wo sa:
– Áleyɔn sa wo lo yábhɛ nɛn; tɛmɛ hɔ́n nbrɛn ɔ́n sé wo nɛn wo lí!
17Lókhɛ́n yíchwɛmán kránman Jezwi salé:
– Kpánhɔn mwannán le ácɔn mɔn tɛɛ nɔn abháne o.
18– Ló ńkránman nkɔn lée nkɔn khwɛ́n bha se.
19Ló ńchɛ ápasá lée ochéthé ńbie chɛ́-nchɛ́ tho; ńkhwɛn kpánhɔn mwannán le ácɔn mɔn, ńgbɛnɛn wu tho, ló ńna Yankan nansi. Ńthé ńthwɛ kpánhɔn se mɛ́n yíchwɛmán, ló wo khwɛn lwa ápasá. 20Wo khúnbrɛn wo tha, ló ási wo mɛn. Lótháthá akha, yíchwɛmán khwɛn, ási ńkrwɛbhɛ́ áwɔ́-mɔn. 21Néphan atha kpánhɔn lókɔn wo li ńsɛ akpɛn mwannán, khɛ́n wo le kan ńmie le ńmiɔ́ chɛ́-nchɛ́ ɔ́nmɔn ha wo hromɛn.
Jezwi énɛnsi khɔ́ duphé tho
(Ɔ́n wú Mák 6.45-52; Ɔ́n wú Jan 6.15-21)
22Lóyámɛ́n, Jezwi si mɛ́n yíchwɛmán hɛn ahran mɛn ébhuriká dúji, lóka lókɔn nɔn mɛ́n nbrɛn ansé ápasá mɔ́nsi olo. 23Lóka ńse nkɔn mɔ́nsi nkɔn lo, ńpha no ábhóbhó bɛn tho ánna Yankan. Lóka ácí gu, mɛ́n míbrɛ ńma lóne; 24lóka lókɔn, yíchwɛmán hran lo ádi hɛ́nmɛn-áan, ńdu ehɛ́n lóhrómɛn, átɛsa wo sa hɛ́nmɛn nrwɛn áphɛ́phrɛ mɛ si. 25Lóka ácí gu mɔn, Jezwi nɛnsi khɔ ndu tho élo gɛ mɛ́n yíchwɛmán. 26Khɛ́n lóka wo wu nkɛ nɛnsi khɔ ndu tho nkɛ bhá, ákhwíthá ka wo hromɛn, ló wo étɔ sa:
– Nɔ́nkrwan bɛn nɔn!
Ló ákhwíthá mɛn, wo elúkhwɛ́. 27Lóyámɛ́n, Jezwi kranman nkɔn sa:
– Tɛmɛ ɔ́n khɔnmán phɔ, mɛn nɔn, ɔ́n ne sókhú!
28Lótɛ Piɛ bho bhwetɔ́, ló ánkranmán nkɛ sa:
– Hwánthe, kasé áli hɛ nbrɛn, tɛmɛ ɛsé mɛn mɔ́nsi ló mɛn nɛnsi khɔ́ ndu tho man gɛ hɛ.
29– Ló Jezwi krɛnmɛn sa, bha a!
Piɛ chan hran mɛn thandi, ló ńnɛ́nsi khɔ ndu tho ánno gɛ Jezwi. 30Lókhɛ́n lóka ńwu áphɛ́phrɛ si akhɔ elé kránmɛn, ansókhú, ló lóka ansɔ́n nó thé, lótɛ annúkhwɛ́ sa:
– Hwánthe, do mɛn ka!
31Lóyámɛ́n Jezwi tia mɔ́n hɔ́n nkɛ, ló ńkránman nkɛ sa:
– Bítɛ khɛ́n hɛ mímíbhú cha nɛn! Bítɛ khɛ́n ɛsokhú ɛ?
32Wo mɔ́nmɔn wo hɛn ahran mɛn, lótɛ áphɛ́phrɛ khwalé. 33Ló yíchwɛmán khɛ́n abha hran mɛn, wo bhɔ ntráhɛ́nlé Jezwi hɛ́nmɛn, ló wo étɔ sa:
– Mímí nbrɛn ɛli Yankan Mi!
Jezwi tɛ lɔ́phɔmán phɔ jan Jenezarɛ́thi gotho
(Ɔ́n wú Mák 6.53-56)
34Wo bhuri duphé, ló wo dilé Jenezarɛ́thi gotho. 35Lóne gothonɛ́n yɛn Jezwi, ló nkɛ bhá nkɛ bha, wo tɔ lóbhwe pi si khúnbrɛn, ló wo khwɛn lɔ́phɔmán khúnbrɛn bha se. 36Wo la nkɛ sa nkɛ sé lɔ́phɔmán mɔ́nsi opá nkɛ ntráliɛ́ mɛ́n nwɛ́ pɛ; ló wo khúnbrɛn tɛɛ wo pa pɛ ɔn, wo phɔ jan.
Markert nå:
MATHIE 14: ENT96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Ebrié New Testament © Bible Society of Côte D'Ivoire, 1996.
