Maariko 7
7
Yëësu aranga amëëghyö agha Abhafarisaayo
(Mataayo 15:1-9)
1-4Sinsikö siyö Abhafarisaayo bheena abhëëghya abhandë, hamwë na Abhayahudi bhonswe igho, bhaarenga na eteemo nyabhorebhe iya ukwisaabha amabhoko, hano bhangʼata okorya. Ni-igho bhaaghootanga seteemo isya abhakörö abhaabho. Hano bhaarwanga mo-moteera, mbaisaabhanga tangata kya bhono ikutunwa, bhoono bhamanya okorya. Ghwiki mbaaghotanga seteemo isyabho isyëndë nsharu igho isya kare, isya ukwöghya ebhekombe, ebhesorra na ëbhëntö ibhyëndë.
Urusikö urwöndë Abhafarisaayo abhandë bheena abhëëghya nyabhorebhe abha amaraghërryö agha Mosa, okanyoora bhaishirë ukurwa mu-mughi ughwa Yërusarëëmu, bhakaikomania ku-Yëësu. Bhakamaaha abheegha nyabhorebhe abha Yëësu, bhararya ibhyakorya igho bhataisaabhirrë kya bhono amaraghërryö aghaabho ghaatunanga.
5Mbe, Abhafarisaayo na abhëëghya abha amaraghërryö agha Mosa, bhakabhöörya Yëësu igha, “N-kwakë abheegha abhaaho bhatakoghoota amaraghërryö agha abhakörö abhëëtö? Ko bhoora nkorya bharë ibhyakorya na amabhoko ghano ghatasaabhuurrwë?”
6Yëësu akabhahonshora igha, “Bhëënyu m-baihunaania mörë. Amangʼana ghano Waryobha yaaghambirë okohetera kö-mörööti Isaaya, m-maheene igha,
‘Abhantö bhano nu-munywa ughwene igho bhakonsookera,
kasi senkoro isyabho, hare sërë na öni.
7Okosaasaama ukwabho kono bhakonsaasaama, n-kwa bhosa,
ko bhoora na-maraghërryö ghano ghaasemorwa na abhantö,
ngo bhakwëghya, bharakanya igha ngo aghaane.’#7:6-7 Maaha mo-ketabho ikya Isaaya 29:13.”
8Yëësu akaghëndërrya okobhatëëbhya igha, “Bhëënyu nkutigha mörë amaraghërryö agha Waryobha, moraghoota seteemo isya abhantö.
9“Nkwanga mörë këngʼaini amaraghërryö agha Waryobha, okore moghoote seteemo isyënyu! 10Ko ökörëngya ni-igha, Waryobha yaaraghërrëëyi okohetera ko-Mosa#7:10a Mosa. Maaha mo-faharaasa. igha, ‘Osooke suwëënyu na nyakuwëënyu.’#7:10b Maaha mo-ketabho ikya Ukurishoka 20:12; Eheetoko iya Etoraati 5:16. Ghwiki, akaghamba igha, ‘Ömöntö wowonswe igho ono akotoka suwaabho, handë nyakuwaabho, ni-igha aitwe.’#7:10c Maaha mo-ketabho ikya Ukurishoka 21:17; Amangʼana agha Abharaawi 20:9. 11Kasi bhëënyu, nkwëghya mörë igha, m-buuya ömöntö ökötëëbhya suwaabho handë nyakuwaabho igha, ‘Ëbhëntö bheno nkaakohaayë bhëkötöörri, n-Koribhani bhërë,’ ensonga iya engʼana iyö ni-igha, m-bya kimwenso ku-Waryobha. 12Ukwëghya kuyö, nkoghera körë ömöntö anyoora umweya ughwa ukwanga ökötöörrya abhaibhöri abhaaye. 13Ku bhuyö, nkokora mörë amaraghërryö agha Waryobha, ghabhorwa ubhwera ubhwako, okore moghoote seteemo isyënyu abheene. Amangʼana m-maaru mokokora ghano ghatuubhaini na ghayö.”
Ubhunyanku ubhwa ömöntö, mo-nkoro bhukurwa
(Mataayo 15:10-20)
14Yëësu akabherekera ghwiki rikomo irya abhantö, akabhatëëbhya igha, “Munyitegherre bhuuya bhëënyu bhonswe igho, momanyërri keno nkoghamba. 15Tekeeho ëkëntö keno keraasohe mö-möbhërë ughwa ömöntö kimunyankuhi. Kasi amangʼana ghano ghakurwa mo-nkoro iya ömöntö, ngo ghakunyankuhya ömöntö.#7:15 Ukunyankuhya ömöntö. Maaha mo-faharaasa ahasë hano handëkirwë igha, Ubhwikööni na ubhunyanku. [16Ömöntö wowonswe igho ono aighuurë ghayö ngambirë, aghaitegherre bhuuya.]#7:16 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani.”
17Hano yaatighaini na rikomo irya abhantö riyö, akasoha mu-nyumba, abheegha abhaaye bhakamöbhöörya ensonga iya ëkërëngyö kiyö. 18Akabhahonshora igha, “Kora bhëënyu bhonswe temoona obhongʼaini ubhwa okomanya ensonga iya ëkërëngyö kiyö hë? Temomanyirë engʼana eno igha, tekeeho ëkëntö keno kekosoha mö-möbhërë ughwa ömöntö kimunyankuhya? 19Ibhyakorya tibhikughya mo-nkoro iya ömöntö hë, kasi mo-nda bhikughya, bhemara bhirwa-mo.” Hano Yëësu yaaghambirë igho, yöörökëri igha, ibhyakorya bhyonswe igho bhyaikërribhwa igha, bhereebhwe.#7:19 Ibhyakorya bhyonswe igho bhyaikërribhwa igha, bhereebhwe. Mo-maraghërryö agha Mosa, Abhayahudi tebhaikërërribhwanga okorya ibhyakorya ibhyëndë kya sëmbëëshë bheena ëbhëtööshö. Maaha mo-ketabho ikya Amangʼana agha Abharaawi 11. 20Akaghëndërrya okoghamba igha, “Amangʼana ghano ghakurwa mo-nkoro iya ömöntö, ngo ghakunyankuhya ömöntö. 21Ko bhoora mo-nkoro iya ömöntö, mo-maitegherro amaghogho ghakurwa, ghano ghakoreeta obhosooraare, ubhwibhi, ubhwiti ubhwa abhantö, 22umushaasha handë omokari uwa ömöntö okotaara kebhara, ubhuhiti, obhoghogho, okongʼaina, obhorangara, rikenge, amatöki, ekeghaaka bheena ubhusheema. 23Amangʼana amaghogho ghayö ghonswe igho, mo-nkoro iya ömöntö ghakurwa, ghayö ngo ghakunyankuhya ömöntö.”
Umukumo ughwa omokari ono atarë Umuyahudi
(Mataayo 15:21-28)
24Mbe, Yëësu na abheegha abhaaye bhakatanora ukurwa mo-mokowa ughwa Ghariraaya, bhakaghya mo-sembaara isya umughi ughwa Tiiro. Akasoha mu-nyumba nyabhorebhe, tiyaatunanga ömöntö amanye hano arë hë. Kasi abhantö bhakamanya hano arë. 25-26Yaare-ho omokari uwöndë, ono ataarenga Umuyahudi. Yaarwërëëyë Föinikë, mo-mokowa ughwa Siria. Mwisëkë uwaaye, yaarë na risambwa. Mbe, hano omokari uyö yaaighuurë amangʼana igha Yëësu haangʼë hayö arë, akaasha, akairekera ko-maghörö aghaaye hayö. Akamosaasaama igha aate risambwa ukurwa ko-moona uwaaye.
27Yëësu akamötëëbhya igha, “Ti-bhuuya ömöntö aruusi abhaana ibhyakorya, arekerre sësëësë. Kasi ekenene ni-igha, abhaana bharaaghere bheghote.”#7:27 Abhaana bharaaghere bheghote. Hano Abhayahudi bhaaghambanga igha abhaana, omanye igha na-Bhayahudi. Na hano bhaaghambanga igha sësëësë, m-bano bhatarëngë Abhayahudi.
28Kasi omokari uyö akahonshora Yëësu igha, “Omonene, m-maheene okoghamba, kasi, hano waanyoora abhaana bhararya, sësëësë seno ukunyoora sërëngë mwi-rungu irya emeeza, nkorya sërë bheno bhekoghwa hansë hayö.”
29Yëësu akamohonshora igha, “M-buuya oghambirë. Mbe, kaghi, risambwa remarrë ukurwa ku-mwisëkë uwaaho.” 30Omokari uyö akakyora ka, akanyoora omoona uwaaye ahwënirë, nkö-bhörrë arë aramuunya, risambwa remarrë kumurwa-ko.
Yëësu arahwënia umukirö rimuumu
31Mbe, Yëësu akatanora ukurwa Tiiro hayö, akahetera Siidööni, akahika ku-nyansha iya Ghariraaya, ku-kyaro ikya Dekapööri.#7:31 Dekapööri. Ensonga iyaamo ni-igha, imighi ikömi. 32Mbe, yaare-mo ömöntö uwöndë ono yaarë umukirö, na ni-muumu yaarë. Abhantö nyabhorebhe bhakamoreeta ku-Yëësu, bhakasabha igha, amosambekere amabhoko, amuhwëni. 33Yëësu akamwahora ukurwa mu-rikomo irya abhantö hayö, akaghya nawe mbareka umwene igho. Akamotoorra ibhyara mo-matwë. Akatwa amate ku-kyara, akamukunia kö-rörëmë. 34Yëësu akagharamera mu-ryobha, akaita ekekoohe, akamötëëbhya igha, “Efata!” Ensonga iyaamo ni-igha, “Rebhoka!” 35Hayö na hayö igho, ömöntö uyö, akarebhoka amatwë na örörëmë urwaye, akasimya okoghamba, na ukwighwa bhuuya igho.
36Yëësu akakangʼasërrya rikomo irya abhantö bhayö igha, bhatakaatëëbhya ömöntö wowonswe oora, ghayö akörrë. Kasi hano yaabhakaanianga, ho bhëngëryanga okoraareka amangʼana ghayö. 37Abhantö bhonswe igho bhakaroghoora bhököngʼu. Bhakaghamba igha, “Ghonswe igho ghano akörrë, m-maiya. Nkuhwënia arë abhakirö, bhaighwa. Amamuumu ghatora okoghamba!”
Markert nå:
Maariko 7: ssc
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
