Maariko 6
6
Yëësu araserwa waabho
(Mataayo 13:53-58; Ruuka 4:16-30)
1Mbe, Yëësu akatanora ukurwa iyö, akakyora waabho mu-mughi ughwa Nazarëëti, hamwë na abheegha abhaaye. 2Hano urusikö urwa Obhotooro rwaahikirë, akasimya ukwëghya abhantö mu-nyumba iya esango iya Abhayahudi. Abhaaru mo-bhano bhaamwighuurë bhakaroghoora, kora bhakamosera. Bhaabhööranianga igha, “Mbe! Ömöntö ono hai agharuusiri amangʼana ghano ghonswe igho? Kana hai yaaruusya obhongʼaini bhonswe igho bhono na obhotoro ubhwa okokora amakono ghayö akokora? 3Ono to-moseremara oora mura uwa Maryamu! Bhamura abhaabho te-bhaabho Yaakobho, Yoose,#6:3 Yoose. Iriina reno mo-senakara isyëndë yandëkirwë igha, Yusufu. Yuuda na Simööni? Kora abhasubhaati bhaaye te-hamwë na bhëëtö hano bharë?” Ku bhuyö bhakamorererra, tebhaamukumiri hë.
4Yëësu akabhatëëbhya igha, “Ömörööti nkosookwa arë kera ahasë, ukutigha mu-kyaro ikyabho, ko-bhawaabho na waaye ka.” 5Ko bhoora bhataamukumiri, tiyaakörrë amakono amaaru hayö hë, kasi yaatöörëëyë abharööyë abhake igho amabhoko, bhakahwena. 6Akaroghoora bhököngʼu ko bhoora bhataarenga na umukumo kora hake hë.
Yëësu aratoma abheegha abhaaye ikömi na bhabhërë
(Mataayo 10:5-15; Ruuka 9:1-6)
Hano Yëësu yaamarrë, akainaaranaara mu-bhishishi ibhya haangʼë hayö, akabha arëëghya-mo abhantö. 7Akabherekera abheegha abhaaye ikömi na bhabhërë. Akabhahaana ubhwera ubhwa ukwata amasambwa ukurwa ko-bhantö. Akabhatoma bhabhërë bhabhërë. 8Akabharaghërrya igha, “Motakaamanora ëkëntö kyokyonswe igho ko-roghendo urwënyu, kasi mogheghe inyimbo iyeene igho. Motakaamanora ensaho, handë omokaate, handë seehera. 9Motoore ebheraatö, kasi motakaaghegha singibho isya ukusyörya.” 10Ghwiki, akabhatëëbhya igha, “Ahasë honswe igho hano bharaabhasërëëni, mwikare mu-nyumba muyömuyö, okohekera hano moretanora ukurwa ahasë hayö. 11Ghwiki, ahasë hohonswe igho hano bharaange kobhasërëënia handë okobhaitegherra, motanore ukurwa hayö. Hano mwatanora, mokongʼonte urutu urwa ko-maghörö aghëënyu,#6:11 Mokongʼonte urutu urwa ko-maghörö aghëënyu. Ensonga iyaamo nu-kwöryökya igha, Waryobha angirë abhantö abha hayö, ko bhoora bhaangirë abhatomwa abhaaye. ko ököbhöörökya igha, Waryobha we bhangirë.”
12Abheegha bhayö bhakatanora, bhakasimya okoraarekera abhantö igha bhahongore ëbhëbhë ibhyabho. 13Ghwiki bhakaata amasambwa amaaru ko-bhantö, na bhakahwënia abharööyë abhaaru ko okobhahaka amaghuta.#6:13 Okohaka amaghuta. Kwörökyanga igha, Waryobha we akuhwënia.
Yohana Omobhatiisya arakengwa righöti
(Mataayo 14:1-12; Ruuka 9:7-9)
14Omokama Herode Antipa#6:14 Herode Antipa. Maaha mo-faharaasa. uwa ikyaro kiyö, yaaighuurë amangʼana agha Yëësu ko bhoora Yëësu yaamanyekaini ahasë honswe igho. Abhandë bhaaghambanga igha, “Uyö n-Yohana Omobhatiisya we aryökirë ukurwa mo-bhaku, kiyö nkyo kekoghera aana obhotoro ubhwa okokora amakono ghayö.” 15Abhandë bhaaghambanga igha, “Uyö nö-mörööti Ëriya.”#6:15 Maaha mo-ketabho ikya Maraaki 4:5. Abhandë bhaaghambanga igha, “Uyö nö-mörööti kya abharööti abhandë abha kare.”
16Mbe, hano omokama Herode Antipa yaaighuurë amangʼana ghayö, akaghamba igha, “Uyö n-Yohana ono naakëngirë righöti iryaye, we aryökirë ukurwa mo-bhaku!”
17-20Herode Antipa, yaarenga aitëtëri Herodia mokaa mumura uwaabho ono yaabherekerwanga igha, Firipö. Yohana Omobhatiisya uyö, yaatëëbhyanga Herode igha, “M-mughiro ukuruusya mura uwëënyu mokaaye, na ambe mura uwëënyu taraakwa hë.” Amangʼana ghayö ghakaghera Herodia akarererra Yohana Omobhatiisya, kora akatuna enshera iya ukumwita, kasi tiyaaghinyöörrë hë. Ku bhuyö Herode Antipa akatoma abhasirikare bhaghoote Yohana bhamotoore mo-kebhohe. Yaamorendanga okore Herodia atakaamwita, ko bhoora yoobhohanga Yohana Omobhatiisya igha, m-möntö uwa heene kora m-möhörëëru. Herode Antipa yaahanshirë bhököngʼu ukwitegherra Yohana, kasi hano yaamaranga ukumwitegherra, yaaighwanga bhoghogho bhököngʼu mo-nkoro iyaaye.
21Mbe, urusikö rokatooka rono Herodia yaanyöörëëyë-ho umweya, ughwa okokora bhono yaatunanga. Urusikö ruyö, n-doora urwa inyangi iya eheetoko iya ukwebhorwa ukwa Herode Antipa. Herode uyö, yaarenga araarëkirë abhanene abha mo-bhokama ubhwaye, abhanene abha abhasirikare, na abhatangati abha mo-mokowa ughwa Ghariraaya. 22Hano waanyöörrë abhaghëni bhaikaayë mu-nyangi hayö, mwisëkë uwa Herodia akasoha akabhina. Herode Antipa na abhaghëni abhaaye bhonswe igho bhakashomerwa. Ku bhuyö omokama akatëëbhya umwisëkë uyö igha, “Nsabha kyokyonswe igho keno ukutuna, nendaakohaane.” 23Akamutyanera igha, “Kyokyonswe igho keno oraansabhe, nendaakohaane, ndokaabha orobhaara urwa obhokama ubhwane, nendaakutwenere.”
24Mbe, umwisëkë uyö akarishoka kebhara, akabhöörya nyakuwaabho igha, “Maayö, n-kë nkasabha?” Nyakuwaabho akamohonshora igha, “Mosabhe omotwe ughwa Yohana Omobhatiisya.”
25Mbe, umwisëkë uyö akakyora bhöngöbhöngö ko-mokama, akamötëëbhya igha, “Ngʼaana omotwe ughwa Yohana Omobhatiisya ku-sinia bhoono igho.”
26Omokama akabhaabhayera bhököngʼu, kasi ko bhoora waanyöörrë amarrë ukutyana mbere iya abhaghëni abhaaye, akataamibhwa kya bhono araange. 27Mbe, akatoma umusirikare aghi akenge Yohana righöti. Umusirikare uyö akaghya mu-nyumba iya ekebhohe, akakenga Yohana righöti. 28Akareeta omotwe ughwa Yohana Omobhatiisya ghörëngë ku-sinia, akahaana umwisëkë uyö, umwene wonswe akaherra nyakuwaabho. 29Hano abheegha abha Yohana bhaaighuurë amangʼana ghayö, bhakaghya, bhakaghegha ikihundughu ikya Yohana, bhakaghya okobheeka.
Abhantö okoheteera ëbhëkwë bhitaanobharahaanwa ibhyakorya na Yëësu
(Mataayo 14:13-21; Ruuka 9:10-17; Yohana 6:1-14)
30Hano abhatomwa abha Yëësu bhayö bhaakyörrë, bhakaikomania ku-Yëësu, bhakamötëëbhya ghonswe igho ghano bhaakörrë na ukwëghya abhantö. 31Ko okoghera iya abhantö abhaaru bhököngʼu bhano bhaare-ho, abhandë bhaashanga na abhandë bharatanora, ku bhuyö Yëësu na abheegha abhaaye bhakataamibhwa okorya. Mbe, akatëëbhya abheegha abhaaye igha, “Muushe, toghende righara, ahasë hano abhantö bhatarë, tumuunye-ko hake igho.” 32Bhakatanora ukurwa hayö na ubhwato abheene igho, bhakaghya ahasë hano abhantö bhatarë.
33Kasi hano bhaatanööyë, abhantö abhaaru bhakabhamaaha, bhakangʼura hano bhakobhata. Abhantö bhayö hamwë na bhano bhaaruurë mu-mighi ighyëndë imyaru, bhakaiha ikibhuusë ukughya-yo. Bhakatangatera Yëësu na abheegha abhaaye ukuhika-yo. 34Hano Yëësu yaahikirë humbu, akaika ukurwa mu-bhwato. Akamaaha rikomo irya abhantö, akabhaabhera, ko bhoora mbaarë kya amangʼöndi ghano ghataana ömörëësya. Akasimya ököbhëëghya amangʼana amaaru.
35Enkaagha iya omoghoroobha, abheegha abha Yëësu bhakaghya, bhakamötëëbhya igha, “Hano mwi-sisi törë, kora iryobha reratuna okoghwa. 36Mbe, tëëbhya abhantö bhano bhatanore, okore bhaghi okoghora ibhyakorya mö-mëghöndö na mu-bhishishi bheno bhërëngë haangʼë hano.”
37Kasi, Yëësu akabhahonshora igha, “Bhëënyu mobhahaane ibhyakorya.”
Bhakamöbhöörya igha, “Nkutuna örë toghende tobhaghorre emekaate ighya sidinaari maghana abhërë#6:37 Sidinaari maghana abhërë. Ekerengere kiyö ni-ikya ehoorohooro iya ömöntö iya imyëri monaane kyaarë. Maaha mo-faharaasa engʼana, Idinaari. okore tobhahaane ibhyakorya?”
38Yëësu akabhabhöörya igha, “Moghende momaahe emekaate ne-renga monaghyö?”
Bhakaghya okomaaha, bhakakyora, bhakamötëëbhya igha, “Gheeho emekaate etaano, na sinswë ibhërë.”
39Yëësu akabhatëëbhya igha, mwikari ko-manyanki abhantö bhonswe igho makomo makomo. 40Bhakaikara amakomo, abhandë ighana ighana, na abhandë merongo etaano etaano. 41Yëësu akaghegha emekaate etaano na sinswë ibhërë siyö, akagharamera mu-ryobha, akakumya Waryobha. Akamonyora emekaate ghiyö, akahërrya abheegha abhaaye igha bhatwenere abhantö. Akabhahaana na sinswë siyö, bhatwenere abhantö bhonswe igho. 42Abhantö bhonswe igho bhakarya, bhakeeghota. 43Abheegha abhaaye bhakakomania ebhesansa ibhya emekaate na sinswë, bhakaishörya ebhekapo ikömi na bhibhërë. 44Abhantö bhano bhaarëëyë ibhyakorya bhiyö, abhashaasha abheene igho, mbaarë kya ëbhëkwë bhitaano.
Yëësu araghenda ku-nyansha kighörö
(Mataayo 14:22-33; Yohana 6:16-21)
45Mbe, Yëësu akaraghërrya abheegha abhaaye igha, bhasohe mu-bhwato, bhatangate bhaamboke inyansha bhaghi Bhëtisaida. Kasi umwene akatama araraghana na rikomo irya abhantö. 46Hano yaatighaini nabho, akaghya umwene igho ku-nguku okosaasaama.
47Hano ubhutikö bhwaahikirë, abheegha bhaarenga mu-bhwato ghatëghatë iya inyansha, na Yëësu nu-mwene igho yaarë ku-nguku. 48Akamaaha bhono bhaanyankanga bhököngʼu okotema sengahi, ko bhoora rikama ryaabhahuushanga. Mbe, hano öröghörö rwaatunanga okosamba, akaghya ko-bheegha abhaaye araghenda ko-manshë kighörö, akabha kya ono akobhaheteera. 49-50Kasi hano bhaarööshë araghenda ku-nyansha kighörö, bhakakanya igha në-këhwë. Hano bhaamörööshë bhonswe igho, bhakoobhoha bhököngʼu, bhakasherra. Yëësu akabhatëëbhya kamwë igho igha, “Motereme motakoobhoha, nö-öni!” 51Yëësu akariina mu-bhwato ubhwabho, rikama rekatendeera. Bhakaroghoora bhököngʼu, 52ko bhoora bhaakërrwë okoneghora ensonga iya amakono agha Yëësu agha ukwaruhya emekaate gheera. Keno kyaaghërrë bhakakerwa okoneghora, nu-bhuribhu ubhwa senkoro isyabho.
Yëësu arahwënia abhantö abhaaru Ghenesareeti
(Mataayo 14:34-36)
53Hano Yëësu na abheegha abhaaye bhaambökirë inyansha, bhakahika ku-kyaro ikya Ghenesareeti. Bhakarekera insika iya ubhwato, bhokabha humbu hayö. 54Hano bhaaikirë ukurwa mu-bhwato, kamwë igho abhantö abha hayö bhakamanya Yëësu. 55Mbe, bhakakenya bhöngöbhöngö, ku-kyaro kiyö kyonswe igho. Abhantö bhaasengʼesanga abharööyë ko-mashambi ukughya ahasë honswe igho, hano bhaaighwanga igha, ho Yëësu arëngë. 56Kera ahasë hano Yëësu yaaghyanga, hakaabha mu-bhishishi, handë mu-mighi, mbaamoreeteranga abharööyë mo-meteera. Bhaamosaasaamanga igha, abharööyë bhakuni kora ripindo irya ingibho iyaaye. Abharööyë bhonswe igho bhano bhaakörrë igho, mbaahwënirë.
Markert nå:
Maariko 6: ssc
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
