Maariko 5
5
Yëësu araghya mu-kyaro ikya abhandë
(Mataayo 8:28-34; Ruuka 8:26-39)
1Yëësu na abheegha abhaaye bhakahika humbu iya inyansha iya Ghariraaya, ku-kyaro ikya Abhagherasi. 2Hano Yëësu yaaikirë ukurwa mu-bhwato, akasikana na ömöntö ono yaarë na amasambwa, ararwera mo-sembeehera.#5:2 Mo-sembeehera. Abhayahudi bhaarë na eteemo iya okobheeka abhantö mo-masana agha mu-singuku, isyëndë mbasebhaashanga abheene. 3Ömöntö uyö mo-sembeehera yaarenga amënyirë. Yaarë na singuru seno ömöntö wowonswe igho ataatoranga kora okomobhoha na ebheraangʼani. 4Wanyoora bhaamobhoha hare kaaru na ebheraangʼani ko-maghörö, na ko-mabhoko, kasi bhyonswe igho bhiyö, yaabhebhotoranga. Tiyaare-ho ömöntö ono yaamokeranga singuru hë. 5Yaaikaranga mo-sembeehera na mu-singuku sinsikö syonswe igho, arakora ikituri, na araikebhakebha na amaghena.
6Hano ömöntö uyö yaarööshë Yëësu araasha akërëngë hare, akamokenyerra, akamotemera hansë ibhiru. 7-8Hano Yëësu yaamörööshë, akahamera risambwa riyö igha, “Uwe risambwa, karwe kö-möntö ono!”
Ömöntö uyö akakora ikituri bhököngʼu araghamba igha, “Uwe Yëësu Omoona uwa Waryobha ono ökërrë bhyonswe igho, ne-ngʼana kë ukuntuna-ko? Ndakosaasaama ku iriina irya Waryobha, otakaanteesa!”
9Yëësu akarëbhöörya igha, “Iriina iryaho nu-uwe wë?”
Rekamohonshora igha, “Iriina iryane nö-öni rijëëshi, ko bhoora m-baaru törëngë kö-möntö ono.” 10Amasambwa ghayö ghakasaasaama Yëësu bhököngʼu igha, atakaghaata ukurwa mu-kyaro kiyö.
11Mbe, ahasë hayö, ryaare-ho rihisho rinene irya sëmbëëshë, reno ryaarëësyanga ku-nguku mbareka. 12Mbe, amasambwa ghayö ghakamosaasaama igha, “Torakosabha utwikërërri, tosohe mö-sëmbëëshë siyö.” 13Yëësu akaghaikërërrya. Mbe, amasambwa ghayö, ghakarwa kö-möntö uyö, ghakasoha mö-sëmbëëshë. Rihisho riyö irya sëmbëëshë, rekangʼaaraara këmwë, ku-kihiringityö ëkërörö, sekakwererra mu-nyansha. Sëmbëëshë siyö, syaarenga kya ekerengere ikya ëbhëkwë bhibhërë.
14Abharëësya abha sëmbëëshë siyö bhakakenya, bhakaghya mu-mughi na mu-bhishishi ibhya haangʼë hayö, bhakaraarekera abhantö amangʼana ghayö. Abhantö bhakaasha, okore bhaimaahere abheene ghayö ghabhaayë. 15Hano bhaahikirë ku-Yëësu hayö, bhakamaaha ömöntö uyö yaarenga na rikomo irya amasambwa aikaayë, aibhöhirë singibho, kora taana amasambwa hë, bhakoobhoha. 16Abhantö bhano bhaarööshë amangʼana agha ömöntö uyö na sëmbëëshë siyö, bhakabha bharatëëbhya abhandë keno kebhaayë. 17Mbe, abhantö bhayö bhakasimya okosaasaama Yëësu igha, arwe mu-kyaro ikyabho muyö.
18Hano Yëësu yaariinanga mu-bhwato, ömöntö uyö yaahwëniibhwi akasaasaama Yëësu igha, amwikërërri bhahinane. 19Kasi Yëësu tiyaikërëëyi hë, akamötëëbhya igha, “Kaghi ka, ko-bhawëënyu, obhatëëbhi amangʼana amarito ghano Omonene akökörëëyë, na ikyabhera ikyaye ku-uwe.” 20Mbe, ömöntö uyö akatanora, akasimya okoraareka Dekapööri,#5:20 Dekapööri. Ensonga iyaamo ni-igha, imighi ikömi. amangʼana amarito ghano Yëësu amökörëëyë. Abhantö bhonswe igho bhakaroghoora.
Yëësu araryökya umwisëkëna ukuhwënia omokari ono yaanyankuha
(Mataayo 9:18-26; Ruuka 8:40-56)
21Hano Yëësu na abheegha abhaaye bhaambökirë na ubhwato ukughya humbu, mbareka iya inyansha, bhakanyoora-ho rikomo rinene irya abhantö, rekamwisangerra. 22Akaasha-ho omonene ömwë uwa inyumba iya esango iya Abhayahudi,#5:22 Inyumba iya esango iya Abhayahudi. Maaha mo-faharaasa. iriina iryaye ni-igha Yairo. Akaghya ku-Yëësu, akairekera ko-maghörö aghaaye hayö. 23Akamosaasaama bhököngʼu, akamötëëbhya igha, “Umwisëkë uwaane m-mörööyë musingu. Ndakosabha toghende, omosambekere amabhoko aghaaho kö-möbhërë ughwaye, okore ahwene.” 24Yëësu akahinana nawe waaye ka. Rikomo rinene irya abhantö rekamosoorana, reramwisangerra.
25Mu-rikomo muyö, yaare-mo omokari ono yaatemoranga amaanyinga, imyoka ikömi na ibhërë. 26Omokari uyö waanyoora yanyanka bhököngʼu ukughya ko-bharëri abhaaru. Akamarra ko-bharëri ëbhëntö ibhyaye bhyonswe igho, kasi tiyaanyöörrë obhoraari röndë hë, öbhörööyë ubhwaye bhokaneneha. 27-28Hano omokari uyö yaaighuurë ghano Yëësu yaakoranga, akabha araighambera mo-motwe ughwaye igha, “Hano nkakunia ingibho iyaaye iyeene igho, nendaahwene.” Mbe, akaibhumbura mu-rikomo irya abhantö, akarwera Yëësu nyuma, akakunia ingibho iyaaye. 29Hayö na hayö igho, okotemora amaanyinga kokeemerra, akaighwa ahwënirë.
30Kamwë igho, Yëësu akamanya igha, obhotoro ubhwaye bhökörrë emeremo. Akaisyörrya rikomo irya abhantö bhayö, akabhabhöörya igha, “N-nawë ankuniri ku-singibho?”
31Abheegha abhaaye bhakamötëëbhya igha, “Tokomaaha kya igho abhantö bhakukwihonderra, ghwiki orabhöörya igha nawë akukuniri? ”
32Mbe, akamaghamagha eno na eno, okore amaahe ömöntö ono amukuniri. 33Omokari uyö akoobhoha,#5:33 Omokari uyö akoobhoha. Abhayahudi bhaaghiranga omokari ono akurwa amaanyinga igha m-munyanku. Tiyaikërërribhwanga na amaraghërryö agha Mosa ukwikoma hamwë na abhandë. Na hano ömöntö yamukunia-ko, wonswe nkunyankuha arë. Maaha mo-ketabho ikya Amangʼana agha Abharaawi 15:25-33. akaasha akairekera ko-maghörö agha Yëësu, eno ararighita, ko bhoora yaamanyirë keno kebhaayë. Akamötëëbhya obhoheene kya igho ghabhaayë. 34Yëësu akamötëëbhya igha, “Mwisëkë uwaane, keno këghërrë uhwënirë, nu-mukumo ughwaho, ku bhuyö, kaghi na omorembe.”
35Hano Yëësu yaarenga akishumaasha na omokari uyö, abhantö bhakaasha ukurwa wa Yairo, omonene uwa inyumba iya esango iya Abhayahudi, bhakamötëëbhya igha, “Yairo, tatigha ukunyankya umwëghya, mwisëkë uwaaho amarrë ukukwa.”
36Kasi hano Yëësu yaaighuurë amangʼana ghayö, akaghasera, akatëëbhya Yairo igha, “Otakoobhoha, kasi kabhe na umukumo.” 37Yëësu akakyörya abhantö bhatakaahinana nawe wa Yairo. Kasi akaghegha Peetero, Yaakobho na Yohana mura uwaabho Yaakobho, akahinana nabho.
38Hano bhaahikirë wa Yairo ka, Yëësu akanyoora abhantö bharakuura bhabhaabhayëëyë. 39Yëësu akasoha mu-nyumba, akabhabhöörya igha, “N-kë mobhaayë morakuura? Umwisëkë ono takuurë hë, kasi naraayë.” 40Abhantö bhayö bhakamosera, bhakamosekerra. Yëësu akabharishökya kebhara bhonswe igho. Kasi akaghegha suwaabho omoona, bhaana nyakuwaabho, na abheegha abhaaye abhatatö bhano yaaishirë nabho, bhakasoha mu-kinyumba keno umwisëkë uyö yaarenga araariibhwi-mo. 41Akamoghoota okobhoko, akamötëëbhya igha, “Tarita, koumu!” Ensonga ya amangʼana ghayö ni-igha, “Nu-uwe nkötëëbhya örë mwisëkë, bhooka!” 42Kamwë igho, umwisëkë uyö akaimerra, akasimya okoghenda. Umwisëkë uyö yaarenga na imyoka ikömi na ëbhërë. Abhantö bhakaroghoora bhököngʼu. 43Yëësu akabhakaania bhököngʼu igha, bhatakaatëëbhya ömöntö wowonswe igho ghayö ghaaikörrë. Akatëëbhya abhaibhöri abha umwisëkë uyö bhahaane umwisëkë uyö ibhyakorya.
Markert nå:
Maariko 5: ssc
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
