Maariko 4
4
Ëkërëngyö ikya umubhusuri
(Mataayo 13:1-9; Ruuka 8:4-8)
1Yëësu ghwiki akasimya ukwëghya abhantö mbareka iya inyansha. Rikomo rinene bhököngʼu irya abhantö rekaikomania-ho. Akasoha mu-bhwato, akaikara-mo, okore bhatakamutimbatimba. Abhantö bhayö bho bhakatighara mbareka iya inyansha hayö. 2Yaabhëëghyanga amangʼana amaaru ko okobharëngërya ëbhërëngyö. Akabharëngërya igha, 3“Mwitegherre mbatëëbhi! Yaare-ho umubhusuri, ono yaaghëëyë ukubhusura kö-möghöndö ughwaye. 4Hano yaabhusuranga, seheke isyëndë isya imbusiro sekaghwa ko-nshera, ibhinyönyi bhekaasha, bhekaserya. 5Isyëndë sekaghwa ku-rirobha irya ku-ritare, reno ryaarë na amarobha make igho. Seheke siyö sekakiina bhöngöbhöngö. 6Kasi hano omobhasö ghwaabharrë, sekooma, ko bhoora setaarenga sihirrë bhököngʼu imiri. 7Seheke isyëndë, sekaghwa mo-maanyamahwa, ghakasetokera, tisyamirë hë. 8Kasi seheke isyëndë, sekaghwa ko-marobha amaiya, sekamera, sekakiina kora sekaama bhököngʼu. Eheke ëmwë iya imbusiro, ekaama sehagho merongo etatö, iyëndë merongo esansabha, na iyëndë righana imwë!” 9Hano Yëësu yaamarrë, akabhatëëbhya igha, “Ömöntö wowonswe ono aighuurë ghayö ngambirë, aghaitegherre bhuuya.”
Keno kyaagheranga Yëësu ararëngya ëbhërëngyö
(Mataayo 13:10-17; Ruuka 8:9-10)
10Hano rikomo irya abhantö ryaatanööyë, Yëësu akatighara na abheegha abhaaye ikömi na bhabhërë, hamwë na abhasoorani abhandë. Mbe, bhakamöbhöörya ensonga iya ëbhërëngyö ibhyaye.
11Akabhahonshora igha, “Bhëënyu mwahonyorrwa amëëghyö agha Obhokama ubhwa Waryobha. Kasi abhantö abhandë nköbhëëghya ndë amangʼana ghonswe igho, ko okobharëngërya ëbhërëngyö. 12N-kya bhoora ömörööti Isaaya yaandëkirë igha,
‘Ukwighwa, mbaraaighwe, kasi tebhamanye ngʼana hë.
Okomaaha, mbaraamaahe, kasi tebhamanyërri hë.
Singa etarëngë igho, mbakaaisyörri bhaabherwe.’#4:12 Maaha mo-ketabho ikya Isaaya 6:9-10.”
Ensonga iya ëkërëngyö ikya umubhusuri
(Mataayo 13:18-23; Ruuka 8:11-15)
13Ho Yëësu yaamarrë akaghamba igha, “Hano mökërrwë okomanya ëkërëngyö keno, iyakë moraaghere momanye ëbhërëngyö ibhyëndë bheera? 14Umubhusuri, nö-möntö ono akoraarekera abhantö engʼana iya Obhokama ubhwa Waryobha. 15Abhantö abhandë, mbatuubhaini na rirobha irya ko-nshera. Abhantö bhayö, hano bhaighwa engʼana iyö, Oghosambwa nkuusha ghörë kamwë igho, ghuruusya engʼana iyö mo-senkoro isyabho. 16Abhandë, mbatuubhaini na rirobha irya ku-ritare. Hano bhaighwa engʼana iyö, nkughyangohera bharë kogheghoota, kora bhashömëëywë. 17Kasi ko bhono bharëngë kya ömöröngö ghono ghotahirrë imiri, hano inyanko yabhanyoora ko okoghera iya engʼana iyö, nkutigha bharë umukumo ughwabho kamwë igho. 18Abhandë mbatuubhaini na rirobha irya mo-maanyamahwa. Hano bhaighwa engʼana iyö iya Obhokama ubhwa Waryobha, nkughikërrya bharë. 19Kasi inyanko iya ko-kebhara kono, iya ubhutuni ubhwa okobha na ëbhëntö, bheena ukwighomba amangʼana aghandë, mbyo bhikutimba engʼana, ekerwa ukwama. 20Kasi abhandë, mbatuubhaini na rirobha iriiya. Bhayö hano bhaighwa engʼana iyö, nkogheghoota bharë, ëmwë yaama sehagho merongo etatö, iyëndë merongo esansabha, na kora iyëndë righana.”
Ëkërëngyö ikya etara
(Ruuka 8:16-18)
21Ghwiki Yëësu akëëghya rikomo irya abhantö riyö igha, “Kasi aaho ömöntö ono aköghöötya etara, aghetoora mwi-rungu, handë aghikundikirya mu-nyöngö? Teko-ketangora ekotoorwa okore emoreke ahasë honswe igho? 22Ni-igho igha, kora teeho engʼana eno ibhisirwë, eno etarehonyorwa. Ghwiki, tereeho ryoryonswe igho reno rikundikiribhwi, reno retarekondokorwa. 23Ömöntö wowonswe igho ono aighuurë ghayö ngambirë, aghaitegherre bhuuya.”
24Mbe, Yëësu akëngërya okobhatëëbhya igha, “Mwitegherre bhuuya! Ekerengere ikyënyu ikya ukwitegherra engʼana, nkyo kiyökiyö keraaghere Waryobha abhahaane obhomanyi ubhwa engʼana iyö, kora abhëngërërri moghemanye bhököngʼu. 25Ono akwitegherra engʼana iya Waryobha na okoghemanya, Waryobha nkömötöörrya arë kora amwëngërya, okore aghemanye bhököngʼu. Kasi hano ömöntö yanga ukwitegherra engʼana iya Waryobha, kora engʼana enke eno amanyirë, nkuruusibhwa arë.”
Ëkërëngyö ikya imbusiro
26Ghwiki Yëësu akabhatëëbhya igha, “Tigha mbarëngëri ëkërëngyö ikyëndë, okore mbööröki kya bhono Obhokama ubhwa Waryobha bhörë. Ömöntö uwöndë yëëmëri imbusiro kö-möghöndö ughwaye. 27Ömöntö uyö akabha araraara na okobhooka kera urusikö, imbusiro yonswe ekamera, kasi tiyaamanyirë bhono yaakiinanga hë. 28Rirobha ndyo rekokora imbusiro iyö ikiina igho kora yaama. Nkosebhoka ërë tangata, ekora inyerenyere, emara ëhörökya ekeghara keno kekobha na seheke. 29Imbusiro iyö hano yakongʼa, nkooma ërë, hayö bhoono ho ömörëmi akoghegha righasi aghya okoghesera.”
Ëkërëngyö ikya orotetere oroke
(Mataayo 13:31-32, 13:34; Ruuka 13:18-19)
30Ghwiki Yëësu akabhatëëbhya igha, “Obhokama ubhwa Waryobha n-kë toraabhorengʼaani nakyo? Handë igha n-kë tokaabhörëngya nakyo? 31Mbutuubhaini na akatetere aka omoharadaari, imbusiro iyö ne-nke okokera simbusuro syonswe igho seno sikwëmibhwa mu-bhusitaani. 32Hano yëmibhwa emere, nkukiina ërë, ebha enene okokera ëmëröngö ghyonswe igho ighya sinyënyi isya mu-bhusitaani. Nkobha ërë na amasagharya amanene kora ibhinyönyi nkuusha bhërë bhehaghaasha-ko amasu.”
33Yëësu yaashumaashirë nabho amangʼana agha Obhokama ubhwa Waryobha kö ëbhërëngyö ibhyaru kya bhiyö, okore abhöörökërri bhamanye. 34Tiyaaghambirë nabho bhosa igho, atabharëngëëyi ëkërëngyö. Kasi hano yaatigharanga umwene na abheegha abhaaye, yaabhörökërranga amangʼana ghonswe igho.
Yëësu aratëndëërya rikama
(Mataayo 8:23-27; Ruuka 8:22-25)
35Hano omoghoroobha ughwa urusikö ruyö ghwaahikirë, Yëësu akatëëbhya abheegha abhaaye igha, “Twamboke inyansha, toghende humbu.” 36Bhakatigha hayö rikomo irya abhantö, bhakasoha mu-bhwato moora Yëësu yaarë, bhakatanora hamwë nawe. Amaato aghandë ghano ghaare-ho, ghakabhasoorana. 37Ikighumbë kekasimya okoherra ku-nyansha kuyö. Amayengo ghakabha gharaitema ubhwato, amanshë ghakasoha mu-bhwato bhokahona ukweshora.
38Enkaagha iyö, Yëësu yaarenga araayë mu-bhwato nyuma, aisaghööyë omosagho. Abheegha abhaaye bhakamutura bhakamötëëbhya igha, “Umwëghya, hano bhëëtö hake törë tukwe, kasi uwe töötöniibhwi hë?”
39Mbe, Yëësu akabhooka, akahamera rikama riyö, akatëëbhya inyansha igha, “Kira otendeere!” Rikama rekatigha okoherra, inyansha ekatendeera. 40Mbe, Yëësu akabhöörya abheegha abhaaye igha, “N-kwakë mwöbhöhirë igho? Nanyabhoono temoraakumya hë?”
41Bhakoobhoha bhököngʼu, bhakabhoorania igha, “Kana, Ömöntö ono n-wa teemo kë, ono kora rikama bheena amayengo bhikumwighwera?”
Markert nå:
Maariko 4: ssc
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2021, Wycliffe Bible Translators, Inc. All rights reserved.
