ลูกา 8
8
ปึง อัหเม ตี เริล เคิบ เยซู
1เจ็นนัน เยซู ก็ เริล ตาม งวัล ตาม เมือง อัห นำ ไล คาว เลาะ เลือง เอาซาง ปกคอง โลก เน อน อัห ปัง ญาม นัน ปึง ลูกนอง นำ ซิบซอง ล็อง นัน ก็ เริล เลิม มด 2ทาเน ก็ มี อัหเม เป็น ปึง เริล เลิม เคิบ นำ แด อัหเม ปึง เน เยซู เกย จวย อัห แลว มี อัหเม ตี เยซู เกย มบรึห ปรอง ทอก แอ็ม เจ็น นัง อัห แด มี อัหเม ตี นำ เกย รักซา ระ งาล โซะ แด อัหเม ปึง เน ก็ มี มี ล็อง ซือ ตัก มารี นำ เป็น ครำ งวัล มักดาลา กำนา ก็ มี ปรอง กุด นำ เจ็ด นัง เยซู เกย มบรึห ปรอง ทอก เจ็น นัง นำ 3เจ็นนัน ก็ มี โยอันนา ยัห คูซา เริล เลิม คูซา เน นำ เป็น ฮัวนา ครำ แองกาน ตัก เจิง เฮโรด เจ็นนัน ก็ มี ซูซันนา มี ล็อง วัล แลว ก็ มี อัหเม ล็อง ซอ วัล ดก ล็อง อัหเม ปึง เน อัห เริล เลิม เคิบ เยซู อัห ก็ ม็อด เอิด เงิน เอิด วะ คอง ออ จวย เยซู เคิบ ลูกนอง นำ อัหเม ปึง เน อัห เริล เลิม เคิบ เยซู นัน
แญง มเบิด เลือง ครำ วาน ซา
มัดทิว 13:1-9, มาระโก 4:1-9
4มี มี ลบ นัน ก็ โตะ ปึง พซาซน เจ็น ดก ตี ดก เมือง โตะ และ เยซู อัห ก็ รูบ โตะ ปัง เยซู เป็น ปึง ดก ครำ ซีเละ ทาเน เยซู ก็ มเบิด ไล เลือง ครำ วาน ซา อน อัห ปัง เยซู ก็ ไล อัห คือเน 5“มี ครำ มี ล็อง เริล วาน ซา ซา มี มบรัห ก็ คลิห ตัก รวง ครำ ก็ โตก เริล โตก วัล เซ็ม ก็ โตะ ท็อห ป็อง แอ็ม ลิบ ซุด 6ซา มี มบรัห ก็ คลิห ตัก ซิก ปาเกียง เวิด ปลัด ไอ มี อิง ก็ แย็ว ลด มเบิล แอ็ม เพาะวา ตะ ซิก ไอ มี จุ เกรด เวิด ทัง ซิก 7ซา มี มบรัห ก็ คลิห ตัก ปา ซีเยอะ ซีเยอะ ก็ เวิด แกะ อี งวม แอ็ม เกา ซา นัน ซา นัน ก็ แกด แอ็ม ไอ มี เลาะ แกะ เตาะ ไอ มี เลาะ แพละ เตาะ 8ซา มี มบรัห ก็ คลิห ตัก ซิก เลาะ ซา นัน ก็ เลาะ ปลัด เลาะ แกะ ซีเละ เลาะลัห นซ็อก กุญ แพละ มี รอย เตา วัล” เยซู อัง แลว เยซู ไล อัห คือนะ แลว นำ ก็ ไล อัห คือเน วัล “ซีเอ มี นโทล ก็ ปัง เอิด เลาะๆ เนอ” นำ อัง
เอาซาง ระ แอ เคาใจ แญง มเบิด กุญ
มัดทิว 13:10-17, มาระโก 4:10-12
9แลว ลูกนอง เยซู ปัง แญง มเบิด นัน แลว อัห ก็ ไอ มี เคาใจ อัห ก็ ลด ซ็วน เยซู คือเน “แญง ตี มัห มเบิด ไล อิห เคิน ซีแล็ม เค็ย ซีวะ บ็อห” อัห อัง
10เยซู ก็ ไล อัห คือเน “แญง มเบิด นัน เคิน ซีแล็ม เค็ย ซีวะ งวะ เอิญ ไล อน แป ก็ กุญ ดาย แต เอิญ ครอ ไล เลือง เน วาล เลือง เอาซาง โตะ ปกคอง โลก เน ก็ มี ดก เลือง ตี เอาซาง ไอ มี ตัน ไล แป นอ ซำรับ แป เน เอาซาง ไล แป ระ เคาใจ เลาะๆ ก็ กุญ แต ซำรับ อัหซอ ตี ไอ มี ปัง เอิญ นัน เอิญ มเบิด ไล อน ตัก อัห ฮัก ตี เอิญ มเบิด ไล อัห เน ก็ ระ อัห ไอ มี เคาใจ อัห เน ก็ มอก แญง เอาซาง เพีย ไล อน แลว ‘อัห วาง ดอม ก็ ไอ มี เม็จ อัห วาง ปัง ก็ ไอ มี เคาใจ’ แญง เอาซาง ไล จังนะ” เยซู อัง อิซยา 6:9-10
เยซู ไล ระ อัห เคาใจ เลือง ครำ วาน ซา
มัดทิว 13:18-23, มาระโก 4:13-20
11เจ็นนัน เยซู ก็ ซวัล อัห คือเน “แญง มเบิด เลือง ครำ วาน ซา นัน ก็ ซีแล็ม คือเน ดาย พรัน ซา ก็ ซีแล็ม เค็ย แญง เอาซาง 12ซา คลิห ตัก รวง ลด มี เซ็ม โตะ ป็อง แอ็ม นัน ก็ ซีแล็ม เค็ย ครำ ตี กุญ ปัง แญง เอาซาง แลว ปรอง ก็ แอง ระ อัห เลอ แอ็ม แญง นัน ระ อัห ไอ มี จำ ระ อัห ไอ มี เคาใจ ปรอง ระ อัห เลอ แอ็ม ก็ เพาะวา เย็ห ไอ มี ซีรอก ระ อัห เจือ ไอ มี ซีรอก ระ อัห กุญ ปน แอ็ม เจ็น ลุห
13ทาเน ซา ตี คลิห ตัก ซิก ปาเกียง ก็ ซีแล็ม เค็ย ครำ ตี กุญ ปัง แญง เอาซาง แลว อัห ก็ เลาะใจ ปัง แต อัห ไอ มี ตัน เคาใจ เลาะ ไอ มี ปอ อิง จับ มี ซะ ลอง ใจ อัห อัห ก็ นาย แอ็ม ใจ ลด พระ แอ็ม เอาซาง อัห ก็ เป็น มอก ซา ตี ปลัด ตัก ซิก ปาเกียง นัน ไอ มี จุ เกรด แร็ง อาก ก็ มเบิล แอ็ม
14ทาเน ซา ตี คลิห ตัก ปา ซีเยอะ นัน ก็ ซีแล็ม เค็ย ครำ ตี กุญ ปัง แญง เอาซาง แลว แต ดก อัห กึด ซะ ตัก โลก เน อัห นเจิก ไอ มี ฮัง นเจิก ไอ มี มวน อัห ก็ ลด ไอ มี รวง กุญ ปัง แญง เอาซาง เลาะ ปานเดย เตาะ อัห ก็ ลด ไอ มี เป็น ปะโยด อน เอาซาง จู มบลึ ตี อัห ทืล อัง เน ก็ ทม แอ็ม กำกึด อัห มอก เกา ซีเยอะ งวม แอ็ม เกา ซา นัน ระ เกา ซา แกด แอ็ม ไอ มี ดก แพละ เตาะ
15ทาเน ซา ตี คลิห ตัก ซิก เลาะ นัน ก็ ซีแล็ม เค็ย ครำ ตี กุญ ปัง แญง เอาซาง แลว อัห ก็ เคาใจ เลาะ อัห กิว แก็นใจ เจือ ซีเละ อัห ก็ มี ใจ เลาะ ใจ ซือ มี ปันฮา อัห ก็ ซอดแซ็ง อด เอิด อัห ก็ ลด เป็น ปะโยด อน ตัก เอาซาง ดก ซีเละ ครำ มอก เน อัห ก็ เป็น มอก ซา คลิห ตัก ซิก เลาะ ดก กุญ ซา นัน” เยซู ซวัล อัห ฮุนนัน
โทจ ตะเกียง แลว ไอ มี อัห ปุก ระ อน
มาระโก 4:21-25
16ทาเน เยซู ก็ ไล อัห คือเน วัล “ไอ มี ซีเอ โทจ ตะเกียง แลว เอิด บุง ปุก ระ อน ไอ มี ซีเอ โทจ ระ ทิง โตะ ลัห เซ็บ ซัง อัห โทจ แลว อัห ก็ ต็อง ต็อก ระ ตัก ตี ทึหๆ ซะ ระ ทาง ซะ ตัก ฮ็อง นัน มด เพือ ระ จู ล็อง ตี กุด เจิง นัน ดอม ซีวะ ก็ ตาด มด 17จู มบลึ ตี เอาซาง งเกริม ระ อน นัน ไอ มี ระ อัห เม็จ เจ็น อิง นัน ก็ ต็อง มี งิ เม็จ จู มบลึ ตี นำ ไอ มี ตัน ไล ก็ ต็อง มี งิ ตี นำ ไล ระ อัห เม็จ มด 18เจ็นเน แป ต็อง ตังใจ ปัง เลาะๆ ดาย ซำรับ ครำ ตี เอิด ใจ ซิห ลด เคาใจ เลาะ เอาซาง ก็ เฮง จวย ระ อัห เคาใจ เลาะ ติกๆ วัล แต ซำรับ ครำ ตี ไอ มี ญอม ปัง นัน ตี กึด เค็ย นัง ออ มี ความ ฮู อุ แลว บัดนะ นโดน ความ ฮู ตี อัห ทือ เค็ย เลาะ นัน ก็ ไอ มี เป็น ปะโยด ซัก มี ติด เตาะ” เยซู อัง
ครำ ตี แอง มอก เยซู ไล อน ซัง กิว เป็น ควน นไจ นำ
มัดทิว 12:46-50, มาระโก 3:31-35
19ญาม เยซู กำลัง นเจ็น พซาซน อุ นัน ครำ ก็ ปิ แก็น ตัก นัน ทาเน ก็ โตะ ควน นำ เคิบ เม นำ อัห โตะ และ เยซู แต อัห กุด โตะ และ นำ ไอ มี กุญ แร็ง ดก ครำ ปิ แก็น อัห ก็ ญ็อง เพา อุ บัดซะ 20ทาเน ก็ มี ครำ ไล เยซู คือเน “อาจาน ควน มัห เคิบ เม มัห โตะ และ มัห ดาย อัห ญ็อง เพา มัห อุ บัดซะ โตน นัน ดาย” อัห อัง 21เยซู ก็ ซวัล อัห คือเน “ปัง เอิด ดาย แป จู ล็อง ตี ปัง แญง เอาซาง ลด แอง ฮุน เอาซาง ไล อน นัน เอิญ ก็ ทือ แป เป็น เม เป็น ควน ออ มด ดาย” เยซู อัง
เยซู ไล งกริม เค็ด งาล แอ็ม
มัดทิว 8:23-27, มาระโก 4:35-41
22ทาเน ก็ มี มี งิ นัน วัล เยซู ก็ ต็อก เฮือ เลิม เคิบ ลูกนอง ออ นำ ก็ ไล อัห ฮุนเน “แอ คาม นอก เริล พาโนน ดาย” นำ อัง อัห ก็ ลด ต็อก เฮือ เริล ออ 23ญาม อัห ต็อก เฮือ เริล นัน เยซู ก็ อวย ญึด นไท แอ็ม ตัก เฮือ ทาเน ก็ พด โตะ งกริม จ็อง นทูด นอก นอก ก็ กุด ใน เฮือ แร็ง ดก นอก กุด เฮือ เฮือ ก็ บัก และ จม แอ็ม
24อัห ก็ โตะ พร็อห เยซู “อาจานๆ แอ บัก และ เปิล จม นอก แลว ดาย” อัห อัง เยซู ก็ คุล ร็อห ไล งกริม ไล นอก นัน งกริม ก็ เค็ด งาล นอก ก็ เค็ด งเกิน อุ ไอ มี นดิ ซัก มี ติด 25นำ ก็ ลด ซ็วน อัห “ซีวะ แป ไอ มี เจือ เอิญ บ็อห” นำ อัง อัห ก็ เลอะ นเจิก เลอะ งึด อัง นำ มด อัห ก็ จ็อก เคิบ นอย ฮุนเน “นำ ไล งกริม ไล นอก เย็ห ก็ ปัง แญง นำ นอ นำ เป็น ซีเอ นังเลาะ บ็อห” อัห อัง เค็ย นอย
เยซู มบรึห ปรอง ตี กุด ครำ เกราซา
มัดทิว 8:28-34, มาระโก 5:1-20
26เจ็นนัน วัล เยซู เคิบ ปึง ลูกนอง ออ ก็ ต็อก เฮือ เริล ติกๆ อัห พด โตะ พาโนน ตัก เกราซา เกราซา อุ พาโนน อุ ซือ จังวัด กาลิลี นัน 27-29ญาม เฮือ กำลัง จอด อุ เยซู ก็ จูล เจ็น เฮือ นำ บัก และ ก็อห ซะร็อห นำ ปัก เม็จ อัหคล็อง มี ล็อง เป็น ครำ งวัล ติๆ พานัน ล็อง นัน ปรอง กุด นำ ดก ซีเละ อิง แลว ปรอง แอง ระ นำ ลุน อุ เต็ว ก็ ไอ มี แซ็ด โกบ ก็ ไอ มี จึห เตาะ อิง แลว นำ ไอ มี อุ ตัก เจิง นำ อุ ตัก พาเฮ็ว ฮัก ปรอง กุด นำ ดก ลบ อัห ก็ เอิด โซ เอิด กุนแจ ท็อก ระ นำ นำ ก็ นจัห แอ็ม กิด แอ็ม มด ปรอง ซับ นำ ปัด อุ ตัก ซะร็อห ทึห ตัก นโจ ฮัก
ญาม นำ เม็จ เยซู นำ ก็ นซาก นำ ลด ญุล คุด กราบ ไว เยซู นำ ก็ จ็อก แร็งๆ ซิห เยซู คือเน “มัห เป็น ควัน เอาซาง ตี แกะ ทีซุด มัห โตะ ญุง เคิบ เอิญ อังวะ ครอ เคิบ มัห อำ มัห ทอระมาน เอิญ เตาะ ดาย” นำ อัง ตี นำ ครอ ฮุนนัน ก็ เป็น ตัก เยซู ไล ปรอง ทอก แอ็ม เจ็น นัง นำ
30เยซู ก็ ลด ซ็วน นำ “มัห ซือ ซีเอ” เยซู อัง ล็อง นัน ก็ ซวัล เค็ย “เอิญ ซือ ตัก มู ตัก ปึง” นำ อัง ตี นำ ซวัล ฮุนเน ก็ เพาะวา ปรอง กุด นัง นำ ดก ซีเละ 31ปึง ปรอง ก็ ครอ เคิบ เยซู ฮุนเน “ครอ อำ มัห ระ อิห คลิห อุ ตัก งกุก จุ ทีซุด นัน ดาย” เย็ห อัง
32ตัก ตี เยซู มบรึห ปรอง นะ ก็ มี อิ ดก นัง ซีเละ เย็ห โละ ป็อง พา อุ ตัก ญวัง ติๆ พานัน ปึง ปรอง ก็ ครอ เคิบ เยซู “ครอ ระ อิห กุด ปึง อิ นัน ดาย” เย็ห อัง เยซู ก็ ระ ปึง ปรอง นัน กุด อิ 33ปึง ปรอง ก็ ลด ทอก เจ็น เอา นัน โตะ กุด ปึง อิ อิ ก็ เลอะ เล็ง ปัด ตัก รัง คลิห ตัก นอก ทะเล กาลิลี นเซ็บ มด เงิก นอก เปิล แอ็ม มด
ครำ เกราซา ไอ มี ตอนฮับ เยซู
34ซุด เปิล อิ แลว ครำ เลียง อิ เม็จ อัห ก็ ญ็อก นเจิก อัห ก็ เล็ง ปัด แอ็ม อัห เล็ง เริล ไล ครำ ใน งวัล เคิบ ครำ ซะร็อห ทึห 35ครำ ทัว พานัน อัห ก็ เลอะ โตะ ดอม มด อัห เลอะ โตะ เคิง ตี เยซู อุ นัน อัห ก็ เม็จ ล็อง ตี งาล ปรอง กุด นัน เลาะ เล็ห แลว นำ เป็น เล็ห ครำ เลาะ วัล นำ คุด อุ นดิ เจ็ง เยซู นำ ก็ จึห โกบ จึห วะ เลียบลอย นำ ก็ งาล แอ็ม พีบา มี ซะติ เลาะ เม็จ นึง เลาะ วัล ครำ งวัล นัน เม็จ นำ เลาะ เล็ห คือนัน อัห ก็ เลอะ นเจิก มด
36ดก ครำ โตะ ดอม แทะ วัล ทาเน ครำ ตี เม็จ เลือง นัน เคิบ มัด ออ อัห ก็ เลามุน อน ตัก ครำ ตี โตะ แทะ ปัง วัล 37ทาเน ครำ ตี อุ แทว เกราซา พานัน อัห เม็จ คาว อัห ก็ เลอะ นเจิก มด อัห ก็ โตะ ครอ ระ เยซู ปัด แอ็ม เจ็นนัน เยซู ก็ ลด ต็อก เฮือ วัล แอ็ม
38ทาเน ล็อง ตัก ปรอง กุด นัน นำ ก็ วาง ครอ เริล เคิบ เยซู แต เยซู ไล นำ วัล เจิง ออ 39“มัห วัล เจิง ออ ติก ดาย ซะ จู มบลึ ตี เอาซาง จวย มัห เน มัห ก็ ต็อง ไล อน ตัก อัห ดาย” เยซู อัง แลว เยซู ไล นำ แลว เยซู เคิบ ลูกนอง ก็ ต็อก เฮือ วัล พาโนน เอา ล็อง นะ นำ ก็ ไอ มี กุญ เริล เคิบ เยซู เตาะ นำ วัล เจิง ออ ฮัก นำ ก็ เลามุน เลือง ตี เยซู จวย นำ นัน นำ ไล อน ตัก ครำ ใน งวัล ออ ปัง มด
ควัน มอน ไจรัด เคิบ อัหเม ตี คอบ เยซู
มัดทิว 9:18-26, มาระโก 5:21-43
40แลว เยซู ต็อก เฮือ โตะ พาโนน แลว ทาเน ก็ มี พซาซน ดก ล็อง เพา นำ อุ พาโนน นัน เป็น ปึง โตะ เยซู แลว อัห ก็ รูบ โตะ และ นำ 41-42ทาเน ก็ มี อัหคล็อง มี ล็อง นะ ซือ ตัก ไจรัด นำ เป็น ฮัวนา ฮ็อง พซุม ครำ ยิว มี งวัล นะ ไจรัด นะ มี ควัน มอน มี ล็อง อาญุ ซิบซอง ปี นำ โซะ บัก และ เปิล ไจรัด เม็จ เยซู นะ นำ ก็ โตะ และ เยซู นำ โตะ ตัก เยซู แลว นำ ก็ คุกโคล กราบ ไว เจ็ง เยซู นำ ก็ ครอ ระ เยซู จวย ควัน ออ ตัก เจิง เยซู ก็ เริล
ญาม เยซู กำลัง เริล เจิง ไจรัด นัน ปึง พซาซน ดก ล็อง ก็ แดก นำ เริล ตัก รวง 43ทาเน ก็ มี อัหเม มี ล็อง นะ นำ เล็ห รึดู ซิบซอง ปี แลว นำ และ มอ รักซา ออ ปึง มอ ก็ จวย นำ ไอ มี กุญ เงิน ทอง ซีวะ คอง นำ ก็ ซุด แอ็ม มด ซุด นำ เอิด รักซา นัง ออ นัน 44ทาเน นำ ก็ เริล เลิม เคิบ อัห ตี เคริบ เยซู นัน นำ เคริบ เยซู เริล แทะ ลอล นำ ก็ แดก โตะ คอบ ซิห นทัล โกบ เยซู ท็อบ นำ คอบ โกบ เยซู นัน นัง นำ ก็ ลด งาล โซะ นำ ลด เม็จ ซึก เมียม ใน นัง ออ ทิบ ฮัด แอ็ม
45ญาม เยซู เม็จจึด มี ครำ คอบ โกบ ออ นัน นำ ก็ ซ็วน ปึง อัห คือเน “ซีเอ คอบ โกบ เอิญ บ็อห” นำ อัง “อิห ไอ มี กุญ คอบ มัห” อัห อัง เปโตร ก็ ซวัล นำ คือเน “อาจาน มัห ซ็วน อังวะ มัห ก็ เม็จ แลว นอ ดก ครำ แดก มัห เริล นอ” เปโตร อัง 46เยซู ก็ ซวัล เปโตร คือเน “มี ครำ คอบ เอิญ ซีเละ นะ เพาะวา เอิญ เม็จ มี ริด อำนาด ทอก เจ็น นัง ออ ซีเละ นะ” นำ อัง
47ญาม อัหเม ล็อง นะ เม็จจึด เค็ย นำ งเกริม เลือง นัง ออ ไอ มี กุญ นำ ก็ ญ็อก ซีนเจิล มด ตึง นัง นำ ก็ ลด โตะ กราบ ไว เจ็ง เยซู นำ ก็ ไล นัง ออ ตัก เยซู เลาะๆ เค็ย “เป็น เอิญ เน ฮัก คอบ มัห ดาย ตี เอิญ ซีรอก คอบ มัห ก็ เอิญ ซีรอก ระ นัง ออ งาล โซะ ท็อบ เอิญ คอบ มัห นะ เอิญ ก็ ลด งาล โซะ ซีเละ” นำ ไล เยซู กาง มัด อัห มด นัน คือนะ 48เยซู เม็จ นำ กิว เจือ ออ ซีเละ นัน เยซู ก็ ไล นำ คือเน “ควัน เฮย มัห เลาะ เล็ห เน ก็ ญอน มัห เจือ ดาย มัห เริล เลาะๆ นทึห เตาะ” เยซู ไล นำ ฮุนนะ
49ญาม เยซู ควะ จ็อก อุ นัน ก็ มี ครำ มี ล็อง นะ โตะ เจ็น เจิง ไจรัด นำ โตะ ไล ไจรัด คือเน “อำ มัห รบกวน อาจาน เตาะ อำ ไล นำ โตะ เจิง ออ เตาะ ดาย ควัน มัห เปิล แลว” นำ อัง 50เยซู เม็จ นำ จ็อก คือนัน นำ ก็ ไล ไจรัด ฮุนเน “อำ ทืล เตาะ ดาย ควัน มัห ต็อง งาล โซะ ดาย เจือ เอิญ กา” เยซู ไล ไจรัด คือนะ
51-52เจ็นนัน เยซู ก็ เริล เลิม เคิบ ไจรัด เล็ห เจิง ไจรัด แลว เยซู ก็ กุด ควังใน เจิง นำ ไอ มี ปอ ระ อีเอ กุด เริล เคิบ ออ แต นำ ระ เปโตร ยอน ยากอบ เคิบ เอา เม ควัน แย็ด นัน เริล เลิม เคิบ ออ เตานะ อัห กุด ควังใน เจิง แลว อัห ก็ เม็จ ครำ เลอะ เญ็ม อุ มด อัห ตุกใจ เซียใจ ตี ควัน ไจรัด เปิล นัน อัห เญ็ม อุ นัน แต เยซู ก็ ไล อัห คือเน “แป เญ็ม อังวะ อำ แป เญ็ม เตาะ ดาย ควัน ไจรัด เน นำ ไอ มี จบ เปิล ซัง นำ อวย นไท อุ มาลือ” เยซู อัง 53ปึง อัห นะ ก็ เลอะ เซด เยซู อัห เซด นำ เพาะวา อัห เม็จ ควัน แย็ด นัน เปิล แอ็ม แลว
54ทาเน เยซู โตะ ควังใน เจิง นัน แลว นำ ก็ ก็อง ที ควัน ไจรัด นัน นำ ลด จ็อก เคิบ ควัน แย็ด นัน คือเน “ควัน เฮย ร็อห เนอ” นำ อัง 55ซีมาล ควัน แย็ด นัน ก็ ลบ วัล โตะ อุ เคิบ นำ วัล นำ ก็ รีด เล็ห วัล นำ ลด ลุก ร็อห ออ เยซู ก็ ไล เอา เม นำ พระ จะ อน นำ ป็อง 56เอา เม นำ เม็จ ควัน ออ รีด เล็ห วัล ปาม ก็ ญ็อก งึด แต เยซู ก็ ลด มบราง ปาม ไอ มี ระ ปาม ไล เลือง เน อน ตัก ซีเอ เตาะ
Markert nå:
ลูกา 8: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
