ลูกา 7
7
เยซู รักซา ลูกนอง นายรอย
มัดทิว 8:5-13, ยอน 4:43-54
1แลว เยซู จ็อก เคิบ พซาซน แลว นำ เคิบ ลูกนอง ก็ เริล งวัล คาเปอนาอุม 2ทาเน ก็ มี ทฮาน โรม มี ล็อง นำ เป็น นายรอย นายรอย ล็อง นะ ก็ รัก ลูกนอง ออ ซีเละ ลูกนอง นำ แร็ง โซะ บัก และ เปิล 3ทาเน นายรอย ล็อง นะ ก็ เม็จ คาว โตะ เยซู ตัก งวัล คาเปอนาอุม นัน นำ ก็ เริล และ ปึง พูนำ ครำ ยิว ตัก งวัล นัน นำ ไล ปึง พูนำ ครำ ยิว นัน เริล และ เยซู นำ ไล อัห เริล ครอ ระ เยซู จวย ลูกนอง ออ 4-5ปึง พูนำ นัน ก็ เริล และ เยซู อัห โตะ ตัก เยซู แลว อัห ก็ ครอ ระ เยซู จวย นายรอย ล็อง นัน อัห วาง ครอ เคิบ นำ คือเน “อาจาน ครอ เคิบ มัห เตาะ ดาย ตัก งวัล อิห เน มี นายรอย มี ล็อง นำ เป็น ครำ เลาะ ซีเละ นำ รัก ครำ ยิว แอ เน นำ จวย ซาง ฮ็อง พซุม อน ตัก งวัล อิห แลว ทาเน ลูกนอง นำ โซะ เท็ม อุ ตัก เจิง นำ ครอ ระ มัห จวย ลูกนอง ออ” ปึง พูนำ อัง
6-7แลว เยซู เม็จ ปึง พูนำ ไล ออ จังนะ แลว นำ ก็ เริล เลิม เคิบ อัห แต ญาม อัห เริล บัก และ เล็ห ตัก เจิง แลว นายรอย ก็ ไล เปือน ออ เริล และ เยซู ตัก รวง นัน เปือน นายรอย นัน ก็ เริล เม็จ เยซู ตัก รวง อัห ก็ ไล เยซู คือเน “อาจาน นาย คอง อิห เค็ย มัห อำ ลำบาก โตะ เจิง อิห เตาะ นำ เค็ย นัง ออ ไอ มี เลาะ ไอ มี ซมควน ระ มัห โตะ ตัก เจิง ออ ไอ มี เพาะ ระ มัห โตะ และ ออ แต นาย อิห เค็ย มัห มี แร็ง ดก ครอ ระ มัห จ็อก อุ ตัก เน ลือๆ ลูกนอง นำ ก็ งาล โซะ ลด นำ อัง 8เลือง ครำ มี อำนาด ไล นำ งาล โซะ นัน นำ เคาใจ เค็ย มัห มี อำนาด ดก ซีเละ ดาย นำ ก็ มี อำนาด มี ยาง นำ ก็ มี ฮัวนา มี อำนาด กวา ออ วัล กัน ฮัวนา นำ ไล แอง ซีวะ นำ ก็ แอง นำ จำเป็น ต็อง ปัง ฮัวนา ออ ทาเน นำ ก็ มี ลูกนอง ออ วัล นำ ไล ลูกนอง ออ เริล อัห ก็ เริล ไล อัห โตะ อัห ก็ โตะ นำ ไล อัห แอง ซีวะ อัห ก็ แอง มด เลือง มี อำนาด นัน นำ เคาใจ เลาะ ซีเละ นำ ก็ แก็นใจ เจือ เค็ย มัห มี แร็ง มี อำนาด ดก กัน มัห ไล ลูกนอง นำ งาล โซะ ลูกนอง นำ ก็ งาล โซะ ซีเละ นำ เจือ จังเน ดาย” เปือน นายรอย ไล เยซู จังนะ
9ญาม เยซู เม็จ เปือน นายรอย ไล ออ คือนะ นำ ก็ งึด ซีเละ นำ ก็ มบิด มัด ไล อัห ตี เริล เลิม เคิบ นำ นัน คือเน “ปัง ดาย ล็อง เน นำ เป็น ครำ กรอก ซอ แต นำ เจือ เอิญ ซีเละ เอิญ ไล แป นังเลาะ นะ เอิญ เริล ทัว ปะเทด อิซราเอล แอ เน เอิญ ไอ มี เม็จ ครำ อิซราเอล แอ เน แก็นใจ เจือ มอก เอา ล็อง เน ตี เป็น ครำ กรอก ซอ เอิญ เม็จ นำ มี ล็อง เดียว เน ตี กิว เจือ เอิญ ซีเละ” เยซู อัง 10เยซู จ็อก คือนะ แลว ปึง เปือน นายรอย นัน ก็ วัล เจิง โตะ เจิง แลว อัห ก็ เม็จ ครำ โซะ นัน งาล โซะ เลาะ แลม
เยซู จวย ควัน แมมาย ระ รีด เล็ห วัล
11เจ็นนัน วัล เยซู เคิบ ลูกนอง คอง ออ ก็ เริล งวัล นาอิน มี พซาซน ดก ล็อง เคริบ นำ เริล 12ญาม อัห ติ โตะ ตัก ปะตู งวัล แลว อัห ก็ เม็จ ครำ งโกง ซบ ทอก เจ็น งวัล ล็อง ตี เปิล นัน ควะ นุม อุ ทาเน เม ครำ เปิล นัน ก็ เป็น แมมาย นำ มี ควัน อัหคล็อง มี ล็อง เดียว ตัก เปิล แอ็ม นัน ทาเน อัห ก็ งโกง ซบ นัน ทอก เจ็น งวัล มี ครำ ดก ล็อง เริล ซง ซบ นัน
13ทาเน แมมาย ล็อง นัน ก็ เญ็ม เยซู เม็จ แมมาย ล็อง นัน เญ็ม นำ ก็ ตึ อัง แมมาย นัน ซีเละ นำ ก็ ไล แมมาย นัน คือเน “อำ เญ็ม เตาะ ดาย จ็อง” นำ อัง 14เจ็นนัน เยซู ก็ เริล คอบ ซิห ฮีบ ซบ นัน ครำ งโกง ฮีบ ก็ ลด ญ็อง อุ งเกิน เยซู ก็ ลด ไล ครำ เปิล นัน ร็อห “ร็อห เนอ ควน” นำ อัง 15ครำ เปิล นัน ก็ ลด รีด เล็ห ลด ร็อห คุด ลด จ็อก อุ เคิบ อัห วัล แลว เยซู แอง ระ นำ รีด เล็ห แลว เยซู ก็ เอิด ล็อง นัน อน ตัก เม นำ
16จู ล็อง ตี เม็จ เยซู แอง ระ ล็อง นัน รีด เล็ห วัล อัห ก็ เลอะ นเจิก มด อัห ก็ ลด อวด ลือ เอาซาง คือเน “มี ลาม เอาซาง ตี แกะ ทีซุด เกิด ตัก กรอก อิซราเอล แอ เน แลว เอาซาง โตะ จวย ครำ คอง ออ แลว” อัห อัง 17เจ็นนัน คาว เลือง เยซู นัน ก็ แปร เริล ทัว จังวัด ยูเดีย มด ครำ ตี อุ เยอะ ซะ ลำ จังวัด ยูเดีย นัน อัห ก็ เลอะ เม็จ คาว เลือง เยซู มด
ยอน ซีรอก เม็จจึด เยซู เป็น ซีเอ
มัดทิว 11:2-19
18ทาเน ลูกนอง ยอน เม็จ คาว เลือง เยซู แอง ซะ แปลก ดก มอก นัน อัห ก็ โตะ เลามุน อน ตัก ยอน ปัง ยอน เม็จ คาว เยซู แลว 19ยอน ก็ ไล ลูกนอง ออ เปียะ ล็อง เริล ซ็วน เยซู วัล ยอน ไล ปาม ซ็วน เยซู คือเน “ยอน ตี จุบ อัห ตัก นอก นัน นำ ไล เยอะ โตะ ซ็วน มัห ดาย นำ ซีรอก เม็จจึด เค็ย มัห เป็น ล็อง นัน ตี ยอน เค็ย โตะ แทะ ออ นัน แมน อัน ลู อิห ต็อง เพา ล็อง ซอ วัล” ยอน ไล ปาม ซ็วน เยซู คือนะ
20-21เจ็นนัน ปาม ก็ เริล ซ็วน เยซู ฮุน ยอน ไล อน ญาม นัน เยซู กำลัง จวย ครำ โซะ ซะเน ซะนัน ดก ล็อง ซีเละ ครำ ปรอง กุด นำ ก็ จวย ครำ บอด มัด นำ ก็ แอง ระ อัห ดอม ซะ ตาด กุญ 22เยซู ปัง ปาม ซ็วน ออ แลว นำ ก็ ไล ปาม เริล ไล ยอน คือเน “ซะ ตี ปา เม็จ เคิบ มัด เคิบ นโทล ออ งิ นะ เน ปา ต็อง เลามุน อน ตัก ยอน ปัง มด ดาย งิ นะ เน เอิญ จวย รักซา ครำ บอด มัด ระ อัห ดอม ซะ ตาด เอิญ จวย ครำ แว็ล ระ อัห นจาง กุญ เอิญ จวย ครำ คีเฮือน ระ อัห เลาะ เล็ห เอิญ จวย ครำ เกลิบ นโทล ระ อัห ปัง กุญ เอิญ จวย ครำ เปิล ระ รีด เล็ห วัล ครำ ตุก ครำ ญาก อัห ก็ เม็จ เอิญ ไล คาว เลาะ คาว แลม อน อัห (ตี เอิญ แอง จังเน ก็ มอก ลาม ไล อน ซีเละ) 23เจือ เอิญ นทึห เตาะ ซีเอ ตี ไอ มี ปันฮา เคิบ เอิญ เอาซาง ก็ แอง เลาะ เคิบ อัห ดาย” เยซู อัง
24ปน ลูกนอง ยอน วัล ออ แลว เยซู ก็ ซ็วน พซาซน เลือง ยอน คือเน “ญาม แป เริล และ ยอน ตัก ตี แลง นัน แป เริล อังวะ แป เริล ดอม นทูล ตี งกริม นทูด นโดน นทูด นแด็ห นัน แมน อัน ไอ แมน ก้า 25แป เริล ดอม ครำ ตี จึห คัว เลาะๆ ครึๆ นัน อัน ไอ แมน ก้า กัน แป ซีรอก เม็จ ครำ จึห คัว เลาะๆ ครึๆ แปงๆ นัน แป ต็อง ดอม ตัก เจิง พะเจายูฮัว ฮัก นอ 26กัน จังนะ ซัง แป เริล ดอม ซีวะ ตัก ตี แลง นัน แป เริล ดอม ยอน ตัก เป็น ลาม เอาซาง ฮัก นอ เอิญ ไล แป นังเลาะ นะ ยอน ล็อง เน นำ แกะ กวา ลาม เอาซาง ล็อง ซอ วัล 27เป็น ยอน ล็อง เนๆ ตี แญง เอาซาง เพีย ไล อน แลว เค็ย ‘ล็อง เน เป็น ลาม คอง เอิญ เอิญ ไล นำ เพีย เริล วาล มัด มัห ระ นำ เพีย เตียม รวง อน ตัก มัห’ แญง เอาซาง อัง มาลาคี 3:1
28เอิญ ไล แป นังเลาะ นะ ดาย ยอน ล็อง เน นำ มี เกียด ดก กวา ครำ ซอ มด จู ล็อง นำ มี เกียด ซีเละ ไอ มี ลาม ล็อง นเดย มี เกียด กวา นำ ซัก มี ล็อง (จู ล็อง ตี เกิด ตัก อัหเม นัน ไอ มี ซีเอ แกะ กวา ยอน เน) แต บัดนะ นโดน ญาม เล็ห งิ เอาซาง ปกคอง แอ นัน ครำ เอาซาง จู ล็อง ก็ มี เกียด กวา ยอน วัล ครำ ตี แย็ด ทีซุด อัห ก็ แกะ กวา ยอน วัล” เยซู อัง
29ทาเน ปึง พซาซน เม็จ เยซู จ็อก ฮุนนะ อัห ก็ เจือ เค็ย เอาซาง ไล แคระ ไล ซือ ซีเละ ครำ เก็บ พาซี ตี พซาซน เซ็ห อัง นัน อัห ก็ เจือ มด ครำ ปึง เน อัห เกย ระ ยอน แอง พิที จุบ นอก อน ออ แลว โตะ เยซู อัห ก็ ลด เจือ เยซู มด#ค 29 ปึง เน ระ ยอน จุบ ออ ตัก นอก ก็ เพาะวา อัห เจือ แญง ยอน อัห ลด เอิด ใจ แมะ อัห ลด พอม เจือ แญง เยซู วัล 30แต ปึง ฟาริซี เคิบ ปึง อาจาน ไล กด โมเซด นัน กำนา โตะ ยอน ไล อัห อัห ก็ ไอ มี ญอม ปัง แญง ยอน เตาะ อัห ไอ มี ญอม ระ ยอน จุบ ออ ตัก นอก เตาะ เจ็นนัน โตะ เยซู วัล อัห ก็ ไอ มี ญอม ปัง แญง เยซู วัล เพาะวา อัห ไอ มี ญอม แอง ตาม แพนกาน เอาซาง เตาะ
เยซู โป ครำ ซะไม นัน
31ทาเน เยซู ก็ ไล อัห ตอ วัล คือเน “เอิญ มเบิด ครำ ซะไม เน ตัก ซีวะ เลาะ บ็อห” เยซู อัง 32เยซู ก็ ลด มเบิด อัห มอก ปึง ควัน แย็ด นำ เค็ย “แป เน ก็ มอก ควัน แย็ด ตี ปิล นอย ตาม รวง ตาม เด็นเตะ นัน ควัน แย็ด อัห เค็ย นอย คือเน ‘อิห ปิล ดนตรี มวนๆ อน ตัก แป แป ก็ ไอ มี ญอม พอน อิห รอง เพลง เซาๆ อน แป ปัง แป ก็ ไอ มี ญอม เญ็ม’ อิห แอง จังนัก แป ก็ ไอ มี ปอใจ” ควัน แย็ด อัห เค็ย นอย มอก นัน 33แป ก็ มอก ควัน แย็ด เน แอง จังนัก แป ก็ ไอ มี ปอใจ เตาะ ยอน ตี จุบ แป ตัก นอก นัน นำ ก็ ทือ เน็ด นำ อด จะ นำ ไอ มี ออก ปุจ แป ก็ วัล เค็ย ปรอง กุด นำ วัล 34เอิญ ตี เอาซาง ระ เกิด เป็น ครำ เน ญาม เอิญ โตะ ป็อง จะ เลิม โตะ ออก เลิม เคิบ แป แป ก็ วัล เค็ย เอิญ เป็น ครำ คึด กะ ออก กะ ป็อง แป วัล เค็ย เอิญ แว ปุจ ตลอด แป วัล เค็ย เอิญ ซอบ เป็น เปือน เคิบ ครำ เก็บ พาซี เคิบ ครำ ไอ มี เลาะ วัล แอง จังนัก แป ก็ ไอ มี ปอใจ เตาะ
35แต ปันญา กิว เลาะ ไอ มี เลาะ นัน แอ เม็จจึด จังนัก ก็ แอ ดอม เอิด ตัก ครำ ตี ทือ ปันญา นัน ลด แอง มอก ปันญา นัน ไล อน กัน อัห แอง เลาะ แอ ก็ เคาใจ เค็ย ซะ ตี อัห ทือ นัน เป็น ปันญา เลาะ กัน อัห แอง ไอ มี เลาะ แอ ก็ เคาใจ เค็ย ปันญา ตี อัห ทือ นัน ไอ มี เลาะ
เยซู ป็อง จะ ตัก เจิง ซีโมน ครำ ฟาริซี
36ทาเน ก็ มี ครำ ฟาริซี มี ล็อง นะ ซือ ตัก ซีโมน นำ มพอล เยซู โตะ ป็อง จะ ตัก เจิง ออ เยซู ก็ เริล ป็อง จะ ตัก เจิง นำ เยซู ก็ เทิง อวย ป็อง จะ อุ ตัก เจิง นำ 37ทาเน ก็ โตะ อัหเม งวัล นัน มี ล็อง นำ เป็น อัหเม ไอ มี เลาะ นำ เม็จจึด เค็ย เยซู โตะ ป็อง จะ ตัก เจิง ซีโมน นัน นำ ก็ โตะ และ เยซู ตัก นัน นำ ก็อง ควด นำฮอม โตะ 38นำ ก็อง ควด นำฮอม โตะ ญ็อง อุ ไล เคา นดิ เจ็ง เยซู นำ ก็ เญ็ม พุย มัด นำ ก็ แจล ตัก เจ็ง เยซู ญ็อก เอิล มด นำ ก็ เอิด นโซก กึ ออ เจ็ด เจ็ง เยซู ระ ทัง นำ ลด จูบ เจ็ง เยซู เจ็นนัน นำ ก็ เอิด นำฮอม เงด ซิห ตัก เจ็ง เยซู นำ ลด ทู เจ็ง เยซู วัล
39ซีโมน ตี มพอล เยซู ป็อง จะ นัน เม็จ อัหเม ล็อง นัน แอง คือนัน นำ ก็ กึด ใน ใจ ออ ฮุนเน “บัห นอ กัน เอา ล็อง เน กิว เป็น ลาม เอาซาง ซีเละ นำ ก็ ต็อง เม็จจึด เค็ย อัหเม ล็อง เน เป็น ครำ ไอ มี เลาะ นำ ก็ ไอ มี ระ อัหเม ล็อง เน ก็อง นัง ออ เตาะ” นำ กึด คือนะ
40เยซู เม็จ ซีโมน กึด ใน ใจ ออ มอก นัน นำ ก็ ลด ไล ซีโมน คือเน “ซีโมน เอิญ เลามุน มี เลือง อน มัห ปัง ดาย” “เออะ ดิห ไล นทึห เตาะ” ซีโมน อัง 41เยซู ก็ ไล นำ คือเน “กัน มี ครำ เปียะ ล็อง เป็น นี เทาแก มี ล็อง นัน ยืม เงิน 500 เลียน มี ล็อง นัน วัล ยืม ฮา เลียน 42แต ปาม ตึง เปียะ ล็อง เน ไอ มี เงิน อน ตัก เทาแก เทาแก นัน ก็ ลด ไอ มี ซ็วน เอิด เงิน ซีวะ ตัก ปาม เตาะ นำ จวย ปาม กวัด ตึง เปียะ ล็อง นอ แต มัห กึด จังนัก บ็อห เปียะ ล็อง ตี ยืม เงิน เทาแก เน ล็อง นเดย รัก เทาแก ดก ทีซุด บ็อห” เยซู อัง 43ซีโมน ก็ ซวัล เยซู คือเน “เอิญ กึด เค็ย ล็อง ตี เอาเลียง ญ็อก แอ็ม นี ดก ทีซุด นัน นำ รัก เทาแก ดก ทีซุด” ซีโมน อัง เยซู ก็ ไล นำ “แมน มัห ซวัล คือนะ ก็ แคระ แลว ดาย” เยซู อัง
44-46ทาเน เยซู ก็ งแก็ล ดอม อัหเม ล็อง นัน นำ ก็ ไล ซีโมน คือเน “เอิญ โตะ เจิง มัห มัห ก็ ไอ มี กุญ พุจ เจ็ง เอิญ มัห ไอ มี ไว เอิญ มัห ไอ มี กุญ เอิด นำมัน ตา ซิห ตัก กึ เอิญ นอ แต อัหเม ล็อง เน นำ เอิด พุย มัด ออ พุจ เจ็ง เอิญ นำ เอิด นโซก กึ ออ เจ็ด เจ็ง เอิญ ระ ทัง วัล นำ ก็ เอิด นำฮอม ทู เจ็ง เอิญ วัล เจ็น เอิญ กุด เจิง มัห เน อัหเม ล็อง เน นำ ไว เจ็ง เอิญ ไอ มี ญัง เตาะ” เยซู อัง
47เยซู ก็ ไล ซีโมน วัล “เอิญ ไล มัห นังเลาะ นะ อัหเม ล็อง เน นำ เคาใจ นัง ออ ลุห ดก ซีเละ แต เอาซาง ไอ มี ทือ ลุห นำ เตาะ นำ ก็ ลด รัก เอาซาง ดก ซีเละ แต กัน ซีเอ กึด เค็ย นัง ออ ลุห แย็ด เอาซาง ไอ มี ทือ ลุห นำ ก็ ตึก นำ ก็ ไอ มี ปอ รัก เอาซาง เตาะ นำ เยา เอาซาง ไอ มี ปอ จวย ออ ดก ปานเดย เตาะ” เยซู อัง
48เยซู ก็ ลด ไล อัหเม นัน คือเน “ซะ ลุห ตี มัห เกย แอง นัน เอิญ ญ็อก แอ็ม แลว เอิญ ไอ มี ทือ ลุห มัห เตาะ ดาย” เยซู อัง 49ครำ ตี ป็อง จะ เลิม นัน อัห ก็ กึด คือเน “เอ ล็อง เน นำ เป็น อีเอ บ็อห ซีวะ นำ จบ เค็ย ญ็อก แอ็ม ลุห ครำ กุญ” อัห อัง 50ทาเน เยซู ก็ ไล อัหเม นัน คือเน “มัห ปน แอ็ม เจ็น ลุห ญอน มัห เจือ เอาซาง ฮัก ดาย มัห เริล เลาะๆ ดาย” เยซู อัง
Markert nå:
ลูกา 7: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
