ลูกา 9
9
เยซู ไล ลูกนอง เริล ซอน อัห
มัดทิว 10:5-15, มาระโก 6:7-13
1ทาเน อุ เจ็นนัน วัล เยซู ก็ งกรอ ปึง ลูกนอง ซิบซอง ล็อง โตะ และ ออ อัห โตะ และ นำ แลว นำ ก็ อน แร็ง อน อำนาด ออ ตัก อัห ระ อัห มบรึห ปรอง กุญ มด จู มบลึ ระ อัห รักซา ครำ โซะ ระ เลาะ เล็ห กุญ 2แลว เยซู อน แร็ง ตัก ลูกนอง ออ แลว นำ ก็ ไล อัห เริล ไล คาว เลาะ เลือง เอาซาง ปกคอง โลก ระ อัห จู ล็อง กุญ เม็จ กุญ ปัง นำ ก็ ไล อัห จวย รักซา ครำ โซะ ระ เลาะ เล็ห วัล
3เจ็นนัน วัล นำ ก็ ไล อัห คือเน “ญาม แป เริล ไล คาว เลาะ เน ก็ อำ แป เอิด ซับ ซีวะ เริล เตาะ เป็น งเกราะ เป็น ทง เป็น ซะ ป็อง เงิน ทอง คัว ทาย ก็ อำ นจวัน เริล เตาะ 4กัน เล็ห ตัก งวัล นเดย แลว ก็ มี ครำ ซีรอก ปัง แป ก็ พัก อุ เคิบ อัห แต กัน แป พัก อุ ตัก เจิง ลัง นเดย แป ก็ พัก อุ เจิง ลัง นัน ต็อง พัก อุ เจิง ลัง นัน จำปอ แป ทอก เจ็น งวัล นัน ดาย ไอ มี จำเป็น เปียน ตี พัก คอง ออ เตาะ 5แต กัน งวัล นเดย ไอ มี ตอนฮับ แป ไอ มี ซีรอก ปัง แญง แป แป ก็ ต็อง พระ แอ็ม งวัล นัน ลด เริล งวัล ซอ วัล ญาม แป ทอก เจ็น งวัล อัห นัน แป ก็ ต็อง นโจ็ห แอ็ม พุน ตัก เจ็ง แป นัน แป แอง จังนัน ก็ ระ งวัล นัน เม็จ ซึก นัง ออ ระ อัห เคาใจ เค็ย อัห แอง ลุห ซีเละ แป ไอ มี จำเป็น ฮับพิดซอบ อัห วัล เตาะ” เยซู ไล ลูกนอง ออ คือนะ
6แลว เยซู ไล ปึง ลูกนอง ออ แลว ปึง ลูกนอง นัน ก็ ลด เริล ออ อัห ก็ เริล มด จู งวัล มอก เยซู ไล อน นัน อัห ก็ ไล คาว เลาะ เลือง เอาซาง โตะ ปกคอง โลก อัห ก็ จวย รักซา ครำ โซะ เพะ ระ เลาะ เล็ห วัล
7-8พซาซน อัห ก็ กึด ดก มบลึ เลือง เยซู นัน มี แกด ล็อง อัห เค็ย เยซู เป็น เอลียา โตะ มแบละ นัง ออ ตัก พซาซน วัล แกด ล็อง อัห เค็ย เยซู เป็น ลาม เอาซาง ล็อง ซอ ตัก อิง ตี รีด เล็ห วัล แกด ล็อง ก็ เค็ย เยซู เป็น ยอน ตี จุบ อัห ตัก นอก ยอน เปิล แลว แต อัห เค็ย เยซู เป็น ยอน รีด เล็ห วัล อัห จ็อก ไอ มี เมือนนอย เตาะ ทาเน พะเจายูฮัว เฮโรด ตี ปกคอง จังวัด กาลิลี นัน นำ ก็ เม็จ คาว เลือง เยซู แอง ซะ แปลก ดก มบลึ นำ เม็จ อัห จ็อก เค็ย เยซู เป็น ล็อง เน ล็อง นัน นำ ก็ ลด ซงไซ อุ 9นำ ก็ กึด ใน ใจ ออ คือเน “เอ ยอน เอิญ ก็ โค็ห แอ็ม งคอ นำ แลว นีห นำ รีด เล็ห วัล นังเลาะ บ็อห” เฮโรด กึด จังเน อุ เจ็นนัน นำ ก็ ซีรอก เม็จ มัด เยซู ซีเละ
10แลว ปึง ตัวแทน เยซู เริล มด จู งวัล มอก เยซู ไล อน แลว อัห ก็ วัล โตะ จ็อก เคิบ เยซู จู มบลึ ตี อัห เริล แอง เคิง งวัล อัห นัน อัห ก็ เลามุน อน ตัก เยซู ปัง มด เจ็นนัน เยซู ก็ มพอล ลูกนอง ออ เริล งวัล เบ็ดไซดา วัล อัห เริล เค็ดๆ จุม อัห ฮัก
เยซู อน ซะ ป็อง ตัก ครำ ดก
มัดทิว 14:13-21, มาระโก 6:30-44, ยอน 6:1-14
11ทาเน ดก ครำ เม็จ คาว เค็ย เยซู เริล งวัล เบ็ดไซดา อัห ก็ เคริบ และ นำ ตัก นัน โตะ อัห แลว เยซู ก็ มพอล อัห โตะ และ ออ นำ ก็ เลามุน เลือง เอาซาง โตะ ปกคอง โลก เน อน อัห ปัง กัน มี ครำ โซะ โตะ เลิม เคิบ อัห นำ ก็ รักซา อัห ระ งาล โซะ มด จู ล็อง
12ทาเน ญาม เยซู นเจ็น ปึง พซาซน อุ นัน ก็ เคริบ แมด ซะ บัก และ แจ็ล ปึง พซาซน ก็ ควะ อุ นัน ดก ล็อง ซีเละ ทาเน ปึง ลูกนอง ซิบซอง ล็อง นัน อัห ก็ โตะ ไล เยซู ฮุนเน “อาจาน แมด ซะ บัก และ แจ็ล แลว ดาย ตัก เน ก็ เยอะ ซะ เจ็น งวัล นอ ครอ ระ มัห ไล ปึง พซาซน เริล และ ซะ ป็อง และ ตี อวย ตัก งวัล ติๆ พาเน วาล มานะ เน ก็ บัก และ แจ็ล แอ็ม แลว นอ” อัห อัง
13แต เยซู ไล ลูกนอง ออ คือเน “แป และ ซะ ป็อง อน อัห ฮัก ดาย” นำ อัง อัห ก็ ซวัล นำ “ฮีเอิห อาจาน อิห ไอ มี ซีวะ ดก ดาย มี คนมปัง ฮา แพ็น เคิบ คา เปียะ นัง เตานะ กัน นเซอะ ปอ ป็อง อิห ต็อง เริล โละ ทน ซัง ปอ อน อัห จู ล็อง มัห ไล อิห เริล ทน นังเลาะ อัน” อัห อัง เค็ย เยซู 14ครำ ปึง นัน ก็ ดก ล็อง ซีเละ นับ จุม อัหคล็อง ฮัก ก็ มี ซม ฮา พัน ล็อง เน ทาเน เยซู ก็ ไล ลูกนอง ออ ไล อัห คุด เป็น ปึง เป็น ปึง มี ปึง นเดย ฮาซิบ ล็อง
15ปึง ลูกนอง นัน ก็ แอง ฮุน เยซู ไล อน อัห ก็ ไล ปึง ครำ ดก นัน คุด เป็น ปึง เป็น ปึง 16แลว อัห คุด มด แลว เยซู ก็ เอิด คนมปัง เคิบ คา นัน นำ ก็ ดอม วาง ทึห ลด คอบคุน เอาซาง เจ็นนัน เยซู ก็ เพก คนมปัง เคิบ คา นัน แบง อน ตัก ลูกนอง ออ ลูกนอง ก็ แบง อน ตัก ปึง พซาซน ป็อง 17อัห ก็ ป็อง อิม มด จู ล็อง จู นัง แลว อิม อัห แลว ก็ ควะ เลือ วัล อัห เก็บ อัน ตี ควะ เลือ นัน กุญ ซิบซอง บุง ปิ วัล
เยซู เป็น พูจวย ตี เอาซาง ตัง ระ อน
มัดทิว 16:13-19, มาระโก 8:27-29
18มี มี งิ นัน เยซู ก็ พระ แอ็ม ปึง ครำ ดก นัน นำ เริล ครอ วอน เอาซาง มี ตี ฮัก มี แต ลูกนอง เริล เลิม เคิบ นำ นำ ก็ ซ็วน ลูกนอง คือเน “อัหซอ อัห เค็ย เอิญ เป็น ซีเอ บ็อห” นำ อัง 19ปึง ลูกนอง ก็ ซวัล นำ ฮุนเน “แกด ล็อง เค็ย มัห เป็น ยอน ตัก จุบ อัห ตัก นอก นัน แกด ล็อง ก็ เค็ย มัห เป็น เอลียา แกด ล็อง ก็ เค็ย มัห เป็น ลาม เอาซาง ตัง อิง มี ล็อง ตี รีด เล็ห วัล” อัห อัง 20นำ ก็ ซ็วน ลูกนอง ออ คือเน วัล “แต แป เน ดุห แป เค็ย เอิญ เป็น ซีเอ” นำ อัง เปโตร ก็ ซวัล นำ “มัห เป็น เมซียา ตี เอาซาง ซันญา โตะ จวย อิห นัน” เปโตร อัง 21แลว เปโตร ซวัล เยซู ฮุนนัน แลว เยซู ก็ ลด มบราง ลูกนอง ออ นำ ไอ มี ระ อัห ไล เลือง เน อน ตัก อีเอ ปัง เตาะ
เยซู เพีย ไล เลือง นัง ออ
มัดทิว 16:20-28, มาระโก 8:30—9:1
22เจ็นนัน เยซู ก็ ลด ไล ปึง ลูกนอง ออ คือเน วัล “เอิญ ตี เอาซาง ระ เกิด เป็น ครำ เน เอิญ ก็ ต็อง อด โซะ ดก มบลึ ปึง ฮัวนา ครำ ยิว ปึง มอ เอาซาง แกะ เคิบ ปึง อาจาน ซอน กด โมเซด นัน อัห ไอ มี ญอม ฮับ เอิญ อัห ก็ ซำ มเบิล แอ็ม เอิญ วัล แต แพะ งิ เจ็นนัน วัล เอิญ ก็ รีด เล็ห วัล” เยซู ไล ลูกนอง ออ ฮุนนะ
23แลว เยซู ไล เลือง นัง ออ อน ตัก ปึง ลูกนอง ปัง แลว นำ ก็ ลบ ไล ปึง พซาซน ฮุนเน วัล “เอิญ ไล แป นังเลาะ นะ กัน อีเอ ซีรอก เป็น ลูกนอง เอิญ อัห ต็อง ตาม ใจ เอิญ ไอ มี ตาม ใจ ออ อัห ต็อง พอม อด ตุก อด ญาก เคริบ เอิญ เริล จู งิ มี เลือง ซีวะ ญาก ก็ ตึก ต็อง พอม อด เอิด มด มอก อัห ตอล งกรัง ซีโรด ออ เลิม เคิบ เอิญ นัน 24กัน เอา นเดย ญอม เปิล ญอม อด ตุก อด ญาก ญอน อัห ไล คาว เลาะ เลือง เอิญ อน อัหซอ ปัง วัล เอา นัน ก็ รีด อุ แต กัน เอา นเดย รักซา ซีวิด ออ ระ อน เอา นัน ก็ ต็อง เปิล แอ็ม วัล 25กัน ซีเอ มี ซะ จู มบลึ ใน โลก เน แต ไอ มี กุญ รีด อุ เคิบ เอาซาง จำ นเดย จำ กวา นัน ก็ ไอ มี ปะโยด ซีวะ เตาะ
26มานะ เน กัน เอา นเดย กราญ ไอ มี ฮาน เจือ เอิญ เคิบ ไอ มี ฮาน เจือ แญง เอิญ วัล บัดนะ เอิญ ตี เอาซาง ระ เกิด เป็น ครำ เน เอิญ ก็ ไอ มี เอิด อัห เป็น ครำ คอง ออ เตาะ เอิญ เป็น ล็อง นัน ตี เอาซาง ระ เกิด เป็น ครำ บัดนะ เอาซาง ก็ ระ เอิญ โตะ เลิม เคิบ ปึง เทวาดา มด เอิญ ก็ โตะ ยาง ครึ ญาม นัน บัดนะ เอิญ ก็ ไอ มี ญอม ฮับ อัห ดาย เอิญ แอง ฮุน ไอ มี เม็จจึด เคิบ อัห 27เอิญ ไล แป นังเลาะ นะ ดาย มี แกด ล็อง ใน ปึง แป ตี ญ็อง อุ เนๆ แป ไอ มี เปิล จำปอ แป เม็จ เอาซาง ปกคอง โลก เน” เยซู อัง
เยซู ระ อัห เม็จ เกียด คอง ออ
มัดทิว 17:1-8, มาระโก 9:2-8
28อุ เจ็นนัน วัล ปะมาน แปด งิ เน เยซู ก็ มพอล เอิด เปโตร ยอน ยากอบ นำ มพอล อัห เริล ครอ วอน เอาซาง ตัก ญวัง ทึห 29ญาม เยซู ครอ วอน เอาซาง อุ นัน มัด เยซู ก็ เปียน แอ็ม มด คัว นำ ก็ เปียน แอ็ม มด คัว นำ ก็ พัห ซัล 30ทาเน ก็ พด โตะ อัหคล็อง เปียะ ล็อง โตะ จ็อก อุ เคิบ เยซู โตะ โมเซด เคิบ เอลียา 31นัง ปาม ก็ ทาง ฮุน เทวาดา เลาะลัห ซีเละ ทาเน ปาม ก็ เลามุน อุ เคิบ เยซู อัห เลามุน เลือง เยซู ต็อง เปิล ตัก เมือง เยรูซาเล็ม บัดนะ นำ ต็อง เปิล ฮุน เอาซาง กึด เจ็น อิง แลว เยซู เคิบ ปาม ก็ เลามุน เลือง นัน อุ
32ทาเน ญาม อัห ควะ อุ ตัก ญวัง ทึห นัน เปโตร เคิบ เปือน ก็ แร็ง เจ็ม มัด อัห ก็ ญึด นไท แอ็ม ทาเน อัห ก็ คุล ร็อห ลัก อัห ก็ ปัก เม็จ นัง เยซู ทาง ซีเละ เซ็ล รับๆ อัห ก็ เม็จ โมเซด เคิบ เอลียา จ็อก อุ เลิม เคิบ เยซู
33เจ็นนัน ญาม โมเซด เคิบ เอลียา บัก และ เริล ออ เปโตร ก็ จ็อก แต นำ ไอ มี เม็จจึด จ็อก จังนัก นำ ก็ ลด ซ็วน ซิห เยซู คือเน “อาจาน แอ อุ เน ก็ เลาะ นอ อิห แอง ตุบ อน แป แพะ ลัง ดาย แอง อน มัห มี ลัง โมเซด มี ลัง เอลียา มี ลัง นอ” นำ อัง 34นำ จ็อก ก็ ไอ มี ตัน จบ ก็ พด โตะ บด ปุก ระ อัห เปโตร เคิบ เปือน ก็ แร็ง นเจิก วัล
35เจ็นนัน ก็ มี แญง จ็อก เจ็น บด นัน คือเน “เน เป็น ควัน เอิญ เอิญ เลือก เอิด นำ ระ อน แลว แป ต็อง ปัง แญง นำ เลาะๆ ดาย” แญง นัน อัง 36ซุด แญง นัน จ็อก ออ แลว อัห ก็ เม็จ ควะ เยซู อุ มี ล็อง เดียว ฮัก ทาเน เปโตร เคิบ เปือน เม็จ เลือง เน อัห ก็ เค็ด อุ ไอ มี ฮาน อัห เลามุน อน ตัก อีเอ ปัง เตาะ
เยซู มบรึห ปรอง ทอก เจ็น ควัน อัห
มัดทิว 17:14-18, มาระโก 9:14-27
37ปัห ซะ ตัก งกร็อห เยซู เคิบ ลูกนอง ออ แพะ ล็อง นัน ก็ จูล เจ็น ญวัง เล็ห เซ็บ แลว ก็ มี ปึง พซาซน อุ นัน ดก ล็อง อัห ก็ รูบ โตะ และ นำ 38ทาเน ก็ มี อัหคล็อง มี ล็อง ตัก ปึง นัน นำ งกรอ เยซู จวย ควัน ออ “อาจาน ครอ เคิบ มัห จวย ควัน เอิญ แด ดาย เอิญ มี ควัน อัหคล็อง มี ล็อง เดียว นะ 39ปรอง ก็ ซำ กุด นำ เย็ห แอง ระ นำ โซะ ดก ซีเละ ปรอง กุด นำ ญาม นเดย นำ ก็ นซาก นำ ก็ ปรึห นำ เพลิด แด็ดๆๆ เล็ห มพวก งกาบ นำ มด นเซ็ม นัง นำ นแด็ก ปรอง มัน กุด นำ ไอ มี บอ พระ นำ เตาะ เย็ห แอง ระ นำ กุญ โซะ ตลอด 40เอิญ ก็ ไล ลูกนอง มัห มบรึห เย็ห ทอก อัห ก็ แอง ไอ มี กุญ เตาะ” นำ ไล เยซู คือนะ
41ทาเน เยซู ก็ ซวัล ล็อง นัน คือเน “บา แป เน ไอ มี เจือ เอิญ นอ เอิญ ต็อง ซอดแซ็ง อุ เคิบ แป อิง ปานเดย บ็อห ซัง แป แก็นใจ เจือ เอิญ เน” เยซู อัง นำ ก็ ไล เอา นัน ซับ ควัน ตัก ออ 42ญาม ควัน นำ กำลัง นจาง โตะ และ เยซู นัน ปรอง ก็ แอง ระ นำ ปลุม กิล เพลิด แด็ดๆๆ เจ็นนัน เยซู ก็ ลด มบรึห ปรอง ปัด แอ็ม เจ็น ควัน ล็อง นะ ควัน ล็อง นัน ก็ ลด เลาะ เล็ห วัล เยซู ก็ ซับ ควัน แย็ด นัน ตัก เอา นำ ลด
เยซู เค็ย นัง ออ ต็อง เปิล
มัดทิว 17:22-23, มาระโก 9:30-32
43อัห เม็จ เยซู มบรึห ปรอง กุญ นัน อัห ก็ ญ็อก งึด อัง เอาซาง อัห งึด ซีเละ ตี นำ มี แร็ง มี อำนาด ดก มอก นัน ญาม ปึง พซาซน ควะ งึด อัง เยซู ตี นำ แอง ซะ แปลก นัน เยซู ก็ ไล ลูกนอง ออ เค็ย 44“ดอม บัดนะ ดาย เอิญ ตี เอาซาง ระ เกิด เป็น ครำ เน บัดนะ อัห ก็ ต็อง มอบ เอิญ อน ตัก อัหซอ ระ อัห มเบิล แอ็ม แญง ตี เอิญ ไล แป เน ครอ ระ แป จำ อน เลาะๆ ดาย” นำ อัง เค็ย อัห 45เยซู ไล อัห ซือๆ ฮุนนัน แต ปึง ลูกนอง ก็ ไอ มี เคาใจ เตาะ มอก เอาซาง นเดิด แอ็ม ใจ อัห เติล แอ็ม นโทล อัห ไอ มี ระ อัห เคาใจ อัห ไอ มี เคาใจ อัห ก็ ซำ ไอ มี ฮาน ซ็วน นำ วัล
ซีเอ แกะ ทีซุด
มัดทิว 18:1-5, มาระโก 9:33-37
46อุ เจ็นนัน วัล ลูกนอง เยซู อัห ก็ เทียง นอย เลือง ซีเอ แกะ กวา นอย ตาง ล็อง ตาง จ็อก เค็ย “เอิญ แกะ กวา แป มด” อัห อัง เค็ย นอย
47เยซู เม็จ อัห เทียง นอย คือนัน นำ ก็ ทาก เอิด ที ควัน แย็ด มี ล็อง นะ ระ นำ ญ็อง อุ นดิ ออ ระ อัห ดอม 48นำ ก็ ไล ลูกนอง ออ คือเน “ล็อง นเดย ตี ท็อม นัง ออ ลด ญอม เป็น เปือน ควัน แย็ด ล็อง เน ไอ มี เซ็ห อัง ควัน แย็ด ล็อง เน ญอน นำ ทือ เอิญ ก็ มอก อัห เป็น เปือน เอิญ ก็ มอก อัห ไอ มี เซ็ห อัง เอิญ อัห ก็ ซำ เป็น เปือน เอา ล็อง นัน ตี ไล เอิญ โตะ ตัก โลก เน เอิญ ไล แป นังเลาะ นะ ใน ปึง แป เน เอา นเดย ตี ญอม ท็อม นัง ออ ไอ มี ทือ นัง ออ เอา นัน ก็ เป็น ซะ แกะ ทีซุด บัดนะ วัล” เยซู อัง
ครำ ไอ มี เค็ย แอ อัห อุ เพียห แอ แลว
มาระโก 9:38-40
49ทาเน ยอน ก็ โตะ ไล เยซู วัล คือเน “อาจาน มี อัหคล็อง มี ล็อง นะ อิห เม็จ นำ มบรึห ปรอง อุ อิห เม็จ นำ จ็อก คือเน ‘เอิญ เอิด อำนาด เยซู ไล มัห ปัด’ เอา ล็อง นะ อัง อิห เม็จ นำ ไอ แมน ปึง แอ อิห ก็ ลด มบราง นำ” ยอน ไล เยซู จังนะ 50เยซู ก็ ซวัล ยอน คือเน “อำ มบราง นำ เตาะ ซีเอ ก็ ตึก กัน อัห ไอ มี เกิ๊ด รวง แอ อัห ก็ เป็น ครำ ปึง แอ แลว” เยซู อัง
เยซู โป ยอน เคิบ ยากอบ
51ทาเน ก็ บัก และ เล็ห งิ เอาซาง เอิด เยซู เริล อุ เคิบ ออ ทึห เยซู นำ ก็ ตังใจ บัก และ เริล เมือง เยรูซาเล็ม 52แต นำ เริล ลัห จังวัด ซะมาเรีย นำ ก็ ต็อง พาน จังวัด ซะมาเรีย นัน ตัก ซะมาเรีย นัน ก็ มี มี งวัล นะ นำ ซีรอก แวด แอว ตัก งวัล นะ นำ ก็ ไล ลูกนอง ออ แกด ล็อง เพีย เริล ไล อัห ตัก งวัล นะ วาล ลูกนอง นำ ก็ เริล ไล ครำ งวัล นะ ระ อัห เพีย เตียม ซะ เตียม วะ ตอนฮับ เยซู 53แต ครำ งวัล นะ อัห ไอ มี ซีรอก ตอนฮับ เยซู เพาะวา อัห เม็จ คาว นำ อง เริล เมือง เยรูซาเล็ม#ค 53 อัห ไอ มี ซีรอก ตอนฮับ เยซู ก็ เป็น ตัก นำ อง เริล เมือง เยรูซาเล็ม ครำ ซะมาเรีย มี วิฮาน คอง ออ แลว ตี เยซู ซีรอก เริล เยรูซาเล็ม นัน อัห เยา เยซู ไอ มี ญอม ฮับ ซาดซะนา ออ อัห ก็ ไอ มี ซนใจ ตอนฮับ นำ เตาะ อัห ก็ ลด ไอ มี ซีรอก ตอนฮับ นำ 54ทาเน ยอน เคิบ ยากอบ เม็จ อัห ไอ มี ตอนฮับ เยซู ปาม ก็ อ็อด ซีเละ ปาม ก็ ลบ วัล ซ็วน เยซู คือเน “งกีจ็อง มัห ระ อิห ครอ เอาซาง มพลิห โอด เจ็น วาง ทึห โทจ แอ็ม งวัล อัห เลาะ อัน” ปาม อัง 55แต เยซู ก็ โป ซิห ปาม ตี ปาม กึด มอก นัน 56เจ็นนัน เยซู ก็ ไอ มี เริล งวัล นัน เตาะ นำ มพอล ลูกนอง ออ เริล งวัล ซอ วัล
เป็น ลูกนอง เยซู ต็อง แอง จังนัก
มัดทิว 8:19-22
57ทาเน อัห ก็ เริล ออ ญาม อัห นจาง เริล ตาม รวง นัน ก็ มี อัหคล็อง มี ล็อง นะ ซ็วน เริล เคิบ เยซู “อาจาน เอิญ ครอ เริล เคิบ มัห ดาย กัน มัห เริล พานเดย เอิญ ก็ เริล เคิบ มัห มด” นำ อัง 58เยซู ก็ มเบิด ซวัล นำ ฮุนเน “ซวะ นจ็อย เย็ห ก็ มี ตี อุ ตี อวย คอง ออ ตัก กรืบ เซ็ม ก็ มี มพวย คอง ออ แต เอิญ ตี เอาซาง ระ เกิด เป็น ครำ เน เอิญ ไอ มี เจิง ไอ มี ตี อุ ไอ มี ตี อวย เตาะ มัห เริล เคิบ เอิญ อังวะ” เยซู อัง
59ทาเน เยซู ก็ มพอล เอิด ครำ มี ล็อง วัล เริล เคิบ ออ “มัห เริล เคิบ เอิญ เป็น ลูกนอง คอง เอิญ ดาย” เยซู อัง เอา ล็อง นะ ก็ ซวัล เยซู คือเน “เออะ ดิห งกีจ็อง แต เอิญ เพา ระ เปิล เอา ออ วาล เอิญ เพา เทิ๊บ เอา ออ วาล ซัง เอิญ กอย เริล เคิบ มัห ดาย” นำ อัง 60เยซู ก็ ไล นำ คือเน “ระ ครำ เปิล เพา นอย เทิ๊บ นอย ออ ฮัก แต ซำรับ มัห มัห เริล ไล เลือง เอาซาง อน อัห ปัง ติกๆ ก็ เลาะ ดาย” เยซู อัง
61เจ็นนัน ก็ มี มี ล็อง วัล ซ็วน เริล เคิบ เยซู นำ ไล เยซู คือเน “งกีจ็อง เอิญ เริล เคิบ มัห ซีเละ ดาย แต เอิญ ต็อง ลา ควน ลา นไจ ออ ตัก เจิง วาล” นำ อัง เค็ย เยซู 62เยซู ก็ มเบิด ซวัล นำ ฮุนเน “กัน เอา นเดย ไท ซิก อัห ก็ ต็อง ไท เริล วาล มัด ติกๆ ไอ ปานัน ก็ แปล็ด รอง ครำ ตี ฮับไจ เอาซาง ก็ มอก นัน นำ ต็อง กึด งาน เอาซาง มี มบลึ เดียว นะ ไอ ปานัน นำ ไอ มี เพาะ เป็น ครำ เอาซาง เตาะ” เยซู อัง
Markert nå:
ลูกา 9: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
