ยอน 8
8
อัห เญ็บ อัหเม ซับ ตัก เยซู
1ทาเน เยซู ก็ เริล เจ็น เมือง เยรูซาเล็ม นำ วัล ออ ตัก ญวัง แพะ ค็อก#ค 1 ญวัง แพะ ค็อก เน อุ ติ ซะ เคิบ เมือง เยรูซาเล็ม 2ปัห ซะ ตัก งกร็อห นำ ก็ ลบ โตะ ตัก วิฮาน เอาซาง วัล อุ มี ญาม เจ็นนัน ก็ โตะ ครำ ทึดๆ โตะ ปัง แญง นำ เยซู ก็ คุด นเจ็น อัห อุ นัน 3ญาม เยซู ควะ นเจ็น อัห อุ นัน ก็ โตะ ปึง อาจาน เคิบ ครำ ฟาริซี อัห ซับ อัหเม มี ล็อง นะ ตัก เยซู อัหเม ล็อง นะ นำ ปิล จู อัห เม็จ นำ เคิบ มัด ออ ฮัก อัห ก็ เญ็บ นำ ซับ ตัก เยซู อัห ระ นำ ญ็อง อุ เคิง มัด ปึง พซาซน ตี ปัง เยซู อุ นัน
4ทาเน ปึง ฟาริซี นัน อัห ก็ ซ็วน เยซู คือเน “อาจาน อัห เม็จ อัหเม ล็อง เน ปิล จู อัห เม็จ นำ เคิบ มัด ออ ฮัก 5กด โมเซด ไล อน เค็ย กัน มี ครำ ปิล จู แอ ต็อง เอิด เกียง กวาง อัห มเบิล แอ็ม อัห มัห ดุห มัห เค็ย จังนัก แอ เอิด เกียง กวาง นำ มเบิล แอ็ม นำ เลาะ อัน” ปึง ฟาริซี ซ็วน เยซู จังนะ#กด เอาซาง 20:10, กด ลบ ซอง 22:22-24
6ตี อัห ซ็วน เยซู จังนัน อัห ซีรอก และ เลือง พอง นำ นำ ลด เอิด น็วห ที ออ เคียน ซะ ตัก พุน ซิก นำ ไอ มี งเคาะ ซวัล อัห 7อัห ก็ ซ็วน เยซู ติกๆ อัห ไล นำ ซวัล เวิดๆ เน เจ็นนัน เยซู ก็ ร็อห ญ็อง นำ ไล อัห คือเน “เออะ ดิห แป เอิด เกียง กวาง นำ มเบิล แอ็ม นำ นทึห เตาะ แต ระ ครำ ตี ไอ มี เกย แอง ลุห ซัก มี ติด กวาง นำ วาล” นำ อัง 8เจ็นนัน นำ ก็ โมด นัง เคียน พุน ซิก วัล
9ทาเน ครำ ตี โตะ พอง อัหเม ล็อง นะ อัห เม็จ เยซู จ็อก คือนัน อัห ก็ วัล แอ็ม ครำ ตี อาญุ ดก ทีซุด วัล วาล อัห วัล มี ล็อง มี จุบ ซุดทาย ก็ ควะ เลือ เยซู เคิบ อัหเม ล็อง นะ ตี ญ็อง อุ ลัห มัด นำ นัน 10เจ็นนัน เยซู ก็ ร็อห ญ็อง วัล นำ ก็ ซ็วน อัหเม ล็อง นะ “ครำ ตี พอง มัห นัน ซุด งาล อัห เริล พานเดย บ็อห ไอ มี ควะ อีเอ พอง มัห เตาะ ก้า” เยซู ซ็วน อัหเม ล็อง นัน จังนะ
11อัหเม ล็อง นะ ก็ ซวัล นำ คือเน “ไอ มี ควะ อีเอ พอง เอิญ เตาะ” นำ อัง เยซู ก็ ไล นำ ฮุนเน “เอิญ ก็ ไอ มี พอง มัห มัห เริล นทึห เตาะ อำ แอง ลุห วัล ดาย” เยซู อัง
เยซู เป็น ทาง ซะ ตัก โลก เน
12ทาเน เยซู ก็ มเบิด จ็อก เคิบ ปึง ฟาริซี มี ลบ วัล คือเน “เอิญ เป็น ทาง ซะ เอิญ โตะ นโจง รวง อน ตัก ครำ ทัว โลก เน กัน แป เคริบ เอิญ เริล แป ก็ ไอ มี จำเป็น เริล ตัก ตี ม็อญ ซะ เตาะ เอิญ นโจง รวง อน ตัก แป ฮัก ระ แป เม็จจึด เริล รวง เลาะ รวง แคระ ระ แป กุญ รีด อุ จำ นเดย จำ กวา” เยซู ไล อัห จังนะ มัดทิว 5:14, ยอน 9:5
13ทาเน ปึง ฟาริซี เม็จ เยซู ไล ออ จังนะ อัห ก็ เทียง นำ คือเน “มัห จ็อก ออ มี ล็อง ฮัก มัห ไอ มี พญาน เพียห ออ มัห จบ เค็ย ออ จ็อก แคระ อิห ก็ ไอ มี จำเป็น เจือ มัห เตาะ ต็อง มี อัหซอ เป็น พญาน เค็ย มัห เป็น ล็อง เน ล็อง นัน ซัง อิห เจือ มัห” ปึง ฟาริซี อัง ยอน 5:31
14เยซู ลด ไล อัห คือเน วัล “ตี เอิญ เค็ย นัง ออ โตะ นโจง รวง อน แป เน ก็ แคระ แลว ดาย แป เจือ เอิญ ก็ กุญ เพาะวา เอิญ เน เม็จจึด เค็ย นัง ออ เล็ห เจ็น นเดย เอิญ เริล พานเดย วัล บัดนะ เอิญ ก็ เม็จ มด เอิญ ก็ ลด เป็น พญาน เพียห ออ กุญ แต แป เน ไอ มี เม็จจึด เอิญ เล็ห เจ็น นเดย เอิญ เริล พานเดย วัล บัดนะ แป ก็ ไอ มี เม็จจึด เตาะ
15ตี แป ตัดซิน เค็ย เอิญ จ็อก ไอ มี แคระ เน ก็ เป็น ตัก แป จ็อก มอก ครำ พาลือ ฮัก แป ไอ มี เอิด กำกึด เอาซาง เตาะ แป เอิด กำกึด ครำ ตัดซิน เอิญ ฮัก แต เอิญ เน เอิญ ไอ มี ตัดซิน อีเอ 16แต กัน เอิญ กิว ตัดซิน ซีเละ เอิญ ก็ ตัดซิน แคระ ดาย เพาะวา เอิญ ไอ มี ตัดซิน มี ล็อง เดียว เอา เอิญ ไล เอิญ โตะ ตัก โลก เน นำ จวย เอิญ ตัดซิน แป ฮัก 17กด แป ก็ ไล อน แลว เค็ย กัน มี พญาน เปียะ ล็อง ไล เมือนนอย มด แอ ก็ เจือ ปาม กุญ แมน อัน 18ทาเน เอิญ เน ก็ เป็น พญาน เค็ย เอิญ เล็ห เจ็น เอาซาง เอา เอิญ ตี ไล เอิญ โตะ และ แป เน นำ ก็ เป็น พญาน มี ล็อง วัล นำ ก็ เค็ย เอิญ เล็ห เจ็น นำ ฮัก กัน มี พญาน เปียะ ล็อง แลว แป เจือ แญง เอิญ ก็ กุญ ดาย” นำ อัง
19ทาเน อัห ก็ ซ็วน เยซู คือเน วัล “เอา มัห นะ อุ ตัก นเดย” อัห อัง เยซู ก็ ซวัล อัห คือเน “แป ไอ มี เม็จจึด เอิญ แป ก็ ลด ไอ มี เม็จจึด เคิบ เอา เอิญ วัล กัน แป กิว เม็จจึด เค็ย เอิญ เป็น ซีเอ แป ก็ เม็จจึด เค็ย เอา เอิญ เป็น ซีเอ วัล” เยซู อัง 20ญาม เยซู ไล อัห เน นำ กำลัง นเจ็น อัห อุ ตัก วิฮาน เอาซาง นัน นำ อุ นดิ ตี อัห ระ ตู ทวาย เงิน นัน แต ญาม นำ นเจ็น อัห อุ ตัก นัน ก็ ไอ มี ซีเอ เญ็บ นำ ญาม นัน ไอ มี ตัน เล็ห งิ ตี เอาซาง ปลอย ระ อัห เญ็บ นำ ตัน
เยซู ไล ครำ ตี ไอ มี เจือ เจิม นัง ออ
21แทะ นัน วัล เยซู ก็ ไล อัห ฮุนเน วัล “เอิญ เริล ตี ซอ ดาย แลว ปน เอิญ แลว แป โละ และ เอิญ ไอ มี เม็จ เตาะ แป ก็ ต็อง เปิล ญาม แป ควะ ลุห อุ นัน เคิง ตี เอิญ เริล ออ นัน แป ก็ เริล ไอ มี กุญ เตาะ” เยซู อัง
22ทาเน ปึง ซะ แกะ ครำ ยิว นัน อัห ก็ ซ็วน นอย คือเน “นำ เค็ย ซีวะ จังนะ นำ เค็ย ตัก ตี นำ เริล ออ นัน แอ เริล ไอ มี กุญ ก็ ซีวะ นำ ไล แอ จังนะ บ็อห นอ นำ เริล มเบิล นัง ออ บ็อห” อัห อัง
23ทาเน เยซู ก็ ไล อัห ตอ วัล “แป เน เป็น ครำ อุ เซ็บ เน พาลือ แป เป็น ครำ โลก แพนซิก เน เอิญ เน เอิญ เล็ห เจ็น ทึห เอิญ ไอ แมน ครำ โลก แพนซิก เน เตาะ 24เคิน เอิญ ก็ ไล แป แลว เค็ย แป เปิล แอ็ม ญาม แป ควะ ลุห อุ นัน เอิญ เน เป็น เมซียา ตี เอาซาง ซันญา โตะ จวย แป นัน กัน แป ไอ มี เจือ เอิญ ญาม แป เปิล บัดนะ แป ก็ ควะ ลุห อุ นัน เอาซาง ไอ มี แก แอ็ม ตี ลุห แป เตาะ” นำ อัง 25อัห ก็ ซ็วน นำ คือเน วัล “ก็ มัห เป็น ซีเอ นังเลาะ” อัห อัง
เยซู ก็ ซวัล อัห คือเน “ก็ เอิญ เป็น ล็อง นัน มอก เอิญ เกย ไล แป ตลอด แลว 26เอิญ ก็ มี ดก เลือง ตี เอิญ โป แป กุญ มี ดก เลือง ตี เอิญ ตัดซิน ระ แป เปิล ก็ กุญ แต มานะ เน เอิญ ไอ มี งเคาะ โป แป ดก เอิญ ไอ มี งเคาะ ตัดซิน แป ล็อง นัน ตี ไล เอิญ โตะ และ แป เน นำ จ็อก เลาะ จ็อก ซือ ตลอด นำ ไอ มี ไล เอิญ ตัดซิน ลงโทด แป ตัน เอิญ ก็ ไอ มี งเคาะ ตัดซิน แป เตาะ แต เอิญ โตะ ไล ซะ ตี ล็อง นัน ไล อน ตัก เอิญ ฮัก” เยซู อัง
27ญาม อัห เม็จ เยซู ไล ออ มอก นัน แลว อัห ก็ ไอ มี ตัน เคาใจ ตี เยซู ไล เลือง เอา ออ นัน 28อัห ไอ มี เคาใจ เยซู ก็ ลบ ไล อัห ฮุนเน วัล “เอิญ ตี เอาซาง ระ เกิด เป็น ครำ เน บัดนะ แป ก็ มพำ ซิห เอิญ ตัก งกรัง ซีโรด งิ นัน บัดนะ ซัง แป เคาใจ เค็ย เอิญ เป็น ซีเอ นังเลาะ ญาม นัน บัดนะ ซัง แป เคาใจ เค็ย เอิญ เน เอิญ ไอ มี โตะ แอง ตาม ใจ ออ เตาะ แต เอิญ จ็อก มอก เอา เอิญ ไล นัน ฮัก 29เอิญ แอง ตาม ใจ เอา ออ ตี ไล เอิญ โตะ และ แป เน นำ ก็ ลด ไอ มี พระ เอิญ นำ อุ เคิบ เอิญ ตลอด” เยซู อัง 30แลว เยซู ไล อัห ฮุนนัน แลว ปึง ครำ ตี ปัง แญง นำ นัน อัห ก็ เจือ นำ ดก ล็อง
เยซู เค็ย อัห เป็น ควัน ปรอง ไอ แมน ควัน งา อับราฮัม
31ทาเน เยซู ก็ ไล ครำ ยิว ตี เจือ นำ คือเน “กัน แป กิว แอง มอก เอิญ ไล อน เน แป ก็ กิว เป็น ลูกนอง เอิญ นังเลาะ 32กัน แป แอง มอก เอิญ ไล อน แป ก็ เม็จจึด เค็ย ซีวะ เป็น เลือง นังเลาะ แป เม็จ แลว แป ก็ อิซระ ไอ มี เป็น ทาด ซีวะ วัล เตาะ” นำ อัง
33อัห ก็ ซวัล นำ คือเน “อิห ไอ มี เป็น ทาด อีเอ ดาย อิห เป็น ควัน งา อับราฮัม อิห ไอ มี เกย เป็น ทาด อีเอ ก็ ซีวะ มัห เค็ย อิห ต็อง ปัง แญง มัห ซัง อิห เป็น ครำ อิซระ” อัห อัง มัดทิว 3:9, ลูกา 3:8
34เยซู ก็ ไล อัห ฮุนเน “เอิญ ไล แป นังเลาะ นะ จู ล็อง ตี แอง ลุห แลว อัห ก็ เป็น คีคา ซะ ลุห นัน ปน ไอ มี กุญ เตาะ” เยซู อัง 35เยซู ก็ มเบิด ไล เลือง ควัน เอาเลียง เคิบ ทาด อน อัห ปัง วัล “ครำ ตี เป็น ทาด อัห ไอ แมน ควัน เอาเลียง เอาเลียง ระ นำ ทอก เจ็น เจิง ออ ญาม นเดย ก็ กุญ แต ควัน เอาเลียง นัน มี ซิด อุ เจิง เอา ออ กุญ ตลอด ไอ มี ซีเอ มบรึห นำ ทอก เตาะ 36แป ก็ มอก คีคา นัน นอ แป เป็น ครำ ลุห แป ก็ เป็น คีคา ซะ ลุห นัน แต กัน ควัน เอาซาง ปลอย ระ แป ปน แอ็ม เจ็น ลุห แป ก็ อิซระ แป ปน แอ็ม เจ็น ลุห กุญ แป ก็ มี ซิด อุ เจิง เอาซาง กุญ
37เอิญ เม็จ แลว แป เป็น ควัน งา อับราฮัม ซีเละ แต แป แกด ล็อง ซีรอก มเบิล เอิญ วัล ตี แป ซีรอก มเบิล เอิญ ก็ ญอน แป ไอ มี ญอม ปัง แญง เอิญ 38เอิญ ไล เลือง นังเลาะ ตี เอิญ เม็จ เคิบ มัด ออ ญาม เอิญ อุ เคิบ เอา ออ นัน แต แป ไอ มี แอง เมือน เอิญ ซัง แป ปัง แญง เอา แป ฮัก” เยซู อัง 39อัห ก็ ซวัล เยซู คือเน “เอา อิห ตัก อับราฮัม ดาย” อัห อัง เยซู ก็ เค็ย “ไอ แมน เตาะ กัน แป กิว เป็น ควัน งา อับราฮัม นังเลาะ นัน แป ก็ ดอม เอิด จาง ตัก อับราฮัม ลด แอง มอก นำ ฮัก แต แป ไอ มี แอง มอก นำ เตาะ 40เอิญ เน เป็น ครำ ไล เลือง นังเลาะ อน ตัก แป เป็น เลือง นังเลาะ ตี เอิญ เม็จ ตัก เอาซาง เอิญ ไล อน ตัก แป ซือๆ แป วัล กึด มเบิล แอ็ม เอิญ วัล อับราฮัม นัน นำ ไอ มี จบ แอง ฮุน แป เน เตาะ แป เค็ย ออ เป็น ควัน งา อับราฮัม ก็ ไอ มี กุญ เตาะ 41แป เน แอง มอก เอา แป นัน ฮัก” เยซู อัง อัห ก็ ซวัล เยซู ฮุนเน “อิห ไอ แมน ควัน อืด ดาย เอา อิห ตัก เอาซาง ฮัก” อัห อัง
42เยซู ก็ ซวัล อัห คือเน “กัน แป กิว เป็น ควัน เอาซาง ซีเละ แป ก็ รัก เอิญ เอิญ เน โตะ เจ็น เอาซาง ดุห เอิญ ไอ มี โตะ ออ ฮัก เอาซาง ไล เอิญ โตะ และ แป ฮัก 43ก็ ซีวะ แป ไอ มี เคาใจ แญง ตี เอิญ จ็อก เคิบ แป เน ก็ ฮุนเน ดาย ตี แป ไอ มี เคาใจ แญง ตี เอิญ จ็อก เคิบ แป เน ก็ เป็น ตัก แป ไอ มี ญอม ปัง เอิญ 44ตี แป ไอ มี ญอม ปัง แญง เอิญ เน ก็ ญอน แป เป็น ควัน ปรอง ซาตาน ฮัก แป ก็ แอง มอก เย็ห นัน ฮัก เจ็น ตัก อิง เย็ห ซอบ มเบิล ครำ ตลอด เย็ห ไอ มี เกย จ็อก เลาะ จ็อก ซือ เย็ห มัก จุ ครำ ตลอด เย็ห คีจุ คีวอก เจ็น ตี นา แลว เย็ห เซ็ห อัง แญง นังเลาะ ตลอด เย็ห ก็ เกิ๊ด รวง แญง นังเลาะ ตลอด แญง คีจุ คีวอก มด จู มบลึ นัน ก็ เกิด เล็ห เจ็น เย็ห นัน ฮัก แป ก็ แอง มอก เย็ห นัน
45เอิญ ไล แป นังเลาะ นะ แป เป็น ควัน ปรอง แป ก็ ลด ไอ มี มัก ปัง เอิญ เอิญ โตะ เลามุน เลือง นังเลาะ ตัก แป แป ก็ ไอ มี เจือ” เยซู อัง 46เจ็นนัน เยซู ก็ ตา อัห ฮุนเน “ตัก ปึง แป เน มี ซีเอ เม็จ เอิญ แอง ลุห ซีวะ กำนะ แป ไล อ็อญ กา เอิญ จ็อก เลาะ จ็อก ซือ เคิบ แป ฮัก แป ไอ มี เม็จ เอิญ จ็อก ลุห ซีวะ ก็ ซีวะ แป ไอ มี เจือ เอิญ 47แป เน ไอ แมน ครำ เอาซาง เตาะ แป ก็ ลด ไอ มี ปัง แญง เอิญ ซีเอ ตี กิว เป็น ครำ เอาซาง อัห ก็ ปัง แญง เอาซาง เลาะๆ ฮัก” เยซู ไล อัห จังนะ
เยซู เค็ย ออ เป็น เยโฮวา
48ทาเน ครำ ยิว นัน อัห ก็ แร็ด ซวัล เยซู คือเน “บัห มัห เน อิห ไล มัห เคิน ก็ แคระ แลว มัห เน เป็น ครำ ซะมาเรีย ตี ไอ มี เม็จจึด เคิบ เอาซาง มัห จ็อก ฮุนนัน ก็ ปรอง กุด มัห ซีเละ เต็ห” อัห อัง
49เยซู ก็ ไล อัห คือเน “ไอ แมน ปรอง กุด เอิญ ดาย ตี เอิญ จ็อก ฮุนนัน เคิน เอิญ อน เกียด ตัก เอา เอิญ ฮัก แต แป เน ดูทูก เอิญ ไอ มี อน เกียด ตัก เอิญ วัล 50นังเลาะ แลว เอิญ ไอ มี ซนใจ และ เกียด อน นัง ออ เตาะ แต มี มี ล็อง นะ นำ ซีรอก ระ จู ล็อง อน เกียด ตัก เอิญ ฮัก ล็อง นะ นำ ตัดซิน ครำ ตี ไอ มี อน เกียด ตัก เอิญ 51เจ็นเน เอิญ ก็ ลด ไล แป เจิม นัง ออ เลาะๆ กัน ซีเอ ปัง แญง เอิญ เน แลว ลด แอง ฮุน เอิญ ไล อน เน อัห ไอ มี เปิล เตาะ อัห รีด อุ จำ นเดย จำ กวา” เยซู อัง
52ทาเน ครำ ยิว ปึง นัน อัห ก็ โป เยซู คือเน “มานะ เน อิห เม็จจึด แลว ปรอง กุด มัห ซีเละ มัห จบ เค็ย ครำ ตี ปัง แญง มัห อัห ก็ ไอ มี เปิล มัห เค็ย ระ อัห รีด อุ จำ นเดย จำ กวา กุญ คีอู มัห ก้า กึด อ็อญ กา อับราฮัม เจือ ปัง เอาซาง เลาะ นำ ก็ เปิล แลว ปึง ลาม เอาซาง ตัก อิง อัห เจือ ปัง เอาซาง เลาะ อัห ก็ เปิล มด แลว มัห จบ เค็ย ครำ ตี ปัง มัห ไอ มี จำเป็น เปิล ปรอง กุด มัห ซีเละ 53เอา อิห ตัก อับราฮัม นำ เปิล แอ็ม แลว มัห ซีแอง แกะ กวา เอา อิห อัง ปึง ลาม เอาซาง อัห ก็ เปิล มด แลว มัห เค็ย ออ แกะ กวา อัห มด อัง มัห กึด เค็ย ออ เป็น ซีเอ เน” อัห อัง
54เยซู ก็ ไล อัห ฮุนเน วัล “กัน เอิญ อน เกียด ตัก นัง ออ ฮัก ก็ ไอ มี คิ ไอ มี ปะโยด เป็น เอา เอิญ ฮัก อน เกียด ตัก เอิญ เอา เอิญ ตี แป เค็ย เป็น งกีจ็อง คอง แป นัน นำ ฮัก อน เกียด ตัก เอิญ 55แต แป ไอ มี กิว เม็จจึด นำ เลาะ เตาะ เอิญ เม็จจึด นำ เลาะ กัน เอิญ มแบล เค็ย ไอ มี เม็จจึด เอาซาง เอิญ ก็ คีอู มอก แป นะ แต เอิญ เม็จจึด นำ นังเลาะ นำ ไล ซีวะ ตัก เอิญ เอิญ ก็ ปัง แญง นำ ฮัก 56แป เค็ย ออ เป็น ควัน งา อับราฮัม นอ แป กึด อ็อญ เลาะๆ กา เอา แป ตัก อับราฮัม นัน นำ อุนใจ เค็ย ต็อง มี มี งิ นำ เม็จ เอิญ โตะ นำ เลาะใจ ญาม นัน แทะ นัน วัล นำ เม็จ เอิญ โตะ แลว นำ ก็ เลาะใจ ซีเละ ซีวะ แป ไอ มี เลาะใจ มอก นำ” เยซู อัง
57ทาเน ปึง ยิว นัน อัห ก็ เทียง เยซู ฮุนเน “มัห เกิด งิ เซ็น เน อาญุ มัห ก็ ไอ มี ตัน ทึง ฮาซิบ ปี มัห ไอ มี จบ เกย เม็จ อับราฮัม ซัง” อัห อัง 58เยซู ก็ ซวัล อัห คือเน “เอิญ ไล แป ซีเละ นะ เอิญ อุ ตลอด เอิญ อุ วาล ไอ ตัน เกิด อับราฮัม นัน” เยซู อัง 59เยซู ไล อัห จังนะ อัห ก็ เอิด เกียง บัก และ นดืม นำ#ค 59 กด คอง ครำ ยิว ตัก อิง กัน อัห จำเป็น มเบิล แอ็ม ครำ ตี แอง ลุห จ็อง นัน อัห เอิด เกียง นดืม ระ เปิล แต นำ ไอ มี ระ อัห เม็จ นัง ออ นำ เริล แอ็ม เจ็น วิฮาน เอาซาง นัน
Markert nå:
ยอน 8: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
