ยอน 9
9
เยซู จวย ครำ บอด มัด เจ็น เกิด
1มี ลบ นัน เยซู นจาง เริล ออ นำ ปัก เม็จ ครำ บอด มัด มี ล็อง นะ ล็อง นะ นำ บอด มัด เจ็น เกิด 2ปึง ลูกนอง เยซู เม็จ ล็อง นะ อัห ก็ ซ็วน เยซู คือเน “เอ ซีวะ ล็อง เน เกิด โตะ เป็น ครำ บอด มัด เป็น ตัก นำ แอง ลุห ฮัก ลู เป็น ตัก เอา เม นำ แอง ลุห บ็อห” อัห อัง
3เยซู ก็ ซวัล อัห ฮุนเน “ไอ แมน ล็อง เน แอง ลุห ไอ แมน เอา เม นำ แอง ลุห ตี นำ บอด มัด เน ก็ เอาซาง ระ จู ล็อง เม็จจึด เค็ย เอาซาง มี แร็ง จวย นำ กุญ 4-5เอิญ จวย นำ มานะ เน ก็ เลาะ มเบิด ก็ มอก เอิญ เป็น ทาง ซะ ญาม เอิญ ควะ อุ ตัก โลก แพนซิก เน เอิญ ก็ โตะ นโจง รวง อน แป มด จู ล็อง มเบิด ก็ มอก ควะ งิ ญาม ควะ งิ อุ เน เอิญ ก็ ต็อง แอง มอก เอาซาง ไล เอาซาง นัน ฮัก ไล เอิญ โตะ ตัก โลก เน เอิญ ก็ ต็อง แอง มอก นำ ไล อน ไอ มี อิง เอิญ ก็ ไอ มี ควะ เตาะ มเบิด ก็ มอก แจ็ล ม็อญ ซะ แอง ซีวะ ไอ มี กุญ เตาะ เอิญ อุ เน แลว เอิญ ต็อง จวย นำ มานะ เน นอ” เยซู ไล อัห จังนะ มัดทิว 5:14, ยอน 8:12
6แลว เยซู จ็อก ฮุนนัน แลว นำ ก็ จ็วห จวก ซิห ตัก พุน ซิก นเซ็บ นำ ก็ เอิด พุน ซิก ซุน ซิห ตัก จวก นัน ระ เป็น ปง นำ ก็ เอิด ปีด ซิห ตัก มัด ครำ บอด มัด นัน 7เจ็นนัน นำ ก็ ไล ล็อง นัน เริล พุจ มัด ตัก นอก ซีโลอำ (ซีโลอำ ซีแล็ม เค็ย “ไล นำ เริล”) เอา ล็อง นะ ควะ บอด มัด อุ นัน นำ ก็ เริล พุจ มัด ตัก นอก ซีโลอำ มอก เยซู ไล นัน แลว นำ พุจ มัด แลว ปาโท็ห มัด นำ ก็ เลาะ เล็ห มด ดอม ซะ ก็ ตาด มด เจ็นนัน นำ ก็ ลบ วัล โตะ ตี เครม เคิง ตี เยซู อุ นัน
8ทาเน ครำ มี งวัล เลิม เคิบ ครำ บอด มัด นัน เคิบ อัหซอ ตี เกย เม็จ นำ คุด ครอ ทาน อุ นัน อัห เม็จ นำ ดอม ซะ กุญ แลว อัห ก็ ซ็วน นอย คือเน “เอ ล็อง เน ตี ม็อด คุด ครอ ทาน อุ ตลอด นัน แมน อัน บ็อห” อัห อัง 9มบรัห ก็ เค็ย แมน มบรัห ก็ เค็ย ไอ แมน อัห เค็ย ล็อง ซอ ตี มัด นำ เพาะ ล็อง นัน แต ล็อง ตี เกย ครอ ทาน นัน นำ ก็ ไล อัห เค็ย “แมน เอิญ เป็น ล็อง นัน ตี ม็อด ครอ ทาน อุ นัน” นำ อัง
10ทาเน อัห ก็ ซ็วน นำ คือเน “ซีวะ มัห ดอม ซะ เม็จ แลว อีเอ แอง ระ มัห งาล บอด มัด เน” อัห อัง 11นำ ก็ ซวัล อัห คือเน “ก็ อัหคล็อง ล็อง นัน ตัก ซือ เยซู นัน นำ แอง ปง ปีด ซิห ตัก มัด เอิญ แลว นำ ปีด แลว นำ ก็ ไล เอิญ เริล พุจ มัด ตัก นอก ซีโลอำ เอิญ พุจ มัด แลว มัด เอิญ ก็ ลด เลาะ เล็ห ลด ดอม ซะ ตาด มด” นำ อัง 12อัห ก็ ซ็วน นำ คือเน “ซัง นำ อุ พานเดย” อัห อัง “ก็ ตอ นะ” นำ อัง
13-14ทาเน งิ ตี เยซู แอง ปง ปีด ซิห ตัก มัด ล็อง นัน ก็ เป็น วัน เซา เป็น งิ มโบละ ครำ ยิว เยซู รักซา ล็อง นัน ตัก งิ มโบละ อัห ก็ เค็ย ลุห อัง กด อัห ก็ เอิด ล็อง นัน ซับ ตัก ปึง ฟาริซี 15ปึง ฟาริซี อัห ก็ ที ซ็วน นำ ติกๆ นำ ก็ ไล ปึง ฟาริซี คือเน “อัหคล็อง ล็อง นะ นำ เอิด พุน ซิก แอง เป็น ปง นำ ก็ เอิด ปีด ซิห ตัก มัด เอิญ เอิญ พุจ แอ็ม แลว เอิญ ก็ ลด ดอม ซะ ตาด มด” นำ อัง
16ปึง ฟาริซี แกด ล็อง อัห ก็ ไล นอย คือเน “เยซู ล็อง นะ นำ ไอ แมน ครำ ตี เอาซาง ไล โตะ ตัก แอ เตาะ นำ แองกาน ตัก วัน เซา งิ มโบละ แอ นำ ลุห อัง กด แอ ดุห” อัห อัง แต มี แกด ล็อง อัห ก็ เทียง ฮุนเน “กัน เยซู เป็น ครำ ลุห นำ แอง ซะ แปลก จ็อง มอก เน ไอ มี กุญ เตาะ” อัห อัง ปึง ฟาริซี นัน อัห กึด ไอ มี เมือนนอย เตาะ
17เจ็นนัน ปึง ฟาริซี ก็ ลบ ซ็วน ล็อง ตี งาล บอด มัด มี ลบ วัล อัห แร็ด ซ็วน นำ คือเน “ล็อง นัน ตี แอง ระ มัห งาล บอด มัด เน มัห กึด จังนัก เลือง นำ” อัห อัง ล็อง นัน ก็ ซวัล อัห ฮุนเน “นำ เป็น ลาม เอาซาง” นำ อัง
18ทาเน ปึง ซะ แกะ ครำ ยิว นัน อัห ไอ มี เจือ เค็ย ล็อง นัน เกย บอด มัด แต งาล เลาะ แลว อัห ไอ มี เจือ จำปอ อัห ซ็วน เอา เม นำ ฮัก 19อัห ซ็วน เอา เม นำ จังเน “ล็อง เน กิว เป็น ควัน ปา นังเลาะ อัน นำ กิว บอด มัด เจ็น เกิด ซีเละ อัน กัน นำ บอด เจ็น เกิด ก็ ซีวะ นำ ดอม ซะ กุญ วัล นำ งาล บอด มัด กุญ จังนัก เน” อัห อัง
20เอา เม นำ ก็ ซวัล อัห คือเน “ล็อง เน เป็น ควัน เยอะ ซีเละ นำ บอด มัด เจ็น เกิด นังเลาะ 21แต เลือง นำ งาล บอด มัด เน เลือง นำ ดอม ซะ ตาด มานะ เน อีเอ จวย นำ อัห จวย นำ จังนัก นัน เยอะ ไอ มี เม็จจึด เตาะ แป ซ็วน นำ ฮัก ก็ เลาะ แกะ นัง นำ แลว นำ ไล แป ก็ กุญ มด” ปาม อัง
22ตี เอา เม นำ ไล อัห ซ็วน ควัน ออ นัน ก็ ปาม นเจิก อัง ปึง ซะ แกะ ครำ ยิว เพาะวา ปึง ซะ แกะ ครำ ยิว เน อัห ไล นอย แลว เค็ย กัน อีเอ เค็ย เยซู เป็น เมซียา ปึง ซะ แกะ ก็ ตัด แอ็ม อัห ไอ มี ระ อัห กุด ฮ็อง พซุม ครำ ยิว เตาะ อัห ต็อง เป็น มอก ครำ กรอก ซอ ฮัก 23เอา เม ล็อง นะ ก็ ลด นเจิก ปาม ไอ มี ฮาน ไล อัห เตาะ ปาม ลด ไล ปึง ซะ แกะ นัน เริล ซ็วน ควัน ออ ฮัก
24เจ็นนัน อัห ก็ ลบ งกรอ ล็อง นะ โตะ จ็อก เคิบ ออ วัล อัห ไล นำ คือเน “กัน กิว เป็น ล็อง นัน จวย มัห นังเลาะ ก็ มัห ไล อิห ซือๆ มัห ต็อง ซาบาน ตัก มัด เอาซาง ฮัก เพาะวา อิห เม็จ แลว ล็อง นัน เป็น ครำ ลุห” อัห อัง 25ล็อง นัน ตี เกย บอด มัด นำ ก็ ซวัล อัห คือเน “นำ ลุห ฮุ ไอ มี ลุห ฮุ เอิญ ไอ มี เม็จจึด เตาะ แต เอิญ เม็จจึด มี มบลึ เดียว เน เอิญ เกย บอด มัด มานะ เน เอิญ ดอม ซะ เม็จ แลว” นำ อัง
26อัห ก็ ลบ ซ็วน นำ คือเน วัล “นำ จวย มัห จังนัก ซัง มัห ดอม ซะ ตาด เน” อัห อัง 27นำ ก็ ซวัล อัห จังเน “ก็ เอิญ ไล แป แลว แป ก็ ไอ มี ปัง เอิญ มบก ไล แป ดก ลบ อังวะ แป ซีรอก เป็น ลูกนอง นำ เลิม เคิบ อัห วัล ก้า” นำ อัง
28อัห เม็จ นำ ซวัล คือนัน อัห ก็ อ็อด วัล อัห ก็ เค็ย นำ ฮุนเน “มัห นัน เป็น ลูกนอง นำ อิห เน อิห เป็น ลูกนอง โมเซด ฮัก 29โมเซด เน เอาซาง ไล อน แญง ออ ตัก นำ ฮัก เอาซาง มอบ อำนาด อน ตัก โมเซด แลว แต เยซู เน นำ เล็ห เจ็น นเดย เจ็น กวา ฮุ อิห ไอ มี เม็จจึด เตาะ ไอ มี เลาะ เจือ นำ เตาะ” อัห อัง
30ล็อง นะ นำ ก็ ซวัล อัห คือเน “แปลก ซีเละ นอ นำ แอง ระ เอิญ งาล บอด มัด แลว แต แป ไอ มี เม็จจึด นำ เล็ห เจ็น นเดย เจ็น กวา แปลก ซีเละ นอ 31แอ ก็ เม็จ แลว นอ เอาซาง ไอ มี ปัง แญง ครำ ลุห แต ซีเอ ตี ทือ นำ ตี แอง มอก นำ ไล อน เอาซาง ก็ ปัง แญง นำ ล็อง เน เอาซาง ปัง แญง นำ เลาะ นำ ก็ ต็อง เล็ห เจ็น เอาซาง ก้า 32ปัง ดาย ครำ บอด มัด เจ็น เกิด มอก เอิญ เน ไอ มี แอ เม็จ คาว อีเอ จวย ระ อัห ดอม ซะ ตาด กุญ เจ็น อิง เจ็น นา ก็ ไอ มี เกย เม็จ คาว เตาะ แต ล็อง เน นำ แอง ระ เอิญ งาล บอด มัด แลว 33กัน นำ ไอ มี เล็ห เจ็น เอาซาง นำ จวย เอิญ ไอ มี กุญ เตาะ” ครำ บอด มัด นัน อัง
34ทาเน อัห ก็ แร็ด ซวัล นำ “มัห เน เป็น ครำ ลุห ครำ บาบ เจ็น เกิด อิห แกะ กวา มัห มัห ซีแอง ไล อิห อังวะ วัล” อัห อัง เจ็นนัน อัห ก็ ลด มบรึห แอ็ม นำ อัห ตัด แอ็ม นำ ระ นำ เป็น มอก ครำ กรอก ซอ วัล
เยซู เค็ย อัห มอก ครำ บอด มัด
35ตี อัห ตัด แอ็ม ล็อง นัน เยซู ก็ เม็จ เยซู เม็จ แลว นำ ก็ เริล และ ล็อง นัน นำ เม็จ ล็อง นัน แลว นำ ก็ ซ็วน ล็อง นัน คือเน “มัห เจือ ล็อง นัน ตี เอาซาง ระ เกิด เป็น ครำ อัน” เยซู อัง 36“นาย เฮย นังเลาะ แลว เอิญ ซีรอก เจือ นำ ล็อง นัน เป็น ซีเอ ก็ มัห ไล เอิญ กา ซัง เอิญ เจือ นำ กุญ” ล็อง นัน อัง
37เยซู ก็ ไล นำ คือเน “ก็ มัห เม็จ นำ เคิบ มัด ออ แลว เน เป็น เอิญ เน ตี จ็อก อุ เคิบ มัห เน” เยซู อัง 38ล็อง นัน ก็ เค็ย “เออะ ดิห งกีจ็อง เอิญ เจือ มัห ซีเละ” นำ อัง นำ ลด กราบ ไว เยซู
39เยซู ก็ ลด ไล นำ คือเน “เอิญ โตะ ตัก โลก แพนซิก เน เอิญ โตะ เพือ จวย ครำ ระ อัห กิว เคาใจ เลือง เอาซาง เลาะๆ ก็ ฮุนเน ดาย จู ล็อง ตี ไอ มี เม็จจึด เคิบ เอาซาง นัน เอิญ ก็ โตะ จวย ระ อัห เม็จจึด เคิบ เอาซาง โป แญง มเบิด ก็ มอก เอิญ จวย อัห ระ งาล บอด มัด#ค 39 “บอด มัด” เยซู ซีแล็ม เค็ย ครำ ตี ไอ มี เม็จจึด เคิบ นำ อัห ก็ มอก ครำ บอด มัด นัน ระ อัห เม็จ ซะ กุญ จู ล็อง ตี กึด เค็ย นัง ออ เม็จจึด เคิบ เอาซาง เลาะ แลว แต อัห ไอ มี กิว เม็จจึด เคิบ เอาซาง เอิญ ก็ โตะ จวย ระ อัห เคาใจ นัง ออ มอก ครำ บอด มัด นัน” เยซู อัง
40ทาเน ปึง ฟาริซี ก็ ญ็อง อุ ติ ซะ นัน อัห เม็จ เยซู ไล ฮุนนัน อัห ก็ ซ็วน นำ “มัห เค็ย อิห บอด มัด อัง” อัห ซ็วน เยซู จังเน 41เยซู ก็ ไล อัห คือเน “แป มอก ครำ บอด มัด ซีเละ ดาย เพาะวา แป ไอ มี เม็จจึด นัง ออ ลุห กัน แป ญอม ฮับ เค็ย ออ บอด มัด แป ก็ ไอ มี ลุห เตาะ แต แป เค็ย นัง ออ เม็จจึด เคิบ เอาซาง เลาะ แป เค็ย นัง ออ ดอม ซะ ตาด เลาะ แป ก็ มอก ครำ บอด มัด นัน แป ก็ ควะ ลุห อุ นัน ดาย” เยซู อัง
Markert nå:
ยอน 9: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
