ยอน 10
10
เยซู เป็น ปะตู ลุก แกะ
1ทาเน เยซู ก็ มเบิด ไล อัห เลือง ครำ เลียง แกะ วัล นำ ไล อัห คือเน “เอิญ ไล แป นังเลาะ นะ กัน ซีเอ ลอด ก็อห งเกริก กุด โตะ และ แกะ ตัก ลุก นัน แต ไอ มี กุด ตัก ปะตู อัห ก็ เป็น ครำ จาง ลอด อัห เป็น ครำ ปุน ซะ อัห 2แต เอา นเดย ตี กุด ตัก ปะตู โตะ และ แกะ นัน เอา นัน ก็ เป็น ครำ เลียง แกะ นังเลาะ นัน
3ญาม นำ กุด เคิง ปะตู นัน ครำ เพา ปะตู อัห ก็ พลาง ปะตู อน นำ นำ ก็ งกรอ ซือ แกะ นัง นเดย นัง นัน ฮัก ปึง แกะ ก็ ลืด เม็จ นเซิง นำ แลว เย็ห ก็ โตะ และ นำ โตะ เย็ห แลว นำ ก็ ซับรวง เย็ห ทอก เจ็น ลุก 4แลว นำ ซับรวง แกะ ทอก มด แลว นำ ก็ ซับรวง เย็ห เริล นำ นจาง เริล วาล มัด แกะ แกะ ก็ เคริบ แทะ ลอล นำ เริล เย็ห ลืด อัง นเซิง นำ แลว เย็ห ก็ ต็อง เริล เคิบ นำ 5จับ มี อัหซอ โตะ ซับรวง เย็ห เย็ห ก็ ไอ มี เริล เตาะ ไอ มี ลืด เย็ห เม็จ นเซิง อัหซอ เย็ห ก็ ปัด แอ็ม” เยซู มเบิด ไล อัห ฮุนนะ 6อัห เม็จ เยซู มเบิด ไล ออ จังนะ แต อัห ไอ มี เคาใจ ซีแล็ม เค็ย ซีวะ
เยซู เป็น ครำ เลียง แกะ เลาะ
7เยซู ก็ มเบิด ไล ปึง ฟาริซี ตอ วัล คือเน “เอิญ ไล แป นังเลาะ นะ เอิญ เน เป็น ปะตู ลุก แกะ
8-10ซีเอ ตี กุด เริล รวง เอิญ อัห ก็ รีด อุ อัห กุด เริล กุด วัล ตาม ซะบาย อัห ก็ เม็จ จู มบลึ ตี อัห จำเป็น ต็อง มี นัน เอิญ โตะ จวย ระ อัห มี ซีวิด ตี เลาะ ซมบูน มด จู มบลึ#ค 10 “ซีวิด เลาะ” ซีแล็ม เค็ย เยซู จวย ระ แอ ตี เจือ นำ เม็จจึด เคิบ นำ เฮง เลาะ ติกๆ ตี แอ มี ซีวิด เลาะ มอก เยซู ก็ ซำคัน กวา นัง คอง แอ วัล แต อัห จู ล็อง ตี เค็ย ออ เป็น เมซียา ตี โตะ วาล เอิญ นัน อัห เป็น โจน โจน นัน อัห จาง ลอด อัห โตะ ลอด ซะ อัห โตะ มเบิล ครำ อัห โตะ ทำลาย ซะ มี มบลึ เดียว นะ แต ปึง แกะ ไอ มี จบ ปัง แญง อัห เตาะ
11เอิญ เน เป็น ครำ เลียง แกะ เลาะ ครำ ตี เลียง แกะ เลาะๆ นัน นำ ก็ ญอม เปิล แตน แกะ ออ 12แต กัน เป็น ลูกนอง ตี อัห จาง เลียง แกะ นัน นำ ไอ แมน งกี แกะ นัน นำ ก็ ไอ มี ญอม ซะละ ซีวิด ออ จวย แกะ เตาะ โตะ ซวะ นจ็อย พ็อก แกะ นำ ก็ ปัด แอ็ม นำ ก็ ปลอย ระ ซวะ นจ็อย จวาด พ็อก แกะ แกะ ก็ เล็ง ปัด มี ติด มี ตี 13ลูกนอง ตี อัห จาง เลียง แกะ นัน นำ ปัด ซีเละ เพาะวา นำ ไอ แมน งกี นำ เป็น ลูกนอง อัห มาลือ นำ ไอ มี กิว ทืล อัง แกะ นัน เตาะ 14-15ซำรับ เอิญ เน เอิญ ไอ มี ปัด เตาะ เอิญ เลียง แกะ เลาะ เอิญ ญอม เปิล แตน แกะ นัน เอิญ เม็จจึด เคิบ แกะ เลาะ แกะ ก็ เม็จจึด เคิบ เอิญ เลาะ ก็ มอก เอิญ เคิบ เอา ออ ตัก เอาซาง นัน เอา เอิญ เม็จจึด เคิบ เอิญ เลาะ เอิญ ก็ เม็จจึด เคิบ เอา ออ เลาะ มัดทิว 11:27, ลูกา 10:22
16ทาเน เอิญ ก็ มี แกะ มี ปึง วัล แกะ ปึง นะ อุ ตัก ลุก มี ตี วัล เอิญ ก็ ต็อง เริล และ เย็ห เมือนนอย แกะ ปึง นัน ก็ ปัง แญง เอิญ เลาะ บัดนะ เจ็นนัน เอิญ ก็ ซับรวง แกะ ปึง นัน โตะ อุ เลิม เคิบ แกะ ปึง เน ระ เป็น มี ปึง เดียว เลิม นัน ครำ เลียง ก็ มี มี ล็อง เดียว ตัก เอิญ เน” เยซู ไล อัห จังนะ 17ทาเน เยซู ก็ เลามุน เลือง นัง ออ อน อัห ปัง วัล คือเน “เลือง เอิญ ญอม เปิล นัน เอิญ ญอม เปิล เพือ ระ กุญ รีด เล็ห วัล ตี เอิญ ญอม เปิล แตน แกะ ออ นัน เอา เอิญ ก็ ลด รัก เอิญ ดก ซีเละ 18เอิญ มี ซิด เปิล ญาม นเดย ก็ กุญ เอิญ มี ซิด รีด เล็ห วัล ญาม นเดย ก็ กุญ ไอ มี ซีเอ จางรู ระ เอิญ เปิล เตาะ เอิญ ญอม เปิล ญาม นเดย ก็ เป็น กำกึด เอิญ ฮัก เอา เอิญ วาง แพน อน เอิญ มอก เน แลว เอิญ ก็ แอง มอก เอา ออ ไล อน ฮัก” นำ อัง
19นำ ไล อัห ฮุนนัน แลว ครำ ตี ปัง นำ นัน อัห ก็ กึด ไอ มี เมือนนอย 20มบรัห ก็ เค็ย “นำ พีบา ปรอง กุด นำ แอ ปัง แญง นำ อังวะ” อัห อัง 21มบรัห ก็ เค็ย นำ เลาะ “เอ แอ ปัง แญง นำ จ็อก แลว ไอ แมน ปรอง กุด นำ เตาะ ครำ ปรอง กุด ไอ มี จ็อก มอก นำ ครำ ปรอง กุด ไอ มี จางรู จวย ครำ บอด มัด ระ ดอม ซะ ตาด วัล” อัห อัง
เยซู เค็ย ออ เป็น ควัน เอาซาง
22ทาเน ก็ เล็ห นา เคด แลว ตัก เมือง เยรูซาเล็ม นัน ก็ เล็ห เทซกาน ซะลอง งิ ตี อัห มอบ วิฮาน อน ตัก เอาซาง ตัก อิง นัน#ค 22 ตัก อิง ซะไม ครำ กรีก ปกคอง ปะเทด อิซราเอล มี ครำ กรีก ทวาย ซะ เจอะ ฮุน อิ ตัก วิฮาน เอาซาง แอง ระ วิฮาน เอาซาง เจอะ อัห ลด แอง พิที ซีวะ ตัก วิฮาน ไอ มี กุญ แลว ครำ อิซราเอล มบรึห แอ็ม ครำ กรีก แลว อัห ก็ แอง พิที ลาง วิฮาน เอาซาง ซัง ไจ กุญ วัล อัห ก็ มอบ วิฮาน อน ตัก เอาซาง วัล ซัง ไจ ตี นัน กุญ วัล เจ็นนัน อัห ก็ ซะลอง งิ ลาง วิฮาน จูวางๆ เตา มานะ เน 23ตัก วิฮาน นัน ก็ มี จาด จ็อง ซือ ตัก จาด ซอลอมอน#ค 23 “จาด ซอลอมอน” จาด ซอลอมอน นัน เป็น จาด ดัว ติด เคิบ ฮ็อง ดัวๆ ตัก เด็นเตะ วิฮาน นัน มี งกรัง 162 เซ็น งกรัง ก็ ทึห 60 ซอก เยซู ก็ นจาง เริล ตัก จาด ซอลอมอน นัน 24นำ นจาง เริล นัน ก็ มี ครำ ดก ล็อง เริล เลิม เคิบ นำ อัห ก็ แกวด นัง เยซู มด
ทาเน อัห ก็ ซ็วน เยซู คือเน “อาจาน อิห เน ไอ มี ปอ แก็นใจ เค็ย มัห เป็น เมซียา ปานเดย เตาะ มัห เป็น เมซียา ตี เอาซาง ไล โตะ จวย อิห ฮุ ไอ แมน ฮุ ครอ ระ มัห ไล อิห กา อำ บำ ระ อิห ซงไซ อุ ดาย อิห ซีรอก เม็จจึด มัห เป็น ซีเอ นังเลาะ” อัห อัง
25เยซู ก็ ซวัล อัห คือเน “เอิญ เป็น ซีเอ เอิญ ก็ ไล แป แลว แป ก็ ไอ มี เจือ ซะ ตี เอิญ แอง จู งิ เน เอิญ ก็ แอง ญอน เอา ไล เอิญ แอง ฮัก ซะ ตี เอิญ แอง เน ก็ เป็น พญาน ระ แป เม็จจึด เค็ย เอิญ กิว เป็น ซีเอ นังเลาะ 26แต แป ไอ แมน แกะ คอง เอิญ แป ก็ ลด ไอ มี เจือ เอิญ 27แกะ คอง เอิญ เย็ห ก็ ปัง เอิญ เลาะ เอิญ ไล แกะ จังนัก เย็ห ก็ ปัง เอิญ ก็ เม็จจึด เคิบ แกะ ออ เลาะ แกะ ก็ เคริบ เอิญ เริล ตลอด 28เอิญ ก็ ระ ปึง แกะ นัน รีด อุ ตลอด จำ นเดย จำ กวา ไอ มี เปิล เตาะ ไอ มี ซีเอ ลู เอิด แกะ นัน ตัก เอิญ กุญ เตาะ 29เอา เอิญ อน ปึง แกะ นัน ตัก เอิญ แลว นำ ก็ มี แร็ง ดก ทีซุด ไอ มี ซีเอ จางรู ลู เอิด แกะ นัน ตัก ที เอา เอิญ เตาะ 30เอิญ เคิบ เอา ก็ เป็น มี ล็อง เดียว นัน” เยซู ไล อัห จังนะ
31อัห ปัง เยซู ไล ออ จังนะ แลว อัห ก็ เอิด เกียง บัก และ นดืม นำ ระ เปิล แอ็ม เปียะ ลบ ตึง เน ตี อัห บัก และ เอิด เกียง นดืม นำ 32เยซู ก็ ลบ ไล อัห ฮุนเน “เอา เอิญ ไล เอิญ แอง ซะ เลาะ ดก มบลึ เอิญ ก็ แอง เลาะ มด แลว มบลึ นเดย บ็อห ตี แป ซีรอก มเบิล แอ็ม เอิญ วัล” เยซู อัง
33ปึง ยิว นัน ก็ ซวัล เยซู คือเน “ตี อิห และ มเบิล มัห เน ก็ ไอ แมน ญอน มัห แอง เลาะ อิห และ มเบิล มัห ญอน มัห โป ดูทูก งกีจ็อง นัน มัห เป็น ครำ พาลือ แต มัห จบ เค็ย นัง ออ เป็น งกีจ็อง” อัห อัง กด เอาซาง 24:16
34เยซู ก็ ซวัล อัห คือเน “ซีวะ แป เค็ย เอิญ โป ดูทูก งกีจ็อง บ็อห นอ ตัก นังซือ เอาซาง ตี แป ทือ อุ นัน ก็ มี มี ตี นัน เอาซาง ไล ปึง พูนำ ครำ อิซราเอล ฮุนเน ‘แป จู ล็อง ก็ เป็น งกีจ็อง’ นังซือ เอาซาง ไล ฮุนนัน นอ 35กัน แญง เอาซาง เค็ย ปึง พูนำ อิซราเอล จู ล็อง เป็น งกีจ็อง แลว อัห ก็ กิว เป็น ซีเละ แญง เอาซาง แคระ ตลอด ดาย เพลง เอาซาง 82:6
36ตี เอิญ เค็ย ออ เป็น ควัน งกีจ็อง ก็ แคระ แลว ปัง เลาะๆ ดาย เอิญ กิว เป็น ควัน งกีจ็อง ซีเละ เอา เอิญ จง ระ เอิญ นำ ก็ ระ เอิญ โตะ อุ ตัก โลก แพนซิก เน ฮัก ก็ ซีวะ แป เค็ย เอิญ โป ดูทูก งกีจ็อง วัล 37กัน เอิญ ไอ มี กิว แอง ฮุน เอา เอิญ ไล อน นัน แป ก็ อำ เจือ เอิญ เตาะ 38แป ไอ มี เจือ แญง ตี เอิญ ไล เน ก็ ตาม แต เตาะ แต กัน เอิญ แอง จู มบลึ มอก เอา เอิญ แอง นัน ก็ ครอ ระ แป เจือ เค็ย เอิญ เป็น ควัน เอาซาง กัน แป เจือ เอิญ ญอน แป เม็จ ซะ แปลก ตี เอิญ แอง นัน แป ก็ เคาใจ เค็ย เอา อุ เคิบ เอิญ เอิญ ก็ อุ เคิบ เอา” เยซู ไล อัห จังนะ
39แลว เยซู ไล อัห จังนะ แลว อัห ก็ และ เญ็บ นำ วัล แต นำ ปัด เริล ออ ลด ปน แอ็ม 40นำ ก็ นจาง คาม นอก จอแดน เริล พาโนน นำ เริล เคิง ตี ยอน จุบ อัห ตัก นอก กำนา นัน เยซู เล็ห ตัก นัน แลว นำ ลด พัก อุ ตัก นัน ดก งิ ยอน 1:28
41ทาเน ก็ มี ครำ เริล เคิบ เยซู ดก ล็อง อัห ก็ จ็อก จังเน “ยอน เน นำ ไอ มี กุญ แอง ซะ แปลก ซีวะ ซัก มี ติด นำ ไอ มี แอง ซีวะ ระ แอ เจือ เค็ย นำ มี แร็ง เอาซาง นอ แต นำ จ็อก เลือง เยซู เน นำ ก็ จ็อก เลาะ จ็อก ซือ ซีเละ นำ เค็ย เยซู เป็น จังเน จังนัน ก็ กิว เป็น เล็ห จู มบลึ มอก นำ เค็ย นัน ซีเละ” อัห อัง 42อัห เม็จ เยซู แอง มอก ยอน เพีย ไล อน นัน อัห ก็ เจือ เยซู ดก ล็อง ตัก นัน
Markert nå:
ยอน 10: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
