ยอน 11
11
ลาซารัด เปิล
1ทาเน ก็ มี อัหคล็อง มี ล็อง โซะ นำ ซือ นำ ตัก ลาซารัด นำ อุ ตัก งวัล เบทานี ลาซารัด เน นำ มี นไจ อัหเม เปียะ ล็อง มาทา มี ล็อง มารี มี ล็อง อัห อุ งวัล เบทานี เลิม นัน 2มารี ล็อง เน ตี เอิด นำฮอม ทุก ซิห ตัก เจ็ง เยซู ตี เอิด นโซก กึ ออ เจ็ด เจ็ง เยซู ลาซารัด ตี โซะ อุ นัน เป็น ควน มารี ล็อง เน ฮัก 3ญาม ลาซารัด โซะ อุ นัน มารี เคิบ มาทา ก็ ไล เปือน ออ เริล ไล เยซู โตะ จวย ควน ออ เปือน ปาม ก็ เริล ไล เยซู ฮุนเน “อาจาน เปือน มัห ตัก มัห รัก ดก นัน นำ แร็ง โซะ อุ มานะ เน ดาย” อัห ไล เยซู จังเน ลูกา 10:38-39, ยอน 12:3
4เยซู เม็จ แญง อัห ไล ออ แลว นำ ก็ ไล อัห ฮุนเน “ตี ลาซารัด โซะ นัน ซุดทาย นำ ไอ มี เปิล ซัง เลือง เน เกิด เล็ห ก็ เพือ ระ อัห อน เกียด ตัก เอาซาง เพือ ระ อัห อน เกียด ตัก ควัน เอาซาง วัล” เยซู อัง
5เยซู นำ ก็ รัก มาทา เคิบ ควน นำ ตัก มารี เคิบ ลาซารัด นัน 6แต ญาม เยซู เม็จ คาว เค็ย ลาซารัด โซะ อุ นัน นำ ก็ ไอ มี งเคาะ เริล จวย นำ เพา อุ เคิง นัน เปียะ งิ วัล 7ปน เปียะ งิ แลว เยซู ก็ มพอล ลูกนอง ออ ลบ วัล โตะ ตัก งวัล เบทานี ตัก จังวัด ยูเดีย นัน
8แต ปึง ลูกนอง ก็ ไล นำ ฮุนเน “อาจาน มัห ลบ วัล เริล ตัก งวัล นัน อังวะ วัล งิ นาน ปึง ฮัวนา ครำ ยิว ก็ บัก และ เอิด เกียง กวาง มัห ระ เปิล แอ็ม แลว ดาย มัห ลบ เริล อังวะ วัล” ลูกนอง นำ อัง
9เยซู ก็ มเบิด ไล อัห คือเน “อำ นเจิก เตาะ ตัก งิ ก็ มี ซิบซอง ซัวโมง นอ กัน ซีเอ นจาง เริล ตัก งิ อัห ก็ ไอ มี นทุด ไอ มี ลัง เตาะ เพาะวา ตัก งิ ทาง ซะ ดอม ซีวะ ก็ เม็จ มด
10แต กัน ซีเอ นจาง เริล ตัก แจ็ล อัห ก็ ต็อง นทุด ต็อง ลัง เพาะวา ม็อญ ซะ ดอม ซีวะ ก็ ไอ มี ตาด มานะ เน เล็ห เวลา เอาซาง ระ แอ เริล โป แญง มเบิด ก็ มอก ควะ ล็อง งิ แอ ไอ มี จำเป็น นเจิก เริล เตาะ” เยซู อัง เค็ย อัห
11เจ็นนัน เยซู ก็ ไล ลูกนอง ฮุนเน วัล “เปือน แอ ตัก ลาซารัด อวย นไท แอ็ม แลว แต เอิญ ซีรอก เริล พร็อห นำ ระ นำ ร็อห วัล” เยซู อัง 12ปึง ลูกนอง นัน ก็ ซวัล คือเน “นาย เฮย กัน นำ อวย นไท พาลือ นำ ก็ กอย งาล กอย เลาะ เล็ห ออ ฮัก” อัห อัง 13ปึง ลูกนอง เยา เยซู เค็ย นำ อวย นไท ลิงลัก อุ แต เยซู ซีแล็ม เค็ย ลาซารัด เปิล แลว 14ทาเน เยซู ก็ ไล อัห ซือๆ คือเน “ลาซารัด เปิล แลว ดาย 15เอิญ เลาะใจ ตี เอิญ ไอ มี กุญ อุ เจิง ลาซารัด ญาม นำ โซะ นัน เลือง เน เกิด เล็ห ก็ ระ เป็น ปะโยด ตัก แป ระ แป แก็นใจ เจือ เอาซาง บัดนะ วัล แอ็ห แอ เริล และ นำ” เยซู อัง เจ็นนัน อัห ก็ เริล ออ
16ทาเน โทมัด ตี อัห เค็ย ควัน แฟด นัน นำ ก็ ไล อัห ตี เป็น ลูกนอง เยซู เลิม นัน คือเน “แอ็ห แอ เริล เปิล เลิม เคิบ อาจาน นอ” นำ อัง
เยซู เล็ห งวัล เบทานี
17เยซู ก็ เริล งวัล เบทานี โตะ เคิด งวัล อัห แลว เยซู ก็ เม็จ คาว อัห เอิด ซบ ลาซารัด ระ ตัก อุโมง ซี งิ แลว 18ทาเน งวัล เบทานี เน ไอ มี ปอ เยอะ ซะ เจ็น เมือง เยรูซาเล็ม ปะมาน แพะ กีโล เน 19ครำ ยิว ตัก จังวัด ยูเดีย นัน อัห ก็ โตะ ออย มารี เคิบ มาทา ตัก เป็น นไจ ครำ เปิล นัน อัห โตะ ออย ปาม ดก ล็อง
20ทาเน มาทา เม็จ คาว เค็ย โตะ เยซู นำ ก็ ทอก เริล และ เยซู แต มารี ควะ อุ ตัก เจิง นัน 21มาทา ก็ ไล เยซู คือเน “อาจาน กัน มัห อุ ตัก เน งิ นาน ควน เอิญ ก็ ไอ มี เปิล เตาะ 22แต เอิญ เคาใจ แลว จังนักๆ มัห ก็ ควะ จวย กุญ กัน มัห ครอ ซีวะ ตัก เอาซาง มานะ เน เอาซาง ก็ จวย กุญ มด” มาทา อัง
23เยซู ก็ ไล นำ คือเน “ควน มัห ก็ รีด วัล ดาย” เยซู อัง 24มาทา ก็ ไล เยซู คือเน “เอิญ เคาใจ แลว นำ รีด เล็ห เลิม เคิบ ครำ จู ล็อง ตัก งิ ซุดทาย นัน บัดนะ” นำ อัง
25เยซู ก็ ไล มาทา คือเน วัล “เอิญ เน เป็น ล็อง ตี ระ ครำ รีด อุ จู ล็อง ตี รีด อุ ก็ รีด ญอน เอิญ ฮัก เอา นเดย ตี เจือ เอิญ ตึง อัห เปิล เริล แลว อัห ก็ รีด เล็ห วัล 26จู ล็อง ตี รีด อุ ตี เจือ เอิญ อัห ก็ ไอ มี งิ เปิล เตาะ มัห เจือ ฮุนเน อัน” เยซู อัง
27มาทา ก็ ซวัล เค็ย “เออะ เอิญ เจือ เค็ย มัห เป็น เมซียา ฮัก มัห เป็น ควัน เอาซาง ตี โตะ อุ ตัก โลก แพนซิก เน” นำ อัง 28แลว มาทา จ็อก เคิบ เยซู แลว มาทา ก็ วัล โตะ ไล ควน ออ ตัก มารี นำ ก็ ซีตาม ไล มารี คือเน “อาจาน โตะ แลว ดาย นำ ไล มัห โตะ และ ออ” มาทา อัง เค็ย ควน
29มารี เม็จ มาทา ไล ออ จังนะ แลว นำ ก็ เลิบ เริล และ เยซู 30-31ครำ ตี ควะ ออย มารี อุ ใน เจิง นัน อัห เม็จ มารี เลิบ ทอก เริล เจ็น เจิง อัห ก็ เยา นำ เริล เญ็ม อุ ตัก อุโมง อัห ก็ เต็ก นำ เริล
ทาเน เยซู ก็ ควะ อุ เคิง ตี มาทา เม็จ นำ เคิน นัน นำ ไอ มี ตัน กุด งวัล ซัง มารี ก็ โตะ และ เยซู ตัก นัน 32ญาม มารี โตะ เคิด ตี เยซู คุด อุ นัน นำ เม็จ เยซู นำ ก็ กราบ ไว เยซู นำ ไล เยซู คือเน “งกีจ็อง กัน เวิด โตะ มัห งิ นาน ควน เอิญ ก็ ไอ มี เปิล เตาะ” มารี อัง 33เยซู ก็ ดอม มารี เคิบ ปึง อัห ตี โตะ เลิม นัน นำ เม็จ อัห เญ็ม นำ ก็ แร็ง เซียใจ ตึ อัง อัห ซีเละ
34เยซู แร็ง เซียใจ นำ ก็ ซ็วน อัห คือเน “แป พระ ซบ นำ ตัก นเดย บ็อห” นำ อัง อัห ก็ ซวัล นำ “งกีจ็อง เฮย มัห เริล ดอม เคิบ อิห กา” อัห อัง 35เยซู ก็ เญ็ม 36ครำ ยิว เม็จ เยซู เญ็ม อัห ก็ จ็อก คือเน “ดอม กา นำ รัก ลาซารัด เน ซีเละ นอ” อัห อัง 37แต แกด ล็อง จ็อก เค็ย “ล็อง เน นำ จวย ครำ บอด มัด ระ ดอม ตาด วัล ก็ กุญ กัน นำ เวิด โตะ งิ นาน นำ จวย ลาซารัด เน ไอ มี ระ เปิล ก็ กุญ ก้า” อัห อัง
เยซู พร็อห ลาซารัด ระ รีด เล็ห วัล
38เยซู เม็จ อัห จ็อก คือนะ นำ ก็ แร็ง เซียใจ วัล เจ็นนัน นำ ก็ เริล ตัก อุโมง โตะ ตัก อุโมง แลว ก็ มี เกียง จ็อง เติล ระ งอก อุโมง นัน 39เยซู ก็ ไล อัห โมล แอ็ม เกียง ตัก งอก อุโมง นัน แต มาทา ก็ เทียง เยซู คือเน “อาจาน ไอ มี เลาะ พลาง งอก อุโมง ก้า มานะ เน ก็ แร็ง ซุ นำ แลว นำ เปิล ซี งิ แลว ดุห” มาทา อัง
40เยซู ก็ ไล มาทา คือเน “เคิน เอิญ ก็ ไล มัห แลว เค็ย กัน มัห เจือ มัห ก็ เม็จ แร็ง เม็จ อำนาด คอง เอาซาง เอิญ ไล มัห จังนะ แลว นอ” เยซู อัง 41เยซู ไล อัห แลว อัห ก็ โมล แอ็ม เกียง ตัก งอก อุโมง นัน
ทาเน เยซู ก็ ง็อห มัด ดอม วาง ทึห นำ ลด จ็อก ฮุนเน “เอา เอิญ คอบคุน มัห ดกๆ ดาย ตี มัห ปัง แญง เอิญ 42เอิญ เม็จจึด แลว มัห ปัง แญง เอิญ จู ลบ แต ตี เอิญ จ็อก เคิบ มัห เน ก็ เพือ ระ เป็น ปะโยด อน ตัก ครำ ตี ปัง อุ ตัก เน เพือ ระ อัห เจือ เค็ย มัห ฮัก ไล เอิญ โตะ ตัก โลก เน” เยซู อัง
43แลว เยซู จ็อก ออ แลว นำ ก็ งกรอ ครำ เปิล นัน ทอก โตะ นำ งกรอ แร็งๆ คือเน “ลาซารัด เฮย ทอก โตะ แต็ห เนอ” นำ อัง 44ครำ เปิล นัน ก็ ทอก โตะ มี พา มบัล ปอก ที ปอก เจ็ง ปอก มัด ปอก มุห นำ มด ตึง นัง เยซู ก็ ไล อัห อีด แอ็ม พา ตัก นัง นำ นัน ระ ซะดวก นำ เริล
45ทาเน ครำ ตี โตะ เลิม เคิบ มารี นัน อัห เม็จ ซะ ตี เยซู แอง นัน อัห ก็ เจือ นำ ดก ล็อง 46แต แกด ล็อง เริล เลามุน เลือง เน อน ตัก ปึง ฟาริซี ปัง
47ปึง ฟาริซี เคิบ ปึง มอ เอาซาง แกะ เม็จ เลือง เน แลว อัห ก็ ลด ไล ซะพา จ็อง โตะ พซุม#ค 47 ซะพา ตี อัห โตะ พซุม นอย นัน เป็น ซะพา จ็อง คอง ครำ ยิว ตัก เมือง เยรูซาเล็ม มี ซะมาซิก 70 ล็อง อัห ตัดซิน ดก เลือง ดก มบลึ ตัก ปะเทด อิซราเอล เน โตะ อัห มด แลว อัห ก็ ซ็วน นอย ฮุนเน “แอ แอง จังนัก เลาะ บ็อห เยซู เน นำ แอง ซะ แปลก จ็อง ดก มบลึ แลว 48กัน แอ ปลอย ระ เยซู แอง จังนัน ติกๆ พซาซน ก็ เลอะ เจือ นำ มด กัน อัห เจือ นำ มด อัห ก็ เอิด นำ เป็น พะเจายูฮัว กัน เจานาย โรม เม็จ เลือง เน อัห ก็ เยา แอ ซู ออ เป็น ซะตรู ออ อัห ก็ โตะ รึห แอ็ม วิฮาน แอ อัห โตะ ทำลาย ปะเทด แอ วัล” อัห อัง
49อัห นเจิก ปะเทด อิซราเอล ญุบ แอ็ม ญอน เยซู นัน แต ทาเน ก็ มี มี ล็อง ตัก ปึง อัห นัน ซือ นำ ตัก คายาฟัด วาง นัน พอดี คายาฟัด เป็น มอ เอาซาง จ็อง นำ ก็ ไล อัห คือเน “แป ไอ มี เคาใจ ซีวะ ซัง 50แป ไอ มี เม็จจึด ก้า แอ มเบิล แอ็ม เยซู มานะ เน ก็ เลาะ ระ ไอ มี ปันฮา เคิบ โรม นัน มี มี ล็อง เปิล แตน ครำ แอ ก็ เลาะ กวา แอ ต็อง เปิล มด ปะเทด ไอ แมน เออะ” คายาฟัด อัง 51ตี คายาฟัด จ็อก มอก นัน ก็ ไอ แมน กำกึด นำ จ็อก เอิด ออ ฮัก เอาซาง อน กำกึด ตัก นำ ระ นำ จ็อก ไล อัห มอก นัน ฮัก เพาะวา วาง นัน คายาฟัด เป็น มอ เอาซาง จ็อง เอาซาง ก็ ลด ระ นำ จ็อก แตน ออ นำ ก็ เพีย ไล อัห เค็ย เยซู ต็อง เปิล แตน ครำ ยิว 52นังเลาะ แลว ไอ แมน เยซู เปิล แตน ครำ ยิว มี ปึง เดียว นำ เปิล แตน ครำ มด จู ล็อง ตี อุ ทัว โลก เน นำ เอิด ครำ เอาซาง ทัว โลก เน ระ เป็น มี ปึง เดียว เลิม เคิบ ครำ ยิว นัน
53(แลว เยซู จวย ระ ลาซารัด รีด เล็ห แลว ปึง ซะ แกะ ครำ ยิว ก็ ไอ มี ปอใจ เตาะ) เจ็น งิ นัน อัห ก็ ลด และ รวง มเบิล เยซู ลด 54เยซู เริล พานเดย นำ ก็ จำเป็น ลอด เริล นำ ไอ มี ระ ซะ แกะ ครำ ยิว เม็จ ออ เจ็นนัน เยซู ก็ เริล เจ็น งวัล เบทานี นำ โตะ อุ ตัก งวัล เอฟาอิม งวัล เอฟาอิม นะ อุ ติ ซะ ตัก ตี แลง นัน นำ เคิบ ลูกนอง ก็ ลด อุ ตัก นะ
55ญาม นัน ก็ บัก และ เล็ห งิ เทซกาน เปซา อัห ซะลอง งิ ตี เอาซาง เว็น ควัน เกา อิซราเอล ตัก อิง ทาเน ก็ มี ครำ งวัล ซะร็อห ดก งวัล อัห โตะ ตัก เมือง เยรูซาเล็ม นัน ดก ซีเละ อัห เพีย โตะ วาล ไอ ตัน เล็ห งิ อัห ซะลอง นัน อัห เพีย โตะ แอง พิที ระ นัง ออ เลาะ ตาม กด เอาซาง วาล
56ญาม พซาซน คุด อุ ตัก เด็นเตะ วิฮาน เอาซาง นัน อัห ก็ ดอม และ เยซู ญาม อัห ดอม และ เยซู นัน อัห ก็ ซ็วน นอย คือเน “เยซู โตะ ซะลอง เทซกาน เปซา เน บ็อห นอ” อัห อัง 57ปึง มอ เอาซาง แกะ เคิบ ปึง ฟาริซี เพีย ไล อัห วาล แลว เค็ย กัน ซีเอ เม็จ เยซู อุ ตัก นเดย ก็ โตะ ไล ปึง ฟาริซี เวิดๆ ระ ปึง ฟาริซี นัน กุญ เญ็บ เยซู
Markert nå:
ยอน 11: Prai
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Global Partners
