Hechos 12
12
Herodes Jesúsnö ösödadönö inia tjötjinö ja̧tjobö weina wene
1Ja̧danö, jejenö baledonö la'aka luwo̧ Herodes mikwo̧, romano jojoma webijetö ömöayedönö Jesúsnö ösödadötjö ju'wedönöma do̧batö inia tjötjinö ja̧tjobö . 2Jobadötjö bakwo̧nö, Juan öjawo̧ Jacobo mikwo̧nö, jo̧ba uu bulatö lotjobö webijetö. Jejenö weawö̧ma Jacobonö uu bulatö lobijadötö. 3Ja̧danö, judío jojodö la'aka luwedöma Jacobonö uu bulatö lotjaja̧ a̧ja̧kwö jwiinö ösödijadötö, Jesúsnö ösödadönö tjöpöjödobetjö̧. Jejenö tjösödiökwe la'aka luwo̧ Herodesma omukwatijetö, Aaa, judío jojodö ötjönö otiwanö tjösödobö jelo̧nöbi do̧tjatobö weta, jö̧ba̧lö. Jejenö omukwatö Pedronöbi do̧tjatobö webijetö ka̧lena ba̧kwaweju okwa tjödobö. Jejenö ji̧nama pjiesta ji̧ möle, pan 'ye'yeachökö kwakwawa pjiesta, Dios öbaledina omukwatö pjiesta ötjabi̧ma.
4Ja̧danö, jejenö weiawö̧ Herodes ömöayedöma Pedronö do̧batijadötö. Do̧batajadö ka̧lena ba̧kwaweju okwa lödijadötö, Dios öbaledina omukwatö pjiesta kwanö katjatenanö kabatö. Ja̧danö, Herodesma webijetö a̧li̧nösamutjö jelemutjö bakwo̧nö guardia jojodönö tjödajökwe Pedronö tjite'ada̧lobö. Jobadötjöma ö'wejemu jojodökwena balewa̧lö Pedronö tjite'ada̧lobö webijetö. Ju'wi möle pjiesta kwanö katjatenama Pedronö öbibö e'ewö jojodö tjö'da̧denö tjujunobö omukwatijetö Herodesma, Pedronö lȩekwa wene yöawobö. 5Jo̧kwaobetjö̧ Pedroma ka̧lena ba̧kwaweju okwa bi̧jetö. Jobe ö̧bonö Jesúsnö ösödadöma kabatökönö abebijadötö Diosnö, Pedronö pjaatobö.
Dios Pedro ka̧lena ba̧kwawejutjö laebinö pjaatina wene
6Ikenama pjiesta kwanö katjatena, Pedronö lȩekwa wene yöawakwa̧ möle yö̧te baibena Pedroma ka̧lena ba̧kwaweju okwa abijetö. Öjabiya döjölatajanö 'dii̧ osiju ka̧lenasiju du̧ju̧taja guardiakwö yö̧ekwobe abijetö, bakwo̧ Pedro öjabiya öwaisöjakwöchobe, ja̧danö, jelo̧ wajwiöjakwöchobe yö̧bekwö. Ju'wedö guardia jojodöbi ka̧lena ba̧kwaweju apjude a'onö te'ada̧lö ji̧jadötö. 7Ikenama Pedro jejenö abonö omönanö öwawachijetö Duluwo̧ weajökwe ángelma. Öwawachena dewinö dejatijetö Pedro ö̧bȩko̧ okwama. Jo̧ba ángelma Pedronö ometupanö 'dobö wiludijetö. 8Wiluibo̧nö jö̧ba̧lijetö:
—¡A̧laibi, omönanö!— jö̧ba̧lijetö. Jejenö jö̧a̧lemi 'dii̧ osiju ka̧lenasijuma omönanö ejachaibijetö. Ikenama ángelma jö̧ba̧lijetö:
—Koleasö̧jȩ nönawi kwökamijido̧nö. Sapatubi 'dubawi— weiökwe a̧ja̧kwijetö Pedroma. Ikenama ángelma webijetö:
—Wamesado̧ jwabekwibö ötjökwö ichi— weiökwe 9Pedroma ángelkwö ka̧lena ba̧kwawȩko̧tjöma labebijetö. Labebö omukwatijetö, Biya̧ma ¿dakwö baledajö? jö̧ba̧lö. Chi̧'wi̧di̧ena bite ángel ötjönö pjaati̧ma, jö̧ba̧lö, omukwatijetö. 10Ikenama Pedrokwö ángelkwö labekwöma ajayinö guardiaso̧ te'ada̧lo̧nöma baledibö jemi tupakwö te'ada̧lo̧nöbi baledijadötö. Jemi tupakwö ka̧lena ba̧kwaweju apjude, 'dii̧ jawatjö otikwadenö ichibijadötö. Tjichibena jade apjudema omönanö po̧ibijetö, a̧dekwanö. Po̧ibena labekwibijadötö a̧petube. Labekwajadö mananö 'yi̧jadötö. Jemi tupakwö, mananö ödöokobe tjȩwa̧bijena ángelma debi̧ babibijetö. 11Ja̧danö, jejenö debi̧ baibiökwe Pedroma otiwanö waisachibö jö̧ba̧lijetö:
—Aaa, babema chöwaisachiba. Biya̧ma chi̧'wi̧di̧maökö. Isabenö jo̧ba ángelma Duluwo̧ weajökwe ángel. Herodes ötjö chö'wöchinö weakwa̧tjö chö̧jibinö pjaatajabe jo̧ba ángelma. Ja̧danö, judío jojodö ötjönö sulabenö baledakwa̧ tjösödi̧ma baledökakobetjö̧ pjaatajabe— jö̧ba̧lijetö. 12Jejenö jö̧ba̧lö Pedroma María jejube 'yi̧jetö. Jobuju Maríama, Juan Marcos mikwo̧ ojo'do. Jeju okwa ba̧jekwadö Jesúsnö ösödadöma ko̧ko̧kwijadötö, Diosnö abebö. 13Ja̧danö, Diosnö atjebonö Pedroma jejunö ichibijetö. Ichibö jeju a̧petu teachakwawemi apjudesötenö 'do'doba̧lijetö. 'Do'doa̧lioko jejunö ju̧kwadö tjömöayujuma, Rode mikwujuma ¿Tijö? jö̧ba̧lö, edö 'yi̧jotö. 14Jobujuma apjudenö ichibö, Pedro iwene ökwöioko, Pedroena, jö̧ba̧lö jo̧'wo̧ ösöwachibijotö. Ja̧danö, jwiinö jo̧'wo̧ jösöwachibobetjö̧ omukwatökönö tebatijökötö Pedronöma. Jo̧banö tebatökönö omönanö ö'öbajö tjebachajijotö okobe deinö yöjawobö. Ja̧danö, ju'wedö tjö̧bajobekwö ichibö yöbawijotö:
—Pedroma apjudenö ö̧ja— jö̧ba̧lö yöbawijotö. 15Jejenö yöjawiawö̧:
—Jo̧bamaökö. Kwo̧'wo̧ jwibujudanö yöka̧la— jö̧ba̧lijadötö jobujunö. Jejenö jö̧tja̧lijayonö jobujuma:
—Cho̧'wo̧ jwibökujusa, jweinö yötawa, Pedrota, apjudenö ö̧ja— jö̧ba̧lijotö. Jejenö yöjawijayonö jobadöma jö̧ba̧lijadötö:
—Jo̧bama Pedromaököena, jo̧banö te'ada̧lo̧ ángelda ö̧jena—jö̧ba̧ljadötö. 16Jejenö jö̧tja̧lonö Pedroma ina 'do'doba̧lijetö apjudenö. 'Do'doa̧liawö̧ o̧do okwa ba̧jadöma bajaliyanö 'ya̧nö po̧bebö tjedemi Pedroda ji̧jetö. Ja̧danö, Pedro jobe ja̧nö ö̧jiawö̧ jwöbeba̧lijadötö, ¡Ayö! Pedroma ¿dakwö laebajajö? jö̧ba̧lö. 17Jejenö jwötjeba̧liökwe Pedroma ömamu kabebijetö jobadönö, Ö'wainö ju̧kwaduwi, jö̧ba̧lö. Ikenama Duluwo̧ pjaataja̧ma yöbawijetö, weajökwe ángelma ka̧lena ba̧kwawejutjö öbibö laebaja̧ma. Ikenama webijetö:
—Yökawaduwo Jacobonöbi, ju'wedö Jesúsnö ösödadönöbi— webijetö. Ikenama jejutjö labebijetö Pedroma jelobe 'ya̧nö.
18Ja̧danö, ju'wi dewachö ka̧lena ba̧kwawejutjö otidadö guardia jojodöma, Pedro deiawö̧:
—¡Ayö!, ¿dakwö laebajajö? Jo̧bama ¿dai döibajajö?— yöba̧lakwawijadötö. 19Ja̧danö, la'aka luwo̧ Herodesma, Pedro dei̧ wene yötjawi̧ a̧ja̧kwö webijetö guardia jojodönö Pedronö tjisakwobö. Jobadöma tjisakwemi deijetö Pedroma. Deiökwe Herodesma abeba̧lijetö Pedronö te'ada̧lakwawa jojodö guardianöma ¿Dakwö baledaja̧da? jö̧ba̧lö. Ikenama, Bidöma otiwanö te'ada̧löködö, jö̧ba̧lö, webijetö ju'wedönö kwabö lotjobö jobadönöma, Pedroma jobadötjö döibajobetjö̧. Ikenama Herodesma Judeatjö labebö jelobe 'yi̧jetö, Cesareabe, ja'yubeda lekwe ö̧jobö.
Herodes ö'wö baibina wene
20Ja̧danö, jobe Cesareanö ö̧jonö Herodesma jwiinö labijetö ju'wedönöma, jelobe ju̧kwadönöma, Tiro comunidadnö ju̧kwadönöbi, Sidón comunidadnö ju̧kwadönöbi. Jobadöma Herodes weemi nijitjöda tju̧kwa kwakwawa emiabijadötö. Herodes jobadönö ölabiawö̧ omukwatijadötö, Herodesma ökwödönö ölabitjö̧ma ¿detjö demakwa̧jö du̧kwa kwakwawama?, jö̧ba̧lö. Jo̧kwaobetjö̧ bakwainö omukwatö, Jobe di̧'yo jo̧banö abeba̧lö ökwödönö wene jwiinö ö̧jobö, jö̧ba̧lö. Jejenö omukwatibö 'yi̧jadötö Herodes ö̧jobekwö. Jobe ichibö edijadötö jelo̧nö, Blasto mikwo̧nö, Herodes ömöayedö tjuluwo̧nö. Jo̧banö ösödinö atjebiökwe Herodesnö abebijetö, jobadö atjebi̧ a̧ja̧kwobö. 21Ikenama ju'wi möle, Herodesma jobadö atjebobe a̧ja̧kwi̧ möle ichibena Herodesma otiwanö 'dubawijetö, la'aka luwedö wame 'dubawaitjadanö. 'Dubawajo̧ la'aka luwedö ba̧jitjakanö ba̧nö, la'aka luwo̧ yöba̧lajitjadanö yöba̧lijetö jobadö Tironö ju̧kwadönöbi Sidónnö ju̧kwadönöbi . 22Jobadöma, Herodes yöawonö kabatökönö jwöbeba̧lakwawijadötö, Bitema Diosdanö yöba̧lo̧. Jojobökena, ida̧ökö Diosdanö babibajo̧, jö̧ba̧lö. 23Ikenama omönanö Duluwo̧ weajökwe ángelma Dios ujulunö isȩbö ja̧ijetö Herodesnö wi̧ba̧'dö̧ nöinö tja̧jinö, ukwa'wo 'ye'yeachibanö. Herodesma, jojodönö jwebeba̧lö yöa̧lokobetjö̧, Ötjöma Diosbö̧kö̧sa, jö̧ba̧lö, Diosnöda ösödaduwi, jö̧ba̧lö, jejenö baledijetö, wi̧ba̧'dö̧ tja̧jinö Herodes ukwa'wonö. Ikenama ju'wi möle, lekwokobetjö, Herodesma ö'wö babibijetö, ukwa'wo wiba'dö̧ nöinö tja̧jobetjö̧.
24Jejenö baledonö jelobebi jelobebi ba̧jekwadö a̧ja̧kwijadötö Dios iwenema. Jesúsnö ösödadöma ba̧jekwachijadötö yelösöda. 25Ikenama Bernabé, Saulo, yöbawö kabatö Jerusaléntjö Antioquíabe ȩwa̧jijadötö. Jelo̧nö öbibö ȩwa̧jijadötö, Juan mikwo̧nö. Jo̧bama griego tjiwenema Marcos mikwijetö.
Markert nå:
Hechos 12: WPC
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©2021, All Rights Reserved
