तोलिङ्सोमु 13
13
अब्राम्मिन् नु लुते़न् से़न्छिॽ
1खे़ल्ले़चोगुल्ले़ अब्राम्मिन्, कुहिम्सामे़न् हे़क्क्याङ् खुने़ॽ कत्तुबा के़रे़क् चिगक्वाहाॽनु लुते़न् याङ्सिङ्ङाङ् मिस्रलाम् थासिङ्ङाङ् नेगेब लाजेॽओ थाङे़॥ 2यरिक् हिम्थक्सा नु साम्म्याङ् युप्पा कत्तुबाल्ले़ चोगुल्ले़ अब्राम्मिन् चाॽरिक् याङ्साकुन्धेसाबा पोःक्खे़आङ् वये़॥
3खुने़ॽ नेगेबलाम् यरिक् ते़न्हाॽओ चत्छिङ्ल पेःल्ले़ तगि बेथेल नु ऐरे़ कुलुम्मो खुने़ॽ साःङ्गाहिम् खिङ्सुआङ् ने़स्से़बादे़न्नो के़रे़, 4हे़क्क्याङ् आम्भा कन् ते़न्नो अब्राम्मिल्ले़ तगि ले़त्ति तोःम्मादे़न् चोगुआङ् ने़स्से़॥ खे़ॽयो अब्राम्मिल्ले़ यहवे दाङ्बान् पेलि फाक्तु॥
5अब्राम्मिन्नु सोरिक् के़बेःक्पा लुतरे़आङ् मे़ल्लुक् मे़ःन्दाहाॽ नु पित्हाॽ कत्तुसि हे़क्क्याङ् साःङ्गाहिम्हाॽआङ् कत्तु॥ 6खुन्छिॽ ने़प्जाङ् सोसोरिक् युङ्मारे़ लागि लाजेःल्ले़ मे़दे़क्तुन्छिन्, थेआङ्भे़ल्ले़ खुन्छिॽ मे़ल्लुक् मे़ःन्दाक्हाॽ नु पित्हाॽ चाॽरिक् यल्लिक् मे़वये़, हे़क्केःल्ले़ खे़ङ्हाॽ सोरिक् वाॽमा मे़न्छुक्मना पोःक्खे़छि॥ 7अब्राम्मिन् नु लुते़ल्ले़ खुन्छिॽ पित् मे़ःन्दा के़गम्बाहाॽरे़ खुनिॽ लुम्मो खे़माॽआङ् पोःक्से़॥ खे़न् ये़म्मो खे़न् लाजेॽओ कनानिहाॽ नु परिज्जिहाॽआङ् मे़युङे़॥
8खे़ल्ले़चोगुल्ले़ अब्राम्मिल्ले़ लुते़न् मे़त्तु “खे़ने़ॽ नु आन्छिॽ लुम्मो हे़क्क्याङ् खे़ने़ॽ के़बित् के़मे़ःन्दाक् के़गम्बाहाॽ नु आङ्गाॽ आबित् आमे़ःन्दाक् ओगे़मे़प्पाहाॽरे़ खुनिॽ लुम्मो खे़माॽ चोगि मेःन्, थेआङ्भे़ल्ले़ आन्छिॽग निःत्ताङ्बा काॽइ आधाप्सि॥ 9के़रे़क् लाजेन् खे़ने़ॽ के़दगाङ्ङे ने़ःॽ॥ आन्छिॽ से़सि॥ खे़ने़ॽ फे़ङ्वा ले़प्माङ् के़बेःक्निफाग्र आङ्गाॽ चुक्वा ले़प्माङ् पेःक्का, खे़ने़ॽ चुक्वा ले़प्माङ् के़बेःक्निफाग्र आङ्गाॽ फे़ङ्वा ले़प्माङ् पेःक्का॥”
10लुते़ल्ले़ कुमिक्किन् खिरि हिसुआङ् ओमे़त्तु, हे़क्क्याङ् सोअर ले़प्माङ्बा यर्दनबा के़रे़क् ते़म्बेःन् निसु॥ यहवे दाङ्बाल्ले़ कुभुङ्इक्#१३:१० यहवे दाङ्बाल्ले़ कुभुङ्इक्—कल्ले़ अदन फुङ्इक्के़ल्ले़ कुयाःम्बेओ पाःत्तुॽ॥ इग्र मिस्र लाजेन् हे़क्के खे़न् के़रे़क् च्वाःत्तिल्ले़ वभिःन्दुआङ् ने़स्से़॥ (कङ्ग यहवे दाङ्बाल्ले़ सदोम नु गमोरा पाङ्जुम्मिन् मे़ङ्मानुःल्ले़ तगिबा पाःन्लो॥) #तोलिङ् २:१० 11खे़ल्ले़चोगुल्ले़ लुते़ल्ले़ यर्दनबा काक् ते़म्बेःन् सेगुआङ् नाम्गे़त् पिसाङ् थासिङ्॥ अक्खेलॽरिक् खे़न् ने़त्छि मनाहाॽ से़न्दे़छि॥ 12अब्राम्मिन् कनान लाजेॽओए युङे़लारे़, लुते़ङ्ग ते़म्बेॽओ के़ने़बा ये़क्यक्हाॽओ युङे़॥ हे़क्क्याङ् खे़ल्ले़ सदोम ये़क्यक्किल्ले़ कुबेसाङ् साःङ्गाहिम् खिङ्सु॥ 13सदोमबा मनाहाॽ कुॽइके़भे़म्बा मे़जोगे़, हे़क्क्याङ् यहवे दाङ्बाल्ले़ कुदक्ले़ङ्वाओ चाॽरिक् लायो मे़जोगु॥
अब्राम्मिन् हेब्रोन पेक्
14लुते़न् से़न्दे़बेआङ् यहवे दाङ्बाल्ले़ अब्राम्मिन् मे़त्तु, “खे़ने़ॽ के़ये़प्पा ते़न्नोलाम् के़मिक्किन् हिसे़ॽआङ् थाङ्गे़त् नु लाङ्गे़त्, नाम्गे़न् नु नाम्धा के़रे़क् पिसाङ् ओमत्ते़ॽ॥ 15थेआङ्भे़ल्ले़ खे़ने़ॽ के़निसुबा के़रे़क् ते़न्हाॽ खे़ने़ॽ नु के़मुॽइदाङ्साहाॽ सदादिङ्ले़ लागि पिनिङ्॥ #सेःक्युक् ७:५ 16आङ्गाॽ के़मुॽइदाङ्साहाॽ इक्सादिङ् खाम्बेःक्मो खाम्भुत्रान् कुइसिक् फोसुङ्सिङ्ॽ॥ कुभारे़ खाम्भुत्रान् निःप्मा मे़सुक्तुने़भग्र खे़ने़ॽ के़मुॽइदाङ्साहाॽआङ् निःप्मा मे़सुक्तुसिरो॥ 17आल्ल पोगे़ॽ, हे़क्क्याङ् लाजेॽओ के़रे़क् पिसाङ् पेगे़ॽ, थेआङ्भे़ल्ले़ आङ्गाॽ खे़न् खे़ने़ॽ पिने़रो॥”
18खे़ब्याङ् अब्राम्मिल्ले़ कुसाःङ्गा हिम्मिन् चत्तु, हे़क्क्याङ् मम्रेबा यहिबासिङ्हाॽरे़ कुबेसाङ्बा हे़ब्रोन्नो युङ्से़ पे॥ खे़प्मो खुने़ॽ यहवे दाङ्बाल्ले़ कुलागि लत्छा ले़त्ति तोःन्मादे़न् थिक् चोगु॥
Markert nå:
तोलिङ्सोमु 13: LIF
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2009, 2023, Wycliffe Bible Translators, Inc. All rights reserved.
