လံာ်တၢ်ကဲထီၣ်အခီၣ်ထံး 26
26
စီၤအံၤစဲးအိၣ်ဝဲဆိးဝဲဖဲဝ့ၢ်ကရၢ်
1တၢ်သၣ်ဝံၤလီၤဒိမၤအသးလၢညါလၢစီၤအၤဘြၤဟၣ်အဆၢကတီၢ်ဝံၤ အလီၢ်ခံမၤကဒီးအသးတဘျီလၢထံကီၢ်အပူၤန့ၣ်လီၤ. ဒီးစီၤအံၤစဲးလဲၤဝဲဆူပှၤဖလ့ၡသးဖိအစီၤပၤစီၤအဘံၤမ့ လ့းအအိၣ်လၢဝ့ၢ်ကရၢ်န့ၣ်လီၤ. 2ဒီးယွၤလီၣ်ဖျါထီၣ်အသးလၢစီၤအံၤစဲးအမဲာ်ညါဒီးစံးဝဲ ဒၣ်, “လဲၤဆူကီၢ်အဲၤကူပတူးအပူၤတဂ့ၤ. အိၣ်လၢကီၢ်လၢယစံးဘၣ် နၤအပူၤတက့ၢ်. 3အိၣ်ဖဲအံၤဒီးယကအိၣ်ဒီးနၤဒီးယကဆိၣ်ဂ့ၤနၤလီၤ. ယကဟ့ၣ်လီၤတၢ်လီၢ်ခဲလၢာ်အံၤလၢနၤဒီးနစၢၤနသွဲၣ်တဖၣ်န့ၣ် လီၤ. ယကဟံးဃာ်ယတၢ်အၢၣ်လီၤလၢယမၤတ့ၢ်ဒီးနပၢ်စီၤအၤဘြၤဟၣ်န့ၣ် လီၤ. 4ယကဟ့ၣ်နၤနစၢၤနသွဲၣ်တဖၣ်အါဝဲဒ်ဆၣ်ဧိၤဖီဧိၤလၢမူခိၣ်အသိး ဒီးယကဟ့ၣ်အဝဲသ့ၣ်လၢတၢ်လီၢ်ခဲလၢာ်အံၤန့ၣ်လီၤ. ကယဲၢ်ပှၤကလုာ်ခဲလၢာ်ကဃ့ယၤလၢယကဆိၣ်ဂ့ၤအဝဲသ့ၣ်ဒ်ယဆိၣ်ဂ့ၤ တ့ၢ်နစၢၤနသွဲၣ်အသိးန့ၣ်လီၤ. 5ယကဆိၣ်ဂ့ၤနၤလီၤ. အဂ့ၢ်ဒ်အံၤ, စီၤအၤဘြၤဟၣ်စူၢ်ယကလုၢ်ဒီး ဟံးဃာ်ကယဲၢ်ယတၢ်သိၣ်တၢ်သီဒီးယတၢ်မၤလိာ်တဖၣ်အဃိန့ၣ်လီၤ.
6ဒီးလၢတၢ်န့ၣ်အဃိစီၤအံၤစဲးအိၣ်ဝဲဆိးဝဲဖဲဝ့ၢ်ကရၢ်န့ၣ် လီၤ.
7ဒီးဖဲပှၤအိၣ်ဖဲန့ၣ်သ့ၣ်တဖၣ်သံကွၢ်တၢ်ဘၣ်ဃးဒီးအမါအဂ့ၢ် န့ၣ်အဝဲ စံးဆၢဝဲလၢမ့ၢ်အဒီပုၢ်ဝဲၢ်မုၢ်န့ၣ်လီၤ. မ့ၢ်လၢအပျံၤဝဲဒၣ်လၢပှၤအိၣ်ဖဲန့ၣ်ကမၤသံအီၤဒီးဟံးန့ၢ် နီၢ်ရံးဘကၤလၢအဒိၣ်တၢ်ဂ့ၤဒိၣ်မးတဂၤအဃိအဝဲတအၢၣ်လီၤဝဲဒၣ် လၢနီၢ်ရံးဘကၤမ့ၢ်အမါန့ၣ်ဘၣ်. 8ဒီးစီၤအံၤစဲးအိၣ်ဝဲဖဲန့ၣ်ယံာ်ထီၣ်တစဲး, ဒီးဖဲစီၤပၤစီၤအဘံၤမ့လ့းကွၢ်လီၤတၢ်လၢအပဲတြီဖိဒီး ထံၣ်ဘၣ်ဝဲဒၣ်လၢစီၤအံၤစဲးမံဃုာ်ဂဲၤဃုာ်ဒီးအမါနီၢ်ရံး ဘကၤန့ၣ်လီၤ. 9ဒီးစီၤအဘံၤမ့လ့းကိးန့ၢ်စီၤအံၤစဲးဒီးစံးဝဲဒၣ်, “ဒီးပိာ်မုၣ်အံၤမ့ၢ်နမါလီၤမးလဲၣ်. ဘၣ်မနုၤလၢနစံးလၢ အမ့ၢ်နဒီပုၢ်ဝဲၢ်မုၣ်န့ၣ်လဲၣ်.”
ဒီးစီၤအံၤစဲးစံးဆၢအီၤ, “ယဆိကမိၣ်လၢယမ့ၢ်စံးလၢအဝဲ မ့ၢ်ယမါန့ၣ်ဒီးယကဘၣ်တၢ်မၤသံယၤအဃိန့ၣ်လီၤ.”
10ဒီးစီၤအဘံၤမ့လ့းစံးဝဲဒၣ်, “နမၤတ့ၢ်ပှၤလၢတၢ်မနုၤတမံၤ န့ၣ်လဲၣ်. ပှၤလၢယခ့ယပှၤအကျါတဂၤကမံဃုာ်ဝဲညီကဒၣ်လၢနမါဒီးနကဒုး လီၤဘၣ်တၢ်ဒဲးဘးလၢပဖီခိၣ်လီၤ.” 11ဒီးစီၤအဘံၤမ့လ့းဟ့ၣ်ပလီၢ်ကယဲၢ်ပှၤခဲလၢာ်, “ပှၤတဂၤလၢ်လၢ်လၢအမၤတရီတပါစီၤအံၤစဲးမ့ၢ်ဂ့ၤ, အမါမ့ၢ်ဂ့ၤန့ၣ်ကဘၣ်တၢ်မၤသံအီၤလီၤ.”
12ဒီးစီၤအံၤစဲးဖှံတၢ်မုၢ်တၢ်ဘိအချံအသၣ်လၢကီၢ်အံၤအပူၤ ဒီးလၢနံၣ်အဝဲန့ၣ်ကူးဘၣ်က့ၤဝဲတၢ်အါန့ၢ်ဒံးတၢ်လၢအဖှံ လီၤဝဲအါအါဂီၢ်ဂီၢ်အဖီခိၣ်အစးတကယၤလီၤ. အဂ့ၢ်ဒ်အံၤ, ယွၤဆိၣ်ဂ့ၤအီၤန့ၣ်လီၤ. 13ဒီးအဝဲဘီၣ်ထီၣ်ညီထီၣ်ဆူညါဒီးကဲထီၣ်ပှၤအထူးအတီၤဒိၣ်မး တဂၤန့ၣ်လီၤ. 14မ့ၢ်လၢအဝဲအိၣ်ဒီးအသိအဖုအဂီၢ်တဖၣ်, အဂီၤဘုၣ်ဂီၤဖံးအဖု အဂီၢ်တဖၣ်အါအါဂီၢ်ဂီၢ်ဒီးအကုၢ်အပှၤအါဒံအါဂၤအဃိဒီးပှၤ ဖလ့ၡသးဖိတဖၣ်သးက့ၣ်အီၤလီၤ. 15လၢတၢ်န့ၣ်အဃိ, ပှၤဖလ့ၡသးဖိသ့ၣ်တဖၣ်အံၤမၤပှဲၤမၤတံာ်တၢၤ ကယဲၢ်ထံပူၤခဲလၢာ်လၢအပၢ်စီၤအၤဘြၤဟၣ်အခ့အပှၤတဖၣ်ခူၣ်တ့ၢ် ဃာ်ဝဲဖဲစီၤအၤဘြၤဟၣ်အိၣ်မူဒံးဝဲအခါန့ၣ်လီၤ. 16တုၤနုၤတစု, စီၤအဘံၤမ့လ့းစံးဘၣ်စီၤအံၤစဲး, “ဟးထီၣ်လၢပထံပကီၢ်အပူၤအံၤတက့ၢ်. အဂ့ၢ်ဒ်အံၤ, နကဲထီၣ်လံပှၤလၢအစိကမီၤဒိၣ်န့ၢ်အါန့ၢ်ပှၤတက့ၢ်လီၤ.” 17ဒီးစီၤအံၤစဲးဟးထီၣ်ဝဲဒီးသူၣ်ထီၣ်အဒဲလၢဝ့ၢ်ကရၢ်အတၢ် တြီၤပူၤဒီးအိၣ်ဝဲဖဲန့ၣ်တစိၢ်တလီၢ်န့ၣ်လီၤ. 18ဒီးစီၤအံၤစဲးခူၣ်လီၤကဒီးထံပူၤတဖၣ်လၢတၢ်ခူၣ်တ့ၢ်အီၤလၢ စီၤအၤဘြၤဟၣ်အစိၤ, ဒီးဘၣ်တၢ်မၤတံာ်တၢၤကွံာ်အီၤလၢပှၤဖလ့ၡသးဖိတဖၣ်ဖဲစီၤအၤ ဘြၤဟၣ်သံဝံၤအလီၢ်ခံန့ၣ်လီၤ. ဒီးစီၤအံၤစဲးကိးန့ၢ်ထံပူၤသ့ၣ်တဖၣ်အံၤအမံၤဒ်သိးသိး အပၢ်ကိးတ့ၢ်ဝဲန့ၣ်လီၤ.
19ဒီးစီၤအံၤစဲးအခ့အပှၤသ့ၣ်တဖၣ်ခူၣ်ထံပူၤဖဲတၢ်တြီၤပူၤ ဒီးထံၣ်န့ၢ်ထံလီၤ. 20ဒီးပှၤကရၢ်အပှၤကွၢ်သိတဖၣ်အ့ၣ်လိာ်အသးဒီးစီၤအံၤစဲးအပှၤ ကွၢ်သိသ့ၣ်တဖၣ်ဒီးစံးဝဲ, “ထံအံၤဘၣ်ဃးဒီးပှၤန့ၣ်လီၤ.” လၢတၢ်န့ၣ်အဃိစီၤအံၤစဲးကိးန့ၢ်ထံပူၤအံၤအမံၤလၢ, “ဧ့စ့း” အခီပညီ, “တၢ်အ့ၣ်လိာ်ဆိးက့လိာ်” န့ၣ်လီၤ.
21ဒီးစီၤအံၤစဲးအခ့အပှၤသ့ၣ်တဖၣ်ခူၣ်ကဒီးထံပူၤအဂၤတပူၤဒီး တၢ်အ့ၣ်လိာ်ဆိးက့လိာ်အိၣ်ကဒီးလၢထံပူၤအံၤအဃိစ့ၢ်ကီးန့ၣ် လီၤ. လၢတၢ်န့ၣ်အဃိစီၤအံၤစဲးကိးထံပူၤအံၤလၢ, “စံးတနၤ” အခီပညီ, “တၢ်ထီဒုၣ်ထီဒါ” န့ၣ်လီၤ. 22ဒီးစီၤအံၤစဲးသုးယံၤကွံာ်အသးဖဲန့ၣ်ဒီးခူၣ်ထံပူၤအဂၤ တပူၤန့ၣ်လီၤ. ဒီးတၢ်ဂ့ၢ်လိာ်ဘီလိာ်တအိၣ်ဘၣ်လၢထံပူၤအံၤအဂ့ၢ်ဘၣ်လီၤ. ဒီးကိးဝဲထံပူၤအံၤအမံၤလၢ, “ရဃိဘိး” အခီပညီ, “တၢ်သဘျ့” န့ၣ်လီၤ. ဒီးစီၤအံၤစဲးစံးဝဲ, “ခဲကနံၣ်အံၤ, ယွၤဟ့ၣ်လံပှၤတၢ်သဘျ့လၢပကအိၣ်ကဆိးလၢကီၢ်အံၤအပူၤဒီး ပကဘီၣ်ထီၣ်ညီထီၣ်ဖဲအံၤန့ၣ်လီၤ.”
23ဒီးစီၤအံၤစဲးဟးထီၣ်ဒီးလဲၤဝဲဆူဝ့ၢ်ဘ့ၢ်ၡဘၤလီၤ.
24ဒီးလၢမုၢ်နၤဝဲန့ၣ်ယွၤလီၣ်ဖျါထီၣ်အသးလၢအီၤဒီးစံးဝဲ, “ယမ့ၢ်နပၢ်စီၤအၤဘြၤဟၣ်အကစၢ်ယွၤလီၤ. ပျံၤတၢ်တဂ့ၤ. ယအိၣ်ဒီးနၤလီၤ. ယကဆိၣ်ဂ့ၤနၤဒီးဟ့ၣ်လီၤနၤ လၢနစၢၤနသွဲၣ်အါအါဂီၢ်ဂီၢ်လီၤ. အဂ့ၢ်ဒ်အံၤ, တၢ်န့ၣ်မ့ၢ်ယတၢ်အၢၣ်လီၤ, ဒီးယခ့ယပှၤစီၤအၤဘြၤဟၣ်အဃိန့ၣ်လီၤ.” 25ဒီးစီၤအံၤစဲးမၤထီၣ်တၢ်လုၢ်လီၢ်တခါဖဲန့ၣ်ဒီးဘူၣ်ထီၣ်ဘါ ထီၣ်ယွၤလီၤ. အန့ၣ်ဝံၤဒီး, သူၣ်ထီၣ်အဒဲဖဲန့ၣ်ဒီးအခ့အပှၤတဖၣ်ခူၣ်ထံပူၤ အဂၤတပူၤဖဲန့ၣ်လီၤ.
တၢ်သးလီၤပလိာ်အတၢ်အၢၣ်လီၤ လၢစီၤအံၤစဲးဒီးစီၤအဘံၤမ့လ့းအဘၢၣ်စၢၤ
26ဒီးစီၤအဘံၤမ့လ့းဟဲဝဲလၢဝ့ၢ်ကရၢ်ဃုာ်ဒီးအပှၤဟ့ၣ်ကူၣ်ဟ့ၣ် ဖးတၢ်စီၤအဃူးစး, ဒီးအပှၤသုးမုၢ်ခိၣ်ကျၢၢ်စီၤဖံကိးလးလၢအကဟဲထံၣ်စီၤအံၤ စဲးအဂီၢ်န့ၣ်လီၤ. 27ဒီးစီၤအံၤစဲးသံကွၢ်ဝဲ, “လၢညါန့ၣ်သုသးဟ့ယၤဒီးဒုး ဟးထီၣ်ကွံာ်ယၤလၢသုကီၢ်ပူၤလီၤ. ခဲကနံၣ်အံၤ, ဘၣ်မနုၤသုဟဲထံၣ်ယၤန့ၣ်လဲၣ်.”
28ဒီးအဝဲသ့ၣ်စံးဆၢဝဲ, “ဒီးခဲကနံၣ်အံၤ, ပသ့ၣ်ညါလၢယွၤအိၣ်ဒီးနၤလီၤ. ဒီးပဆိကမိၣ်လၢတၢ်အၢၣ်လီၤအီ လီၤသညူးသပှၢ်တမံၤကြၢးအိၣ်လၢပဘၢၣ်စၢၤန့ၣ်လီၤ. ပအဲၣ်ဒိးလၢနကအၢၣ်လီၤပှၤ, 29လၢနသုတမၤအၢပှၤတဂ့ၤဒ်ပတမၤအၢဘၣ်နၤအသိးန့ၣ်လီၤ. ပသူၣ်အိၣ်သးအိၣ်နၤဒီးပျဲနလဲၤတၢ်ခုၣ်ခုၣ်မုာ်မုာ်န့ၣ်လီၤ. ခဲကနံၣ်အံၤတၢ်အိၣ်ဖျါလီၤတံၢ်လီၤဆဲးလၢယွၤဆိၣ်ဂ့ၤတ့ၢ်နၤ လီၤ. 30ဒီးစီၤအံၤစဲးကတဲာ်ကတီၤတၢ်အီၣ်တၢ်အီအမူးတခါလၢအဝဲသ့ၣ် အဂီၢ်ဒီးအဝဲသ့ၣ်အီၣ်သကိးတၢ်န့ၣ်လီၤ. 31လၢမုၢ်ဆ့ၣ်ထီၣ်တနံၤဂီၤဂီၤန့ၣ်, တဂၤစုာ်စုာ်မၤအတၢ်အၢၣ်လီၤ ဒီးစဲပနီၣ်တံၢ်အီၤလၢတၢ်ဆိၣ်တမံၤလီၤ. စီၤအံၤစဲးကတိၤတၢ်လီၤမုၢ်လီၤဖးအတၢ်ဆၢဂ့ၤဒီးအဝဲသ့ၣ် ဒီးဟးဖးဝဲဒ်တံၤသကိးတဖၣ်အသိးန့ၣ်လီၤ.
32ဒီးလၢမုၢ်တနံၤန့ၣ်စီၤအံၤစဲးအခ့အပှၤတဖၣ်ဟဲဒီးတဲဘၣ်အီၤ လၢထံပူၤလၢအဝဲသ့ၣ်ခူၣ်တ့ၢ်ဝဲတပူၤအဂ့ၢ်န့ၣ်လီၤ. အဝဲသ့ၣ်စံးဝဲ, “ပထံၣ်န့ၢ်ထံလံ.” 33ဒီးစီၤအံၤစဲးကိးဝဲထံပူၤအံၤလၢဘ့ၢ်ၡဘၤအခီပညီ, “တၢ်ဆိၣ်” န့ၣ်လီၤ. တၢ်န့ၣ်မ့ၢ်ဝ့ၢ်ဘ့ၢ်ၡဘၤဒိးန့ၢ်မံၤအံၤဒ်လဲၣ်အဂ့ၢ်န့ၣ်လီၤ.
စီၤဧ့ၡီၤအမါပှၤတခီဘီမုၢ်ဖိတဖၣ်
34ဒီးဖဲစီၤဧ့ၡီၤအသးအိၣ်ဝဲအနံၣ်လွံၢ်ဆံန့ၣ်အဝဲဟံးန့ၢ်ပှၤ ဃ့ၤသးမုၣ်ဖိခံဂၤ, စီၤဘအ့ရံၤအဖိမုၣ်နီၢ်ယဟူဒံးဒီးစီၤအလိၣ်အဖိမုၣ်နီၢ်ဘၤ စမးန့ၣ်လီၤ. 35အဝဲသ့ၣ်ဒုးအိၣ်ထီၣ်တၢ်နးတၢ်ဖှီၣ်အတၢ်အိၣ်မူလၢစီၤအံၤစဲး ဒီးနီၢ်ရံးဘကၤအဂီၢ်န့ၣ်လီၤ.
Markert nå:
လံာ်တၢ်ကဲထီၣ်အခီၣ်ထံး 26: KSWC
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sgaw Karen Common Bible © Bible Society of Myanmar, 1992.
