လံာ်တၢ်ကဲထီၣ်အခီၣ်ထံး 25
25
စီၤအၤဘြၤဟၣ်အစၢၤအသွဲၣ်အဂၤတဖၣ်
(၁ကွဲး. ၁:၃၂-၃၃)
1ဒီးစီၤအၤဘြၤဟၣ်န့ၢ်အမါလၢပိာ်မုၣ်အဂၤတဂၤလၢအမံၤမ့ၢ်ဝဲ နီၢ်ကတူရၤန့ၣ်လီၤ. 2ပိာ်မုၣ်န့ၣ်ဆံးစၢ်န့ၢ်အီၤစီၤစံးမရၣ်, စီၤယးကၡၣ်, စီၤမဒၣ်, စီၤမံးဒယၣ်, စီၤယံးၡဘးဒီးစီၤၡူဧၤန့ၣ်လီၤ. 3ဒီးစီၤယးကၡၣ်မ့ၢ်စီၤၡဘၤဒီးစီၤဒဒၣ်အပၢ်လီၤ. ဒီးစီၤဒဒၣ်အစၢၤအသွဲၣ်တဖၣ်မ့ၢ်ဝဲပှၤအၤၡူရးဖိ, ပှၤလတူၡးဖိဒီးပှၤလူမးဖိလီၤ. 4ဒီးစီၤမံးဒယၣ်အဖိခွါတဖၣ်မ့ၢ်ဝဲစီၤဧ့ၤဖၣ်, စီၤဧ့ၤဖ့ၢ်, စီၤဃနိာ်, စီၤအဘံဒၤဒီးစီၤအ့ၤလဒါဧၤလီၤ. ပှၤခဲလၢာ်အံၤန့ၣ်မ့ၢ်နီၢ်ကတူရၤအစၢၤအသွဲၣ်တဖၣ်န့ၣ်လီၤ.
5ဒီးစီၤအၤဘြၤဟၣ်ဟ့ၣ်တ့ၢ်ကယဲၢ်တၢ်လၢအအိၣ်ဒီးအီၤခဲလၢာ်ဆူ စီၤအံၤစဲးန့ၣ်လီၤ. 6မ့မ့ၢ်, ဖဲအအိၣ်မူဒံးဝဲအခါန့ၣ်ဟ့ၣ်ဝဲတၢ်ဟ့ၣ်သ့ၣ်တဖၣ်ဆူ အဖိခွါတဖၣ်လၢအမါအဂၤတဖၣ်ဆံးစၢ်န့ၢ်အီၤန့ၣ်လီၤ. ဒီးဆှၢလီၤအဖိခွါသ့ၣ်တဖၣ်အံၤဆူကီၢ်လၢမုၢ်ထီၣ်လၢအယံၤ ဒီးအဖိခွါစီၤအံၤစဲးန့ၣ်လီၤ.
စီၤအၤဘြၤဟၣ်အတၢ်သံဒီး တၢ်ခူၣ်လီၤကွံာ်အီၤ
7ဒီးစီၤအၤဘြၤဟၣ်သံဝဲဖဲဒီးအသးအနံၣ်အလါအိၣ်ဝဲတကယၤနွံ ဆံယဲၢ်နံၣ်န့ၣ်လီၤ. 8အဝဲအိၣ်ကၢအိၣ်ခိးတုၤအသးပှၢ်တုာ်ဝဲန့ၣ်လီၤ. 9အဖိခွါတဖၣ်လၢအမ့ၢ်ဝဲစီၤအံၤစဲးဒီးစီၤယံးၡမၤဧ့လးခူၣ် လီၤဘျၢလီၤအီၤလၢလၢၢ်ကအိမးကပ့လၤလၢအဘၣ်ဃးဒီးပှၤဃ့ၤသး ဖိစီၤစိၤဃၢ်အဖိခွါစီၤဧ့ၤဖရိၣ်, လၢအအိၣ်ဖဲ မးမရ့အမုၢ်ထီၣ်ပျီပူၤန့ၣ်လီၤ. 10ဒီးပျီအံၤမ့ၢ်တၢ်လီၢ်လၢစီၤအၤဘြၤဟၣ်ပှ့ၤတ့ၢ်လၢပှၤဃ့ၤသး ဖိအအိၣ်န့ၣ်လီၤ. စီၤအၤဘြၤဟၣ်ဒီးအမါနီၢ်စၤရါဘၣ်တၢ်ခူၣ်လီၤအီၤခံဂၤလိာ် ဖဲန့ၣ်လီၤ. 11ဒီးစီၤအၤဘြၤဟၣ်သံဝံၤအလီၢ်ခံကစၢ်ယွၤဆိၣ်ဂ့ၤအဖိခွါစီၤ အံၤစဲးလၢအအိၣ်ဝဲဆိးဝဲဘူးဒီး “ပှၤမူဝဲတဂၤလၢအထံၣ်ယၤ အထံပူၤ” န့ၣ်လီၤ.
စီၤယံးၡမၤဧ့လးအစၢၤအသွဲၣ်တဖၣ်
(၁ကွဲး. ၁:၂၈-၃၁)
12စီၤယံးၡမၤဧ့လး, လၢနီၢ်စၤရါအကုၢ်ပိာ်မုၣ်ပှၤအဲၤကူပတူး နီၢ်ဟၤကၢ်ဆံးစၢ်န့ၢ်ဝဲလၢစီၤအၤဘြၤဟၣ်အဂီၢ်န့ၣ်, အိၣ်ဒီးအဖိခွါသ့ၣ်တဖၣ်အံၤလီၤ. 13အမံၤဒ်အအိၣ်ဖျဲၣ်ထီၣ်ဝဲတဂၤဝံၤတဂၤအသိးန့ၣ်မ့ၢ်ဝဲစီၤနဘါ ယိး, စီၤက့ဒၢ်, စီၤအးဒဘအ့လး, စီၤမံးကစၢ်, 14-15စီၤမံးၡမၤ, စီၤဒူမၤ, စီၤမၤစၤ, စီၤဃဒၢ်, စီၤတ့မၤ, စီၤယတူၢ်, စီၤနါဖံၣ်ဒီးစီၤက့ဒမၤလီၤ.
16အဝဲသ့ၣ်မ့ၢ်ပှၤတဆံခံဒူၣ်အမိၢ်ပၢ်ဖံဖုလၢပျၢၤဒီးအမံၤတဖၣ် ဘၣ်တၢ်ဟ့ၣ်လီၤဆူအဒူသဝီတဖၣ်ဒီးတၢ်လီၢ်လၢအသူၣ်ဒဲ အလီၢ်တဖၣ်အိၣ်ဝဲန့ၣ်လီၤ. 17စီၤယံးၡမၤဧ့လးအသးအိၣ်ဝဲတကယၤသၢဆံနွံနံၣ်ဖဲအသံဝဲ န့ၣ်လီၤ. 18စီၤယံးၡမၤဧ့လးအစၢၤအသွဲၣ်တဖၣ်အိၣ်ဝဲဆိးဝဲလၢတၢ်လီၢ်လၢ ကီၢ်ဃဝံလၤဒီးကီၢ်ၡူၢ်အဘၢၣ်စၢၤဒီးပၢၢ်လၢကီၢ်အဲၤကူပတူး အမုၢ်ထီၣ်ဒီးဆူကီၢ်အၤၡူၢ်န့ၣ်လီၤ. အဝဲသ့ၣ်အိၣ်လီၤဖးဒီးစီၤအၤဘြၤဟၣ်အစၢၤအသွဲၣ်အဂၤတဖၣ်န့ၣ် လီၤ.
စီၤဧ့ၡီၤဒီးစီၤယၤကိာ်အတၢ်အိၣ်ဖျဲၣ်ထီၣ်
19အအံၤမ့ၢ်စီၤအၤဘြၤဟၣ်အဖိခွါစီၤအံၤစဲးအဂ့ၢ်န့ၣ်လီၤ.
20ဒီးဖဲစီၤအံၤစဲးန့ၢ်မါလၢနီၢ်ရံးဘကၤ, လၢအမ့ၢ်ပှၤစူၤရံဖိ စီၤဘသူၤအ့လးအိၣ်လၢပၤဒနါရၣ်အပျီပူၤ (ပှၤအမံနယၣ်ဖိလၢ ကီၢ်မ့းစပံတၤမ, အဖိမုၣ်), ပှၤစူၤရံဖိစီၤလၤဘၣ်အဒီပုၢ်ဝဲၢ်မုၣ်န့ၣ်, အသးအိၣ်လံဝဲအနံၣ်လွံၢ်ဆံန့ၣ်လီၤ. 21ဒီးမ့ၢ်လၢနီၢ်ရံးဘကၤအဖိတအိၣ်ဘၣ်အဃိစီၤအံၤစဲးဘါထုကဖၣ် လၢအဂီၢ်န့ၣ်လီၤ. ဒီးယွၤစံးဆၢအတၢ်ထုကဖၣ်ဒီးနီၢ်ရံးဘကၤဒၢထီၣ်ဝဲဒၣ်န့ၣ်လီၤ. 22နီၢ်ရံးဘကၤကန့ၢ်ဘၣ်အဖိအသဃံာ်ဒီးတချုးအဝဲသ့ၣ်အိၣ်ဖျဲၣ်ထီၣ် ဒံးဘၣ်န့ၣ်အဝဲသ့ၣ်ကနိလိာ်သးလၢအမိၢ်အဟၢဖၢပူၤန့ၣ်လီၤ. ဒီးပိာ်မုၣ်စံးဝဲ, “ဘၣ်မနုၤအဃိတၢ်ဒ်သိးအံၤမၤအသးဒီး ယၤန့ၣ်လဲၣ်.” မၤသးဒ်န့ၣ်ဒီးအဝဲလဲၤသံကွၢ် တၢ်လၢယွၤလၢတၢ်စံးဆၢတမံၤအဂီၢ်န့ၣ်လီၤ.
23ဒီးယွၤစံးဘၣ်အီၤ, “ပှၤကလုာ်ခံကလုာ်အိၣ်ဝဲလၢနပူၤလီၤ. နကဆံးစၢ်ထီၣ်, ပှၤဂီၢ်မုၢ်ထီဒါလိာ်သးခံဖုန့ၣ်လီၤ. ပှၤတကလုာ်ကဆူၣ်န့ၢ်အဂၤတကလုာ်လီၤ. ပှၤအဒိၣ်ကဘၣ်မၤတၢ်ခ့တၢ်ပှၤ အတၢ်မၤလၢပှၤအဆံးအဂီၢ်န့ၣ်လီၤ.”
24တၢ်ဆၢကတီၢ်ဘၣ်ဝဲလၢအဂီၢ်လၢအကဆံးစၢ်ထီၣ်တၢ်ဒီး, အဝဲမၤန့ၢ်အဖိခွါသဃံာ်ခံဂၤလီၤ. 25ပှၤအခီၣ်ထံးတဂၤန့ၣ်အညၣ်ဂီၤဃဲးဝဲဒီးအဖံးမၤအသးဒ်ဆ့ကၤ ဖးထီအိၣ်ဒီးအဆူၣ်အဒံးအဃိဒီးအဝဲဘၣ်တၢ်ယုၢ်န့ၢ်အမံၤလၢ စီၤဧ့ၡီၤလီၤ. 26ပှၤခံဂၤတဂၤန့ၣ်အိၣ်ဖျဲၣ်ထီၣ်လၢအစုဟံးဃာ်စီၤဧ့ၡီၤအခီၣ် နၢၣ်ခံဃံးဃံးဒီးဘၣ်တၢ်ကိးအီၤလၢစီၤယၤကိာ်လီၤ. ဒီးလၢအဝဲသ့ၣ်အိၣ်ဖျဲၣ်ထီၣ်ဝဲန့ၣ်စီၤအံၤစဲးအသးအိၣ်ဝဲ အနံၣ်ဃုဆံန့ၣ်လီၤ.
စီၤဧ့ၡီၤဆါလီၤကွံာ်ဖိဝဲၢ်ကိတၢ်န့ၢ်သါအတၢ်ဆိၣ်ဂ့ၤ
27ဒီးဖိသၣ်ပိာ်ခွါတဖၣ်ဒိၣ်ထီၣ်ဝဲ, ဒီးစီၤဧ့ၡီၤကဲထီၣ်ပှၤ ခးတၢ်သ့ ဂ့ၤဂ့ၤ, ပှၤတဂၤလၢအအိၣ်မုာ်လၢခိခိၣ်ပှၢ်လၢ်ကျါလီၤ. 28ဒီးစီၤအံၤစဲးဘၣ်အသးလၢစီၤဧ့ၡီၤဒိၣ်တက့ၢ်လီၤ. အဂ့ၢ်ဒ်အံၤ, ဆၣ်ဖိကီၢ်ဖိလၢအဘၣ်တၢ်ခးန့ၢ်အီၤလၢစီၤဧ့ၡီၤ န့ၣ်အီၣ်ဝဲဘဲဒီးအသးမုာ်ဝဲန့ၣ်လီၤ. မ့မ့ၢ်နီၢ်ရံးဘကၤဘၣ်အသးဒိၣ်တက့ၢ်လၢစီၤယၤကိာ်လီၤ.
29ဒီးမုၢ်တနံၤဖဲစီၤယၤကိာ်ဖီဝဲသဘ့ကသူထံန့ၣ်စီၤဧ့ၡီၤ ဟဲက့ၤလၢအလူၤခးတၢ်န့ၣ်လီၤ. ဒီးတၢ်သၣ်ဝံၤအသးလီၤ. 30ဒီးစံးဘၣ်စီၤယၤကိာ်, “ယသၣ်ဝံၤလီၤဒိလၢာ်လံ. ဟ့ၣ်ယၤလၢတၢ်အီၣ်ဖါဂီၤအံၤတနီၤတက့ၢ်.” (မၤသးဒ်န့ၣ်ဒီးပှၤကိးအမံၤလၢအဒိၣ်လီၤ.)
31ဒီးစီၤယၤကိာ်စံးဆၢအီၤ, “နမ့ၢ်ဟ့ၣ်ယၤလၢဖိဝဲၢ်ကိတၢ် န့ၢ်သါအတၢ်ဆိၣ်ဂ့ၤန့ၣ်ယကဟ့ၣ်နၤတၢ်န့ၣ်လီၤ.” 32ဒီးစီၤဧ့ၡီၤစံးဝဲဒၣ်, “ဂ့ၤလံ, ဘူးမးလၢယကသံလီၤ. ယတၢ်န့ၢ်သါအတၢ်ဆိၣ်ဂ့ၤန့ၣ်ကမၤဂ့ၤယၤမနုၤလဲၣ်.”
33ဒီးစီၤယၤကိာ်စံးဆၢအီၤ, “အဆိန့ၣ်မၤတၢ်ဆိၣ်တမံၤလၢနကဟ့ၣ် ယၤတၢ်န့ၢ်သါအတၢ်ဆိၣ်ဂ့ၤတက့ၢ်.”
ဒီးစီၤဧ့ၡီၤမၤတၢ်ဆိၣ်န့ၣ်ဒီးဟ့ၣ်လီၤအတၢ်န့ၢ်သါအတၢ်ဆိၣ် ဂ့ၤဆူစီၤယၤကိာ်န့ၣ်လီၤ. 34တုၤနုၤတစု, စီၤယၤကိာ်ဟ့ၣ်အီၤကိၣ်ဒီးသဘ့ကသူထံတနီၤလီၤ. စီၤဧ့ၡီၤအီၣ်တၢ်အီတၢ်ဝံၤဒီးဂဲၤဆၢထၢၣ်ဟးထီၣ်ကွံာ်ဝဲလီၤ. တၢ်န့ၣ်မ့ၢ်စီၤဧ့ၡီၤပာ်ကဲဖိဝဲၢ်ကိတၢ်န့ၢ်သါအတၢ်ဆိၣ်ဂ့ၤ ထဲလဲၣ်အဂ့ၢ်လီၤ.
Markert nå:
လံာ်တၢ်ကဲထီၣ်အခီၣ်ထံး 25: KSWC
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sgaw Karen Common Bible © Bible Society of Myanmar, 1992.
