Marcos 9
9
1Ax ikx xi tma'n Jesús kye:
—Ax tok kxel nma'ne kyeye, at junjun kyxol qeju ate' tzalu na'nxtoq kykyim ex ok kyila' ok tul tkawb'il Dios tuk'il tipumal.
O ch'expaj tilb'ilal Jesús
Mateo 17.1-13; Lucas 9.28-36
2Tb'ajlenxitzun qaq q'ij, xi tuk'in Jesús Pedro, tuk'ix Jacobo ex Juan, kyjunalx e je'x tuk'in twi' jun witz ma' twa'l; ex o ch'expaj tilb'ilal Jesús kywitz. 3O qoptz'aj t-xb'alun ex ok pur saq wen ik tza'n ttxa che'w; mi jun tx'jol xb'alun tzalu twitz tx'otx' jaku saqix tu'n ik tza'n jlu. 4Ex kub' tyek'un tib' Elías tuk'ix Moisés, in che yolintoq tuk'il Jesús. 5Xitzun tma'n Pedro te Jesús:
—Xnaq'tzal, b'a'n ax tu'n qten tzalu; e tjaw qb'incha'n ox tal ja t-xaq tze'yin kywi': jun teya, jun te Moisés, ex jun te Elías, chi Pedro.
6Porke minti' b'a'n tu'n Pedro alkye tu'n t-xi tma'n tu'nju otoq naj kynab'l xnaq'tzb'en. 7Ex tzaj jun muj kub' ten kyib'aj; ex at jun tzaj yolin tuj muj in tma'n:
—Atzun Nk'wa'le jlu k'ujla'nxix wu'ne; kyb'inxe tyol.
8Ex te jurat, tej t-xi kyke'yin kyi'jele, mi a'l juntl o kyil, noq o'kxte Jesús attoq kyuk'il.
9Kyja'toq kyku'tz twi witz, xi tma'n Jesús kye:
—Aju ma kyile, mi'n txi kyma'ne kye xjal, maxitzun kxel kyma'ne okxi njatz anq'ine kyxol kyimni, aqine sk'o'maj qine tu'n Dios tu'n ntene kyuk'il xjal, chi Jesús kye.
10Ex xi kyk'u'n ju yol lu tuj kyanmi, ex e ok ten xjelil ti'j kyxolx ti t-xilen jlu tu'n tjatz anq'in kyxol kyimni. 11Xitzun kyqanin te Jesús:
—¿Tiqu'n in kyma'n xnaq'tzal ti'j ley qa ilxix ti'j tu'n tul nej Elías? Che chi.
12Xi ttzaq'we'n Jesús:
—Ax tok tzul nej Elías, ex kb'ajel tb'incha'n juntl maj tkyaqil. ¿Ex chi tok in tma'n tuj Tu'jil wi'je? In tma'n tu'n tik'x nimku wu'ne, aqine sk'o'maj qine tu'n Dios tu'n ntene kyuk'il xjal, ex in tma'n tu'n wel ik'une kyu'n xjal. 13Ex lu kxel nma'ne kyeye, ate Elías o tzul, ex tkyaqilju kyajb'il xjal o kyb'incha ti'j, ik tza'n in tma'n ti'j tuj Tu'jil, chi Jesús kye.
Jun ku'xun at ju'ẍ tuj tanmi b'anix tu'n Jesús
Mateo 17.14-21; Lucas 9.37-43
14Tejtzun kyul jatum ate' txqantl t-xnaq'tzb'en, o kyil nimku xjal otoq tz'ok kychmon kyib' kyi'j kyuk'ix junjun xnaq'tzal ti'j ley ex jaw jun yol kyxol. 15Tejtzun kylonte xjal otoq tzul Jesús, b'i'x e lab'in ti'j ex e tzaj qelan naj q'olb'el te. 16Xitzun tqanin Jesús kye t-xnaq'tzb'en:
—¿Alkye yol in che yoline ti'j kyuk'il xjal?
17Tzajtzun tma'n jun kyxol xjal:
—Xnaq'tzal, ma tzul wi'ne nky'ajale tuk'ila, at jun ju'ẍ tuj tanmi ma tz'ok nky'ajale men tu'n. 18Noq jachaq in tzaj tuj twitz tu'n ju'ẍ, in kub' xo'n tu'n, ex in swakin tuj ttzi', ex in qitx'itx'in t-xe' te', ex in xi ttx'ilin tib'. Ma txi nma'ne kye t-xnaq'tzb'ena tu'n tetz kylajo'n ju'ẍ tuj tanmi k'wa'l, ex minti' xb'ant kyu'n, chi xjal.
19Xi ttzaq'we'n Jesús:
—Aqeye xjal minti' in xi kyoksla'ne. ¿Jte' q'ij tu'n ntene kyuk'ile? ¿Jte' q'ij tu'n kyik'xe wu'ne? Kyi'ntze k'wa'l tzalu.
20Ultzun kyi'n tuk'il Jesús. Tejtzun tilwaj Jesús tu'n ju'ẍ, tzaj tuj twitz k'wa'l tu'n ju'ẍ, kub' tz'aq k'wa'l twitz tx'otx', in b'alq'aje' ex in swakin tuj ttzi'. 21Xi tqanin Jesús te tman k'wa'l:
—¿Jte'xi ab'q'i ttzyetlen tk'ixb'isanjtz k'wa'l lu tu'n ju'ẍ? Chi Jesús.
Xi tma'n mamb'aj:
—Matoq k'wa'lx tej ttzyet. 22Ex nimku maj in xi tz'aq k'wa'l tuj q'aq' tu'n ju'ẍ ex tuj a', taj ju'ẍ tu'n tkyim k'wa'l tu'n; ex qa jaku b'ant tu'na, q'aq'antz tk'u'ja qi'je, ex qo tonintza, chi mamb'aj.
23Xi tma'n Jesús te:
—¿Tiqu'n in tzaj tma'na weye ikju: Qa jaku b'ant tu'na, chiya? Alkye at tokslab'l, tkyaqil jaku b'inchanjtz te.
24Jurattzun tzaj q'ajt tman k'wa'l ex tma:
—Kxel woksla'ne Tat, chin tonintza tu'n tten mastl wokslab'le.
25Tejtzun tlonte Jesús kyja'toq kypon tilj xjal, xi mayo'n ju'ẍ tu'n.
—Aya ju'ẍ, tu'na ma tz'ok k'wa'l men ex chkyin twi'; aqine in chin q'mante teya, tetza tuj tanmi k'wa'l ex mi'n tz'okxa juntl maj, chi Jesús xi tma'n te ju'ẍ.
26Atzunte ju'ẍ jaw sch'in ex tzaj juntl maj tuj twitz k'wa'l tu'n, etztzun, ex ik tza'n kyimni ok k'wa'l tu'n; kyja'tzun o kyma nimku xjal: Ma kyim k'wa'l, che chi. 27Ex jaw ttzyu'n Jesús tq'ab' k'wa'l, jaw twab'an ex jawtzun we' k'wa'l.
28Tejtzun tokx Jesús tuj ja, xi kyqanin qe t-xnaq'tzb'en te kyjunalx:
—¿Tiqu'ntzun minti' xb'ant qu'ne tu'n tetz qlajo'ne ju'ẍ? Che chi.
29Xitzun tma'n Jesús kye:
—Aqeju jun k'loj ju'ẍ lu mlay che etz noq kukx, noq o'kx jaku che etz tu'n na'j Dios ex qa ma kub' qyo'n we'yaj, chi Jesús kye.
In yolin Jesús juntl maj ti'j tkamik
Mateo 17.22-23; Lucas 9.43-45
30Tejtzun kyik' tuj lugar lu, e ik' aj tuj tx'otx' Galilea. Ex minti' o tajb'e Jesús tu'n kyb'inte xjal, 31porke in tq'o'ntoq xnaq'tzb'il kye t-xnaq'tzb'en in tma'n:
—Chin xel q'o'ne tuj kyq'ab' xjal ex chin b'el b'yo'ne; ex nkyimlenxitzune, chin jawil anq'ine tuj toxin q'ij, aqine sk'o'maj qine tu'n Dios tu'n ntene kyuk'il xjal, chi Jesús kye.
32Atzun kye t-xnaq'tzb'en minti' el kynik' ti'j ju yol lu, ex in che xob' tu'n t-xi kyqanin te.
Alkye mas at toklen kyxol
Mateo 18.1-5; Lucas 9.46-48
33E pontzun tuj tnam Capernaum. Tejtzun tokx Jesús tuja, xi tqanin kye t-xnaq'tzb'en:
—¿Alkye yol in che xjeline ti'j kyxolxe tuj b'e? Chi Jesús.
34Atzun kye minti' e q'ajt, tu'nju otoq che yolin ti'j kyxolx tuj b'e alkyeju mas at toklen kyxol. 35Kub'tzun qe' Jesús, e tzaj ttxko'n qe kab'laj t-xnaq'tzb'en, ex xi tma'n kye:
—Qa at jun tajb'il tu'n tok te tnejel, q'o'nk tib' te mankb'il kye kykyaqil, ex q'o'nk tib' te ajb'el kye kykyaqil.
36Ex tzaj ti'n Jesús jun k'wa'l, kub' tq'o'n kyxol, jawtzun tchle'n, ex xi tma'n kye:
37—Alkye ma k'monte jun tal k'wa'l ik tza'n jlu tu'nju at tk'ujlalil wi'je, aqine in chin tk'mo'n; ex alkye ma k'monte weye, mya o'kx aqine in chin tk'mo'n, ax ikx in k'monjtz Dios tu'n, aju tzaj samante weye.
Alkye minti' in q'ojl qi'j, axtzun quk'ilju
Mateo 10.42; Lucas 9.49-50
38Atzunte Juan xi tma'n te Jesús:
—Xnaq'tzal, ma qile jun xjal in ajb'en tb'iya tu'n tu'n kyetz qe ju'ẍ tuj kyanmi xjal tu'n, ex mya a jun quk'ile, kyja'tzun xi qmayo'ne, porke mya quk'ile in b'et, chi Juan.
39Xitzun tma'n Jesús:
—Mi'n txi kymayo'ne; ex qa at jun xjal ma tz'ajb'en nb'iye tu'n tu'n tb'inchante jun b'inchb'en nim tipumal, mlay b'ant tu'n tyolin naj mya b'a'n wi'je. 40Ex alkyeju minti' in q'ojl qi'j, axtzun quk'ilju. 41Ex alkye jun xjal ma tzaj q'onte jun vas a' kyeye tu'nju okslal qeye wi'je, aqine Crist, ax tok kxel nma'ne kyeye, ktzajel q'o'n jun oyaj te ti'j jlu.
Aju tolsab'l tu'n qkub' tz'aq tuj il
Mateo 18.6-9; Lucas 17.1-2
42Qa at jun xjal ma kub' tz'aq jun tal ch'in tu'n tuj il, aju kyxol qeju okslal wi'je, mas b'a'n tu'n tok k'alet jun ma tij kya' ti'j tqul xjal ex tu'n tku'x xo't tuj mar. 43Qa tu'n tq'ab'a kb'el tz'aqa tuj il, tx'emin ela, porke mas b'a'n tu'n tokxa tuj kya'j ẍtunka, ex mya tu'n t-xi'ya tuj infierni tuk'il kab'e tq'ab'a, jatum ta' q'aq' mlay b'ant tyupit. 44[Atzun minti' in che kyim qe ẍuq' in che wa'n ti'j kychib'jal kyimni, ex atzun mlayx yupj q'aq'.] 45Ex qa tu'n tqana kb'el tz'aqa tuj il, tx'emin ela; ex mas b'a'n tu'n tokxa tuj kya'j koxa, ex mya tu'n t-xi xo'na tuj infierni tuk'il kab'e tqana tuj q'aq' mlay b'ant tyupit. 46[Atzun minti' in che kyim qe ẍuq' in che wa'n ti'j kychib'jal kyimni, ex atzun mlayx yupj q'aq'.] 47Ex qa tu'n tb'aq' twitza kb'el tz'aqa tuj il, q'i'metza; ex mas b'a'n tu'n tokxa tuj tkawb'il Dios tuj kya'j junx tb'aq' twitza, ex mya tu'n t-xi xo'na tuj infierni tuk'il kab'e tb'aq' twitza. 48Atzun minti' in che kyim qe ẍuq' in che wa'n ti'j kychib'jal kyimni, ex atzun mlayx yupj q'aq'.
49Ex kykyaqile kb'antel kytene tu'nju k'ixk'oj k'ik'ex kyu'ne, mer ik tza'n tuj q'aq' che okex q'o'ne, [ex tkyaqil oyaj in xi q'ot te Dios, il ti'j tu'n tok atz'an ti'j]. 50B'a'n te atz'an; ex qa ma naj ta'w atz'an, ¿alkye k'ajb'el tu'n toktl ta'w? Che okxe ik tza'n atz'an; tenwt kymojb'ab'l kyib'e kyxolxe.
Markert nå:
Marcos 9: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
