Marcos 10
10
In tq'o'n Jesús xnaq'tzb'il tu'n mi'n tkub' tpa'n tib' xjal tuk'il t-xu'jil
Mateo 19.1-12; Lucas 16.18
1Ik'tzun Jesús tuj tnam Capernaum, pon tuj tx'otx' Judea ex tuj tx'otx' jlajxi nima Jordán. Pon kychmon kyib' juntl maj xjal tuk'il, ex xi tq'o'n juntl maj Jesús xnaq'tzb'il kye ik tza'n in tb'incha'n junjun maj. 2E pontzun laq'e' qe fariseo tuk'il, xi kyqanin qa q'o'n tu'n ley tu'n tex tlajo'n xinaq t-xu'jil, xi kyqanin jlu noq tu'n tok Jesús tuj joyb'il ti'j kyu'n. 3Xi ttzaq'we'n Jesús:
—¿Tza'n tten kyaj tma'n Moisés?
4Tzajtzun kyma'n qe fariseo:
—Xi tq'o'n Moisés amb'il tu'n ttz'ib'anjtz jun u'j jatum in tma'n qa otoq kub' kypa'n kyib', tu'ntzun tex tlajo'n xjal t-xu'jil, che chi.
5Xitzun tma'n Jesús kye:
—Noq tu'nju puro kyuw kyanmiye, kyja'tzun kyaj ttz'ib'an Moisés ju mandamyent lu kyeye. 6Ex atxix t-xe tnejel tej tb'ant tkyaqil tu'n Dios, kub' tb'incha'n Dios xinaq tuk'ix xu'j. 7Kyja'tzun kyjel tq'o'n xinaq tman tuk'ix ttxu' tu'n tmoje' tuk'il t-xu'jil. 8Kykab'iltzun che okel te junx; kyja'tzun mya kab'e kytentl, noq junx kyten. 9Tu'ntzunju, aju ma tz'ok tmojb'a'n Dios, mi'n tz'el tpa'n xjal, chi Jesús kye.
10Tejtzun kyokx tuja xi kyqanintl t-xnaq'tzb'en Jesús ax ti'j jlu. 11Xitzun tma'n Jesús kye:
—Qa at jun xjal ma kub' tpa'n tib' tuk'il t-xu'jil ex qa ma moje' tuk'il juntl, in tb'incha'n aj pajil, ex in tb'incha'n il twitz nej t-xu'jil. 12Ex qa at jun xu'j ma kub' tpa'n tib' tuk'il tchmil, ex qa ma moje' tuk'il juntl, ax ikx in tb'incha'n aj pajil.
E kub' tky'iwla'n Jesús qe k'wa'l
Mateo 19.13-15; Lucas 18.15-17
13Ex pon kyi'n xjal tal kyk'wa'l tu'n kyok tmako'n Jesús; atzun kye t-xnaq'tzb'en e mayet qe xjal kyu'n, aqeju e pon q'inte kye tal k'wa'l. 14Tejtzun tlonte Jesús jlu, tzaj tlo'ch tk'u'j ex xi tma'n kye t-xnaq'tzb'en:
—Kyq'onxe amb'il kye tal k'wa'l tu'n kytzaj wuk'ile ex mi'n che'x kymayo'ne; porke aju tkawb'il Dios kyekye xjal ik kyten ik tza'n qe tal k'wa'l lu. 15Ax tok kxel nma'ne kyeye, qa minti' ma che oke ik tza'n jun tal k'wa'l tu'n t-xi kynimane tkawb'il Dios, mlay che okxe tuj tkawb'il Dios, chi Jesús kye.
16E jawtzun tchle'n Jesús qe tal k'wa'l, kub' tq'o'n tq'ab' kyib'aj, ex e kub' tky'iwla'n.
Jun xjal q'inun in yolin tuk'il Jesús
Mateo 19.16-30; Lucas 18.18-30
17Tejtzun tik' Jesús tu'n t-xi' tuj tb'e, ul qelan jun xinaq tuk'il, kub' ẍmeje' twitz ex xi tqanin te:
—Xnaq'tzal b'a'n, ¿alkye ok nb'incha'ye tu'n nkamb'anteye chwinqlal te jumajx? Chi xinaq.
18Xi tma'n Jesús te:
—¿Tiqu'n in chin ok tq'o'na te b'a'n? Mi a'lo jun xjal b'a'n, o'kxte Dios b'a'n. 19B'a'n qe mandamyent tu'na: Mi'n kyb'inchaye aj pajil, mi'n che b'iyune; mi'n che elq'ane, mi'n che nik'ane yol ti'j juntl, mi'n kub' kysb'u'ne jun xjal, kynimanxe kymane ex kytxu'ye, chi tz'ib'an tuj ley, chi Jesús te.
20Atzunte xinaq xi tma'n:
—Xnaq'tzal, tkyaqil jlu o japun wu'ne tej matoq k'wa'lx qine.
21Xitzun tke'yin Jesús twitz ex o tk'ujla, ex xi tma'n te:
—Atx jun tu'n tb'ant tu'na: Txi'ya, k'ayinxa tkyaqilju at teya, ex q'onxa kye meb'a, kteltzun tq'inumab'la tuj kya'j; tzajtzuna wuk'ile [q'im tcrusa] ex lpe'ka wi'je, chi Jesús te.
22Atzunte xinaq tzaj nim tb'is tu'nju yol lu, ajtzun meltz'aj in b'isun porke attoq nim tq'inumab'l.
23Xitzun tke'yin Jesús ti'jele ex xi tma'n kye t-xnaq'tzb'en:
—Kyuw tu'n kyokx qe q'inun tuj tkawb'il Dios.
24B'i'x o naj kynab'l t-xnaq'tzb'en Jesús tu'nju yol lu; ex xi tma'ntl Jesús kye:
—Aqeye nk'wa'l, [kyuw tu'n kyokx tuj tkawb'il Dios qeju q'uql kyk'u'j ti'j kyq'inumab'l,] 25mas jurat jaku tz'ex jun chej camey tuj toy' jun b'aq, twitzju tu'n tokx jun q'inun tuj tkawb'il Dios.
26Atzun kye t-xnaq'tzb'en mas jaw naj kynab'l, in kyma'n kyxolx:
—Qa ikju, ¿alkyetzun jaku klet?
27Xitzun tke'yin Jesús kywitz ex xi tma'n kye:
—A jlu mlay b'ant kyu'n xjal, atzunte Dios jaku b'ant tu'n; ex tkyaqil in b'ant tu'n Dios.
28Oktzun ten Pedro q'malte te Jesús kyja':
—Kina qo'ye Tat, ma kyaj qq'o'ne tkyaqilju at qeye, ex ma qo ok lpe'ye ti'ja.
29Xitzun tma'n Jesús kye:
—Ax tok kxel nma'ne kyeye, alkye jun xjal ma kyaj tq'o'n tja, ex qa ttzik, ex qa titz'in, ex qa tman, ex qa ttxu', ex qa t-xu'jil, ex qa tk'wa'l, ex qa ttx'otx' tu'n nlaje, ex tu'n tlaj tqanil kolb'il, 30tkyaqilju ma kyaj tq'o'n, ok tk'ma' jun syent maj t-xel tuj tq'ijlalil ja'lo: Nimku tja che tzajel q'o'n, nimku che okel te ttzik, nimku che okel te titz'in, nimku che okel te ttxu', nimku che okel te tk'wa'l, ex nim ttx'otx' ktzajel q'o'n; ax ikx k'ik'ex nim yajb'il tu'n, ex ktel tchwinqlal te jumajx tuj tq'ijlalil tzul. 31Ex qeju ate' te tnejel ja'lo, nimku che okel te mankb'il; ex qeju ate' te mankb'il ja'lo, nimku che okel te tnejel.
In yolin Jesús toxmaji'n ti'j tkamik
Mateo 20.17-19; Lucas 18.31-34
32Kyja' t-xi' Jesús tuj b'e tu'n tjax tuj tnam Jerusalén kyuk'ix qe t-xnaq'tzb'en, ex in b'et Jesús nejni kywitz; ex qeju lepch qe'ktoq ti'j e jaw lab'in ex tzaj kyxob'il. E je'xtzun tuk'in Jesús juntl maj qeju kab'laj t-xnaq'tzb'en, ok ten q'malte kye tkyaqilju at ttzajel ti'j.
33—Qo jawix tuj tnam Jerusalén ja'lo ex chin xel q'o'ne tuj kyq'ab' qe nejenel kye pal ex tuj kyq'ab' xnaq'tzal ti'j ley, aqine sk'o'maj qine tu'n Dios tu'n ntene kyuk'il xjal, ex kb'el q'o'n nsentense tu'n nkyime, ex chin xel q'o'ne kyu'n tuj kyq'ab' stranjer xjal. 34Chin okel xmayine kyu'n, ex ok chin b'ajel asyaline, ex k'okel tzub'an tuj nwitze, ex chin b'el b'yo'ne; ex tuj toxin q'ij chin jawitz anq'ine, chi Jesús kye.
Aju kyqanb'etz Jacobo tuk'ix Juan
Mateo 20.20-28
35E pontzun laq'e' Jacobo tuk'ix Juan, aqeju tky'ajal Zebedeo, ex xi kyma'n te Jesús:
—Xnaq'tzal, qajb'ile tu'n tb'inchanteya qeye aju kxel qqanine teya, che chi.
36Atzunte Jesús xi tqanin kye:
—¿Alkyetzun kyajb'ile tu'n nb'inchanteye kyeye?
37Atzun kye xi kyma'n te:
—Q'ontza qoklene tu'n qkub' qe'ye ttxlaja ok tk'monteya toklena, jun tuj tb'anq'ab'a ex juntl tuj tnayaja.
38Xitzun tma'n Jesús kye:
—Minti' nne'l kynik'e ti'j aju in tzaj kyqanine. ¿Jakupe tzik'x yajb'il kyu'ne, aju weye k'ik'ex wu'ne? ¿ex jakupe tzik'x nim k'ixk'oj kyu'ne, ik tza'n weye k'ik'ex wu'ne? Chi Jesús kye.
39Tzajtzun kyma'n:
—Jaku tzik'x qu'ne.
Xitzun tma'n Jesús kye:
—Ax tok k'ik'ex yajb'il kyu'ne aju weye k'ik'ex wu'ne, ex k'ik'ex nim k'ixk'oj kyu'ne ik tza'n weye k'ik'ex wu'ne. 40Ex aju tu'n kykub' qe'ye tuj nb'anq'ab'e ex tuj nnayaje, mya tuj nkwente ta' tu'n t-xi nq'o'ne kyoklene, porke b'animaj alkye qeju che b'el qe' ntxlaje.
41Tejtzun kyb'inte qeju lajtl t-xnaq'tzb'en, tzaj kyq'oj ti'j Jacobo ex ti'j Juan. 42E tzajtzun ttxko'n Jesús ex xi tma'n kye:
—B'a'n kyu'ne, aqeju ate'k te kawil kyxol qe nasyon, in che kawin kyib'aj xjal, ex aqeju ma' kyoklen kyxol, in che kyaj xjal tjaq' kykawb'il. 43Ex myatzun ik tten kyeye kyxole: alkye tajb'il tu'n tten mas toklen kyxole, atzunju tu'n tok te ajb'el kyeye; 44ex alkye tajb'il tu'n tok te nejenel kyxole, atzunju tu'n tok te kymajen kykyaqil. 45Porke minti' ma chin ule tu'n kyok txqantl te nmajene tu'n kyajb'en weye, noq o'kx ma chin ule tu'n wajb'ene kye mastl ex tu'n t-xi nq'on wib'e tu'n nkyime tu'n kykolpet nimku xjal, aqine sk'o'maj qine tu'n Dios tu'n ntene kyuk'il xjal, chi Jesús kye.
Aju moẍ Bartimeo tb'i, jaqet twitz tu'n Jesús
Mateo 20.29-34; Lucas 18.35-43
46E ultzun tuj tnam Jericó. Tejtzun tetz Jesús tuj tnam Jericó kyuk'ix qe t-xnaq'tzb'en ex kyuk'ix nim xjal, lu jun xjal moẍ, Bartimeo tb'i, tky'ajal Timeo, q'uqltoq ttzi b'e in mo'n. 47Tejtzun tb'inte moẍ kyja'toq ttzaj Jesús aj Nazaret, jaw sch'in, in tma'n:
—Aya Jesús tk'wa'l David, q'aq'antz tk'u'ja wi'je, chi moẍ.
48Nimku xjal ok ten ilil ti'j, xi kymayo'n tu'n tq'ajen, atzun te, mas jaw sch'in kyuwxix:
—Aya Tk'wa'l David, q'aq'antz tk'u'ja wi'je, chi Bartimeo.
49We'tzun Jesús, xi tma'n kye xjal tu'n ttzaj kytxko'n; tzajtzun kytxko'n xjal ju moẍ ex xi kyma'n te:
—Qe' tk'u'ja, we'ktza, lu in txkonjtza tu'n Jesús, che chi.
50Kyajtzun t-xo'n moẍ ttxo'w, jaw we' naj ex xi' tuk'il Jesús. 51Xitzun tqanin Jesús te:
—¿Alkye tajb'ila tu'n nb'inchanteye teya?
Atzunte moẍ xi tma'n:
—Xnaq'tzal, wajb'ile tu'n tjaqet nwitze.
52Xitzun tma'n Jesús te:
—B'a'n tu'n taja; tu'n tokslab'la ma b'anixa, chi Jesús te.
Te jurat naj jaqet twitz moẍ, ex ok lpe' ti'j Jesús tuj b'e.
Markert nå:
Marcos 10: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
