Marcos 5
5
Aju xinaq aj Gadara at ju'ẍ tuj tanmi
Mateo 8.28-34; Lucas 8.26-39
1E pontzun jlajxi laguna tuj kytx'otx' aj Gadara.
2Tejtzun tetz Jesús tuj barc, jurat naj ul jun xinaq kanul ti'j, tzaj tuj camposant, tokx jun ju'ẍ tuj tanmi. 3Axtoq najl xjal tuj camposant, ex mi a'l jun xjal in xkye' ti'j tu'n tk'alet tu'n caden. 4Ex nimku maj e b'aj k'alo'n qe tqan kyuk'ix qe tq'ab' tu'n caden, ex e kub' tzaqj qe caden tu'n ex e b'aj tpaẍu'n, ex mi a'l jun xjal in xkye' ti'j. 5Tkyaqil q'ij ex qonik'an ax ta' twi witz ex tuj camposant, in sch'in ex nno'k tk'ixb'isan tib' tu'n ab'j. 6Tejtzun tlonte xjal najchaq kyja'toq ttzaj Jesús, xi qelan ex kub' ẍmeje' twitz Jesús. 7Jaw tq'ajq'ajel twi' kyuw, ex xi tma'n:
—¿Ti toklena wi'je, Jesús, aya Tk'wa'l Dios ma' toklen? Chin kub'sale twitza, mi'n chin kub' tyajla'na.
8Tma xjal ikju tu'nju xi tma'n Jesús te:
—Aya ju'ẍ, tetza tuj tanmi xjal lu.
9Ex xi tqanin Jesús te:
—¿Ti tb'iya?
Atzunte xjal xi ttzaq'we'n:
—Legión we nb'i, porke nim qb'ete.
10Ex o kub'sanxix ju'ẍ twitz Jesús tu'n mi'n kyex lajo'n tuj kytx'otx' aj Gadara. 11Ate'toq txqan b'och niqayin, nim kyb'et in che wa'ntoq tk'u'j witz. 12Ex e kub'san qe ju'ẍ twitz Jesús:
—Qo t-samanxa kyxol b'och tu'n qokxe kyuj, che chi.
13Xitzun tq'o'n Jesús amb'il kye. E je'tztzun qe ju'ẍ tuj tanmi xjal, e jo'kx kyuj b'och b'alo te kab' mil kyajlal b'och; extzun kyxo'n kyib' kykyaqil b'och ttxa'n xaq, ex e b'aj naj tuj a'.
14Atzun qeju in che pastorin qe b'och e je'l oq, ex xi kyq'o'n tqanil kye xjal tuj tnam ex kye xjal tuj kojb'il. E tzajtzun xjal ke'yilte ti otoq b'aj. 15E ultzun tuk'il Jesús, ex o kyil q'uqltoq ju xjal aju otoq yajlanjtz kyu'n ju'ẍ nimku kyb'et, tok t-xb'alun ju xjal ex otoq b'anix tnab'l; tzajtzun kyxob'il xjal. 16Ex aqeju e lonte jlu, xi kytx'olb'a'n kye xjal tza'n tten otoq b'anix ju xjal aju otoq yajlanjtz kyu'n ju'ẍ, ex ti o b'aj kyi'j b'och. 17E oktzun ten xjal kub'sal twitz Jesús tu'n tex tuj kytanmi.
18Kyja'toq tokx Jesús tuj barc, aju xjal otoq yajlanjtz kyu'n ju'ẍ o kub'san twitz Jesús tu'n t-xi' tuk'il Jesús. 19Atzunte Jesús minti' tkuyi tu'n t-xi' xjal tuk'il, noq o'kx xi tma'n te:
—Txi'ya tjaya kyxol qe termaniya, ex tx'olb'anxa kye aju nimxix ma tb'incha Qman teya ex tza'n tten ma tzaj q'aq'an tk'u'j ti'ja.
20Xi'tzun ju xjal, ok ten tx'olb'alte tuj tx'otx' Decápolis, xi tma'n aju nimxix o tb'incha Jesús te; ex kykyaqil xjal e lab'in ti'j.
Aju tme'jel Jairo, ex aju xu'j ok tmako'n t-xb'alun Jesús
Mateo 9.18-26; Lucas 8.40-56
21Tej tik'tz Jesús juntl maj tuj barc, ul jlajtzi laguna, ul kychmon kyib' nim xjal ti'j; axtzun kub' ten Jesús ttzi a'. 22At jun kye qeju nejenel tuj ja te k'ulb'il, Jairo tb'i, ul tuk'il Jesús; tej tlonte Jairo kyja' ttzaj Jesús, kub' mutze' t-xe' tqan. 23Nimxix o kub'san twitz, ex tma:
—Ch'ix tkyim nme'jele; tzaja wuk'ile tu'n tkub' tq'o'na tq'ab'a tib'aj tu'ntzun tb'anix ex tu'n tanq'in, chi Jairo.
24Xi'tzun Jesús tuk'il, ex e ok lpe' nim xjal ti'j, ex ok kyb'etz'an kyib' xjal ti'j Jesús. 25Ex at jun xu'j kyxol xjal, otoq b'ant kab'laj ab'q'i yab'toq tu'n ẍwo'j. 26Ela'xi maj otoq txi aj kyuk'il nimku q'anal, ex nim otoq k'ixb'i, ex otoq b'aj tnajsa'n tkyaqilju at te; ex minti' o b'ant ch'in, noq mas xi' tuj tilil. 27Tej tb'inte xu'j tqanil ti'j Jesús, pon laq'e' ttzal ti'j Jesús kyxol xjal, ex ok tmako'n xu'j t-xb'alun Jesús. 28Porke chi xu'j: Ichaq noq t-xb'alun tz'ok nmako'ne, chin b'antele. 29Ex jurat naj o we' ẍwo'j ti'j; ex o tna' xu'j tuj t-ximlal otoq b'anix ex otoq tz'el tyab'il. 30Jurattzun el tnik' Jesús ti'j qa otoq b'anix jun xjal tu'n tipumal; ajtztzun tke'yin kywitz xjal, ex tma:
—¿Alkye ma tz'ok makonte nxb'alune?
31Xi kyma'n t-xnaq'tzb'en te:
—Lu in tke'yina qe xjal nno'k kyb'etz'an kyib' ti'ja, atzun teya in tma'na: ¿Alkye ma tz'ok makonte weye?
32Xitzun tke'yin Jesús kywitz kykyaqil xjal ate'toq ti'jele, tu'n tel tnik' ti'j alkye otoq tz'ok makonte te. 33Atzunte xu'j tzaj lu'lun tu'n t-xob'il, porke b'a'ntoq tu'n aju otoq b'inchanjtz te; pontzun laq'e' xu'j twitz Jesús, kub' ẍmeje' t-xe tqan, ex clarxix xi tma'n tkyaqil. 34Xitzun tma'n Jesús te:
—Nme'jel, tu'n tokslab'la ma b'anta; txi'ya, txub'txaj ta'ya ja'lo, b'i'x ma kyaj b'anixa, ma tz'el tyab'ila.
35Matoq in yolin Jesús tej kyul kab'e xjal e tzaj tuj tja nejenel tuj ja te k'ulb'il ex xi kyma'n te:
—Ma kyim tme'jela; ¿tigan sikt Xnaq'tzal tu'na? Che chi.
36Tejtzun tb'inte Jesús aju in kyma'n, xi tma'n teju nejenel tuj ja te k'ulb'il:
—Mi'n xob'a, o'kx qe' tk'u'ja.
37Ex minti' o tkuyi Jesús tu'n kyxi lpe' xjal ti'j, noq o'kx Pedro, tuk'ix Jacobo ex Juan aju titz'in Jacobo e je'x tuk'il. 38Tejtzun tpon Jesús tja nejenel o til Jesús qe xjal in che wulj ex in che oq' ex nimxix in che wu'yin. 39Okxtzun Jesús tuja ex xi tma'n kye xjal:
—¿Tiqu'n in che wulje ex in che oq'e? Aju txin mya kyimni, noq in tan, chi Jesús kye.
40Ex e ok ten xjal xmayil ti'j Jesús. Atzunte Jesús e je'tz tlajo'n kykyaqil xjal ttxa'n pe'n, o'kx tman txin okx tuk'in, tuk'ix ttxu', ex kyuk'ix qeju ate' tuk'il Jesús. E okxtzun jatum ta' txin. 41Jawtzun ti'n Jesús tq'ab' txin ex xi tma'n te:
—Talita cumi, chi Jesús. Atzun in tma'n ju yol lu: Txin, teya in xi nma'ne, we'ktza.
42Jurattzun jaw we' txin ex ok ten b'etel, tu'nju otoq japun kab'laj ab'q'i tu'n. Atzun kye xjal nim e jaw lab'in tej kyke'yinte jlu. 43Ex xi tkyuwsa'nxix Jesús kye, xi tma'n tu'n mi'n t-xi kyma'n kye xjal, ex xi tma'n tu'n t-xi q'ot ch'in twa txin.
Markert nå:
Marcos 5: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
