Marcos 12
12
Aju techal kyi'j qe aq'nal mya b'a'n
Mateo 21.33-46; Lucas 20.9-19
1Ex ok ten Jesús q'malte junjun techal kye, chi kyja':
—At jun xjal ku'x tawa'n tqan uva, ok tq'o'n pe'n ti'j, ku'x tlaku'n jun jul jatum tu'n tel ptz'et ta'l uva, ex jaw tb'incha'n jun ja te kwentb'il tqan uva. Tu'n jlu xi tq'o'n ttx'otx' te kymajen aq'nal, ex xi' tuj juntl lugar najchaq. 2Tejtzun tpon tq'ijlalil tu'n tkub' twitz awal, tzaj t-sama'n jun tmajen kyuk'il majenal tx'otx' tu'n t-xi kyq'o'n majenal tx'otx' ch'in twitz awal te. 3Atzun kye majenal tx'otx' tzaj kytzyu'n ju majen ex b'aj kyk'ixb'isa'n, ex aj kysama'n minti' ch'in q'i'n tu'n. 4Tzaj t-sama'n xjal juntl tmajen; atzun kye majenal tx'otx' ok kyxo'n tu'n ab'j, ok kyk'ixb'isa'n twi', ex ok kyyaso'n. 5Tzaj t-sama'n xjal juntl tmajen, atzun te jlu b'i'x kub' kyb'yo'n. Ex te tib'ajxi e je'x t-sama'n txqantl majen; junjun b'aj kyk'ixb'isa'n, ex junjun kub' kyb'yo'n.
6Ex atxtoq juntl tu'n ttzaj t-sama'n, aku ju tk'wa'l k'ujla'nxix tu'n; te mankb'ilxitzun tzaj t-sama'n tk'wa'l. Qapelo at ch'in tchi tuj kywitz ok tpon nk'wa'le, chi xjal. 7Atzun kye majenal tx'otx' kyma kyxolx: Atzunte etzal jlu; chux qeye, qb'yonku tu'ntzun tkyaj ten tqan awal te qe, che chi. 8Tzyettzun kyu'n, kub' kyb'yo'n, ex kyxo'n ti'jxi tqan awal.
9¿Titzun ok tb'incha' tajwil tqan awal? Ktzajeltzun ex che b'el tb'yo'n qe majenal tx'otx', ex kxel tq'o'n ttx'otx' te kymajen txqantl xjal.
10¿B'ajxpe jaw kysch'i'ne jatum in tma'n tuj Tu'jil chi kyja'?:
Aju ab'j el kyik'un qe b'inchal ja, atzunju ma tz'ok te skyini te simyent.
11Tu'n Qman ma b'ant jlu, ex ma' t-xilen jlu tuj qwitz, chi tuj Tu'jil.
12Oktzun tilil kyu'n tu'n ttzyet Jesús porke kanun tuj kynab'l qa kyi'j xi tma'n Jesús ju techal lu, ex tzaj kyxob'il kywitz xjal, kyja'tzun kyaj kyq'o'n ex e ik'.
Tu'n tq'onjtz chojb'il te gobierni
Mateo 22.15-22; Lucas 20.20-26
13Ex tzaj kysama'n fariseo junjun kyuk'il kyuk'ix junjun xjal ate' tuj tpartid Herodes, tu'ntzun tkub' tz'aq Jesús tuj jun tyol kyu'n. 14Tejtzun kyul qe, xi kyma'n te:
—Xnaq'tzal, b'a'n qe qu'n ax tok tyola, ex minti' in xob'a kywitz xjal, porke minti' in tke'yina ti t-xilen xjal, noq o'kx in tq'o'na jun xnaq'tzb'il axix tok ti'j jun b'e tu'n kyok lpe' xjal ti'j Dios. ¿B'a'npe tu'n t-xi qq'o'ne chojenj nne'l tqanin gobierni te Roma, ex qa mi'n? ¿Okpe kxel qq'o'ne, ex qa mi'n? Che chi.
15Atzunte Jesús el tnik' kyi'j xmletz' qe ex xi tma'n kye:
—¿Tiqu'n in che jyone tumel wi'je? Kyi'ntze jun pwaq tu'n tok nke'yine.
16Ultzun kyi'n, ex xi tma'n Jesús kye:
—¿Al etzun tilb'ilal jlu tok twitz, ex al etzun b'iyb'aj tz'ib'an twitz?
—Te gobierni, che chi.
17Xitzun tma'n Jesús kye:
—Pues kyq'onxe te gobierni aju te gobierni, ex kyq'onxe te Dios aju te Dios, chi Jesús kye.
Ex e jaw lab'inxix ti'j tyol.
Aju xjelb'il ti'j anq'ib'l
Mateo 22.23-33; Lucas 20.27-40
18E ultzun junjun saduceo tuk'il Jesús, aqeju in kyma'n qa mlay jatz anq'in jun xjal kyxol kyimni; ex xi kyqanin te:
19—Xnaq'tzal, at jun yol kyaj ttz'ib'an Moisés qe. Qa at jun xjal ma kyim ttzik ex ma kyaj ten t-xu'jil qtzan ttzik ex minti' jun tk'wa'l otoq tzaj, il ti'j tu'n tmoje' xjal tuk'il t-xu'jil qtzan ttzik, tu'ntzun tkyaj jun t-xel qtzan ttzik tu'n, tu'n mi'n tnaj tiyjil. 20At wuq xjal e ten kyitz'in kyib'; aju tnejel knet t-xu'jil, ex o kyim minti' jun tk'wa'l kyaj. 21Ex ax ju xu'j jaw ti'n tz'inb'aj te t-xu'jil; ax ikx o kyim minti' jun tk'wa'l kyaj. Ax ikx o b'aj ti'j tkab'in tz'inb'aj. 22Ex elpun b'aj kywitz kywuqil xinaq tu'n xu'j, ex minti' jun kyk'wa'l kyaj. Te mankb'ilxitzun ikxte xu'j kyim. 23Tuj tq'ijlalil ok kyjatz anq'in xjal, ¿alkyetzun jun kyxol kywuqil k'okel te tchmil xu'j lu, porke kywuqil e xu'jlan te? Che chi.
24Xi ttzaq'we'n Jesús:
—¿Myapetzun tu'n jlu in che el txalpuje tu'nju minti' nne'l kynik'e ti'j ju tz'ib'an tuj Tu'jil ex tu'nju minti' nne'l kynik'e ti'j tipumal Dios? 25Porke tuj tq'ijlalil ok kyjatz anq'in xjal kyxol kyimni, minti' kyxu'jil xinaq ex minti' kychmil xu'j knetel, noq o'kx che okel ik tza'n qe anjel ate' tuj kya'j. 26Atzunju yol kyi'j kyimni ok kyjatz anq'in, ¿b'ajxpe jaw kysch'i'ne tuj tu'jil Moisés tza'n tten kub' tyek'un tib' Dios ti'j jun ch'i'x in k'ant, tu'n tyolin tuk'il Moisés? Chi Dios: Aqine Tdios Abraham ex Tdios Isaac ex Tdios Jacob. 27Ate Dios mya Kydios kyimni, noq o'kx Kydios itz'; kyja'tzun nim in che el txalpuje ti'j, chi Jesús kye.
Aju mandamyent mas ma' toklen
Mateo 22.34-40
28Pontzun laq'e' jun xnaq'tzal ti'j ley, in b'intoq kyi'j tej kyyolin saduceo tuk'il Jesús, ex o tb'i qa otoq tzaq'wet xjel tu'n Jesús tuj tumelxix, xitzun tqanin te Jesús:
—¿Alkye tnejel mandamyent mas nim toklen kyxol kykyaqil? Chi xjal.
29Xi ttzaq'we'n Jesús:
—Aju tnejel mandamyent kyxol kykyaqil, atzun jlu: Kyb'intze aqeye aj Israel, ate Qman Qdios, o'kxku junx. 30Kyk'ujlamtzune Qman Dios tu'n tkyaqil kyanmiye, tu'n tkyaqil kyk'u'je, tu'n tkyaqil kynab'le, ex tu'n tkyaqil kyipumale. Atzun tnejel mandamyent jlu ma'xix toklen. 31Ex aju tkab'in mandamyent ikx tten ik tza'n tnejel, atzun jlu: Kyk'ujlame qe kyuk'ile ik tza'n kyeye in kyk'ujlan kyib'e, chi tuj Tu'jil. Minti' juntl mandamyent mas nim toklen kywitz jlu, chi Jesús te.
32Atzunte xnaq'tzal ti'j ley xi tma'n:
—Tuj tumelxix ma tmaya Xnaq'tzal. Ax tok tyola, noq junxte Dios at, ex minti' juntl, o'kx te. 33Ex aju tu'n qk'ujlante Dios tu'n tkyaqil qk'u'j, ex tu'n tkyaqil qnab'l, ex tu'n tkyaqil qanmi, ex tu'n tkyaqil qipumal, ex tu'n qk'ujlante qe quk'il ik tza'n qe in qk'ujlan qib', mas ma' toklen jlu twitz tkyaqil oyaj in kub' patit tib'aj altar ex twitz tkyaqil oyaj in xi q'ot te Dios, chi xnaq'tzal ti'j ley.
34Tejtzun tb'inte Jesús otoq tzaj ttzaq'we'n xjal tuj tumelxix, xi tma'n te:
—Noq ch'intl taj tu'n tkanuna ti'j tkawb'il Dios, chi Jesús te.
Ya minti'tl ok kynimarin kyib' tu'n t-xi kyqanin juntl yol te.
¿Al e k'wa'lb'aj ju Crist?
Mateo 22.41-46; Lucas 20.41-44
35Tejtzun t-xi tq'o'n Jesús xnaq'tzb'il kye xjal tuj tja Dios, xi tma'n:
—¿Tza'n tten in kyma'n qe xnaq'tzal ti'j ley qa tk'wa'l David ju Crist aju at toklen tu'n Dios? 36Ex ax David kyaj q'mante jun yol tu'n tipumal Xewb'aj Xjan. Chi kyja':
Xi tma'n Qman te Wajawe: Qekuya tuj nb'anq'ab'e, akutzun in kub' kyi'j qe aj q'oj ti'ja wu'ne, chi tuj Tu'jil. 37Qa in tma'n David qa a Crist Tajaw, ¿tza'ntzun tten tu'n tok Crist te tk'wa'l? Chi Jesús kye.
Ex nimku xjal kub' kyb'i'nxix tyol Jesús in che tzalaj ti'j.
In tchik'b'a'n Jesús mya b'a'n kyaq'unb'en qe xnaq'tzal ti'j ley
Mateo 23.1-36; Lucas 11.37-54; 20.45-47
38Ex tuj ju t-xnaq'tzb'il xi tma'n Jesús kye:
—Ten kykwente kyi'je kye xnaq'tzal ti'j ley, nim kygan ti'j tu'n kyb'et tok kyxb'alun ẍjo'w, ex kyajb'il tu'n kyok q'olb'e'n tuj plas. 39Ex kyajb'il tu'n kykub' qe' kyuj kynejel q'uqb'il kyuj ja te k'ulb'il, ex kyajb'il tu'n kykub' qe' kyuj tb'anil q'uqb'il kyuj nintz wa'n. 40Nne'l kyi'n kyja meb'a xu'j, ex in che na'n Dios nim tuj, tu'ntzun tmaqset kyb'inchb'en. Mas nim kysentens jlu kb'el, chi Jesús kye.
Aju oyaj tu'n jun meb'a xu'j
Lucas 21.1-4
41Ex kub' qe' Jesús ttxlaj k'ub'l pwaq tuj tja Dios, in ke'yin ti'j tej tku'x kyq'o'n xjal kyoyaj tuj k'ub'l pwaq, ex nimku q'inun ku'x kyq'o'n nim pwaq. 42Ax ikx pon jun meb'a xu'j, tal yajxix, ku'x tq'o'n kab'e tal sentav. 43E tzajtzun ttxko'n Jesús qe t-xnaq'tzb'en ex xi tma'n kye:
—Ax tok kxel nma'ne kyeye, aju meb'a xu'j lu tal yajxix, mas nim ma ku'x tq'o'n kywitz kykyaqil qeju ma ku'x kyq'o'n kyoyaj tuj k'ub'l pwaq; 44ex kykyaqil qe jlu ma ku'x kyq'o'n aju in kyaj ten kye; atzunte xu'j lu maske tal yajxix, pero ma ku'x tq'o'n tkyaqilju at tajb'enil twi twa, chi Jesús kye.
Markert nå:
Marcos 12: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
