Juan 17
17
Jesús in na'n Dios kyi'j qe t-xnaq'tzb'en
1Tb'ajlenxitzun tma'n Jesús jlu, jaw tke'yin twitz kya'j ex tma:
—Tat, ma pon or; chin tnimsa'nktza, aqine Tk'wa'la, ax ikx teya tu'n tjaw nimsa'na wu'ne. 2Porke ma tzaj tq'o'na woklene kyib'aj kykyaqil xjal tu'n t-xi nq'o'ne chwinqlal te jumajx kye kykyaqil qeju ma che tzaj tq'o'na weye. 3Ex atzun chwinqlal jlu te jumajx, tu'n tojtzqinjtza kyu'n, o'kx aya jun Dios axix tok, ex tu'n wojtzqinjtze kyu'n, aqine Jesucrist ma chin tzaj t-sama'na.
4Ma jaw nnimsa'ne tb'iya twitz tx'otx', ma japun b'aj wu'ne aju aq'untl tzaj tq'o'na weye tu'n nb'inchanteye. 5Ja'lotzun Tat, chin tnimsa'nktza ttxlaja ik tza'n o chin jaw tnimsa'na ttxlaja ojtxi na'nxtoq tb'ant twitz tx'otx'.
6Ma txi nchik'b'a'ne kye xjal tza'n ttena, aqeju ma che etz ti'na kyxol xjal ex ma che tzaj tq'o'na weye. Etzan qe tu'na nej ex ma che tzaj tq'o'na weye, ex ma txi kyniman tyola. 7Ja'lo ma tz'el kynik' ti'j, tkyaqilju ma tzaj tq'o'na weye, tuk'ila in tzaj; 8porke aju yol ma tzaj tma'na weye ma txi nma'ne kye; ex ma txi kyniman, ex ma tz'el kynik' ti'j qa axix tok tuk'ila ẍin tzaje, ex ma txi kyoksla'n qa aya tzaj samante weye.
9Chin kub'sale twitza kyi'j; mya kyi'j qe txqantl xjal chin kub'sale twitza, noq o'kx kyi'j qeju ma che tzaj tq'o'na weye; porke etzan qe tu'na. 10Tkyaqilju at weye, teya, ex aju at teya, weye; ex ma chin jaw nimsa'ne kyu'n qeju ma tzaj tq'o'na weye.
11Mlay chin tentle twitz tx'otx'; atzun kye ax ate' twitz tx'otx', ex ma chinxe tuk'ila. Tat, aya xjan, aqeju ma che tzaj tq'o'na weye, kwentin oka qe tu'n tipumala, tu'ntzun kyten junx kyximb'etz, ik tza'n qe junx qo'. 12Tej atinxtoqe kyuk'il twitz tx'otx' kwentin qe wu'ne tu'n tipumala; aqeju ma che tzaj tq'o'na weye kwentin qe wu'ne, ex minti' jun kye ma naj, noq o'kx jun ma naj, aju il ti'j tu'n t-xi tuj najen tu'ntzun tjapun aju tz'ib'a'maj tuj Tu'jil.
13Ja'lotzun chin xe'le tuk'ila; ex in xi nma'ne jlu kye akux atinxe twitz tx'otx', tu'ntzun kytzalajxix wuk'ile ik tza'n weye in chin tzalaje. 14Ma txi nma'ne tyola kye; ex ma che el ik'un kyu'n xjal, porke mya te twitz tx'otx' qe, ik tza'n weye ax mya te twitz tx'otx' qine. 15Minti' in chin kub'sane twitza tu'n kyaj ti'na tu'n mi'n kytentl twitz tx'otx', noq o'kx tu'n kyok tkwentina tu'n mi'n tkub' kyi'j tu'n tajaw il. 16Mya te twitz tx'otx' qe, ik tza'n weye ax mya te twitz tx'otx' qine. 17Pa'n ela qe tu'nju tyola axix tok, tu'ntzun kyajb'en o'kx teya; aju tyola axix tok. 18Ik tza'n ma chin tzaj t-sama'na tu'n wule kyxol xjal, ikxtzun kye ma che'x nsama'ne kyxol xjal. 19Noq tu'n kylaj ma txi nq'on wib'e tu'n wajb'ene o'kx teya, ax ikx kye tu'n t-xi kyq'on kyib' teya noq tu'nju tyola axix tok, tu'ntzun kyajb'en o'kx teya.
20Mya o'kx kyi'j jlu chin kub'sale twitza, ax ikx chin kub'sale kyi'j txqantl ok che okslal wi'je noq tu'n kyyol. 21Chin kub'sale twitza tu'n tok junx kyximb'etz kykyaqil, ik tza'n teya ata wuk'ile ex atine tuk'ila, Tat; ikxtzun kyeju tu'n kyten junx quk'il, tu'ntzun t-xi kyoksla'n kykyaqil xjal qa aya ma tzaj samante weye. 22Ik tza'n weye ma chin jaw tnimsa'na, ax ikx kye ma che jaw nnimsa'ne tu'ntzun kyok junx, ik tza'n qe junx qo'. 23Aqine kyuk'il, ex aya wuk'ile, tu'ntzun kytenxix junx kyximb'etz, tu'ntzun tel kynik' kykyaqil xjal ti'j qa aya tzaj samante weye, ex ma che tk'ujlaya ik tza'n weye ma chin tk'ujlaya.
24Tat, aqeju ma che tzaj tq'o'na weye, wajb'ile tu'n kyten wuk'ile jatum chin tele, tu'ntzun tok kyke'yin wajwalile aju tzaj tq'o'na weye; porke in k'ujlanjtze tu'na atxix ojtxi na'nxtoq tb'ant twitz tx'otx'. 25Tat aya tz'aqlxix, minti' ojtzqi'na kyu'n xjal, atzun weye ojtzqi'na wu'ne, ex qeju ate' wuk'ile ma tz'el kynik' ti'j qa aya tzaj samante weye. 26Ma txi nchik'b'a'ne kye tza'n ttena, ex kukx kxel nchik'b'a'ntle kye tu'n telxix kynik' ti'j, tu'ntzun kyna'nte qa at tk'ujlalila kyi'j ik tza'n at tk'ujlalila wi'je, ex tu'n ntene kyuk'il.
Markert nå:
Juan 17: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
