Hechos 8
8
Tej kyyajlanjtz qe okslal tu'n Saulo
1Atzunte Saulo mojl tyol kyuk'il tu'n tkyim Esteban.
Ax q'ij e ok ten xjal yajlal kye kykyaqil okslal ate' tuj Jerusalén; ex kykyaqil e je'l sputj, e pon tuj tx'otx' Judea ex tuj tx'otx' Samaria, o'kx qe apostol e kyaj ten. 2Ku'xtzun maqu'n Esteban kyu'n junjun xinaq nimal Dios, ex e oq'xix ti'j. 3Atzunte Saulo kukx kyyajlanjtz qe okslal tu'n, nno'kx kyuj kykyaqil ja, ex in che etz tjawo'n qe xinaq ex qe xu'j, in che okx tq'o'n tuj pres.
Tej tpakb'an Felipe tuj tnam Samaria ti'j tqanil kolb'il
4Atzun kye qeju otoq che el sputj, in che b'et tuj tkyaqil lugar in che pakb'an ti'j tqanil kolb'il. 5Atzunte Felipe xi' tuj tnam Samaria, ex xi tpakb'a'n kye xjal ti'j Crist aju at toklen tu'n Dios. 6Atzun kye xjal tej kyb'inte tyol Felipe ex tej kyke'yinte in che b'ant qe señ nim kyipumal tu'n, xi kyb'i'nxix, junx tok kynab'l ti'j aju xi tma'n Felipe kye. 7Ex nimku xjal at ju'ẍ tuj kyanmi in che b'anix, in che sch'in qe ju'ẍ ok kyetz tuj kyanmi xjal; ex nimku xjal tzqijle'n kyyab'il in che b'anix kyuk'ix nimku kox. 8Kyja'tzun nimxix e tzalaj qe xjal tuj tnam Samaria.
9Ex attoq jun chman tuj tnam, Simón tb'i, b'a'n mañ tu'n ex otoq che b'aj t-sb'u'n qe aj Samaria, in tma'n qa nim toklen. 10Xitzun kyb'i'nxix kykyaqil xjal aju tyol chman, tza'nx qeju ch'in kyoklen ax ikx qeju ma' kyoklen in kyma'n:
—Ate xjal lu ma tz'ok te tipumal Dios ma'xix.
11Ex xi kyb'i'nxix aju tyol chman, tu'nju otoq tz'el q'ij in che sb'unjtz tu'n noq tu'nju mañ b'a'n tu'n. 12Ex tej t-xi kyoksla'n aju tpakb'ab'l Felipe ti'j tkawb'il Dios ex ti'j Jesucrist, e b'yantzun qe xinaq ex qe xu'j. 13Ax ikxte Simón xi toksla'n, ex tej tb'yan ax o ten tuk'il Felipe; ex tej tok tke'yin qe señ ex qe b'inchb'en nim kyipumal in che b'ant tu'n Felipe, jawtzun lab'in ti'j.
14Atzun kye apostol ate'toq tuj Jerusalén, tej kyb'inte qa otoq kyk'am aj Samaria aju tyol Dios, xitzun sama'n Pedro kyu'n tuk'ix Juan tu'n kypon kyuk'il. 15Tejtzun tpon Pedro tuk'ix Juan tuj Samaria, e oktzun ten na'l Dios kyi'j okslal tu'n ttzaj q'o'n Xewb'aj Xjan kye. 16Tu'nju na'nxtoq ttzaj q'o'n Xewb'aj Xjan kye; noq o'kx otoq che b'yan tuj tb'i Qajaw Jesús. 17Atzunte Pedro tuk'ix Juan kub' kyq'o'n kyq'ab' tib'aj kywi' okslal, ex kyk'amtzun okslal aju Xewb'aj Xjan.
18Tejtzun tke'yinte Simón in q'onjtztoq Xewb'aj Xjan noq tu'nju in kub' kyq'o'n kyq'ab' apostol tib'aj kywi' xjal, xitzun tma'n kye tu'n t-xi kyi'n ch'in pwaq, 19ex tma:
—Ax ikx kyq'ontze weye aju ipumalj lu, tu'ntzun kyk'monte xjal Xewb'aj Xjan ok tkub' nq'o'ne nq'ab'e tib'aj kywi'.
20Atzunte Pedro xi tma'n te:
—Knajel tpwaqa, ax ikx teya, porke ma kub' t-ximana qa noq tu'n tpwaqa tu'n tk'monteya aju oyaj in tzaj tq'o'n Dios. 21Minti' toklena ti'j jlu porke aju tanmiya mya tz'aqlxix twitz Dios. 22Tajtz ti'j tanmiya tu'nju mya b'a'n ma tb'inchaya, ex kub'sana twitz Dios, qapelo jaku kub' najsa'n aju ma kub' t-ximana tuj tanmiya; 23porke nno'k nke'yine puro nojni tuj tanmiya tu'n mya b'a'n, ex tzyu'nxa tu'nju mya b'a'n.
24Xitzun ttzaq'we'n Simón:
—Che kub'sane twitz Qajaw wi'je, tu'n mi'n ttzaj jlu wib'aje aju ma kymaye, chi Simón.
25Atzun kye apostol t-xilenxi kychik'b'a'n aju axix tok ex tb'ajlenxi kyma'n tyol Dios kye xjal, e ajtz meltz'aj tu'n kyul tuj Jerusalén, ex tuj b'e in che pakb'an ti'j tqanil kolb'il kyuj nimku tal tnam kye aj Samaria.
O yolin Felipe tuk'il jun xjal aj Etiopía
26Tb'ajlenxi jlu o yolin jun t-anjel Qajaw tuk'il Felipe ex tma:
—We'ktza ex txi'ya tuj tnayaj q'ij tuj b'e in xi' tuj Jerusalén tu'n tku'pun tuj Gaza, chi anjel.
Aju b'e lu in ku'x tuj lugar minti' kynajb'il xjal tuj. 27Jawtzun we' Felipe, ex xi'tzun. Ex ok tk'ulb'an tib' tuk'il jun xjal aj Etiopía. Nim toklen ju xjal lu, ex onil te jun xu'j rey Candase tb'i, aju kyrey aj Etiopía. Tuj tkwent ta' aju tq'inumab'l xu'j rey, ex otoq tzul aj tuj Jerusalén k'ulul te Dios. 28Kyja'toq taj xjal tuj ttanmi q'uqltoq tuj tcarwaj, ex in sch'intoq tuj Tu'jil Isaías aju t-sanjel Dios. 29Atzunte Xewb'aj Xjan tzaj tma'n te Felipe:
—Laq'e'xa ttxlaj carwaj.
30Xitzun qelan Felipe ttxlaj, ex o tb'i in sch'intoq tuj Tu'jil Isaías aju t-sanjel Dios. Xitzun tqanin Felipe te:
—¿Tzinpe nne'l tnik'a ti'j aju in jaw t-sch'i'na?
31Atzunte xjal tma:
—¿Tza'n tten tu'n tel nnik'e ti'j qa mi a'l jun chik'b'alte weye?
Ex o kub'san xjal tu'n tjax Felipe tuk'il ex tu'n tkub' qe' ttxlaj.
32In sch'intoq tuj Tu'jil jatum in tma'n kyja':
Xi q'i'n ik tza'n jun ẍne'l in xi q'i'n tuj b'iyb'il te; ex ik tza'n jun ẍne'l minti' in q'ajt twitz ju matzol ti'j, kyja'xtzun te minti' o q'ajt.
33Tej tyajlanjtz minti' xi b'inchet ti'j; atzunju tiyjil, ¿alkye jun jaku b'ant ttx'olb'ante te? Porke kub' b'yo'n tu'n mi'n ttentl twitz tx'otx', chi tuj Tu'jil.
34Xitzun tqanin aj Etiopía te Felipe:
—Chin kub'sale teya tu'n ttzaj tma'na weye, ¿al i'j o yolin t-sanjel Dios; ti'jxpe o yolin ex qa ti'j juntl?
35Tzyettzun tyolin Felipe, tzaj xe't tyol ti'j ju in tma'n tuj tu'jil Isaías aju t-sanjel Dios, ex xi tpakb'a'n aju tqanil b'a'n ti'j Jesús. 36Ex kyja' kyxi' tuj b'e, e kanun ttzi jun a', tmatzun ju xjal:
—Lu jun a' lu; ¿myapelo b'a'n tu'n nb'yane?
37[Xitzun tma'n Felipe te:
—Qa ma txi toksla'na tu'n tkyaqil tanmiya, jaku b'ant.
Xi ttzaq'we'n xjal:
—Kxel woksla'ne ate Jesucrist Tk'wa'l Dios.]
38Xitzun tma'n xjal tu'n twe' carwaj; e ku'xtzun kykab'il tuj a', ex o b'yan ju xjal tu'n Felipe. 39Tejtzun kyjatz tuj a', jaw q'i'n naj Felipe tu'n T-xew Qajaw, ex minti' o ilwaj juntl maj Felipe tu'n xjal; ik'tzun xjal in tzalaj tuj tb'e. 40Atzunte Felipe pon q'i'n tuj tnam Azoto; ex ik'tzun in pakb'an ti'j tqanil kolb'il kyuj kykyaqil tnam, ex pon max tuj Cesarea.
Markert nå:
Hechos 8: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
