Hechos 7
7
Tej tyolin Esteban te tkolb'il tib'
1Aju nejenel kye pal kye judiy xi tqanin te Esteban kyja':
—¿Axpe tok ik tza'n in kyma'n qe xjal lu?
2Xi ttzaq'we'n Esteban:
—Aqeye erman ex aqeye tat, kyb'intze nyole. Aju Dios ma'xix toklen kub' tyek'un tib' twitz qxe'chel Abraham tej atxtoq tuj tx'otx' Mesopotamia, na'nxtoq tpon tuj Harán, 3ex tma Dios te: Tetza tuj ttanmiya, kyxol qe t-xjalila, ex txi'ya tuj tx'otx' kxel nyek'une teya, chi Dios te. 4Etztzun Abraham tuj kytx'otx' aj Caldeo ex pon tuj Harán. Tkyimlenxitzun tman, tzajtzun q'i'n Abraham tu'n Dios, ul q'i'n tuj tx'otx' tzalu jatum najl qeye ja'lo. 5Pero minti' xi tq'o'n Dios tetzb'il Abraham, mi jun piẍ tx'otx'; noq o'kx xi ttziyan Dios te tu'n t-xi tq'o'n aju tx'otx' te tetzb'il ex te tib'ajxi te kyetzb'il tiyjil, maske na'nxtoq titz'j jun tk'wa'l Abraham tej tyolin Dios tuk'il. 6Ex xi tma'n Dios te kyja': Qe tiyjila che okel te stranjer xjal tuj ttx'otx' juntl nasyon, ex che okel te kymajen xjal, ex che b'ajel yajla'n kyu'n tuj kyaje syent ab'q'i. 7Ex kb'el nq'o'ne tcastiw nasyon jatum che tel te majen; tb'ajlenxitzun jlu che eletz ex che ajb'el weye tuj lugar tzalu, chi Dios. 8B'anttzun ti'j jun yol tu'n Dios tuk'il Abraham, ex tma tu'n tb'ant ju sircunsisyón te jun techal ti'j ju yol tzaj ttziyan Dios te. Kyja'tzun, tej tul itz'j Isaac aju tky'ajal Abraham, o sircunsidarinjtz tu'n Abraham tuj twajxaqin q'ij; ax ikx tej tul itz'j Jacob aju tky'ajal Isaac, o sircunsidarinjtz tu'n Isaac; ax ikx tej kyul itz'j qe kab'laj tky'ajal Jacob, e sircunsidarinjtz tu'n Jacob; aqeju tk'wa'l Jacob atzun kyxe'chel kab'laj k'loj aj Israel.
9Atzun qe tky'ajal Jacob aqeju qxe'chel tzaj tlo'ch kyk'u'j ti'j José aju kyitz'in, ex xi kyk'ayin kye xjal, pontzun q'i'n José tuj tx'otx' Egipto; pero ate Dios attoq tuk'il, 10ex o kolin ti'j tuj tkyaqilju yajb'il te, ex xi tq'o'n tnab'l tu'n tel b'a'n tuj twitz Faraón aju rey kye aj Egipto; tu'n jlu ok q'o'n José te gobernador tuj Egipto tu'n rey ex tu'n tkawin José kyib'aj kykyaqil qeju ate' tuj tja rey.
11Tzajtzun jun we'yaj kyib'aj kykyaqil xjal tuj tx'otx' Egipto ax ikx tuj tx'otx' Canaán, ex nimxix yajb'il tzaj kyib'aj xjal, atzun kye qxe'chel minti' knet kywa. 12Tejtzun tb'inte Jacob qa at triw tuj Egipto, e je'x t-sama'n qe tky'ajal tnejel maj, aqeju qxe'chel. 13Tejtzun kyxi aj tkab'maji'n, tzaj tyek'un tib' José tu'n tel kynik' ttzik ti'j, ex tb'itzun rey alkye tiyjil José. 14E tzajtzun t-sama'n José qe xjal q'ilte Jacob, aju tman, kyuk'ix kykyaqil qe terman, 75 kyb'et. 15Kyja'tzun tten pon Jacob tuj Egipto, ex ax o kyim tuj Egipto, ax ikx kye qxe'chel ax e kyim tuj Egipto. 16Atzun kyb'aqil ajtz q'i'n tu'n tul tuj Siquem, okx kyq'o'n aj Israel tuj toy' pik tuj ju tx'otx' aju otoq laq'et tu'n Abraham tu'n pwaq kyuk'il tk'wa'l Hamor tuj Siquem. 17Tejtzun tul laq'e' tq'ijlalil tu'n tjapun aju tziyimaj tu'n Dios, aju otoq tma Dios tu'nx tib' te Abraham, chmettzun kyajlal qxjalil ex e chmet-xix tuj Egipto. 18Te yajxitl ok juntl rey tuj tx'otx' Egipto, aju minti' ojtzqi'n twitz José tu'n. 19Aju rey lu ok ten sb'ul kye qxjalil, ex e yajlanjtz qxe'chel tu'n ojtxi, ex tma kye tu'n tex kyxo'n qe tal kyk'wa'l tu'n kykyim. 20Tujxtzunju tq'ijlalil lu ul itz'j Moisés, ex tb'anilxix ke'yin tuj twitz Dios; ox xjaw o ch'iysanjtz tuj tja tman. 21Ex tej tex q'i'n tu'n tkyim, aju tme'jel rey xi q'inte ex o tch'iysa ik tza'n tex tal. 22Ex o xnaq'tzanjtz Moisés tu'n tok tnab'l tuj tkyaqil ik tza'n kye aj Egipto; ex at tipumal tyol ex taq'unb'en.
23Tej tjapun 40 ab'q'i tu'n Moisés, ul tuj tanmi tu'n t-xi' visitaril kye aj Israel, aqeju t-xjalil. 24Tejtzun t-xi tke'yin in k'ixb'isanjtz jun terman, xi kolil ti'j, ex kub' tb'yo'n Moisés aju aj Egipto tu'ntzun t-xelin ti'j, tu'nju otoq k'ixb'i ju aj Israel tu'n. 25Tuj tnab'l Moisés qa tu'n tel kynik' t-xjalil ti'j qa ax Dios ktzoqpil kye noq tu'n Moisés; atzun kye minti' el kynik' ti'j. 26Te juntl q'ij ok noj Moisés kyi'j kab'e aj Israel in che q'ojl, ex o tajb'e tu'n tb'ant kyten tu'n mi'n kyq'ojintl, ex xi tma'n kye: Tat, kyitz'in kyib'e, ¿tiqu'n in che q'ojine? 27Atzun teju in k'ixb'isante tuk'il, ex lamo'n Moisés tu'n, ex tma: ¿Alkye ma tz'ok q'onte teya te jwes tu'n tkawina qib'aje? 28¿Tajpeya tu'n nkub' tb'yo'na, ik tza'n kub' tb'yo'na jun aj Egipto ew? Chi xjal. 29Tej tb'inte Moisés ju yol lu el oq, ex xi' tuj tx'otx' Madián, ok te stranjer xjal tuj tx'otx' lu; axtzun e itz'j kab'e tky'ajal.
30Tb'ajlenxitzun 40 ab'q'i, kub' tyek'un tib' jun anjel twitz Moisés tuj jun lugar minti' kynajb'il xjal tuj t-xe witz Sinaí, kub' tyek'un tib' anjel tuj tqan q'aq' in k'ant ti'j jun wi' ch'i'x. 31Tejtzun tke'yinte Moisés jlu, jaw lab'in ti'j ju ok tke'yin; tejtzun t-xi laq'e' ke'yilte, tb'itzun tq'ajq'ajel twi Qman in tma'n: 32Aqine Kydios qe t-xe'chela, aqine Tdios Abraham, ex Tdios Isaac, ex Tdios Jacob, chi Dios. Atzunte Moisés jaw lu'lun ex tzaj t-xob'il, minti' xi tke'yin tu'n tchi. 33Tzajtzun tma'n Qman te: Q'i'mela t-xajb'iya, porke aju lugar jatum tkub'a tx'otx' xjan. 34Ax tok ma wile yajb'il kye qe xjal etzan wu'ne, aqeju ate' tuj Egipto, ma nb'iye in che ayin, ex ma chin ku'tze tzoqpil kye. Ja'lotzun tzaja, kxel nsama'na tuj Egipto, chi Qman te.
35Maske otoq tz'el ik'un Moisés kyu'n aj Israel ex otoq kyma te kyja': ¿Alkye ma tz'ok q'onte teya te jwes tu'n tkawina qib'aje? Che chi. Pero axte Moisés xi t-sama'n Dios tzoqpil kye ex tu'n tkawin kyib'aj, tu'nju otoq tma anjel te, aju kub' tyek'un tib' twitz ti'j jun wi' ch'i'x. 36E je'tztzun q'i'n qe qxe'chel tu'n Moisés tuj Egipto, ex tb'incha Moisés qe b'inchb'en nim kyipumal ex qe señ tuj tx'otx' Egipto, ex tuj mar Kyaq Ke'yin, ex tuj lugar minti' kynajb'il xjal tuj, jatum e ten 40 ab'q'i. 37Axte Moisés o q'mante kye aj Israel: Kjawil t-sk'o'n Qman Dios jun t-sanjel ax kyxol qe kyermaniye tu'n tten kyuk'ile, ik tza'n qine. 38Ex axte Moisés aju o ten kyxol aj Israel tuj lugar minti' kynajb'il xjal tuj, ex o ten aju anjel tuk'il ex o yolin tuk'il twi witz Sinaí, ax ikx o ten Moisés kyuk'il qe qxe'chel, ex o tk'am ju yol te chwinqlal tu'n ttzaj tq'o'n qe.
39Atzun kye qxe'chel minti' xi kyniman, noq o'kx el kyik'un, ex aju tajb'il kyanmi tu'n kyaj meltz'aj juntl maj tuj Egipto. 40Xitzun kyma'n te Aarón: B'inchama junjun qdiose tu'n kykub' nej qwitze; porke minti' b'a'n qu'ne ti ma b'aj ti'j Moisés aju etz q'inte qe tuj tx'otx' Egipto, che chi. 41Kub'tzun kyb'incha'n jun tilb'ilal tal wakẍ, ex kub' kyb'yo'n qe alumaj te jun oyaj twitz, ex e tzalajxix ti'j tilb'ilal tal wakẍ aju otoq kub' kyb'incha'n. 42Atzunte Dios el tpa'n tib' kyi'j, ex e je'x ttzoqpi'n tu'n kyk'ulun kywitz qe che'w ate' twitz kya'j; ik tza'nx tz'ib'an tuj kyu'jil t-sanjel Dios, in tma'n kyja':
—Aqeye aj Israel, ¿baqa weye tzaj kyq'o'ne kyoyaje kyuk'ix qe alumaj e kub' kyb'yo'ne tej kytene 40 ab'q'i tuj lugar minti' kynajb'il xjal tuj?
43O'kx xi kyi'ne aju tja jun dios Moloc tb'i, xb'alun ja, ex ju tilb'ilal jun che'w Renfán tb'i ok te kydiose. Kyb'inchaye qe tilb'ilal lu tu'n kyk'ulune kywitz. Kyja'tzun che xel nq'a'kje max ti'jxi Babilonia, chi tuj Tu'jil.
44Tej kyten qxe'chel tuj lugar minti' kynajb'il xjal tuj, ajb'en kyu'n jun ja xb'alun te nab'l Dios, jatum k'u'n qe tz'lom ab'j tz'ib'an tley Dios kywitz. O b'ant ja lu ik tza'nx tzaj tma'n Dios te Moisés, tzaj tma'n tu'n tb'inchet ju ja ik tza'nx otoq tzaj yek'un te. 45Kyk'amtzun qe qxe'chel ju ja xb'alun te nab'l Dios, ex tuk'ix Josué at kyuk'il tej tul kyi'n ju ja lu tej ttzyet kytx'otx' txqantl xjal kyu'n, aqeju e ex tlajo'n Dios kywitz qxe'chel ex kyja'xtzun tten tej tok David te rey. 46B'a'n ela tmod rey David tuj twitz Dios, ex o tajb'e David tu'n tb'inchante jun ja te tnajb'il Dios, aju Tdios Jacob. 47Ex ate Salomón jaw b'inchante tja Dios, 48maske aju Dios ma'xix toklen myatzun ax najl tuj jun ja kyb'inchb'en xjal, ik tza'n in tma'n Dios tu'n t-sanjel chi kyja':
49Ate kya'j nq'uqb'ile tu'n nkawine, ex aju tx'otx' tkub' tjaq' nqane. ¿Alkyetzun jun ja ok kyb'incha'ye weye? ¿Ex jatum ta' jun lugar te wojlab'le?
50¿Myapetzun tu'n nq'ab'e xb'ant tkyaqil jlu? Chi Qman.
51Kyuw qeye, minti' in xi kyb'i'ne, ex minti' in xi kyoksla'ne tuj kyanmiye, ex minti' in xi kyb'i'ne tu'n kyẍkyine. Kukx tik' nej kyrasone twitzju te Xewb'aj Xjan. Ik tza'n o kyb'incha kyxe'chele ojtxi, ax ikxtzun kyeye in kyb'incha'ne. 52¿Atpe jun t-sanjel Dios minti' o yajlanjtz kyu'n kyxe'chele ojtxi? Ex kyu'ntzun e kub' b'yo'n qe t-sanjel Dios, aqeju o kyma tqanil ojtxi qa attoq tulel ju Crist aju Tz'aqlxix, atzun kyeye o txi kyq'o'ne tuj kyq'ab' Aj Sanjelal, ex o kub' kyb'yo'ne. 53Aqeye kyk'ame aju ley tzaj kyq'o'n anjel, ex minti' ma japun kyu'ne, chi Esteban.
Tej tkyim Esteban
54Tejtzun kyb'inte xjal tkyaqil tyol Esteban, tzaj nimxix kyq'oj tuj kyanmi ex o qitx'itx'in t-xe' kye' ti'j. 55Atzunte Esteban nojni tuj tanmi tu'n Xewb'aj Xjan, jaw tke'yin twitz kya'j ex o til t-spik'umal Dios tuj kya'j tuk'ix Jesús wa'l ttxlaj Dios tuj b'anq'ab'aj. 56Tmatzun Esteban:
—Ma wile kya'j katl, ex lu Jesús wa'l ttxlaj Dios tuj b'anq'ab'aj, aju sk'o'maj tu'n Dios tu'n tten kyuk'il xjal.
57Atzun kye xjal jaw tq'ajq'ajel kywi' kyuwxix, ex ok kymaqsi'n tuj kyẍkyin, e pon tilj ti'j. 58Extzun kyi'n ti'jxi tnam, oktzun kyxo'n tu'n ab'j; atzun kye testiw nik'al yol ti'j el kyi'n kyẍjo'w tok kyi'j, kyaj kyq'o'n tuj tkwent jun ku'xun Saulo tb'i. 59Ex matoq nno'k xo'n Esteban tu'n ab'j kyu'n, ok ten na'l Dios ex tma:
—Jesús Wajaw, k'monxa wanmiye, chi Esteban.
60Kub'tzun ẍmeje' ex jaw tq'ajq'ajel twi' kyuw:
—Tat, mi'n tz'ok tq'o'na kyb'inchb'en xjal lu te jun il.
Tej tb'aj tma'n jlu, kyimtzun.
Markert nå:
Hechos 7: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
