MARK 12
12
Kemeshentsse Lli Kedengathu Pi Ajühkaghape
(Mat 21.33-46; Luk 20.9-19)
1 #
Isa 5.1-2 Tsaseng wi Jisu na ajühkaghape ha pi anyithu kiza: “Ciwi anyi kesü na kemeshentsse ton pi sheng nu aghapeng sa pi vü, ma tssü kemisügü ghena ayyiku kesü chhüya, nu acatu kesü gheya. Tsaseng wi ma kemeshentsse lli tsü pi denga theng nu kijünyi wa. 2Kemeshentsse bi kewwi tsüwi ma nssümagha kesü kesun pi kedengathu wi ma shei tsü pvü gholo wa thsü. 3Kedengathu na nssümaghawa tsü ghan pi kiccü, nu mangla pi ncüla kesun pi gho neng thsü. 4Tsaseng wi ma nssümagha kepawa kesun chi; kedengathu na tsü la kiccü pi ma li wi ayisü sa nu ma kejügheya ntsa sa thsü. 5Tsaseng wi ma nssümagha kepa la kesun chi nan mathu na tsü pathia; tsüti mathu na kepathu kejon la pahan kiccü nu pahan pathia. 6He wi ma kesunchi kesawa na ma tsa ma kaghaliwa tsü ketan sadha. Asakhen ntsawa ma tsa tsü kesun pi kedengathu wi chi nu khi, ‘Mathu na itsawa ha kinyiküben kesa hi chütiben.’ 7Isala kedengathu na khokho wi khi, ‘Hawa ha alli pvüwa tsawa le, ikhang na ma pathi nu ma keben tsü pi ikhang ji saya na.’ 8Tsalina mathu na atsawa tsü ghanya nu pathia, nu ma kamang pi athsütsa wi khala.
9Jisu na keü, “Isalethu, alli pvüwa na khati saben nu? Ma ghola kedengathu tsü pathi nu alli tsü pi kedenga kepathu cüaben. 10#Zak 118.22-23Nthu na Ntsawajüh wi hati si meya kwe?
‘Ajjen kesathu na pi ma men nkemi sala
meya mvula kesa lonwa tsüna
tsüdi jawi adonbvü ghangpvüwa sa shaghadha.
11Ha Apvüwa na sachi;
khatila amankesa kesü dhanu!’ ”
12Judah nyi ccülikesathu na Jisu ghanyale sa, kepaghenanye mathu na ma ajühkaghape ha khi pi mathu shun kesa tsü chüben. Isala mathu na anyitentiwa tsü messi kesalina ma teshi nu bvüa.
Khajana Pi Kecü Jjügi Kekeü
(Mat 22.15-22; Luk 20.20-26)
13Farisithu pahan nu Herod nyithu pahan kesun pi Jisu wi pala keü nu ma ghan-nan thsüle sa. 14Mathu na ma wi gho nu keü, “Kesansiwa, ikhang na no atsentsenwa khiden, nu anyi nankepapa sa nten kesa chüben, kepaghenanye no anyi kizzakedi nsala Anyiza len tsentsawa pi nyu sansiden. Khajana pi Rom Kadimiwa kecü ayen benla nmi nu? Ikhang na pi mathu cüla ncüla nu?”
15Isala Jisu na mathu cho tsü chüya nu mathu luneng, “Nthu mangkesa na hi ghan-nan le saten nu? Rükatssü kesü sengho hi ya ghangchi thsülo.”
16Mathu rükatssü kesü sengho ma cü, ma mathu wi keü, “Hawa ha thowa tsi nu thowa nyan zhüki theng nu?” Mathu na “Kadimiwa le!” khineng.
17Tsalina Jisu na khi, “Kadimiwa jithu pi Kadimiwa cülo, nu Anyiza jithu pi Anyiza cülo.” Nu mathu na Jisu ghang pi amansa.
Hangneng-keshagha Cüki Kekeü
(Mat 22.23-33; Luk 20.27-40)
18 #
Kek 23.8
Sadukithu anyi keshü wina hangneng-shagha nbenle khi ketenthu pahan na Jisu wi gho nu ma wi keü, 19#Aye 25.5 “Kesansiwa, Mosa na ithu ghena ayenwa ha zhüchi: ‘Keujüla anyi kesü na atsanga nmila ma wubvü teshi nu shü lethu keshüwa shicü ben thsüle kesalina ma cünyuwa yala denyilewa tsü yaya thsü nsathu yishü.’ 20Kheni kuti tsü wi cünyunyi tagü na ben, keqhaiwa na ma wubvü yanu atsanga nmila shü. 21Ma cünyu keniwa na denyilewa tsü yaya nu ma la atsanga nmila shü. Tsü makesü cünyunyi kechengwa miwi la, 22nu tsüdi miwi la tsüti sa; cünyunyi tagü tsüdila nzawa tsü ssiben nu atsanga nmila shü. Asakhen wi nzawa la shü wa. 23Keshüthu tsüdila hangneng-keshagha tsathang wi nzawa tsüna thowa wubvü saben nu? Kepaghenanye ma tagü tsüdila nza tsüwa ssibendha.”
24Jisu na mathu wi kiza, “Nthu na khatila sazzi ben nu! Tsüna nthu na Ntsawajüh nyelela Anyiza kekhang lela nkechü ghena le! 25Kepaghenanye anyithu na keshü wina hangneng- keshagha seng wi mathu na tang wi nyilothu ti sa nu keshanyi sa nbendha. 26#Bvü 3.6 Keshü wina hangneng-shagha keben cüki: nthu na Mosa lesüshen wi aghangbhon kemecang cüki tsü si meya kwe? Ciwi Anyiza na hati Mosa wi kizale kesa zhütheng, ‘Hi Abraham Nyiza, Isak Nyiza, nu Jakob Nyiza.’ 27Ma hangkeben Nyiza khe keshü Nyiza nye. Nthu na sazzi ntsa saben.”
Ayenkhukechi Ketiwa
(Mat 22.34-40; Luk 10.25-28)
28Ayenkesansithu kesü na mathu keccücanli keben tsü zaya, nu Jisu na mehaitsü Sadukithu jüh lunengchi kesa tsü chüya nu ma wi keü, “Ayenkhukechi jawi khawa aghuti ntsawa nu?”
29Jisu na tsü lunengchi, “Aghutiwa na hale: ‘Kinalo! O Israel! Apvüwa, ithu Nyiza tsü ketan na Apvüwa le!#12.29:ithu Nyiza tsü ketan na Apvüwa le; nyelela Apvüwa ithu Nyiza ha ketan na Apvüwa 30#Aye 6.4-5 Nleben tsüdi, no kahang tsüdi, no kemeshen tsüdi, nu no kezü tsüdi pi Apvüwa n-Nyiza tizenya.’ 31#Lev 19.18Aghuti keniwa na ha: ‘No ketanla no ketizen ti njenphon tizenya.’ Ciwi ayenkhukechi ha keni miwi ketiki nmi.”
32 #
Aye 4.35
Ayenkesansiwa na Jisu wi khineng, “No khiti chidhale, kesansiwa! Ntsakhiwa no kekhi tsüti, Apvüwa Anyiza tsüna ma ketan khe kepa wi nmi. 33#Hos 6.6 Nu anyi kesü ma leben tsüdi, ma kemeshen tsüdi, nu ma kezü tsüdi pi Anyiza ntizenthu yishü, nu ma ketanla ma ketizen ti ma jenphon ntizenthu yishü. Asahang pi kekinyipen miwi ahhansha sa pi Anyiza kecü tsü mi wi la ayenkhukechi ha keni keniewa aghuti saben.” 34#Luk 10.25-28 Jisu na anyi tsüwa na metsashhu luneng kechi mukeya wi ma anyi tsüwa wi kiza, “No Anyiza Kadiyyi ssinu temeja nben.”
Haseng wi anyi thola ma wi pala keü kü wa.
Messiya Cüki Kekeü
(Mat 22.41-46; Luk 20.41-44)
35Jisu na Kekinyijjen wi nyu sansi nu keü, “Khati nu Ayenkesansithu na Messiya ha David tsa le khiya mehai nu? 36#Zak 110.1 Kemetha Ghamu na David miwi ben nu kekhi na:
‘Apvüwa na iPvüwa wi khi:
Hi nghinyithu pi nccü kekhu wi npi kechi chu
ikwen ajewa donkiyalo.’
37David na ma cila ‘Apvüwa’ isalethu, khati nu Messiya tsüna David tsa saya mehai nu?”
Jisu na Ayenkesansithu Kitsankechi
(Mat 23.1-36; Luk 20.45-47)
Anyitenti keti na anonghe ntsa Jisu jüh kinaben. 38Ma mathu sansi nu khi, “Ayenkesansithu ghena kiden-kesha yalo, mathu na agwomejuwa kaghazu pvünu kegoe nu asenkesapen wi nyu na mathu shalom sa, 39nu Sinagogthu wi apen kemehai ntsa wi ben, nu kemishu wi kekinyikü pen wi ben mvuden. 40Mathu na denyilethu miwi mathu ghena kemehaiwa saya nu mathu keben tengya, nu kekhie kesie sa pi ammi saden. Mathu kemeten na tsüdi miwi nkemehaiwa saden.”
Denyile na Khukechi
(Luk 21.1-4)
41Jisu na kekinyijjen keben kechipen kete wi ben nu anyithu na mathu pisa pi kechi tsü ghang ben. Keban kejon na apisa kejon sengho cü chiben; 42ciwi ketha-u denyile kesü na pisa kenmiewa keni, tsüna pisa kesü-u tsü sengho cü chi. 43Jisu na ma sansikeyathu cighu chi nu mathu wi khi, “Hi atsentsa nthu kizaden, denyile ketha-uwa hana tsüdi miwi jiki pi chidha. 44Kepaghenanye kepathu na mathu keben qei wina pi chi; isala nzawa, ma ketha-u ma keben sen nu hang keten tsü maben pi chidha.”
Markert nå:
MARK 12: RENGNBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
