MARK 11
11
Khang Ntsa Sasen nu Jerusalem wi Kedu
(Mat 21.1-11; Luk 19.28-40; Jhn 12.12-19)
1Mathu na Jerusalem tsaki kegho wi Bethfage nu Bethani nyuti keni kete Oliv Yikha wi ghoya. Jisu na hati sansikeya keni kecükegwe 2pi atu wi wa thsü, “Nshinyi tuwi anyu wi tsü walo. Nshinyi ciwi du lethu gada zza kesü nyu ma miwi npi kedonki hu pi ketheng muya ben na tsü, lisha sen nu he wi gholo. 3Keujüla nyu nshinyi keüla mangkesa na nshinyi tsü lisha ben nu? isa lethu. Apvüwa na ha nsenthu yishü ben, nu wan kesun pi he wi gho neng thsüaben le, isa khilo.”
4Tsalina manyi wa nan gada zza kesü pi alen kete ajenka wi hugi ketheng muya. Manyi wala tsü lisha ben nan, 5anyi ciwi ngan kebenthu na manyi wi keü, “Nshinyi mangkesa na tsü lisha ben nu?”
6Manyi na Jisu manyi kekiza ti mathu lunengchi nu mathu na manyi teshi chicü. 7Manyi na gada tsü ssinu Jisu wi gho, nu mathu thsü pi gada miwi shi nu Jisu ya ma miwi donki thsü. 8Anyi kejonla mathu thsü pi alen wi shi, nu pahan na alli wi aghang shhü sengho alen wi chi. 9#Zak 118.25-26 Anyi atu wi kewathu nu aseng wi nie ketenthu na jisha nu “Hosanna! Anyiza na sawegü pi Apvüwa nyan wina gho ketenwa kecüwa salo. 10Anyiza na sawegü pi ithu ba Kadimi David kadiyyi gho ketenwa kecüwa salo! Hosanna! Kemisintsa senglo!”
11Jisu na Jerusalem wi du nu Kekinyijjen wi wala ciwi pala tsüdi ghang kevüli chi. Isala minuwa kesalina ma sansikeyathu Taghakeni ssinu Bethani wi wa.
Jisu Na Khhaghabvüton Kishenkecü
(Mat 21.18-19)
12Pitsüwa wi mathu na Bethani wina ghoneng keten wi Jisu na ghamaya. 13Ma alen kesie wina khhaghabvü ton kesü mawa ketan pogho keben muya, nu ma ciwi khhaghabvü bi muyala nyekala sala ghang wa. Isala ma tsü kete wi gho nan mawa ketan muya, kepaghenanye tsüna khhaghabvü ma bi kebün tsü wi nye. 14Jisu na khhaghabvü ton wi khi, “Anyi thola nmiwi nbi ndsa neng thsüdha!”
Nu ma sansikeyathu na ma tsüti kekhi tsü zaya.
Jisu Na Kekinyijjen wi kewa
(Mat 21.12-17; Luk 19.45-48; Jhn 2.13-22)
15Mathu na Jerusalem wi ghoya, nu Jisu na Kekinyijjen wi wa anyi ciwi pala shei nu jeü kebenthu tsüdi jügüshia. Ma wala apisa kemili nu tuktur jeü kebenthu miz tsü pakhakuli, 16nu ma anyi thola Kekinyijjen ccühha wina mangla pvünu nshhu thsü. 17#Isa 56.7; Jer 7.11 Ma nyithu sansi: “Ntsawajüh wi Anyiza na kekhi hati zhütheng, ‘Hi Kekinyijjen pi anyi mizzatenti tsüdi ghena kekhie jjen kesü le ciden, isala nthu na tsü pi kaghanfüthu keben pen kesü sadha.” 18Keqhaikedi ntsathu nu Ayenkesansithu na ha zaya nu mathu na Jisu pathiale kesa alen bha wa. Isala mathu na ma messi, kepaghenanye anyitenti maben la ma kesansi kina nu amansadha.
19Minulen wi Jisu nu ma sansikeyathu na anyunutiwa tsü teshia.
Khhaghabvü ton wina Chükeya
(Mat 21.20-22)
20Ghanenwa mitu mathu na alen wi kegoe wa nan khhaghabvü ton tsüna shü dula ma ghazan cu kebenla muya. 21Pitor na khati sa khe tsü meshenya nu ma Jisu wi khi, “Kesansiwa, ghangchilo. no khhaghabvü ton kishencü kesa tsüna shüdha le!”
22Jisu na mathu luneng, “Nthu Anyiza wi kenondi benyalo. 23#Mat 17.20; 1 Kor 13.2 Hi atsentsa nthu kizaden, anyi kesü le kesü lela ayikha hawi kizala shagha nu wa atssükedone wi dulo khi nu ma leben wi ma kekhi tsüti nkesütula nondi ben lethu ma ghena tsüti sa cüben. 24Hi ha jjügi ghena nthu kizaden: Nthu na kekhie kesa wi mangwa khie khe tsü muyadha kesa nondilo, isathu nthu na mangwa khie khe tsü muya ben na. 25#Mat 6.14-15Nu khathansha wi nthu na shagha kekhie sa khe nthu na meshu kesütanla kemeshensa ben lethu kesami teshi pi cülo, isathu nthu Ba tang wi kebenwa la nthu kesami teshi pi cüben.” 26(Keujüla nthu na nyu kesami teshi pi ncü lethu, nthu Ba tang wi kebenwa la nthu kesami teshi cü nben.)
Jisu Kekhang keben Cüki Kekeü
(Mat 21.23-27; Luk 20.1-8)
27Mathu na kheneng Jerusalem wi gho. Jisu na wa Kekinyijjen wi kegoe keten wi keqhaikedi ntsathu, keshenpfüthu, nu Ayenkesansithu na gho 28ma wi keü, “No mangwa kekhang wina hathu ha saben nu? Thowa na kekhang ha pi no cü nu?”
29Jisu na mathu wi khineng, “Hi nthu wi pala kesü keü ten na hi kizalo, isathu hi la mangwa kekhang wina hathu ha saben khe pi nthu kizaben. 30Johan baptism tsüna Anyiza wina la anyi wina gho nu?”
31Mathu ketanla mathu jawi keccücanliwa: “Ikhang na khati le khi nu? Keujüla ikhang na ‘Anyiza wina le’ khithu ma isathu ‘Mangkesa na nthu ma n-nondi nu?’ isa khiben. 32Isala keujüla ikhang na ‘Anyi wina le khithu, ...’ ” (Mathu na anyithu messi, kepaghenanye anyi tsüdila Johan tsüna atusenjüh-kechü kesü le kesa nondi den.) 33Tsalina mathu na Jisu wi “Ikhang na nchü le” khineng chia. Jisu na mathu wi “Isathu, hi la hi mangwa kekhang wina hathu ha saten khe pi nthu kizaya nben.”
Markert nå:
MARK 11: RENGNBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
