MARK 10
10
Jisu Na Keyisha Cüki Pi Kesansi
(Mat 19.1-12; Luk 16.18)
1Tsaseng wi Jisu na apen tsü teshi nu Jordan Ghaku pvüdhi sen nu Judea yyi wi wa. Anyitenti na kheneng gho ma vüya nu ma keshüthangla sa keten ti mathu sansi. 2Farisithu na gho ma ghan-nanle kesalina ma wi keü, “Anyi kesü na ma wubvü yisha kesa ayen benla nmi nu?” 3Jisu na mathu wi keü neng, “Mosa na ayen khati kesa pi nthu cü nu?”
4 #
Aye 24.1-4; Mat 5.31 Mathu luneng kechi na, “Mosa na anyi kesü ya keyisha lesü zhü pi ma wubvü cü nu kesun pi bvü thsü tenle.”
5Jisu na mathu wi kiza, “Nthu leben kedhu ghena Mosa na ayen ha zhü pi nthu cüle. 6#Ade 1.27; 5.2 Isala adechhü sahangkechi wina Ntsawajüh khi keten ti ‘Anyiza na nza nu npvüza sachi. 7#Ade 2.24 Ha jjügi ghena npvüza kesü na ma bajja teshi nu wala ma wubvü manyi kesütan sa waben, 8nu keni tsüna kesütan saben.’ Tsalina manyi tsüna keni nyedha isala kesütan sadha. 9Tsüghena Anyiza na zanghu kethengwa tsü anyi na zanzighe yishü.”
10Mathu ajjen wi kedu seng wi sansikeyathu na gho Jisu wi ha jjügi keü. 11#Mat 5.32; 1 Kor 7.10-11 Ma mathu wi khi, “Npvüza thowa na ma wubvü yisha nu nza kepawa yaya khe ma keqheza sa pi ma wubvü shundha. 12Tsü makesü, nza thowa na ma wuba yisha nu npvüza kepawa ssiben wa khe ma keqheza sadha.”
Jisu Na Sawegü Pi Ghanyithu Kecü
(Mat 19.13-15; Luk 18.15-17)
13Anyi pahan na ghanyithu ssinu Jisu wi gho nu ma ya ma kwen chang pi ghanyithu miwi chi thsüle sa, isala sansikeyathu na mathu satekü. 14Jisu na tsü mukeya wi ma leben minuya nu ma sansikeyathu wi kiza, “Ghanyithu tsü nkhala, mathu yala hi wi gho thsülo, kepaghenanye Anyiza Kadiyyi na hathu hati kesa jile. 15#Mat 18.3 Hi atsentsa nthu kizaden, anyi kesü le kesü lela ghanyi kesü ti sa nu Anyiza Kadiyyi ya nkeya tsü ciwi duya nben.” 16Tsaseng wi ma kwen chang pi ghanyi kesüsü miwi chi nu sawegü pi mathu cü.
Anyi Kebanwa
(Mat 19.16-30; Luk 18.18-30)
17Jisu na kheneng kijünyi wa keten wi anyi kesü na bvü gho ma tuwi akhhutsüdu nu keü, “Kesansi kemehaiwa, hi anuphan kahang muyale kesalina hi mangwa nsathu yishü nu?”
18Jisu ma wi kiza, “No mangkesa na kemehaiwa hi citen nu? Anyiza ketan khe thola nmehai le.” 19#Bvü 20.12-16; Aye 5.16-20 No ayenkhukechithu tsü chüben: ‘Nyu npathi la; keqheza nsa la; n-ghanfü la; milikemesa wi nyu nkimenni la; nyu nmechu la; nba njja kinyikü tenlo.’ ”
20Anyi tsüwa na khineng, “Kesansiwa, hi ghanyi tsüwi na ayenkhukechi hathu ha tsüdi nieyadha le.”
21Jisu na ma ghang pi tizenya nu ma wi kiza, “No pala kesü nsathu yishü ben. Wala no keben tsüdi jeü nu apisa pi ketha-u cülo; isathu tang wi no keben benyaben, tsaseng wi gho hi nie ghalo.” 22Anyi tsüwa na ajüh ha zaya theng nu ma hathanala bvüa, kepaghenanye ma keban ntsa kesü. 23Jisu na ghang kevüli chi nu ma sansikeyathu wi kiza, “Keban kesü na Anyiza Kadiyyi wi dule kesa na khatila dhu nu!”
24Sansikeyathu na ajüh tsü kina pi mathu mansa, isala Jisu na mathu wi khi, “Ghanyithu, Anyiza Kadiyyi wi dule kesa na khatila dhu nu! 25Keban kesü na Anyiza Kadiyyi wi dule kesa na sunsiesa kesü na aghaceng ku wi keshhuwa la le!”
26Sansikeyathu na amansa ntsa nu khokho wi keü, “Isathu thowa na hangshaya mehai nu?”
27Jisu na mathu ghangti nu khi, “Hawa ha anyi ghena saya nben, isala Anyiza ghena tsü saya mehai, kepaghenanye Anyiza na pala tsüdila kuliya mehai.”
28Tsaseng wi Pitor kekhi na, “Ghangchilo, ikhang na pala tsüdila teshi nu no nieten le!” 29Jisu na khineng, “Hi atsentsa nthu kizaden, anyi thowa na ighena nu ajühkemehaiwa ghena ajjen, acünyuthu, atssüggüthu, aba, ajja, atsangathu, nu allithu teshi khe, 30ma nansü kahang ha wi jiki ntsa muyaden. Ma tsü miwi meza-meza muya keten na ajjenthu, acünyuthu, atssüggüthu, ajjathu, atsangathu, nu allithu, —nu kemeten-kemesha la muyaden; isala kahang gha keten wi ma anuphan kahang muyaden. 31#Luk 13.30 Khili atu sa keben kejon na asakhen saben, nu khili asakhen sa keben kejon na atu saben.”
Jisu Na kecheng tughuwa Ma Keshü Cüki Kekhi
(Mat 20.17-19; Luk 18.31-34)
32Jisu nu ma sansikeyathu na khili Jerusalem wi shu tendha. Jisu na sansikeyathu tuwi waden, nu mathu na amansa; nu anyi mathu nie ketenthu na messiben. Jisu na kheneng kuti ma sansikeyathu Taghakeni ssi wa nyu na ma miwi kulichi keten cüki khi pi mathu kiza. 33Ma mathu wi “Kinalo, ikhang na Jerusalem wi shu tendha, ciwi nyu na Anyi Tsawa ghan pi keqhaikedi ntsathu nu Ayenkesansithu kwen wi chiaben . Mathu na ma meshensa pi shü thsülo pi Judah nyi nkenyethu kwen wi chiaben. 34Mathu na ma nankeqhe, ma meshuki, ma kihhe, nu ma pathiaben; isala ghanan kecheng seng wi ma hangneng-shagha shaben.”
James Nu Johan Manyi Kekhie
(Mat 20.20-28)
35Tsaseng wi Zebedee tsa James nu Johan manyi Jisu wi gho nu khi, “Kesansiwa, no yala ishinyi ghena pala pahan kuli thsü mvuben le!”
36Jisu na manyi wi keü, “Hi nshinyi ghena mangwa sachi thsü mvuben nu?”
37Manyi luneng, “No kadipen wi donki nu n-nyankethang sa kegho wi ishinyi yala kesü nkwen ajewa nu kesü tavüwa donkiya thsü mvuben le!”
38 #
Luk 12.50 Jisu na manyi wi kiza, “Nshinyi na mangwa khieben khe nshinyi na nchü. Nshinyi na hi jjü keten ketizen kesa hyiwa tsü jjüya mehai kwe? Nyelela hi baptaiz sa kentenwa tsü saya mehai kwe?”
39Manyi “Sayamehai le” khineng. Jisu na manyi wi khi, “Nshinyi hi jjü keten hyiwa tsü jjüya mehai nu hi baptaiz sa ketenwa tsü saya mehai, 40isala ikwen ajewa nu tavüwa donkiya kemehai tsüna hi kessiya kemehai kemeshon nmi. Tsüwa tsüna Anyiza na thothu ghena apen tsü keten theng khe tsüthu ji le!”
41Sansikeya kepathu ma tagha na tsü cüki zakeya wi mathu James nu Johan manyi miwi leben minu. 42#Luk 22.25-26 Tsalina Jisu na mathu tsüdi cighu pi ma wi chi nu khi, “Nthu na anyi Anyiza nkechüthu miwi kekhang kesenthu na mathu miwi apvüwa saten nu accülikesathu na mathu miwi kekhang tsüdi senten kesa tsü chüben. 43#Mat 23.11; Mrk 9.35; Luk 22.26 Isala nthu jawi tsü tsüti sa nben. Keujüla nthu thowa na kediwa sa mvu khe ma nthu tsüdi maghawa nsathu yishü; 44nu nthu jawi thowa na atu sa mvu khe ma tsüdi nssümaghawa saben. 45Kepaghenanye Anyi Tsawa lela nyu ya ma kekuli sa thsüle ngho, isala ma nyu kekuli sa nu ma kahangli khuchi pi anyi kejon hangshayale kesa ghena ghole.”
Jisu Na Anyon Nkemuwa Bartima sa pi Mehai Kecü
(Mat 20.29-34; Luk 18.35-43)
46Mathu na Jerikho wi ghoya, nu Jisu nu ma sansikeyathu na anyitenti keti kesü ssinu wa keten wi anyon nkemu kekuwhe nyi kesü ma nyan Bartima kesa Tima tsa tsüna alen wi donkiben. 47Ma tsüwa tsüna Nazareth nyiwa Jisu le kesa zakeya wi jisha nu khi, “David tsawa Jisu! Hi nantizen chicülo!”
48Anyi kejon na ma satekü nu ma ccen ben walo ma kiza. Isala ma tsümiwi misiki magha nu khi, “David tsawa, hi nantizen chicülo!”
49Jisu na ngan nu “Ma cichilo” khi.
Tsalina mathu na ma wi “N-nongheya nu shaghalo, ma no ciben le!” khi.
50Tsalina ma ma thsü pi khala nu kephenki sen nu Jisu wi gho.
51Jisu na ma wi keü, “Hi nghena mangwa sachi thsü mvuben nu?”
Anyon nkemuwa na luneng, “Kesansiwa, hi yala pala mu nengya thsülo.”
52Jisu na ma kiza, “Whalo, no kenondi na no sa pi mehai cüdha.”
Tsümeyi ma nyon na pala muya nu ma alen wi Jisu nie wa.
Markert nå:
MARK 10: RENGNBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
