LUK 1
1
Ajühtuwa
1Kediwa Theofilo:
Anyi kejonla mathu piketsü sala ithu jawi mangwa sa khe tsüthu cüki zhü nu kulichidha. 2Mathu na aghatsan wi anyon pi mu nu ketsijüh pi kekhithu na pi ithu kekiza ti zhüchi. 3Tsalina Njenkebenwa, hi tsüthu tsü aghatsan wina mehaitsü sinan kesalina hi nghena tsü aghatsan-ghanu sala zhü chithu mehai benle meshen. 4Isanu pi no sansi cü kesathu cüki tsüdi wi no ya atsentsawa tsü maben chüya thsüle kesalina hi hati saben.
Johan Baptizwa pvügha keten Kekhi
5 #
1 Kc 24.10
Herod na Judea wi kadimi sa keben tsüwi Abijah keqhaikedishi wi keqhaikedi kesü Zekhariya na ben. Ma wubvü Elizabeth la Aaron keqhaikedi shicübvügha nyi kesü. 6Manyi qho Anyiza tuwi hang tsatan nu Apvüwa na ayenkhukechithu tsüdila nie cencu den. 7Isala Elizabeth na nkepvügha ghena manyi tsanga nmi, nu manyi qho qhai wadha.
8Ghanan kesü Zekhariya na atsathangla kekuli ma dulu wi tsü wala Kekinyijjen wi keqhaikedi kekuli tsü saben. 9Keqhaikedi yen kenie wina akezen wwinu Zekhariya na wala kekinyipen wi hankedemvu kemecang-u sa. Tsalina ma Apvüwa Kekinyijjen wi du, 10nu anyitenti na akhemi wi ben nu hankedemvu mecang keben jü wi tsü kekhie saben. 11Ciwi Apvüwa nyilo kesü na gho ma tuwi hankedemvu mecang pi kekinyipen na ajewa nganya. 12Zekhariya na ma mukeya wi qhethiketen nu messiya. 13Isala nyilowa na ma kiza, “Nmessi lalo, Zekhariya! Anyiza na no kekhie tsü zayadha, nu nwubvü Elizabeth na atsa kesü pvüghaya ben na. No ma nyan pi Johan cilo. 14Ma kepvügha wi n-nonkeghe muyaden nu nyu kejonla anonkeghe saben. 15#Scs 6.3 Kepaghenanye ma Apvüwa tu wi kedi nyi kesü saben, isanu ma kisengtssü kekhang jjü nben; isala ma pvüghaya meyi na Kemetha Ghamu pi ma pong pvüben. 16Nu ma Israel nyi kejonla sa pi Apvüwa mathu Nyiza wi gho nengya thsüaben. 17#Mal 4.5-6 Ma atusenjüh-kechüwa Elijah kezü nu kekhang ti Apvüwa tu wi waben. Ma abathu nu atsangathu sa pi ajühkeyali thsü, anyi nyu jüh nkeyathu ssi sengho ketsatan kemeshon len wi chi, nu Apvüwa nyithu sa pi ma ghena kidenya thsüaben.”
18Zekhariya na nyilowa wi keü, “Keujüla tsüti saben lethu, hi khati nu tsü chüya mehai nu? Hi qhai wadha, nu iwubvü la qhai wadha.”
19 #
Dan 8.16; 9.21 Nyilowa na luneng, “Hi Gabriel le! Hi Anyiza tu wi ngan benden, hi ajühkemehaiwa ha pi no kizalo hi kesun chi. 20Isala no hi matsü wina sacen ketenthu jüh kekhi tsü nkenondi ghena pala hathu ha npi kesacen chu no ajühkhiya nben.”
21Tsü tsüwi anyithu na akhemi wi Zekhariya hieben, ma matsü kesiela Kekinyijjen non wi ben wa kesalina mathu amansa. 22Ma shhughola ajühkhi pi mathu ccüneng meyala, tsalina mathu na ma Kekinyijjen non wi kemanthi kesü muyale kesa chüya. Ma ajühkhi meyala kesalina akwen sa pi mathu ccüneng.
23Zekhariya na Kekinyijjen wi ma kekuli sacen nu ma jjen wi wha neng. 24Tsaseng wi ma wubvü Elizabeth na atsa-npvüya nu ma asha manga nyu kuthi. Ma hati khi, 25“Hawa ha Apvüwa na ighena sachi cüdha. Ma hi tizen nu imiwi nyu pangbiwa tsü sen bvüdha.”
Jisu pvüghaketen Kekhi
26Elizabeth na atsa-npvükeya asha tughowa wi Anyiza na nyilowa Gabriel kesun pi Galilee wi anyu kesü Nazareth kesa witsü chi. 27#Mat 1.18 Ma yala ketsijüh kesü pi ghala pvünyi-metha kesü na Kadimi David shicübvügha nyi kesü ma nyan Josef kesa wi tsü n-nuwale ajühcen kethengwa tsü kiza thsüle kesalina. Ghala tsüwa nyan na Maria. 28Nyilowa na wala nzawa wi kiza, “Ae, kaghali kepvüwa! Apvüwa na no ssiden nu sawegü pi no cü ntsa sadha!”
29Isala Maria na nyilowa jüh ha mangwa le khiben nu kesa meshen pi ma qhethiketen nu amansa. 30Nyilowa na ma kiza, “Nmessi lalo! Maria, no Anyiza kaghali pvüyadha na. 31#Mat 1.21 No atsa-npvüya nu atsa kesü pvüghaya ben na ma nyan pi Jisu cilo. 32#2 Sam 7.12,13,16; Isa 9.7 Ma kedi saden, ma pi Kemisintsa Anyiza Tsawa isa ciden. Apvüwa Anyiza na ma pi ma baqhai David ti kadimi kesü sa thsüden, 33nu ma Jakob shicübvüghathu miwi anuphan kadimi saden; ma kadiyyi na ma sakhen sa nben!”
34Isala Maria na nyilowa wi keü, “Hi pvünyimetha kesü na khati nu tsüti saya mehai nu?”
35Nyilowa na luneng, “Kemetha Ghamu na nmiwi ghoben nu Anyiza kekhang na no ghong cüben. Tsalina ntsa tsü pvüghaya lethu, ma pi Kemethawa Anyiza Tsawa le ciden. 36Ha meshenyalo, nshiliwa Elizabeth atsanga nmile khi ketenwa tsüna ma keqhai seng wi atsa-npvüyadha, nu ma tsüti kesa na nansü asha tughowa sadha. 37#Ade 18.14 Kepaghenanye ciwi Anyiza ghena mangla sa nkeya nmi.”
38Maria na khi, “Hi Apvüwa maghalewa, no kekhi tsüti imiwi sa keyawa salo.” Isanu nyilowa na ma teshi nu bvüa.
Maria na Elizabeth Hhainan kewa
39Tsaseng wi Maria na kidenya nu kaghajila Judea diyyiwa wi ayikha wi anyuti kesü wi tsü wa. 40Ma wa Zekhariya jjen wi du nu Elizabeth shalom sachi. 41Elizabeth na Maria ma shalom kesa zaya meyi ma pvü non wi memewa tsüna kuli shagha. Kemetha Ghamu na gho Elizabeth pongya, 42ma jisha nu khi, “No nza jawi kemihhi ntsawa, npvü wi kebenwa memewa tsü yala mehai keyawa salo! 43Hi thowa lenu Apvüwa jja na hi hhainan ghoben nu? 44Kepaghenanye hi no shalom kesa zaya meyi ipvü non wi memewa na ma nonkeghe wina kephenki shagha le! 45Apvüwa jüh kekhi tsüna no wi sacen benle kesa nondikeya ghena no nza kemihhi ntsawa le!”
Maria na Kesengkhwi sa
46Maria na khi:
“Hi kahang tsüdi pi Apvüwa
seng ben;
47nu ighamu na hi Hangshawa Anyiza wi ma nonghe bendha,
48 #
1 Sam 1.11 kepaghenanye ma hi ma amagha kizza ntsawa
ha lela meshenben!
Khili nten na anyi tsüdila hi pi kemihhi
ntsawa le ci tendha,
49kepaghenanye kekhang ntsawa Anyiza na
ighena pala keti kuli chicüdha.
Ma nyan na kemethawa;
50ma nanketizen pi abvüye tsüdi wi
ma kinyikü ketenthu ccüca chidha.
51Ma ma kwen kekhangwa changchi pi kekapvü
nu mathu kemeshen tsüdi sa pi bvüzighedha.
52 #
Job 5.11; 12.19 Ma mathu kadipen wina kadimi kekhangthu zansha,
nu kizzathu pieki cü.
53Ma pala kemehai pi ghama kebenthu ghanja cü,
nu kebanthu kesun pi kemessü bvü thsüdha.
54Ma ithu bamyithu wi khishi ketheng ti
ghola ma magha Israel kiqa cüdha.
55 #
Ade 17.7
#1 Sam 2.1-10 Ma anuphan la Abraham nu ma shicübvüghathu
tsüdi nanketizen tsü meshen benden.!”
56Maria na asha kecheng cen Elizabeth gweghe benla nu ajjen wi wha neng.
Johan Baptizwa Kepvügha
57Elizabeth na kepvügha tsü cuya nu ma atsa kesü pvüghaya. 58Ma jenphonthu nu ma shilithu na Apvüwa na ma nantizenchi kecü tsü zaya nu mathu tsüdi gweghe anonghe ntsa sa.
59 #
Lev 12.3
Tazen ghanan wi mathu na atsawa hyuhan le gho nu mathu na ma nyan pi ma ba Zekhariya nyan tsü ci mvu sa. 60Isala ma jja na khi, “Nyele, ma nyan pi Johan ciden.”
61Mathu na ma wi kiza, “Isala nshili kesütanla pi tsü nyan nci le.”
62Tsaseng wi mathu na akwen sa pi ma ba ccüneng nu atsawa nyan pi thowa ci mvuben khe keü chi.
63Zekhariya na kezhüji kesü khieya nu tsü miwi “Ma nyan na Johan” tsüti zhüchi. Mathu tsüdila amansa. 64Tsümeyi Zekhariya na ajühkhi nengya nu ma Anyiza seng shagha. 65Ajenphonthu tsüdila messi nu hathu cüki ha Judea diyyiwa yikha tsüdi wi la khi wa. 66Ha za keyathu tsüdila mathu leben wi “Atsa hawa ha khati sa shagha ten nu?” isa. Kepaghenanye Apvüwa kekhang na ma ssi tsentsa saden.
Zekhariya Na Atusenjüh-kekhi
67Johan ba Zekhariya na Kemetha Ghamu pi ma pong pvünu atusenjüh- khi kechi:
68“Israel Nyiza Apvüwa senglo!
Kepaghenanye ma gho ma nyithu kiqa
nu lishachi cüdha.
69Ma ma maghawa David shicübvügha wina
ithu ghena Hangshawa kesü pieki cüdha.
70Ma kheni atusenjüh-kechü kemethathu wina
71ma ithu ghinyithu nu nankemeghüthu kwen wina
ithu hangshaya benle khishi chitheng.
72Ma ithu bamyithu nantizenchi,
nu ma kemetha Cenkethenjühwa tsü meshen benden khi.
73-74Ma ithu baqhai Abraham wi kishen,
ma ithu ghinyithu kwen wina ithu kekashaya,
nu ithu yala kemessi nmila ma kekuli
sa thsüben kesa khishi chitheng,
75isanu ithu kahang chula ma tu wi metha
nu tsatan benya thsüle kesalina.”
76 #
Mal 3.1 “No, itsa, no pi Kemisintsa Anyiza wi
atusenjüh-kechüwa ciden.
Kepaghenanye no Apvüwa tuwi na wala
ma ghena alen saden,
77ma nyithu kiza nu mathu yala hangshakeya
nu kesami teshi kecü muya thsüle kesalina.
78Ithu Nyiza na nantizenden,
Ma hangshakeya kewegü ya ithu miwi na shhugho thsü,
79 #
Isa 9.2
nu tang wina keshü kejang wi
hang ketenthu tsüdi miwi wegü,
nu ithu lentsütson pi kecca len wi chi cüben.”
80Atsawa tsüna qhai shagha nu asajjü nu aghamu len wi zü kayi. Ma Israel nyithu tu wi kekuli sa keshhugho tsathang npi kecu chu ayyikeshü wi hang.
Markert nå:
LUK 1: RENGNBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.
