Mateyo 14
14
Yohana mubatizi akoṅwa.
1-12.
1Mishi ija zumbe Helode azaiva kilango cha Yesu. 2Azawaγamba wabwanga wakwe: Uyo ni Yohana Mubatizi, atefufuka kwa wafilewo, ne vyeleka, izo nguvu zikidaha kuγosholwa ndiye. 3Hambu Helode aamgwila Yohana, aamgela mwe chumba kwa mbuli ya Helodiya, mkaza nduγuye Filipo. 4Hambu Yohana azamγamba: Vina ṅwiko ukimγuwa. 5Ne akundileho kumkoma, miya azaogoha wantu, hambu wazafanyanya kuti: Ni mteγanyingwa. 6Mushi wa nyemi ya kuvyalwa kwa Helode, ṅwana ywa kindele ywa Helodiya azasanganya muja nyumbai, azamtamila Helode; 7ne ahomwikila msuhi na kukilisha, kangwe amunke, ndivyo alombeze. 8Kwa viya, aandiilevyo kukundilwa ni nine, azaγamba: Ninka mwe bakuli ivi lushe aha mutwi wa Yohana Mubatizi! 9Zumbe azaihilwa, miya kwa mbuli ya ija mikilishize na kwa mbuli ya waγeni, awoja nyemi nawo, azalaγiliza, akauinkwe; azatuma muntu, 10akamshenge Yohana mutwi umo mwe chumba. 11Mutwi wakwe uzaletiγwa mwe bakuli, kaja kandele kazauinkwa, kazauiγala kwa nine. 12Wahina wakwe wazaiza, wazaγuwa kimba chakwe, wazachizika; wakibinda wazahita kwa Yesu, wazavimwukwila.
Yesu aiγusha wantu 5000.
13-21.
13Yesu akiviiva, azahauka, azahita na chombo kuntu kwe ike ṅwenye; miya wantu wakiviiva, wazamtongela, wazaγenda na milundi, wakilawa 14mwe mizi yawe. Yesu akilawila azaona, kuti wantu ni wangi, azabulwa ni utungu nawo, azahonya wanyonge wawe. 15Kukishwa wahina wazamwizila angwe: Kuntu kunu ku ike, kangi zuwa jizashwa, shungula wantungwa, wahite kwe mizi, wakakiγulile nkande! 16Angwe ni Yesu: Washindahita wai? Wainkei inywi vyaja! 17Angwe ndiwo: Nkatina nkande, ni migate mishano du na fi mbili. 18Angwe: Viletei na kunu kwangu! 19Azalaγiliza, wantu watandikane mwe lwondo ndala ndala, vikibinda azaγuwa ija migate mishano na ziya fi mbili, azaolela na kwe lwingu akilavya ntogolo, azabendulabendula ija migate, azaiinkila kwa wahina, waja wahina wazaiinkila kwa wantu. 20Woshe wazaja, wazaiγuta; mpuγutishi zishiγalezo wazazidodola zizamema ngahu kumi na mbili. 21Waja wajilewo waγoshi du wazaγelemuka makulija mashano kushima wavyele na wana.
Yesu aγenda mwe bahali ulanga
22-36.
22Wakibinda kuja azakundila wahina wakwe kufikaingila mwe chombo, wavemlongwela na uko sheja, mpaka ashungule waja wantu. 23Akibinda kuwashungula waja wantu azakwela mwe mulima ṅwenye ike, kangwe avike. Lwiza lukigwa, a γuko ike. 24Chiya chombo chiibindile kuuka haja na kuhita ntampo nde, miya chizapishiγwa ni maimbi, hambu mpeho izalawa kuja, wakohita nako. 25Vikibuza luγojo lwa ne lwa kilo, azaiza na kuja, waiiko, akiγenda mwe bahali ulanga. 26Wahina wakwe wakimwona, avyoγenda inwe bahali ulanga, wazashentukisha, wazaγamba: Ni mzimu, wazakema kwa woγa. 27Yesu azafikawalonga angwe: Toγwai ni myoyo! Ni miyo; msheogohe! 28Petelo azahitula angwe: Zumbe ati ni weyo nilaγiliza, niize na uko, uliko, na kuγenda mwe mazi ulanga! 29Angwe: Iza! Petelo azasheela mwe chombo, azaγenda mwe mazi ulanga, azahita kwa Yesu. 30Miya akiolela mpeho azaingilwa ni woγa, azaandiila kunywilimila, azakema angwe: Zumbe, nivunila! 31Yesu azafikakusula mkono wakwe, azamtoza angwe: Nini ukishetozesha vyedi? Nini ukikalakasha? 32Wakiingila mwe chombo, mpeho izatongomala. 33Miya waja we mwe chombo wazamkinila angwe: Kweli u ṅwana Mulungu.
34Wazaomboka na sheja, wazatimila shi ya Genezaleti. 35Waγoshi wa ija shi wakimtaila wazatuma koshe koshe kwe shi ze hehi, ne wahomletela woshe wena mili, 36wazamhembeleza, wadowe du lusiniko lwa nkazu yakwe; woshe wamdowilewo wazahona.
Markert nå:
Mateyo 14: KISHNT05
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
New Testament in Kishambala © Bible Society of Tanzania, 2005.
