Mateyo 13

Shimo. 7.

Lushimo lwa mhasi.

1-23.

1Mushi uja Yesu azalawa mwe ija nyumba, azahita kwa ikala nkandai he bahali. 2Mabumba mangi ya wantu yazaunganana haja, aliho; ne vyeleka, akiingila mwe chombo, aikale mumo, miya wantu woshe wazaγoloka nkandankanda ya bahali. 3Azawalonga mbuli nyingi kishimo, azawaγamba: Kuna mhasi, azalawa kwa myaγa mbeyu. 4Akimyaγa mbeyu, kuṅwe zizagwa silai, videγe vizaiza, vizazija. 5Kuṅwe zizagwa he mawe hashinaho shanga nyingi, zizafaalika nguzu kwa kushowa shanga yeingila na ndai; 6miya zuwa jikiandiila kuaka, zizanyuluka, zizakalaγala, kwa kuti nkazina sindo. 7Kuṅwe zizagwa he miwa; miwa izakwela, izazifuwa. 8Kuṅwe zizagwa mwe shanga ntana, zizavyala, kuṅwe gana, kuṅwe milongo mtandatu, kuṅwe milongo mitatu. 9Mwena mashikilo yeiva neaive!

Vyeleka Yesu akilonga kishimo.

10Wahina wazamwizila, wazamuli: Nini ukiwalonga kishimo? 11Yuja azawalanduia angwe: Inywi mzafilwa mbazi, mtaile vihili vya uzumbe wa lwingu, miya waja nkawafilwe mbazi ivyoho. 12Hambu mwena kitende atainkwa vivyoho, aisiize kuγenyeza; miya ashinaye, hata viya, avyona navyo, atavihokwa. 13Ne vyeleka, waja nikiwalonga kishimo, hambu waiene kangi nkawaona, waiivile kangi nkawaiva, nkawataila. 14Ne uvyowabontokela uteγanyi wa Yesaya, uja wa kuγamba: Kuiva nezemwive vivyoho, miya nkezemuvifumbule! Kuolela nezemwolele vivyoho, miya nkezemuvitaile. 15Hambu myoyo ya inu mbali ni mibada, mashikilo yawe yana ntoγo za kuiva, mesho yawe waiyasisize, kangwe washezaona na mesho yawe, kangwe washezaiva na mashikilo yawe, washezataila mwe myoyo yawe wakihituka na kwangu, nikiwahonya. 16Miya mesho yenyu yana nyemi, kuti yaona, hata mashikilo yenyu, kuti yaiva. 17Kweli namiti: Wateγanyi na watanda wangi wazakundisha kuona viya, muvyoona, miya nkawaviene, hata kuiva viya, muvyoiva, miya nkawaviivile.

Bontokelo ja lushimo lwa mhasi.

18Lushe inywi ivai luja lushimo lwa yuja mhasi: 19Kila muntu akiiva mbuli ya Mulungu, akisheitaila, yuja mubada aiza, amhoka viya vimyaγiγwevyo mwe moyo wakwe. 20Ne mbeyu zimyaγiγwezo silai. Ziya zimyaγiγwezo he mawe ni waja weiva mbulingwa na kufikaihokela na nyemi; 21miya nkawana sindo mwe myoyo yawe, watozesha mishi miγeke, miya wakiona ukiwa ao nkondo kwa iyo mbuli wafikaihilwa. 22Ziya zimyaγiγwezo he miwa ni waja weiva mbulingwa, miya sungu za inu shi na lwufyo lwa mali ziyafuwa mbulingwa, ishevyale. 23Ziya zimyaγiγwezo mwe shanga ntana ni waja weiva mbulingwa na kuitaila, ne wevyaia kuṅwe gana, kuṅwe milongo mtandatu, kuṅwe milongo mitatu.

Lushimo lwa ngano zegelwa mbeyu za fovo.

24Azawazisa lushimo lutuhu angwe: Uzumbe wa lwingu wafanana na muntu mwehanda mbevu ntana mwe lubuwa lwakwe. 25Miya wantu wakisisila, kuzaiza munkulu ywakwe, azamyaγa mbeyu za fovo kwe ngano gati, akibinda azahita. 26Nkande zikikula, zikivyala, hata ziya fovo zizaoneka. 27Wapuna wa yuja zumbe wazamwizila, wazamuti: Zumbe, nkuhandile mbeyu ntana mwe lubuwa lwako? Lushe ziya fovo zianduka na hi? 28Azawati: Ni munkulu aviγosholeye. Waja wapuna wazamuti: Wakunda, tihite, tiṅofule na kuunganyanya fovo? 29Azawati: Do, kangwe mkiunganyanya fovo mshezaṅofula ngano haṅwe nazo. 30Lekai, vikuzanye haṅwe, mpaka ngano zikizashengwa! Mishi ija ya kushenga ngano nenilonge waja weshenga: Bosi unganyanyai ziya fovo, muzikante makisa, zikaokwe, miya ziya ngano muziiγale he ikilo jangu ja nkande!

Lushimo lwa mvumo.

31-32.

31Azawazisa lushimo lutuhu angwe: Uzumbe wa lwingu wafanana na kahuluzi ka ntunda ya mvumo, muntu akikaγuwa azakahanda mwe lubuwa lwakwe. 32Ni kahuluzi kadodo kuzinka mbeyu zoshe, miya kakikula kavota miti yoshe yehandwa, kaγaluka muti mgima, hata madeγe yeanga ulanga yaiza, yazenga mwe matambi yakwe.

Lushimo lwa shimbi.

33Azawaγambila lushimo lutuhu angwe: Uzumbe wa lwingu wafanana na shimbi, mvyele akijiγuwa, azajigela, ati ni mwe ngahu ntatu za mushu wa ngano, kangi uja mushu woshe wajikolela.

34Izi mbuli zoshe Yesu azazilonga waja wantu kishimo; 35nkakuna mbuli, awalongileyo kishilushimo, kangwe vibontoke viya vilongiγwevyo ni mteγanyingwa kuγamba: Neniinule kanwa changu, nilonge kishimo, nenilavilize viya vifishiγwevyo, vivyo inu shi yatulwavyo.

Bontokelo ja lushimo lwa ngano.

36Ne ahoshungula waja wantu, vikibinda azahita na kaya. Wahina wakwe wazamwizila, angwe: Tibontwele luja lushimo lwa fovo ihandiγweyo mwe lubuwa! 37Azawaitikila angwe: Yuja mwehanda mbeyu ntana ni ṅwanangwa ywa muntu. 38Lubuwa ni ngulu ngima; ija mbeyu ntana ni wenye uzumbengwa, ziya fovo ni wana wa yuja mubada. 39Yuja munkulu mwezihanda ni yuja ṅwenye leba; mishi ya kushenga ngano ni bindilizo ja inu shi, waja weshenga ni walau. 40Sa viyaho fovo zivyounganyanyiγwa, zikaokwe na moto, ne ndivyo mbuli iγende, inu shi ihozabindilizikila. 41Ṅwanangwa ywa muntu atatuma walau wakwe, watalavya mwe uzumbe wakwe na kuwaunganyanya woshe wena lwihizo, 42waγosholewo vishiγosholwavyo, wawashindike na mwe ziko jeaka moto, ne kwena kulila na kukemeza meno. 43Ne ndiho watanda waake mwe uzumbe wa ishe ywawe, viya ni zuwa. Mwena mashikilo yeiva neaive!

Lushimo lwa mali ifishiγweyo.

44Uzumbe wa lwingu wafanana na feza zifishiγwezo mwe lubuwa; muntu akiziona atahita na nyemi, ataγe vyoshe, avyona navyo, aγule luja lubuwa.

Lushimo lwa kalata.

45Vituhu uzumbe wa lwingu wafanana na mchuluzi mwelonda makalata matana. 46Akiona kalata iṅwe jena kima kikulu, atahita, ataγe vyakwe vyoshe, avyona navyo, ajiγule.

Lushimo lwa lwavu.

47Vituhu uzumbe wa lwingu wafanana na lwavu; lukigelwa mwe bahali lwagwila nyama za kila mbali. 48Lukimema, wantu waluiγala na mpwai, waikala, washaγwila ziya ntana na mwe viγa, miya ziya mbada wataziasha. 49Ne ndivyo mbuli iγende, inu shi ihozabindilizikila. Walau watalawa, waahule wabada na watanda, washindike wabada na mwe ziko jeaka moto; 50ne kwena kulila na kukemeza meno.

51Mzaiva izi mbuli zoshe? Wazamwitikila: Ehe. 52Azawati: Kwa ivyoho kila mtabaluwangwa mwefuziγwa uzumbe wa lwingu afanana na mγoshi ywa chengo mwekalavya mwe kitende chakwe vihya na vishakazu.

Yesu abelwa Nazaleti.

53-58.

53Yesu akibinda kulonga izi shimo azahauka. 54Azahita na kuja, akulileko, azafuza mwe vikilo jawe, woshe wazashentuka angwe: Ivi viyuγo na izi nguvu zakwe zianduka na hi? 55Uyu so ṅwana fundi? Nine nkaitangwa Maliya? Wanduγuze so Yakobo na Yose na Simoni na Yuda? 56Hata walumbuze woshe nkatina nawo? Lushe uyu ivi vyoshe vimwandukila hi? 57Wazaihilwa ndiye. Yesu azawati: Mteγanyingwa nkabelwa kutuhu, kushima kaya kwakwe na nyumbai mwakwe. 58Uko nkaγoshole vilozo vingi kwa mbuli ya kushetozesha kwawe.

Markert nå:

Mateyo 13: KISHNT05

Marker

Del

Kopier