LUK 15
15
Amang Kelmo
(Mit. 18:12-14)
1Nahani akha ah khasana hrai ngei lea, phaija ta ngei na Jisu rou ngei ranga phao. 2Pharisis ngei lea roukung ocha ngeina lung ollang thou so. “Na spa hina manijong phaija ta ngei ta riem ma ok chak no wa bakkom bakha ae!” 3Chuna pa chu Jisu na manita panteem hi pe.
4“Ejonga kelmo riha sunga akha na mang juija amo na alota ae sa? Amo na shachik ahra am na amunt na somku-ku ta shi phur weta amang kelmo ha matuk malim ma jonga rolleh. 5Amona matukjuija ariemma maling chumma shi weta. 6Ma inn na lea ah ruija hange chuna amona atonpi ngei akha inn ning tungtieng eja ta kokka bomtalpi ah manita ril, ‘Keina leima ariem minge roulamchu amangsha kelmo ha tuk singe chuna reen amange!’ 7Na chu hekta keina ril inge som-ku-aku malmashi ngei lung lhong darkar am no hal pakchel akhana lung lhong jui wanram ah eya ah riem mang meh.
Amang Rupa Makhai Asom
8“Anoleh ejonga nameinu akha na rupa makhai asom sunga akha mangjuija namei nu na alo ta ae sha? Nameinu na sermei warpi weta ma inn sunga eheilim pa hrabakta amona atuk ma lim ma jonge. 9Nameinu na matukjuija amona atonpi inn-ning kolla am eja ta bom tul pi weta manita ril, ‘Keina leima ariem singe roulam chu kasum amang paisa ha tuksinge chuna ani lim na riem ha ei oh!’ 10Hihekta munt ha ah, keina nangeita rilla aminge Chungthieng wanrui ngei na pakchel akha na shilung hlongjuija leima ariem mange.”
Amang Sanaopa
11Jisu na hata rilla am mah, “Apha akha ah spa akha hina sanao ani am meh. 12Naopongpa na makolla ril, ‘Apa oh kachangphung shuk makhai ha atun keita pejo,’ chunapa chu spa hana asanao rel anita ajai hui weta sam so. 13Apha atan te waitakka chu asanao naopongpa na masaruk makhai hi jurveta apha sum ha choiveta inn houphurra thingso. Amo na aram alah amunt akha ah masum makhai ha ariem salla lokchokta ringthing so. 14Amona ma am makhai limpa thangsu takka hana ram ma ati pi makhai butang jutang akha shukso. Hana chu makolla ephao am ni jo ve. 15Chunapa chu amo na naram sunga am mee akha kolla thing weta napa Innkul sunga wok selranga hata hlaso. 16Amona awon taranga mahal juija vok bakna rak phao baknum pokkae chuti phao sunga atu akha na amota bakrang inn rang pe mee am no ae. 17Achana ah chu amona hita halpha ah ril, ‘Kapa kor ngei lim na phao hita hella bakka am meh hina keina wanram ma waipha tukka am minga! 18Keina thou wa thing ing weta kapa ta hita rillange, keina apa nakolla akha chu Chungthieng kolla pak tullu lu sange. 19Kei hi nasanao ae ta kokka matik cha ni ange keita kom nasuuk ngei akha hekta hallo.’ 20Chuna pa chu amona ngir thou weta mapa am na ah lea rang thou so.
“Inn hai thou wa mapa na amo aram alah hai thou wa ri so; malungsunga leima ringrei ngei ah mapa na tanna waveta aban tieng shukka asanaopa ta abeng chuppa kol so. 21Asanao pana ril, ‘Apa’, ‘keina Chungthieng akha chu apa nakolla pak tullu lu sange kei hi nasanao akha ae ta kok matik cha ni ange.’ 22Chuti weta mapa na chu akor ngei ta harra kokka ril! ‘Hra tekti pun akha machunga sengpi oh, makutta kom kutjabik akha chu akae ah hanghup happi oh. 23Hana anal shilsanao jonga thatto hana ani na ariem ma reen ae weta bakha inn ha ange! 24Roulamchu athi sa kasanaopa ha awoni chu amoha ring thou so; Amo ha amangsa so ae chuti weta awomni chu keina tuksinge.’ Hanapa chu manina bakka riem thou so.
25“Hana lei apha sunga masanaopa ulientekpa chu loupokka am songe Inn tienga lampi ah maleh juija inn neija mawok juija hung rasam tolla lamma nuija am tara theiso. 26Chunapa chu amo na kor akha kokveta makolla sai, ‘Eje hlakka am ma meh?’ 27Kor hana sangso, ‘Nanaopa ha lea so ae inn na ephao aol ana am no wa chuna sarukka napa na ariem hie sulla anol silsanao akha that ta ae.’
28Mata pa na hana sarukka alung leima sha ah inn na luttang nonge; hanapa chu mapana shukka inn na lut rang hlem so. 29Mapa ta amo na ril, ‘Anno, kum chuppa keina kor hekta tullu lu ah aminge keina naril natrong juino ti kom am nonge, nangna keita echu pe jou che? Katonpi ngei hitta kabakha rang kel akha te phao pe no che! 30Chuti weta nasanao pa na nanei nadon limpa ariem salla vokno namei ngei hitta hou thinga inn na maleh juija nang na anol kel mataranga that pi ae!’ 31Mapa na sange, ‘Kasanao, nang chu apha chang honna kei hitta am ha ae hana eheilimpa hi nataranga chakkae. 32Chuna ani na riemma reen ae anga sa ae roulam chu nanao ha athi sa ha awoni chu amohi ringso ae; Amo hi mangphur halkom atun chu tuksinge.’ ”
Markert nå:
LUK 15: CHOTBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
