LUK 11
11
Aniek Rang Jisu Chupi
(Mit. 6:9-13; 7:7-11)
1Nahani akha ah Jisu na amunt akha ah aniek ma su juija, Marui akha na makolla ril, “Arengpu, kanita aniek rang chupi oh, Johan na arui ngei ta chupi hekta.”
2Jisu na manita ril, “Nangei na niek juija, hita rillo:
Pathieng: naming athieng changshu oh
na rengram jung shu oh.
3Nahani ah kani bakrang pe pi oh,
4kani pak kom silpi oh.
Rouram chu kani na kom kanita alal ae ngeita
ngakpi hekta. Akha chu kani ta ahlem na nea no ranga.”
5Hana Jisu na arui ngei ta ril. Ejonga nangei karra akha na natronpi inn na janjaija thing weta makolla rillo. Tronpi oh budol ennthum te pu hak tikkae ta. 6Katronpi akha ka inn na ramhai thou wa tunga mabak rang ephao am no wa am singe! 7Chuna ejonga natronpi na hita sanga inn sunga thou, keita jet no oh, inn har kom kal sange hana kasanao ngei lea kei kot chunga am singe kei na thou weta ephao pe nea ang ni jange nangta. 8Keina nangei kolla rillinge amo ha matronpi mak halkom thou weta pe num no ae. Chuti halkom amona lea ah, lea ah, ajak am no ah maniek rouram sarukka amo na thou weta atron pi hana ahop na pe pi ae.
9“Chuna, nangei kolla keina rillinge sai ta lea chu nangna pha ang che; jong ta lea chu nangna tukkang che; rai oh, chu lea chu natarang hongpi ange innkal. 10Rouram chu aniek meelim na pha ae hana atujong jong meelim na tukpha ae, hana innkal rai meelim taranga hongpi ae. 11Nangei karra atu mapa na asanao na tuiriek niek juija arul pe mee am ma meh? 12Ano lea artui niek jui ja eimehnu pe mee am meh? 13Hrano nangei ha nasanao ta ahra pekrang dang ta lou chu thangwan na pathieng na chu nangei ta eja ah lella muihla athieng aniek meelim ta pe ang meh!”
Jisu Lea Beelzebul
(Mit. 12:22-30; Mak. 3:20-27)
14Jisu na atrong shukpi no wa dijabol na shi spa akha kolla dijabol ta julla mahou sanu takka spa ha atrong shuk thou ah, meelim na angak shuk so. 15Chuti weta malmashi ahre na chu ril, “Na hi Beelzebul, dijabol ngei rengpa ae, amo na majaitha pe ah julla hla nea ah ae.”
16Adang ngei na Jisu ta chang an num ma mani na Jisu ta anealah tullu kani ta nangna ri pi oh Chungthiengna angei ae ta dang rang. 17Chuti weta Jisu na mani halla am dangpha ah amona manita ril. Ram akha hi mani mashel sunga sulla adang adanga ta hlak lea chu sat tang no ae. Hana chakno wa inn sunga mani mashel ngai hlakno lea adang adanga ta ange. 18Chuna ejonga saitan ngei rengram abom, abom manimashel sulhlak lea chu eja shotta am mang? Dijabol kajulla kahla hi Beelzebul na keita pek jaitha ae ta nanei rilha. 19Ejonga na hi ah mah aleh chu keina alo ta manita julla hla hou nea ang? Alota nangei nuju ngei na manita julla hla nea ang? Nanutieng jui mee ngei na nang hi ralla am meh ti dangpi ange! 20Nahi ano ae, Chungthieng hina jaitha ah keina dijabol ta julla hla inge chuna hina chu Chungthieng rengram hi nangei kolla tung so ae.
21“Arat athei spa akha na cham shai akha chu chai alem su wa ma inn hakka am lea chu mapot machai lim pa am ang no ae. 22Chuti weta amota hella rattek ti spa akha na machunga mane juija chu amona mapot machet akha chu machamp masei limpa amona choija thing weta samso.
23“Atujong amoha kamee no lea amo chu keita ngarchang mee ae; atujong akha na kei hita hom ha no mee amo chu routakka adang, adang ta ange.
Hrano Muihla Lea Na
(Mit. 12:43-45)
24“Hrano muihla na mee kol hai thou wa shukka thing juija amo na masol hak ranga ram kang ram munt junga nathingjui, ramunt matuk no juija amona mathei chakka hita ril, ‘Keina shukka kathingna inn lea ang singe.’ 25Chuna hita ma lea juija amona shukka mathing na inn ha leima hra ah thieng am so ae. 26Hana amona shukka thing weta amo na hella hrano muihla sari ruija phao weta mani na hana am so. Chunapa chu mani na ripta nejuija chu athou leija mahratno ta lella hrano tek so.
Adiek Riem Na
27Jisu na rou hi rilla am lei ah wairul riha kar sunga namei nu akha na Jisu kolla ril, “Nangta don nu akha chu nutang thun na hang namei nu ha eja ah jarhra mo mu!”
28Chuti weta Jisu na sange, “Chungthieng rou ngei weta aril jui ngei hana eja ah jaihra tek kae!”
Anealah Ae Ranga Rou Pea
(Mit. 12:38-42)
29Jisu ta wairul riha na ahul tunga am ma amo na hita channowa ril, “Eja ah hrano meerol ngei sa atun rija mee ngei hi! manina angakpi tullu hachak sai ah am meh, Jonah kolla pek chak ano wa atu akha kolla pe ang niejo weh. 30Rouphupa Jonah kolla anelah hi kom Nineve malmashi ngei taranga ae chu hekta atun rija malmashi ngei taranga meesanaopa hina anealah changpi so ae. 31Chuna routreem rungnie ah chu natak tienga rengnu Sheba na ngir thou weta atun rija malmashi ngei ta neinunt pe ange. Rouram chu amo na simlei su-wa rolla araeng Solomon lungsing lungwan ngei tikkaeta phao wa chuna nangei kolla keina karil num chu Solomon ta loktek akha am ae tiha. 32Routreem rungnie ah chu Ninewa mee ngeina ngir thou weta nangei ta neinunt non nange, rouram chu mani na Jonah rousui juija mani pak heithou alung hlonge; chuna kei na adiek rou rillinge Jonah ta ahre chak halkom loktek akha hina am meh!
Pum Ma Awar
(Mit. 5:15; 6:22-23)
33“Atu akha na awar dewankari ka thuppa shi no ae, hana tai ah burra kom shino ae hata mashi ang sarukka dewankari shi na chunga shi ae. Chuta lea chu inn sunga lut mee lim na awar ri pha nea ange. 34Namit ha chu napum ma dewankari ae. Chuna namit na leima hrat lei lim chu napum limpa kom war ra am mange chuti weta namit na hrano wa ri no jui ja chu napum limpa thimma chak am mange. 35Chuna sarukka nakolla am awar ha thimjou meh ta hrabakka an no. 36Ejonga napum limpana war huppa am juija akha chu athim ahui te phao am tol no juija chu awar na shi hak ti ange chuna diwankari na nakolla mawar war pi jui ja war hek ta nang kom war ange.”
Jisuna Pharisis Akha Chu Roukung Ocha Ngeita Neinount Pek Na
(Mit. 23:1-36; Mak. 12:38-40)
37Jisu na rou rilsu natienga Pharisis na amo hita bakha ranga kokka Jisu na lut ve ta bak ranga ong so. 38Jisu na kut sil no wa bu bak juija Pharisis na angak shukso. 39Chuna pa chu Jisu na makolla ril. “Anno, Pharisis nangeina chu tuidon akha chu buhu hi awou wa chak sil chau ae chuti weta asunga chu hra no na shi hak ti chao ae. 40Lungmo oh! Chungthieng na awou sakleija asunga kom sa no meh? 41Chuna nakolla am mahai ha sarra ring ngei ta ripta pejo chuleh chu nakolla eheilimpa ha athieng chang ange.
42“Oh, Pharisis nangei tarang eja ah ati pi meh! nangei na Chungthieng kolla som ma akha chu adiek nathingparsa pe weta Chungthieng hina lungshit akha chu adiek hata na thadol chau ae.
43“Eja ah ati pi meh Pharisis ngei oh! Synagogue sunga chu lokka angna halla shi ah akha chu malmashi bomtul na karra chu nangei ta ajak ati pe pinum ma. 44Eja ah ati pi meh! nangei chu amel dang lou hlan bong ngei hek ti ae akha chu hana chunga ephao dangno wa rolla am ngei hekti ange.”
45Roukung ocha ngei karrak sunga akha na Jisu kolla ril, “Ocha, narilla am rou hi kani ta kom nuiso che ae!”
46Hana Jisu na sang. “Eja ah ati pi meh roukung ocha nangei kom! nangei na malmashi ngei ta ron na arit pot ronpi ah nangei na chu nangei kutchal te phou dokka shukka mani rot arit pot san num no chao mani ta. 47Eja ah ati pi meh nangei hi! Roulam chu nangeina Chungthieng rouphu ngei taranga hlan hur chao ae napanapu ngei na manita that phur ae. 48Ngei na rilsuk so ae, hana nangei pipu ngei na ae phur tullu ha. Manina rouphu ngeita that weta nangai na hlan saem chao ae. 49Hina rou sarukka Chungthieng lungwar na rilleh, ‘Kei na rouphu ngei akha chu rou ron eje hla inge, chuti weta manina mani ahre ta that ta ahre tana aol ana pe ae.’ 50Chuna sarukka atun rija mee ngei ta aol ana pe ange roulam chu mani na rouphu ngei ta that te simlei shak hai thou wa. 51Abel ta that hai thou wa Zekariah ta athieng amunt lea maicham karrakka that ta. Chuna keina nangei kolla ril inge, atun rija mee ngei limpa ta aol ana pe ange!
52“Roukung ocha na ngei tarang eja ah ati pe meh! Roulam chu nangeina thimwar inn na lut rang innkal aikilh shi ah, nangei na kom lut no, lut tikkae ti mee taranga ko ngei na lut pi no!”
53Jisu na amunt ha houphurra mathing sanutienga Roukung ocha ngei lea Pharisis ngei na trong jet hlakka leima kha ah leima tam rou sai hlakka thou so. 54Manina ejongpa akha lalla maril juija changa mant ranga mani na amota hakka am so.
Markert nå:
LUK 11: CHOTBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
