LUK 10
10
Spa Somsari Anie Ta Jisu Na Hla Na
1Hina nutienga Jisu na spa somsari anieta halla mathing ang na amunt hulok lim ma manita anie, anie hlaso. 2Manita amo na ril, “Sang pottang leima tam am meh, chuti weta sangpottang mee chu am no ae, chuna sangpottang mitpu kolla ratta nie oh, chu lea chu amona sangpotpang mee ha hla ange. 3Thingo! Keina nangei ta kelmo nao ram mui ngei karra hla hekta hla singe. 4Nangei thingjuija selhou kom choi no oh, hana hou kom choi no oh, kekok kom choi no; hana lampi ah kom atu akha kolla mokthingno oh. 5Nangei na atu halkom atuhalkam inn sunga lut juija makolla hita rillo, ‘nangei inn sunga adai ti chang shu oh.’ 6Ejonga adai di mee lea hata nangkom mani inn sunga am mo; chuna makolla kom adai hana hata am shu oh ejonga anoleh adai napekha lah nole lah siro. 7Mani inn sunga hata am weta nataranga bakko enno ta pe lim ha bakko enno. Rouramchu tullu lu mee na matullu nujuija phaphung shuk pha shu oh. Chuna natrung na inn ha helnga rol no oh. 8Apha chang honna nangei lutna hulokka nangei ta ariemma hakka am na ah nangei matieng bakrang enn ran donna pekha hata bakko. 9Rai eya takom dampi hrapi oh, hana malmashi ngei kolla hita rillo, ‘Chungthieng reng ram nangei tarang leima nei ah jungso ae.’ 10Chuna nangei thingna Apha changhonna hulokka lut juiya nangei ta ariem ma lamtuk lea no shukka thing jou weta Lampi hita rillo. 11‘Nangei huloka kani kae pha ah kuppa am vokphu! Na chinga tenga hou unge. Chuti weta nangei makkang no chu Chungthieng reng ram ha nangei kolla neiya am so ae!’ 12Keina nangei kolla adiek rou rillinge ha chu Chungthieng rungnie ah routreem ae jui ya nangei hulok ta chu Sodom ta hella Chungtheingna ringrei ngei tekkange!
Ngoiring Am Lao Hulok
(Mit. 11:20-24)
13“Oh, Gorasin nataranga eya ah ati pi meh he Bethsaida eya ah aol ana napha ang mo nu rouram chu nangei kolla anealah tullu ha Tyre lea Sidon kolla ae phur lea manina bora rui thalveta paiya akha chu vokphul bolla shilung hlong ange. 14Chungthieng routreem rungnie ah Tyre lea Sidon hu ngei ta hella ringrei ngei tek kange. 15Kapharnahum! Nangna chu thangwan phao wa nathei chakka kal num ma che? Nangta chu sharmei-kum sunga denga hou ange!”
16Jisu na arui ngei ta ril, “Atu jongna nangei rou jui mee ha karou jui ah ae; atujongna nangeita ngeinum noleh keita ngeinum no ah ae; atujong na keita ngeinum no lea keita hla mee amota ngei num no ah ae.”
Spa Somsari Anie Lea Na
17Spa somsari anie na ehekta ariemma lea ah mani naril, “Arengpu,” “Naminga kanina rouril juiya diyabol na phao aril jui ah thinge!”
18Jisu na ril, “Saitan thangwan hai thou wa hucham plak hekta tulla jung ri inge. 19Ngai oh! Keina nangei kolla kane jaitha pe singe nangei na arul ngei akha chu eimehnu chunga thingne rang, chuna nangei ta anda ngei ta nea ranga akha chu mani na nangei ta ephao ae nea ang no ae. 20Chuti weta hrano muihla na nangei ta atiya nangei ril jui sa rukka leima ariem no oh, hata hella nangei ariem rang chu nangei ming wanram ma jiekka shi na riem tekko.”
Jisu Na Ariem Na
(Mit. 11:25-27; 13:16-17)
21Hana lei apha ah Jisu hi muihla athiengna shihakta riemma am ma ril, “Pathieng, simlei akha chu wanchunga Arengpu! Keina nangta dom minge rouram chu nangna adang athei asing ngei kolla thuppa siveta unga ngei ta natakpi hina taranga. Pathieng hi sa nahal nadit.
22“Ka Pathiengna pot chei limpa hi keita peksa ae atu akha na dang no ae atu mo meesanaopa kapa ah no wa chu. Akha na atu na mapa athieng moti ha meesanaopa ano wa hana masanao pana atu jong akha kolla mahal nujuija rilshuk ah no wa dang no ae.”
23Jisu na arui ngeita haileh ah aruwa ril, “Eja ah nangei hi jaihra meh nangei na ri ja am ri pha hi! 24Nangei kolla rillinge ha chu awoni ja nani ri num ma ripha nea hi akha chu theinum ma nangei theipha nea hi thiempu eja na akha chu areng eja na ri numg theipha num ae chuti weta mani na nea no ae.”
Ahra Samariah Spa Hina Panteem
25Roukung chupi takpi akha Jisu hi alota changa mantpi ang meh ta phao ae, “Arengpu,” “Alota ae weta keina samla ringchang pha ang meh ta sai?”
26Jisu na sang, “Trongsan na chu alo jiekka si meh? Hana alo ta nangna mani kolla tanglat che meh?”
27Spa hana ril, “ ‘Arengpu Chungthieng ta napum akha nalunglim khotta lungshi oh, namaihla limkom, hana narat nathei limpa kom hana nalungrang limpakom,’ ‘natakta nalungshit hek ta inning kolla am ngei ta lungshi oh.’ ”
28“Nang hi adiekso,” ta Jisu na sanga, “nahi mak hi ae oh chu lea nangna aring pha ange.”
29Chuna roukung chupi takpi pa na mathei chakka adiek ahra changnumna Jisu ta sai, “Atu mo ae ka inn ning tung tieng?”
30Jisu na sang, “Apha akha ah Jerushalem hai thou Jerikho wa tum ma jung spa akha am meh. Chuna aruthei ngei na amo ta tukhlakka phita apun anie lah ah thi no hai ta hou phur so. 31Chunapa chu hita shukso ae thiempu akha na hana lampi tienga tuma majung juija spa hata ripha ah amo na lampi adang tienga theija thingso. 32Hahekta chap mana Levite spa akha kom hana lampi ah junga amota an phur weta akha chu lampi adang tienga amona thingso. 33Chuti weta samariah spa akha kom hana lampi ah mathing juija amo ta tukhlakso. Chuna amo na mari juija malung shukka ringrei ngei ja. 34Amo na ma am na ah waveta atuk apumma alem akui am na ah siktui not ah akha chu darkha tui sungpi ah hra bakta hlum piso. Hana machungna asa chunga shiveta inn akha ah amo na hra bakta matun mahlou ae pi so. 35Atuk hu war juija amona dinari ani lah weta inn hakpa ta pe so. “Amota hrabakta an pi oh ta kom rilla hana chunga alut nasel nathum ha keina ka lea juija nakolla lea pi ange.”
36Chuna Jisu na nahi rilveta chan so, “Nalungranga chu mani ennthum sunga atu na inn ning tung tieng hekta aruthei ngei na phita shi spa hata mal tek mo ae?”
37Roukung chupi takpi pa na sange, “leima lungshi ah makolla ae pa na ae.”
Jisu na ril, “Thing weta nangkom hata ae oh.”
Jisuna Martha Lea Mary Kolla Tung
38Jisu akha chu arui ngei na mani lampi ah hata mani thing juija husung akha ah namei Martha tinuna mani ta ariem ma ma inn sunga tungpi. 39Amo ha ma ute Mary ti akha am meh, amo na Jisu kae kunga ong weta machu ah am rou hrabak ta ngei ah am. 40Martha ma ae ang tullu leima tam ma dol hai sulla amo na Arengpu am na wa weta ril, “Ka ute ha tullu limpa kathei chakka ae ranga keita hou phurra hana am meh? Chuna makolla nangna rilpi oh ka tullu san ranga!”
41Arengpu na sangso, “Martha, Martha! Haja tam taranga nangna olla am che. 42Chuti weta akha te chak hi darkar am songe. Mary na ahra routakka halso ae chuna makolla hai thou wa lah ah thing ang no ae.”
Markert nå:
LUK 10: CHOTBSI
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
