wandījo BŪSOMBOOJI BO KŪGUNANHA
BŪSOMBOOJI BO KŪGUNANHA
Ī shitabo shenīshi shilītūwīla mihayo ya wandījo gīt'umo līhayīlile ī lina lyasho, Wandījo wa shose īsho tushimanile nishisho tutashimanile. Tūlīsoma gīkī aho shitaalī kūbiza ho ī shose shenīsho, walīho Mulungu. Hū ng'wene ū Nseemi wa shose. Tūlībona mo ya wandījo wa kūseema kwa ng'wa Mulungu, ūmo akaseemela igūlū na sī a ha wandījo wa mihayo yose, nī shose īsho shilīmo, īsho tūkūshibonaga, nī shisho tūtadūgije kūshibona. Tūloolekejiwa ūmo akabaseemela banhū, nū mumo gakandīja kūbiza ho mahanga ga banhū, na ndīmi jose ja kalūngalūngīle. Ū mu shitabo shenīshi tūlīwīlwa nī ya wandījo wa shibi, na mbika jose ja mayanga ayo gakalondeela, ayo nī haha gataalī gakūbakoyaga pye a banhū mu sī jose. Tūlīwīlwa nū mumo ū Mulungu akandīja kūbīītīla a banhū kūlenganīla nū mumo jiigeleelilwe ī nhūngwa ja kikalīle kabo.
Kūfuma kale, a Bayudaya a bamani ba shandīkwa badeebile gīkī ū ng'wandīki washo ī shitabo shenīshi walī Musa. Gwike ū wei atihayile ī lina lyakwe, alīyo ūyo gūmanīkile gūlī gīkī ū Musa hū ng'wandīki wa shitabo shitanò sha kwandya ī sha mu Bibilia. Ī shitabo sha Wandījo shidūgije kūtūūlwa mu magele mataale abīlī.
Suula ya kwandya kūshisha ikūmin'īmò. Ū ng'wigele lyenīlī tūlīsomaa mihayo ya būseemi ūbo Mulungu akabūbeeja, kūfuma mu kūdūhū. Tūlīsoma gīkī a banhū ba kwandya aho bakakwīla, ī nhūngwa ja kikalīle kabo jikabiza ja malofu no, kūshisha ū Mulungu ūbamala ngw'ihuuma lya minzī mu shikū ja ng'wa Noa. Hanuma ya myaka mingī hangī aho bongeja kūkwīla, ū Mulungu akabasambaja, nguno bakandya kūzenga nzengo gwa Babeli, gīkī bikale bitingije ipandī līmò.
Suula ikūmi n'ibīlī kūshisha makūmi atanò. Ū ng'wigele lya kabīlī tūlinhwa mihayo ya bakūlūgenji b'ihanga lya Baisilaeli, kwandīja Abulahamu; ūlondeela ng'witūnja wakwe Isaka, hama ng'wizūkūlū wakwe Yakobo (Lina līngī Isilaeli). Hūna biza a bitūnja ikūmi na babīlī ba ng'wa Isilaeli, abo baalī wandījo bo ng'anda ikūmi n'ibīlī j'ihanga lya Baisilaeli. Ū mu banhū ikūmi na babīlī benabo, tūlinhwa mihayo ya ng'wa Yosefu mingī kūbaheeba a biye. Nguno h'ūyo akatūmamīlwa na Mulungu kūbashisha mu sī ya Misili pye a Baisilaeli.
Na ng'hana ū mu shitabo shenīshi tūlīwīlwa mihayo ya banhū, na shiseeng'wa shose, alīyo ū meeja ntaale na ntongeeji wayo ī mihayo yenīyo alī Mulungu ng'wenekīlī. Shilandya mu koolecha gīkī ū Mulungu hū ng'wene ū meeja wa shose, na shilīmalīīja mu kūtūlanga tūmane gīkī, ū Mulungu atogilwe no no no ū kwīta ya koolecha gīkī, ū wei hū ng'wene ū ntongeeji wa mihayo yose. Ū wei akabinhaga nsango abo bakīgomelaga īyo ayīhelile, alīyo abo bakashimīzīlaga ū mu kahelele kakwe, a bene akabīīlūkīlaga mbango. Ī shoi shilī shitabo sha mihayo ya kale, īyo ītūūlilwe na būlīngīsīīji bo kūbagunanha banhū ba ng'wa Mulungu kwīmīīla ha ng'hana pye a makanza ga shikū ja būlamu wabo.
ĪYO ĪLĪMO
Mulungu nseemi wa shose 1:1–2:25
Kwandya kwa shibi na būbi bose 3:1-24
Kūkwīla kwa banhū kūfuma kūlī Adamu kūshisha kūlī Noa 4:1–5:32
Ihūūma mu shikū ja ng'wa Noa 6:1–10:32
Babeli kūzengwa na kūgwa kwayo 11:1-9
Kwandīja kūlī Shemu kūshisha kūlī Abulahamu 11:10-32
Wandījo w'ihanga lya Baisilaeli, Abulahamu, Isaka na Yakobo 12:1–35:29
Būbyīle bo ng'wa Esau 36:1-43
Yosefu na baana ba ng'wawe 37:1–45:28
Baisilaeli kūja mu sī ya Misili 46:1–50:26
Markert nå:
wandījo BŪSOMBOOJI BO KŪGUNANHA: SUKBI15
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sukuma Bible © Bible Society of Tanzania, 2019.