wandījo 1
1
Kūseema kwa ng'wa Mulungu
1A ha wandījo wa kūseema, ū Mulungu akaseema igūlū na sī. 2Ī sī yalī dalali, yalī ītī na shose shose sha kwīyīta ībeelele#1:2 Sha kwīyīta ībeelele: Nūūlū, sha kwīyinha wiza. Nīyo yalī ītingatilwe minzī, hama yalī mu giiti shitaale. Alīyo ū Moyo wa ng'wa Mulungu walī a higūlya ya minzī.
3Hūna ū Mulungu ūhaya gīkī, “Ni lībizage ho isana#1:3 Isana: Būpe bo kūgunanha kūbona. ng'hana lyūbiza ho isana.” 4Ū Mulungu ūbona yabeelela ū kūbiza ho ī lisana; ī lisana ūlīlekanya nī giiti. 5Ū Mulungu ūliitana ī lisana “līīmi,” ī giiti ūshiitana “būjikū.” Yūbiza mhīndī, yūbiza dilū, lūshikū lwa kwandīja.
6Hangī ū Mulungu ūhaya gīkī, “Ni gūbizage ho ng'wanya gwa kūgalekanya a minzī.” 7Ū Mulungu ūbeeja ng'wanya gwa kūgalekanya a minzī. Gangī gūbiza kwigūlya, a gangī kū sīlīlī ya ng'wanya gwenūyo. 8Ū Mulungu ūgwitana ū ng'wanya gwenūyo “igūlū.” Yūbiza mhīndī, yūbiza dilū, lūshikū lwa kabīlī.
9Hūna ū Mulungu ūhaya hangī gīkī, “A minzī ayo galī ha sīlīlī y'igūlū gikuminge hamò, yilonge sī nyūmu;” ng'hana yūbiza gīko. 10Ī lipandī lya sī īyo ītī na minzī, ū Mulungu ūlitana “Sī nyūmu;” alīyo a minzī ayo gakikuminga ūgitana “Nyanza.” Ū Mulungu ūbona yabeelela. 11Na lūūlū ū Mulungu ūhaya gīkī, “Ī sī ni īzwishage sha kūzwa, Ībize ho mitī, na mbika jose ja shikolo sha kūzwa, īsho shilī na matwajo ga mbīyū ja kūzwa.” Ng'hana yūbiza gīko. 12Ī sī yūbiza na būdūla wa kūzwisha shikolo; yūzwa mitī ya būlī mbika, na būlī shose īsho shilī na mbīyū ja kūzwa na kūtwaja matwajo. Ū Mulungu ūbona yabeelela. 13Yūbiza mhīndī, yūbiza dilū, lūshikū lwa kadatū.
14Ū Mulungu ūhaya hangī gīkī, “Ū mu ng'wanya gwigūlū shibize ho shikolo sha kūfunya isana, shiyūgalekanya a makanza ga līīmi na a ga būjikū; na koolekeja makanza ga chū na jidikū, hamò na kagalūkīle ka myaka na shikū. 15Nīyo shibize sha kūtūūla isana ū mu ng'wanya gwigūlū, na kwītwimīla ī sī.” Ng'hana yūbiza gīko. 16Ū Mulungu ūbeeja shikolo shitaale shibīlī sha kūfunya isana. Ī shimò shitaale, shene līīmi, shūbiza sha kūsuga makanza ga līīmi. Ī shido shūsuga makanza ga būjikū, gwene ng'weji; hūna ūbeeja na sonda. 17Ū Mulungu ūshitūūla ī shikolo shenīsho ū mu ng'wanya gw'igūlū, gīkī shiyūyītwimīl'ī sī. 18Na gīkī shigasuge a makanza ga līīmi na a ga būjikū, na kūshilekanya ī giiti nī lisana. Ū Mulungu ūbona yabeelela. 19Yūbiza mhīndī, yūbiza dilū lūshikū lwa kanè.
20Hanuma ya henaho ū Mulungu ūhaya hangī gīkī, “A minzī gookale shiseeng'wa shipanga sha būlī mbika; na noni ja būlī mbika jibize ho, jiyūlala a higūlya ya sī ū mu ng'wanya gwigūlū.” 21Hūna ū Mulungu ūseema shiinū nhaale nhaale ja mu nyanza, nī shiseeng'wa shingī pyī ī shipanga, īsho shokalile mu minzī, īsho shikaselemaga; nī noni ja kūlala ūjiseema ja būlī mbika. Ū Mulungu ūbona yabeelela. 22Ī shiseeng'wa shenīsho ūshifuuha alīhaya gīkī, “Ibyalanagi mukwīle, mugookaje pa a minzī ga mu nyanza; nī noni jookale hose pyī ū mu sī.” 23Yūbiza mhīndī, yūbiza dilū, lūshikū lwa katanò.
24Ū Mulungu ūhaya hangī gīkī, “Ī sī īfunye shiseeng'wa shipanga sha mbika na mbika; jibize ho ndimu ja būlī mbika. Na shiinū ja kwigweesa ha sī, na būlī mbika jose ja shiinū ja mu matogolo.” Ng'hana yūbiza gīko. 25Ū Mulungu ūbeeja mbika na mbika ja shiinū ja mu matogolo; nī ndimu ja būlī mbika jose pyī ūmo jigelelile, pyī nī shiinū ījo jikigweesaga ha sī ja būlī mbika. Ū Mulungu ūbona yabeelela. 26Hūna ū Mulungu ūhaya gīkī, “Tūbeeje na munhū mu suso yise, abize wa kūtwikola. Bajisuge ī ndīlo ja mu nyanza, nī noni ja higūlya, pyī nī ndimu; babize basugi bayo ī sī, nī shiinū ja kwigweesa ha sī pyī ī jose.”
27Hūna ū Mulungu ūnseema munhū
mu suso yakwe,
mu suso yakwe ū Mulungu ūnseema,
ūbaseema ngosha na nkīma.
28Ū Mulungu ūbafuuha alīhaya gīkī, “Bbyalanagi mukwīle, ng'wīyookaje ī sī ng'wīsuge. Nī ndīlo ja mu nyanza mujisuge, pyī nī noni ja hape; nī shiseeng'wa shipanga ī shose īsho shilī mu sī.” 29Hanuma ū Mulungu ūbawīla gīkī, “Nang'winhaga pyī ī sha mu sī īsho shikazwaaga na kūtwaja matwajo, nī mitī ya shisuumo pye ī yose. Shikūbiza shilīwa shing'we, 30būlī ntī gwa madūūtū, nī shinīlīzu shose shose īsho shikazwaaga, nashītaga kūbiza shilīwa kūlwa shiinū jose ja mu sī, nī noni ja higulya, nī shiseeng'wa sha kwigweesa ha sī; kūlwa shose pyī ī sha mu sī īsho shilī na myūyī ya būpanga.” Ng'hana yūbiza gīko. 31Hūna ū Mulungu ūbona gīkī, pyī īsho akashibeeja shilī shawiza no. Yūbiza mhīndī, yūbiza dilū, lūshikū lwa katandatū.
Markert nå:
wandījo 1: SUKBI15
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Sukuma Bible © Bible Society of Tanzania, 2019.
