Huan 21
21
Hesus ta aparesé na shete disipel
1Despues Hesus a aparesé un bia mas na su disipelnan na lago di Tiberias. Esaki a tuma lugá di siguiente manera. 2Simon Pedro, Tomas, yamá tambe ‘Ohochi’, Natanaèl di Kana na Galilea, e yunan di Zebedeo i dos otro disipel di Hesus tabata huntu. 3Simon Pedro a bisa e otronan: ‘Mi ta bai piska.’ Nan a bis'é: ‘Nos tambe ta bai piska huntu ku bo.’
E ora ei nan a bai den nan boto, pero henter anochi nan no a kohe nada.#Lukas 5:5 4Den kibrá di mainta, Hesus tabata pará na kantu, ma e disipelnan no tabata sa ku t'E. 5El a bisa nan: ‘Mi yunan, boso no a kohe nada di kome, no?’ Nan a kontestá: ‘Nada!’ 6E ora ei El a bisa nan: ‘Tira boso reda na banda drechi di e boto i boso lo kohe piská.’ Nan a tira nan reda i nan no por a hal'é aden mas, asina hopi piská tabatin den dje!#Lukas 5:6
7E ora ei e disipel stimá di Hesus a bisa Pedro: ‘Ta Señor!’ Ora Pedro a tende ku ta Señor, el a shorotá su paña djariba, pasobra e no tabatin nada otro bistí i a bula na awa. 8E otro disipelnan a bai kantu ku e boto i nan a lastra e reda bini kuné. Nan tabata un shen meter asina for di tera, ke men no muchu leu. 9Ora nan a baha na tera, nan a mira un kandela di karbon ku un piská riba dje, i tambe tabatin pan. 10Hesus a bisa nan: ‘Trese algun piská ku boso a kohe.’ 11Simon Pedro a subi den e boto, lastra e reda yen di piská grandi, trese kantu. Tabatin 153 piská, ma tòg e reda no a sker. 12Hesus a bisa nan: ‘Bin desayuná!’ Niun di nan no a tribi interogá Hesus mas aleu pa sa ken E ta, pasobra nan tabata sa ku ta Señor. 13Hesus a kohe e pan duna nan, meskos tambe El a hasi ku e piská.
14Esei tabata e di tres bia ku Hesus a aparesé na su disipelnan, despues ku El a lanta for di morto.
Hesus i Pedro
15Despues ku nan a desayuná, Hesus a puntra Simon Pedro: ‘Simon, yu di Huan, bo ta stima Mi mas ku tur e otronan akí ta stima Mi?’ Pedro a rospond'É: ‘Sí, Señor, Bo sa ku mi ta stima Bo.’ Hesus a sigui bis'é: ‘Duna mi lamchinan di kome!’ 16Hesus a puntr'é pa di dos bia: ‘Simon, yu di Huan, bo ta stima Mi?’ Pedro a kontestá: ‘Sí, Señor, Bo sa ku mi ta stima Bo.’ E ora ei Hesus a sigui bis'é: ‘Kuida mi karnénan!’ 17Despues Hesus a puntr'é pa di tres bia: ‘Simon, yu di Huan, bo ta stima Mi?’ Pedro a bira tristu, pasobra Hesus a puntr'é esei pa di tres bia. El a kontestá: ‘Señor, Bo sa tur kos; Bo sa ku mi ta stima Bo.’ Hesus a sigui bis'é: ‘Duna mi karnénan di kome! 18Mi ta sigurá bo: tempu bo tabata hóben, bo tabata drecha bo paña bai kaminda bo tabata ke. Ma ora bo bira bieu, lo bo rèk man#21:18 lo…man: ekspreshon fiho pa referí na komienso di krusifikashon di un hende. Nan tabata rèk su man mara riba e balki horizontal di e krus, pa despues nan hib'é kaminda e krusifikashon mes lo a tuma lugá. laga otro hende drecha bo paña pa bo i hiba bo kaminda bo no ke.’ 19Hesus a bisa asina pa indiká ki tipo di morto Pedro lo a muri pa duna Dios gloria. Despues El a bisa Pedro: ‘Sigui Mi!’
Hesus i e disipel stimá
20Pedro a bira wak i mira e disipel stimá di Hesus ta bini nan tras. Ta e mesun disipel ei a lèn patras, hala mas serka di Hesus durante e sena i puntr'É: ‘Señor, ken ta bai traishoná Bo?’#Huan 13:25 21Ora Pedro a mir'é, el a puntra Hesus: ‘Señor, ke tal di esun ei?’ 22Hesus a bis'é: ‘Si Mi ke lag'é keda na bida te ora Mi bini bèk, esei no tin nada di aber ku bo! Sòru pa abo sigui Mi!’
23P'esei e notisia ku e disipel ei lo no muri a plama serka e rumannan. Ma Hesus no a bisa asina; El a bisa: ‘Si Mi ke lag'é keda na bida te ora Mi bini, esei no tin nada di aber ku bo!’
24Ta e disipel ei mes ta testiguá tokante tur e kosnan akí; ta e mes tambe a skibi nan. I nos sa ku su testimonio ta kuadra ku bèrdat.
Konklushon
25Tin hopi otro kos mas ku Hesus a hasi. Si mester a bai skibi nan tur un pa un, mi ta suponé ku lo no tabatin sufisiente lugá den henter mundu pa pone e bukinan ei!
Nu geselecteerd:
Huan 21: BPK13
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Papiamentu Bible with DC © Bible Society in Netherlands Antilles and Aruba, 2012, 2013
