2 MULIYANA 12
12
Yowas mulla vi Yuda, Tempella kotiya
2 Lml 24
1Hay li ma Yowas muɗ mul kayni busata valam asay siɗiya. 2Hay busata siɗiyata vi Yehu kayni, Yowas tuni mulu, nam ti mulda ir busat dok-fiɗi hay Yerusalem. Sulum ya' ala Siba, ta Ber-Sebata. 3Yowas li sle ma ɗigera kir Ma-Vatɗina, hay liyn kaf ma nam tuɗ kuɗ gatta vi mul-ma-ɗifinna Yehoyada. 4May liyn ma ini kulo ɗiŋiriŋŋa may vat goy noŋɗi; sumun ka li ɗifini, ŋal urdin kaw kayn kulo kay liyn ma ɗiŋiriŋŋa. 5Yowas di tam muliyan-sa-ɗifinna ala: Gurjuta ta vuli goyo ta mara' hay ziyna vi Ma-Vatɗina kaf, gurju ta li lop hiɗi na'ta kaf, kayn di ala gurju ta muɗ sumuna, kuɗ ŋaɓta ta tuni kisita, gurjuta ta may hay varta vi sumun pa kay nara' hay ziyna vi Ma-Vatɗina, 6hin muliyan-sa-ɗifinna gigekaw yaw gurjut hay ɓam sa ma nam wumna, kay sle ma ɓulak hay ziyd kafna nisi as kotom hiɗi gurju na'ta.
7May co hay busata dok-ma' yam ɦidita vi mulla Yowas kayni, slen ma nisi as kotom hay ziydna nisi may kotomɗi. 8Mulla Yowas yi mul-ma-ɗifinna Yehoyada hiɗi muliyan-sa-ɗifin segena, nam ka disi ala: Slen ma kalaf hay ziyda ma nigi as kotomna nigi min kotomɗi kay mige? Wulin kayni sum sa nigi wisina nigi as yaw gurjut hay ɓisi loɗi, may nigi ma vul gurjut goyo kay kotta vi ziyda. 9Muliyan-sa-ɗifinna vi diksi kay nisi ma yaw gurjuta hay ɓam sumunɗi, kay nisi ma tun nekka vi inda vi ziyda kisiɗi. 10Nala mul-ma-ɗifinna Yehoyada sli timgil kepe, nam co viriy kulo kalam kepe, nam tunum goy hay gal giwin-ma-ɗifinna, hay gal ma jufna, hay liy ma sumun kalay kalaf hay ziyda vi Ma-Vatɗin kayn nisi jik hayamna. Muliyan-sa-ɗifinna sa ŋom vun-ziyna cuk gurjuta ta sumun mara' hay ziyda vi Ma-Vatɗin kafta gaa hay timgilla. 11Hay li ma nisi waawa ala gurjut ka ŋolo hay timgilla, sa ma ɗota vi mulla co'o hiɗi mul ŋol ma-ɗifinna, gurjut na'ta nisi yawa'a ŋaɓa' goyo. 12Nisi vul gurju na'ta ta ŋaɓay goyta hay ɓam sum sa lopna hini hay ɓisiya kay kot tuw ziyda vi Ma-Vatɗina. Gurjut na'ta nisi tuna' mi sum sa har guna hiɗi sum sa li lop hay ziyna vi Ma-Vatɗina. 13Kay sa jak-ziyna hiɗi sa ceɗ hiɗiyna, kay gusta vi guna hiɗi hiɗiy ma fiyokŋa ma asay kay kot ziyda vi Ma-Vatɗina hiɗi namna, kay lopna vi kotna vi ziyda kaf. 14May doorota ta sumun mara' hay ziyda vi Ma-Vatɗina, nisi may kot tasa ma ŋol hiɗi na'ɗi, kot kewɗi, kot kaway ma niyɗi, kot togolomɗi, kot sle ma ora lebo ma dooroɗi kaw: 15Nisi vulum kayni mi sum sa li lopna, kay nisi ma tunum kay li lopna vi ziyda vi Ma-Vatɗin hiɗi namu. 16Sum sa gurjut vuli hay ɓisi kay nisi vula' mi sum sa li lopna sa may jobsi kay labara vi gurjut noŋɗi, kay nisi li slen kayn hay hagata valamu. 17Gurjuta vi ɗifin ma kay jiw-zlata hiɗi ɗifin ma poora sa may maram hay ziyna vi Ma-Vatɗin noŋɗi. Nam vi sum sa li ɗifinna.
18Bugol kayni, Hazayel mul ma Siriyana kaliya, nam dur sum sa hay Gatna, nam sli Gat. Hazayel ka hiɗi varta kay tuɗ sli Yerusalem. 19Yowas mulla vi Yuda yaw sle ma vuli goy ɗifinna kafe, ma Yosafat vulum goy ɗifinna kafe, ma Yoram hiɗi Ahasiya sumiyamu, muliyana vi Yuda, slen ma nam kay tuwam vulum goy ɗifinna, ora kaf ma ka hay timgilla vi ziyda vi Ma-Vatɗina, hiɗi ma hay ziyna vi mulla; nam jokom kaf mi Hazayel mulla vi Siriya, nala Hazayel min tuɗ dur Yerusalem loɗi.
20Caw lopna vi Yowas ma hinina, sle ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi Yuda. 21Sa sunda valam yaw kulo kalamu, nisi ŋra vunsi kay lum joo'o; nisi ci Yowas hay ziyna vi Millo, hay vun liy ma jik gaana vi Silla. 22Yosakar goora vi Simeyat, hiɗi Yozabad goora vi Somer sa sunda valam calamu, nam mita may. Nisi pum tam sumiyamu, hay hoyok-ziyna vi David. Goora valam Amatsiya ti mulda hay baŋalamu.
Nu geselecteerd:
2 MULIYANA 12: Massana
Markering
Delen
Kopiëren
Wil je jouw markerkingen op al je apparaten opslaan? Meld je aan of log in
BIBALDA TA PELDETTA © L'Alliance Biblique du Cameroun, 2001