2 MULIYANA 13
13
Yowahaz ti mul kay Israyel
1Co hay busata dok-ma' yam ɦidita vi Yowas goora vi Ahasiya mulla vi Yuda kayni, Yowahaz goora vi Yehu ti mulda kay sa Israyella hay Samariya. Nam ti mulda ir busat doogo yam siɗiya. 2Nam li sle ma joo'o kir Ma-Vatɗina; nam li suluk ŋray ca ki Yerobowam goora vi Nebat nala, kay Yerobowam kal gurona vi Israyel hay sulukŋa, nam min ja jaram goy hiɗi sulukŋ noŋɗi. 3Ma-Vatɗina muɗ ɦiy ŋolo kat sa Israyella, nam vulsi goy hay ɓam Hazayel mulla vi Siriya, nam vulsi hay ɓam Ben-Hadad goora vi Hazayel. 4Yowahaz tiy tam Ma-Vatɗina. Ma-Vatɗin hum tiyta valamu, kay nam wi curoɗta ma mulla vi Siriya ka curoɗ sa Israyella, 5Ma-Vatɗin vul sa ma but sum sa Israyel goy kepe, gurona vi Israyel hulot goy hay ɓam sum sa Siriyana, nisi hot lak hay guɗukŋa visi ki jew nala. 6May suluk ma jafna vi Yerobowam kal sum sa Israyel hayamna nisi min ja jarsi goy hiɗi namɗi; nisi kaw kal tuwsi hayamu, lawayna Astarte kaw ka ini kulo zaw hay Samariya. 7Kuɗ slena hiɗi sumuna vi Yowahaz kaf kayni, Ma-Vatɗin hinim sum sa jaŋ kulumayn dok-vasl, keke-ma-duur doogo, sum sa li duur birim doogo; kay mige mulla vi Siriya vatsi goy noŋ kafe, nam muɗsi ŋray ca ki butuw ma tayam gaa kuɗ seŋu nala. 8Caw lopna vi Yowahaz ma hinina, slen ma nam lum kafna, sle ŋulo ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi Israyel. 9Yowahaz miti kuɗ sumiyamu, nisi pum hay Samariya. Bugolda goora valam Yowas ti mulda hay baŋalamu.
Yowas mulla vi Israyel
10Co hay busata dok-ɦidi yam siɗiyata vi Yowas mulla vi Yuda kayni, Yowas goora vi Yowahaz ti mulda kay sa Israyella hay Samariya. Nam ti mulda ir busat doogo yam karkiya. 11Nam li slen ma joo'o kir Ma-Vatɗina, suluk ma Yerobowam goora vi Nebat kal sum sa Israyel hayamna nam min ja jaram goy hiɗi nam noŋ ne'ɗi, nam tap kuɗ hagata na'ta. 12Caw lopna vi Yowas ma hinina, slen ma nam lum kafna, sle ma ŋulo ma nam lumna, duura ma nam lum hiɗi Amatsiya mulla vi Yudana, kayni ka ɗoy hay ɗerwelda vi Labar-Ma-Liyna vi muliyana vi Israyel. 13Yowas miti kuɗ sumiyamu, Yerobowam mus kulo kay zlamda-mulda valamu may. Nisi pi Yowas hay Samariya kat muliyana vi Israyel.
Mitta vi Elise
14Elise moyn vumu, mi moy ma cap cum matna; nala Yowas mulla vi Israyel kalay katamu, bowom gaa'a, ka tiya, nam ka di ala: Bunu, Bunu, keke-ma-duura vi sa Israyella hiɗi sum sa ɓe kalamna! 15Elise ka dum ala: Slaŋ diŋ-diŋ ɓarawta, yawaŋ ɓarawna kaw, nam sli diŋ-diŋ ɓarawt kep hiɗi ɓarawna kaw. 16Bugol kayni Elise di tam mulla vi Israyel ala: Ganaŋ diŋ-diŋ ɓarawt hiɗi ɓaŋu. Hay li ma nam gan diŋ-diŋ ɓarawt hiɗi ɓalam ganna, Elise tun ɓalam kay ɓam mulla, 17nam ka di'e: Malaŋ fenetren goyo hay gal ma kuɗuwna, nam mala' goyo may. Elise di'e: Ɓeŋ ɓarawta, nam ɓe ɓarawta. Elise di'e: Kayni ti ɓarawta vi butta-goyta ta may vi Ma-Vatɗin pa, ti ɓarawta ta butaŋ goyo hay ɓam sa Siriyana; naŋ ma ci sum sa Siriyana hay Afek ta-ta naŋ ma vatsi goyo. 18Elise hot di lo ala: Yawaŋ ɓarawta. Nam yawa'aya. Elise di tam mulla vi Israyel: Wataŋgi gaa kay nagata. Nam wata' gaa kay nagat sem hiɗi, bugolda nam cola. 19Sana vi Lawn dikam muɗ ɦiya kat mulla, nam ka dum ala lali naŋ ci gaa kay nagat sem vasl lebo sem karkiya; nala naŋ ɗawn ma ci sum sa Siriyana ta-ta vatsi goy kafe; may wulin kayni naŋ ma kol kisi ɗawn sem ɦidi ɦawa.
20Elise mitiya, nisi pumu. Hay busata ka'ta, sojena vi sum sa Mowabna cukay kulo hay nagata. 21Fat tara kep nisi ka pi sa lak' kayni, irsi cuk kay vokŋa vi sojen nisina. Nala nisi gi san hay zul ma Elise ka buri hayamna. San kayni tuwam jo tam zokŋa vi Elise, nam hot muɗ iriya, col kulo kay selemu.
22Hazayel mulla vi Siriya curoɗ sum sa Israyella hay buura irita vi Yowahaz kafe. 23May Ma-Vatɗin lisi slugota, nam wisi hawsiya, nam muɗ iram kirsiya kuɗ bonota valamu hiɗi Abraham, Isaak hiɗi Yakub, nam may mini kay vatsi goyɗi, ta-ta vaydi, kay nam bay noysi goy vok iram tuwa. 24Hazayel mulla vi Siriya mitiya, goora valam Ben-Hadad ti mulda hay baŋalamu may. 25Yowas goora vi Yowahaz li duura hiɗi Ben-Hadad goora vi Hazayel. Hoyok-ziy ma Hazayel yawam hay ɓam bulum Yowahazna nam hot yawam kafe. Yowas kol kisi sem ɦidi, nam hot yaw hoyok-ziyna vi Israyel.
Nu geselecteerd:
2 MULIYANA 13: Massana
Markering
Delen
Kopiëren
Wil je jouw markerkingen op al je apparaten opslaan? Meld je aan of log in
BIBALDA TA PELDETTA © L'Alliance Biblique du Cameroun, 2001