2 MULIYANA 14
14
Amatsiya mulla vi Yuda
2 Lml 25; 26:1-2
1Co hay busata ma'ta vi Yowas, goora vi Yowahaz mulla vi Israyel kayni, Amatsiya goora vi Yowas tun mulu hay Yuda. 2Nam muɗ mul kayni busata valam coy dok-ma' yam vasl. Nam ti mulda ir busat dok-ma' yam zleeŋe hay Yerusalem. Sulum ya' ala Yowadan, ti goota Yerusalemta. 3Nam li sle ma ɗigera kir Ma-Vatɗina, ŋray hiɗi bulum David noŋɗi may; nam li kayni ŋray ca ki bulum Yowas li nala. 4Liyn ma ini kulo ɗiŋiriŋ hayɗin may vat goy noŋɗi; sumun ay li ɗifini, ŋal urdin kaw kayni kulo kay liyn ma ɗiŋiriŋŋa.
5Hay li ma mulda hinawa goy hay ɓalamu, sa sunda valamu sa ci bulumna nam cisi goy kafe. 6May gurona vi sa ci matna nam min cisi goyɗi, kuɗ va ma ɗoy hay ɗerwelda vi gatta vi Musus, ta Ma-Vatɗina vul vun-ma-gatna ala: As ci bumna kuɗ sulukŋa vi gurona valamɗi, as ci gurona kuɗ sulukŋa vi busiɗi lay; may gigekaw cum ɗawni kuɗ sulukŋa valamu valamu.#14:6 Ɗuw kayni hay Gsm 24:16.
7Nam ci sum sa Edomna birim doogo hay liy ma beɗna vi mandana; hay duur namna nam sli Sela, nam tuna' se' ala Yokteel, sem na'ta ka ta'a ta-ta vaydi. 8Bugol kayni Amatsiya cuk sa sunda kat Yowas goora vi Yowahaz, goora vi Yehu, mulla vi Israyel, kay dum ala: Naŋaya, duray tuwaya. 9Yowas mulla vi Israyel gi sunda tam Amatsiya, mulla vi Yuda kay dum ala: Gu-cocona vi Libaŋ gi sunda tam gu-gamna vi Libaŋ: Kay dum ala: Naŋ ma vul goota vaŋ ca'a mi goora vanu. Muuriya ma fulla ma hay Libaŋ jika, nam tay gu-cocon gaa kuɗ selemu. 10Naŋ kolawa kay sum sa Edomna, kuɗ na'ta dikaŋ fokawa hiɗi suburta. May musaŋ hiɗi suburta na'ta vo hay ziyna vaŋu. Wulin lo naŋ min li duura ma laŋ joo'o, ma as bulakaŋ naŋ goyo, ma as ɓulak jafna vi Yuda goyo kaw kay mige? 11May Amatsiya min humumɗi. Nala Yowas mulla vi Israyel kalay vun duura; namu hiɗi Amatsiya mulla vi Yuda tupa dig tuwsiya hay Bet-Semes ta ka hay Yuda. 12Sum sa Israyella kol kay sum sa Yudana, gigekaw pir vo hay guɗukŋa valamu valamu. 13Hay Bet-Semes, Yowas vi Amatsiya mulla vi Yuda, goora vi Yowas, goora vi Ahasiya. Nam co hay Yerusalem, nam co baŋana ir goldoŋ kis-fiɗi hay gulmunna vi Yerusalem, tun caw hay vun-galana vi Efrayim pa ta-ta tam vun-galan ma hay gefna. 14Nam yaw ora hiɗi doorota kaf, hiɗi doway ma ka hay ziyna vi Ma-Vatɗina, hiɗi ma hay timgil ma hay ziyna vi mulla; nam yaw sumun gorvo'o kaw, nam hotay hay Samariya may.
15Caw lopna vi Yowas ma hinina, sle ma nam lum kafna, lop ŋulo ma nam lumna, duur ma nam lum hiɗi Amatsiya mulla vi Yudana, kayni ka ɗoy hay ɗerwelda vi Labar-Ma-Liyna vi muliyana vi Israyel. 16Yowas miti kuɗ sumiyamu, nisi pum hay Samariya kat muliyana vi Israyel. Goora valamu Yerobowam ti mulda hay baŋalamu may.
17Amatsiya goora vi Yowas, mulla vi Yuda, li busat doogo yam vasl bugol mitta vi Yowas goora vi Yowahaz mulla vi Israyel. 18Caw lopna vi Amatsiya ma hinina, kayni ka ɗoy hay ɗerwelda vi Labar-Ma-Liyna vi muliyana vi Yuda. 19Nisi fok kulo kalamu hay Yerusalem, nam pir goy hay Lakis, ɗawni nisi cum goyo. 20Nisi ziyim kulo kay kulumna, hotomay hay Yerusalem, nisi pum kat sumiyamu hay hoyok-ziyna vi David. 21Sum sa Israyel kaf vi Azariya, busata valam asay doogo yam karkiya, nisi tunum mulu hay baŋal bulum Amatsiya. 22Azariya hot in Elat, nam hota' gaa kuɗ gaŋeraŋa vi Yuda, bugol mitta vi mulla.
Yerobowam 2, mulla vi Israyel
23Hay busata doogo yam vaslta vi Amatsiya goora vi Yowas, mulla vi Yuda kayni, Yerobowam goora vi Yowas mulla vi Israyel, ti mulda hay Samariya. Nam ti mulda ir busat dok-fiɗi yam kep. 24Nam li sle ma joona kir Ma-Vatɗina. Suluk ma Yerobowam goora vi Nebat lumisna, ma nam kal sum sa Israyel hayamna, nam min ja jaram goy hiɗi kaynɗi. 25Nam hot tun jaara vi Israyel fokay hay vun Hamat pa, ta-ta hay niy-lumna ma hay liy ma fulla, kuɗ yoboy ma Ma-Vatɗin Lawna vi Israyel dumu vun sa ma jobta valamu Yonas goora vi Amittay, hay Gat-Hefer.#14:25 Yon 1:1. 26Kay Ma-Vatɗina wi sa Israyella kalay hay lasta ŋolda hiɗi curoɗta ta suw yamda ta sum sa gorvona hiɗi sa buti goyna kaw ka kalay hayta, sa ma co gut kuɗ sa Israyella kep kaw mayɗi. 27May Ma-Vatɗina dikam may varay kay vatsi sesi goyo hay nagatɗi, nam butsi goyo hiɗi ɓam Yerobowam goora vi Yowas.
28Caw lopna vi Yerobowam ma hinina, slen ma nam lum kafna, sle ŋulo ma nam lum vun duura, nanige Damas hiɗi Hamat ay jew vi Yuda may nam hotsi hay gaŋeraŋa vi Israyel, kayni kaf ka ɗoy hay ɗerwelda vi Labar-Ma-Liyna vi muliyana vi Israyel. 29Yerobowam miti kuɗ sumiyamu, sa muliyana vi Israyel. Zakariya goora valamu ti mulda hay baŋalamu may.
Nu geselecteerd:
2 MULIYANA 14: Massana
Markering
Delen
Kopiëren
Wil je jouw markerkingen op al je apparaten opslaan? Meld je aan of log in
BIBALDA TA PELDETTA © L'Alliance Biblique du Cameroun, 2001