Yohanna 2
2
Wəza na Yesu na Paya
(2:1—12:50)
Əɓel a kana
1Aka əvoŋ mahoko'ən na əɓel agəɗək a Kana, aka dələv na Galile. Ma Yesu tat adaka. 2Yesu pak məyani dit gewleɗ nan aka əɓel vani. 3Adan mbazla akkpapə, ma Yesu təɓsən na: Tahəŋ də mbazla ɓa. 4Yesu azlan sətək na: Ɗakə, mi dəsapaw də is di? Pay naw dəgap tagay ɓa. 5Yaŋ man tənah sit məɗɗaŋ wəza na: An anah sukum pak məɗɗa.
6Gagiyeɗ na gərəm tahəŋ adak sləre, mə Yudeɗ aɗiyaŋ nabbur ziti, taka net pak tay ətaf iŋkile zəga na litər səkatə. 7Yesu aɓsit na: Məknih gagiyeɗiŋ dit iŋkile, aknihinik tuɓurtuɓuru. 8Yaŋ Yesu aɓsit na: Kakaŋ na məmbaɗə, məkə sən afən wən addəv əɓele. Akaŋ sənənka. 9Adan afən wən addəv əɓel anet iŋkile dəkkpaŋgaŋ mbazla naka, dəsən na səŋgay di ɓa, ya məɗɗaŋ wəza məs dəmbeɗtin iŋkile, net asənənka. Afən wən addəv əɓel ayak zələt waŋ məɓelta, 10aɓsən na: Ɗəf pak tay əpsit mbazla an nenek daabəŋ sit ɗiy en ayə. An abeyke, wapsit an məs tay nek ɓa. Ya noko, kəzaɓanək mbazla an nenek hã kakaŋka.
11Aski ətəŋ sekene an Yesu agəɗ daabəŋ a Kana aka dələv na Galile. Arbanək gagdak nani, gewleɗ nan atafnənka.
12 #
MAT 4:13
Dərɓagani, ambatək a Kafarnahum ndəni, mani, milmiŋgiɗin gəm gewleɗ nani, pay diyɗa assoŋ adak ɓa.
Yesu addəv Gəla-na-Maŋgəlva
(MAT 21:12-13; MAR 11:15-17; LUK 19:45-46)
13 #
ƏGI 12:1-27
Əzləra na Pak net mə Yudeɗ go'oy, Yesu peŋ a Yerusalem. 14Arihik məvəlaŋ wasliɗe, timiŋgiɗi, biŋgeɗ na maha dit məddəɗaŋ deleɗ ɗewɗew addəv Gəla na Maŋgəlva. 15Yesu helege ləmaslgən ka azlawar arɓehet timiŋgiɗ dit wasliɗe pak səddəv Gəla na Maŋgəlva. Andolet deleɗ net məddəɗaŋ deleɗi aslaŋgan tabəl neti. 16Aɓsit məvəlaŋ biŋgeɗ na maha na: Məzargit zəgeɗiŋ səŋka, kədakkpaŋganən gəla na Əbba ka gəla nawman vokum ɓa. 17#GLƊ 69:10Gewleɗ nan aɗɗumonənək məverni na: Əŋgla na gəla nok tay əzlu a makraw va offo.
18Mə Yudeɗ azlanənka, aɓsənən na: Sekene mi kədarbə səm məsəngən na is tat də gbogboŋ naɗɗa zəga vaska di? 19#MAT 26:61; 27:40; MAR 14:58; 15:29Yesu azlani aɓsit na: Məɓzlu Gəla na Maŋgəlva əŋka, wanəsilgin addəv pay hoku. 20Yaŋ mə Yudeɗ net aɓsənən na: Mərka Gəla na Maŋgəlvaŋ agəɗ əzva kaklaw poɗo kiyən sləre. Yaŋ nok kəmna wakəsilgin addəv wəvoŋ hoku?
21Ya nan apel na aka Gəla na Maŋgəlva dəsan gəɓa zəni. 22Səza Yesu asil səka əmta, gewleɗ nan aɗɗumonən an məs apeli, yaŋ atafən an Məverin gəm əpel an Yesu apeli.
Yesu asənək an na makra ɗəfa
23Aka Yesu asan a Yerusalem gap əzləra na Pak, ɗiy diyɗa atafənka vi awlenin sekeneɗ məs agəɗə. 24Ya Yesu zək nan dəppan kiyən sit ɓa, vi asinik pakə. 25Wəray tay ɗəf dənah səngən wən na ɗəf ɓa, vi asənək an na makra ɗəf pakə.
Nu geselecteerd:
Yohanna 2: GB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
All right reserved
