Yohanna 1

Əpel maddaabəŋ

(1:1-18)

Əpel na əkeɗeɗe'e gəm na zeŋgile

1Də ətəŋ na, əpel tay səkayə, əpel van tay aza Maŋgəlva. Əpel van ndəni Maŋgəlva. 2Tay səkay aza Maŋgəlva də ətəŋga. 3Zəgeɗ pak dəndən məɗɗeti, zəga tay taka dayday məɗɗan məza dəndəni ɓa ɓa. 4Azani zeŋgile asani, zeŋgile van dəki əkeɗeɗe aket ɗiyi. 5Əkeɗeɗe tay əwiɗ ara guzliyo, ya guzli dəɓap əsərətən ɓa.

6 # MAT 3:1; MAR 1:4; LUK 3:1,2 Ɗəf məs Maŋgəlva aslən payə, iya nan na Yohanna. 7Ade na ka miziwe yi vi karban əkeɗeɗe naka, vi ɗiy pak dərahaŋgən ətaf sə kəlazani. 8Nan ndəni əkeɗeɗe ɓa, ade na kawpel aka əkeɗeɗe iyi. 9Əkeɗeɗe van ndəni əkeɗeɗe an gesiŋ məzukekeɓe ɗəf titir pakə, adek aka dəlva.

10Tay lahəŋ aka dəlva, dəndəni məzəməɗ dələva, ya dələv dəsən ɓa. 11Azet ɗiy nan tusso ade, ya ɗiy nan dətafnən ɓa. 12Ya ɗiy en dəŋgluwəni, dətafən iya nan na, apsit gbogboŋ nakkpaŋ kirtin Maŋgəlva. 13Net duwe məwet dit mbel ɓa, mãy də əŋgla na gəɓa zə ɗəf ɓa, mãy də əŋgla na ɗəf ɓa, də əŋgla na Maŋgəlva yi.

14Əpel nak akkpaŋgək ɗəf də gəɓa zəni, asanək də gəla a walaŋgəmə. Mulak gagdak nani, gagdak va na Karmalay dəknah də mbəlembəle gəm də gegesiŋ arah səza Afəni. 15Yohanna apelik wən nani, anahək dayadaya amna: Ndəni məs nəpel wən nani, nənah na: Tay əzzan dərɓagawa, adayək kiywa, vi tay səkay tak məwuwi ɓa.

16Mənam pak mərahək haran nam səzet aryeɗ nani, mərahək mbəlembəle aka mbəlembəle. 17Vi də va Moyis mahenziŋ ade, mbəlembəle də gegesiŋ tam azzoŋ dəza Yesu Kristu. 18Ɗəf tay dula ɗah Maŋgəlva ɓa. Ya Wətən karmalay, dəsan Maŋgəlva addəv Afəni, ndəni dərbani.

Yohanna məgəɗ baptem gəm gewleɗ nan maddaabəŋ

(1:19-51)

Ərba wən na Yohanna məgəɗ Baptem

(MAT 3:1-12; MAR 1:1-8; LUK 3:1-18)

19Aŋki əpel na Yohanna aka mə Yudeɗ asləŋgin məsdəlveŋge dit mə Leviɗe sə Yerusalem azani, vi dəssohonəngən na: Nok nawa kənan di? 20Azlanəka dəɗaman ɓa, arbanək na: Naw, intə Kristu ɓa. 21#MAL 3:23 ƏMS 18:15,18Assohõnənka: Ya nawa kənan kandi? Eliya kənan sa? Yaŋ amna, ndən nənan ɓa. Məskəleŋ kənan sa? Yaŋ azlan na: Owwo. 22Aɓsənən na: Ya nawa kənan kandi? Vi məmndagangən əzlan sit ɗiy məs dəslənməni. Ya nok mbar kədawnah aka ki zuk di? 23#ISA 40:3Yaŋ aɗiman na:

Intə wəla dədaŋzla vaŋvəl

a kapta-muyã na:

Meziwgin tive na Daya sarra

va məskəleŋ Isaya anahə.

24Ɗiy en məslənit vet mə Farisaɗe əŋgə. 25Assohõnənka, aɓsənən na: Ya Vimi kan kədaɗɗa Baptem adan Kristu kənan ɓa, Eliya ɓa, məskəleŋ ɓaŋ di? 26Yohanna azlan sitik dawnəh na: Naw in tat əɗɗa baptem dit iŋkile, ya ɗəf maɓɓan tay a walaŋkum məs kəsənən ɓa. 27Tay əzzan dərɓagawa, ya nəgap nawpel helegeɗ net hensek nan ɓa.

28Wənəs pak a Betani agəɗə, dəgar ki Yurdeŋ, a təki Yohanna adaɗɗa baptem.

Yesu, ndargayãk na Maŋgəlva

29Vit pumpum nani, Yohanna awlak Yesu dazzan azani, yaŋ amna: Akəŋtə ndargayãk na Maŋgəlva məzəvvuyon mambray naka dəlva. 30Ndəni məs nəpel wən nan nənah na: Ɗəf tay əzzan dərɓagawa, məs dəday kiywa, vi tay səkay tak məwuwi ɓa. 31In sən kiyu nəsən ɓa, ya vi dərbəgən a Israyel, ndəni nəde əɗɗa baptem dit iŋkile.

32Yohanna apelik akan dawnəh na: Nulak Əmpəs na Maŋgəlva əpirken sə disiŋ va mukuɗuŋgulo asan akani. 33Ya naw nəsən ɓa, hara na məs dəslənu əɗɗa baptem dit iŋkile, ndəni dənah su na: Ɗəf məs kədawla Əmpəs əpirken əsan akan na, ndəni məgəɗ baptem də Zeŋgile Salala. 34Ya naw nulaka nərbanək na, ndəni Wətən Maŋgəlva.

Gewleɗ na Yesu en maddaabəŋ

35Vit pumpum nan əmpa, Yohanna tay ziwwe adak dit sula səret gewleɗ nani. 36Yaŋ awla Yesu dawtoŋgo, amna: Ndargayãk na Maŋgəlva yakəŋkə. 37Gewleɗ sula nek aprəmənək dawpel vaska, yaŋ azbanən Yesu. 38Yesu amanək haran dirɓe, awle na tay əzbanəni, aɓsit na: Mi kədawkayanən di? Aɓsənən na: Rabbi va ənəh na, Mərbəzəga, aŋga kəsok di? 39Aɓsit na: Məde kulanəngəni. Ndəɗaŋ kan mbatə, awlanən təki asani. Assoŋ azan adak pay dəpaska wagəɗ aza təbəz poɗo na moskoyo.

40Andre, məlmən Simoŋ Piyer ndəni taka neret ɗiy sula məs dəprəmnən Yohanna, dəzbanən Yesu. 41Ndən mbat ərəh Simoŋ məlmən anan daabəŋ aɓsən na: Mərəhək Mesiya va ənəh na Kristu. 42Akak aza Yesu. Yesu təmtəm ulan amna: Istə Simoŋ wətən Yohanna, kawyuki na Kefas, va wənah na milɓe.

Filip də Natan

43Vit pumpum nani, Yesu aynanək nadda a Galile. Aləmək də Filip aɓsən na: Azbawa. 44Ya Filip van ɗəf na Betsayda yi, walaŋgəla-metiŋ na Andre də Piyer. 45Filip mbat ərəh Natanayel, aɓsən na: An məs Moyis aver wən nan addəv mahenziŋ gəm an məskəleŋɗe apeleŋ akan naka mərəhəka, ndəni Yesu na Nazaret wətən Yosef. 46Natanayel aɓsən na: Zəga moggon wade sə Nazaret sa? Filip amna ade awla.

47Adan Yesu awla Natanayel dazzan azani, apelik akani, amna aŋki mə Israyel an gesiŋ məs tay də muluvuluvu azan ɓa. 48Natanayel aɓsən na: Səŋga kəsənu di? Yesu azlani, aɓsən na: Tak aka Filip dəyuk ɓa, kəsok ammba sokoyo, nulukuko. 49Yaŋ Natanayel azlan sən na: Mərbəzəga, istə Wətən Maŋgəlva, istə məlĩ na Israyel. 50Yesu azlani, aɓsən na! Kətaf na vi nənah na nulukuk ammba sokoyo sa? A kuwəl zəgeɗ məday kiyit eski. 51#VAA 28:12Aɓsən əmpa na: Gesiŋ gesiŋ nədawnah suko, akulanən disiŋ məkolən, maslayɗe na Maŋgəlva əpeŋgeŋ gəm əpurkoŋ aka Wətən Ɗəfa.

Nu geselecteerd:

Yohanna 1: GB

Markering

Deel

Kopiëren