Lk 24
24
Ñwômane soñ Yésus Krist
(Mt 28:1-10; Mk 16:1-11; Yo 20:1-10)
1E *môs ôsu ya sondô, be nga ke soñ ésala tyé, be bili mimbon mi ne mbamba menyum be nga mane kômesan. 2Be nga koone na akok e ntoo mvasan asu soñ; 3be nga nyiin, ve be nji koone mbime Nti Yésus. 4Mbôlô be mbe fe'e ne vema ajô di, ateme na bôte bebaé be nga yené be be be be'e mengômesan ma faé. 5Be nga luu mesu si a woñ ôse; ve be nga jô be na: Amu jé mia jeñe nyô a vee e miñwuan été' 6A nji bo va, ve a wômôya. Simesa'an aval avé a nga kobô mia éyoñ a mbe Galilé, 7a jô'ô na: Mona môt a yiane keeban e mo bebo mbia be mam, a yiane tyelébane Krôa, ve a yiane wômô e môse lale. 8A be nga simesane nkobô Yésus.
9Nkôlaneya soñ, be nga bulan asu ya kate beyé'é awôm a wua a bôte bevo'o mam mete mese. 10Be mbe na: Marie Madeléne, Yôana, Marie nyia Yakob; a ba bevok mfula'an a be e mbe be nga kate de minlôman; 11ve nkobô te ô nga yené be be ane fianga, ajô te be nji ke buni binga bete. 12Ve Pierre a nga kôlô si a ke mbile soñ. Eyoñ a kumbu, a nga yene ve biyé bi bôô si; wôna a nga bulane *nda jé a kamek e jam e nga kui.
Beyé'é y'Emmaus
(Mk 16:12-13)
13Môse te ôbien bebaé ya be be be mbe be kelek e nlam jôé na Emaus, bebé kiliméta awôm a jia a kui Yérusalém, #24:13 stade wua a ne méta 185 ajô te bestade 60 be ne 11 kiliméta. 14be mbe be la'ane minlañ ajô mam mese me nga boban.
15E nté be mbe be la'an a sañetan e zañe jap, Yésus a nga kui be bebé a nyiine nsamba wop. 16Ve mise map me mbe te nguleya yeme nye.
17A nga jô be na: Za minlañ mia laane zañe jenan éyoñ mia wulu? Ane be nga tebe, be wô'ô ôlun. 18Wua ya be be, jôé na Kléôpas, a nga yalane nye na: Ye ô ne étam ô too Yérusalém teke yeme mam ma boban été melu ma' 19Jia? E Yésus a sili be. Be nga yalane nye na: E jam e nga kui ajô Yésus ya Nazarét, e nye a mbe *nkulu mejô a ne éwôlô e mimboon a e nkobô asu Zambe a asu bôt, 20a aval avé minlô betuni miangan a bivete biangan be nga ve nye na a nyoñe mekua ya awu a tyelé nye *krôa yôp. 21Bi nga too ndi minleme na e nye a ye kôté Israél, ve mbunda'an a mam mete mese e môse lale e ñwô bi ntoo wu ane mam mete me mane boban. 22E ne bebela na binga b'éziñe ya be bia ba te bo bia na bi kame beta nkaman; ba te kune ke soñ a, 23éyoñ be boya teke koone mbim, ba te zu jô na beéngele ba te yené be be a kate na a ne vevee. 24Bevo'o b'éziñe ya ba bia be be bi mbe ba te ke soñ a koone mam avale binga ba te jô; ve Nye, be nji ke nye yen. 25E nde Yésus a nga jô be na: A bôt be ne fe'e momo, a *nlem ôte'ete'e ya buni mam mese bekulu mejô be nga jô! 26Ye Krist a nji yiane tôbane mintaé avale te a nyiin étôto'o jé' 27Ane a nga liti be, e Mintilane mise, e mam ma fombô nye, Ataté Môze a kalane bekulu mejô bese.
28Eyoñe be nga kui bebé a e nlam be mbe be kelek, a nga yené ane môt a kômbô ke ôyab abui. 29Ve be nga yemete nye na: Tabe'e bia be mia, amu ngô'é é ntoo bebé, *môs ô nga lumbu. A nga nyiine na baa be be be tabe. 30A too tawôlô baa be be, e nde a nyoñe fembé, a tote bifia bibotan; wôna a nga be'e je a ve be je. 31Ane mise map me nga kuiban a be nga yeme nye; ve a nga jañe be mis. 32A be nga jôan wua a nyô mbo'o na: Ye minlem mi nji bo'o bia e mebum, éyoñ a to'o a kobô'ô bia *zen a kôñela'ane bia Mimfufube Mintilan' 33Awolo te ebien be nga kôlô si a bulane Yérusalém a koone beyé'é awôm a wua a bemvôé bap nsula'an 34e mbe be nga jô be na: E ne fo'o bebela na Nti a wômôya, a a yenéya be Simon. 35Be nga kañete jam e nga kui be be *zen, a aval avé be nga yeme nye éyoñe mbe'ane fembé.
Yésus a yené e be beyé'é awôm a wua
(Mk 16:14-18; Yo 20:19-20; Mm 1:1-8)
36Be ngenane be kobô'ô nalé, Emien ve suan ézezañe jap a jô be na: Mvo'é é bo'o a mia. 37Njalane woñ be nga buni na be yeneya kôn. 38Ve a nga jô be na: Amu jé minsisime mienan mi ne ntu'ulan a amu jé aval asimesane te da yené e minleme été' 39Yenane mo mam a mebo mam, mamiene le; namba'ane ma a yenan: Nsisim ô nji bi minsôn nge bives, avale mi lôô me bili. 40A a jô'ô nalé, a nga liti be mo a mebo. 41Mbôlô, ava'a dap été, be mbe be ngenane teke buni, a be mbe be kamek, a nga jô be na: Ye mi bili jôme ya di va' 42Be nga kee nye étune kos é too mbuban. 43A nga nyoñe je a di je ôsu viap.
44Wôna a nga jô be na: E jame me mbe me jô'ô mia e nde le éyoñe te bia be mia bi ngenan na: Mam mese me ne ntilan ajô dame metiñe me Môze, e be bekulu mejô a besam me nga yiane tôéban. 45Ane a nga yooé be fek asu ya yeme Mimfufube Mintilan. 46A a nga jô be na: E nne e ne ntilane nalé na Krist a nga yiane tôbane mintaé, a a nga yiane wômô miñwuan e môse lale 47a na nkôñelane minlem asu njamane mam *abé ô nga yiane kateban e be meyoñe mese amu jôé dé ataté Yérusalém. 48Mi ne bengaa y'été. 49A mi lôô: Ma ye lôme mia e jôme Esaa wom a nga ka'a mia, ve mia, taba'an e tison été, akekui mia ye jaléban a ngule ya yôp.
Nkeane yôp
(Mt 16:19-20; Mm 1:9-12)
50A nga kee be a kui mfa'a ya Bétani, wôna a nga bete mo yôp a botane be.
51A ngenan a bota'ane be, e nde a kandane be a betebane yôp.
52Mfa'a wop, éyoñe be maneya kañe nye, be nga bulane Yérusalém, njalan a beta mevak; 53a be mbe *nda Zambe éyoñ ése be va'a Zambe akéva.
Nu geselecteerd:
Lk 24: BDCB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Bible en langue Bulu © L'Alliance Biblique du Cameroun, 2007, 2015.
