Lk 23
23
Yésus a kobô ajô asu Pilat a asu Hérôde
(Mt 27:11-14; Mk 15:2-5; Yo 18:28-38; Mm 4:25-28)
1Be nga kôlô si bese nsamba a kee Yésus asu be Pilat.
2Be nga taté na ba bo'olô nye mejô be jô'ô na: Bi nga koone môte nyô a sô'ôlô'ô bôte y'ayoñe dangane na be bene njôan, a kama'ane na be bo teke ya'ane kéza *toya, a jô'ô fe émiene na a ne Krist, njô bôt.
3Pilat a nga sili nye minsili avale di na: Ye ô ne njô bôte Beyude nga? Yésus a nga yalane nye na: Wo jô nalé.
4Pilat a nga jô minlô betuni a jama bôte na: Me nji yene jam da yiane mekua e be môte nyô.
5Ve be nga yeme ngu a jô na: A ngômelane bôt a ñye'elan a ke a ye'ele e Yudé ase, ataté Galilé vôm a nga taté a kui va.
6Eyoñe Pilat a nga wô'ô nalé, a nga sili nge môt ate a mbe môte ya Galilé;
7Éyoñ a wô'ôya na a mbe éjôé Hérôde, a nga lôme nye e be Hérôde amu nye fe a mbe Yérusalém melu mete.
8Eyoñe Hérôde a nga yene Yésus, a nga vak abui, amu ôbe nté mvus a nga bi nkômbane ya yene nye amu mam a nga wô'ô be kobô'ô ajô dé, a mbe a buni'i na a ye yene nye a bo'o étua jam éziñ. 9A nga sili nye minsili ôbe ayap, ve Yésus a nji yalane nye jam éziñ.
10Minlô betuni a *beyeme bekalate be mbe valé be bo'olô'ô nye mejô ngulengu. 11Hérôde a bezimbi bé be nga bo nye mam a ébiasé ése; a éyoñ be maneya kpwe'ele nye a jalé nye ngômesan ja faé, be nga bulane nye be Pilat. 12Môs ôte ôbien Pilat ba Hérôde be nga bo bemvôé, a too ke na be mbe minziziñ melu mvus.
Yésus a nji yem ajô
(Mt 27:15-30; Mk 15:6-19; Yo 18:39-19:16)
13Pilat a nga bañete minlô betuni a bivete y'ayoñ, 14a jô be na: Mi nga zuu ma môte nyô ane nyô a sô'ôlô bôte na be bene njôan. Tama yenan, me maneya sili nye minsili ôsu vienan, me nji koone nye mekua me jia ya bikobe mia lañe nye. 15Hérôde fe avale da, amu a bulaneya bia nye, a mi lôô na e môte nyô a nji bo jam éziñ da yian awu. 16Ajô te ma ye suu nye éyoñ me maneya bo na be bibi nye minkasa. 17Abô'ô ese, Pilat a mbe ntindane ya suu be mbôk éziñ. 18Be nga yôtane bese nsamba wua na: Bo'o na e môte nyô a wu a su'u bia Barabas. 19Barabas a nga keebane mbôk ajô ékukuma é nga boban e tison a ajô mewôé me môt. 20Pilat a nga beta kobô be, nkômban wé ô too na a suu Yésus. 21Ve be mbe be yôta'ane na: Tyelé'é nye *krôa yôp! Tyelé'é nye *krôa yôp! 22Pilat a nga beta jô éyoñe lale na: Z'aval *abé a nga bo? Me nji yene jam éziñe be nye da yian awu. Ajô te ma ye suu nye éyoñe me maneya bo na be bibi nye minkasa. 23Ve be nga yemete a mbetane metyiñe ngul be sili'i na be tyelé nye *krôa yôp. A metyiñe map me nga dañ. 24Pilat a nga nyoñe ntyi'an wo yiane nsili wop. 25A nga suu e nyô a nga wuaban e *nda mimbôk ajô ékukuma a ajô mewôé me môt e nye ate be mbe be sili'i; ve a nga kee Yésus e mo me nkômbane wop.
Yésus a tyelébane krôa
(Mt 27:31-56; Mk 15:20-41; Yo 19:16-37; Eza 53:5-12; Sam 22:17-19)
26Eyoñe be kele nye, be nga nyoñe Simon éziñ ya Sirén a so'o mefup, a be nga kee nye mbe'e *krôa, naa a be'e wô e mvuse Yésus. 27Beta ndula bôt a binga be nga tôñe nye mvus; binga ba be mbe be kute mekôp a beté mo tôé be yônô'ô nye. 28Yésus a nga kôñelane be be a jô na: A bengone ya Yérusalém, te yônane ma, ve yônane miabebien a bone benan. 29Amu mi lôô: Melu ma zu e mme ba ye jô na: Ebotan é bo'o be minkôkôm mi binga, ébotan é bo'o be binga be nji biaé *bon a be nji nyaa *bon! 30Eyoñe te ba ye jô beta minkôle na: Kpwa'ane bia yôp! A bone minkôle na: Buta'ane bia yôp! 31Amu nge ba bo nyumi élé avale di, aya a ye kui e be nkôt élé'
32Eyoñe be mbe be kele wôé Yésus, éyoñe jia te fe be nga kee bebo mbia be mam bebaé baa be nye be wu.
33Eyoñe be kuiya e vôme ba loon ékôkoé nlô, be nga tyelé nye *krôa valé, nalé fe bebo mbia be mam bebaé: Wua e mbo nnôm, nyô mbok e mbo ngal. 34Yésus a nga jô na: A Esaa wom, jamé'é be, amu be nji yem e jam ba bo. Be nga kabane mengômesane mé a ndoone me abia. 35Bôt be nga tele valé be fombô'ô. E mfa'a bivet, be mbe be kpwe'ele'e Yésus be jô'ô na: A nga nyii bôte befe; a tame nyii émien, nge a ne Krist ntobane Zambe! 36Bezimbi fe be nga subu nye bebé be kpwe'ele'e nye a ve nye woon a ne sañ 37be jô'ô na: Nge ô ne njô bôte Beyude, nyi'i womien! 38Ntilan ô mbe nye nlô yôbe na: Nyôna a ne njôô Beyude.
39Wua ya bebo mbia be mam be mbe be tyele *krôa a nga kobô nye ébiasé na: Ye ô nji bo Krist? Nyi'i womien a nyi'i bia! 40Ve nyô mbok a nga komekane nye a jô na: Ye ô nji ko Zambe woñ, e wo wo tôban avale melebe da' 41E mfa'a wongan bia tôbane *zôsôô ntyi'ane mejô, amu bia nyoñe ma'an mimboone miangan mi nga yiane nyoñ; ve môte nyô a nji bo jam éziñ e n'abé. 42Nye na: A Yésus, ô simesa'ane ma, éyoñe wo ye zu éjôé jôé été. 43Yésus a nga yalane nye na: Ma bele ane ma jô wo de na: den bia wo bia ye tabe Paradis.
44Bebé zañe *môs, dibi e nga bo si ése a kui *mewolo melaa ya mamengô'é. 45Jôp e nga bo ékukut, a éndelé ya *nda Zambe é nga nyaé zañ. 46Yésus a nga yône tyiñe yôbe na: A Esaa wom ma kee nsisime wom e mo môé. A éyoñ a nga tote bifia bite, a nga suu mvebe. 47Evete bezimbi ntete wua, ayene a nga yene jam e nga kui, a nga ve Zambe duma a jô na: Teke vaa nge beté na môte nyô a mbe *zôsôô.
48A minsamba mi bôt mi nga zu tabe jam e nga boban, éyoñe mi maneya yene jam e nga kui, mi nga bulan kôbe mo a nkuk. #23:48 kôbe mo a nkuk: ndeme na bôt ba kam, ba semé jam ba yen. 49Ba bese be mbe be yemek Yésus a e binga be mbe be kelek e nsamba wé ataté Galilé, be mbe be tele ôyap, be fombô'ô e jam da boban.
Ba jame Yésus e soñ
(Mt 27:57-61; Mk 15:42-47; Yo 19:38-42)
50Môt éziñe ya ékôane bemvendé, jôé na Yôsep, mbamba môt a *zôsôô, 51a nji nyoñe ngap e ntyi'an ajô a mimboon mi bôte bevok, a mbe môte y'Arimaté, tisone Beyude, a mbe a yañge'e éjôé Zambe. 52A nga ke be Pilat a sili mbime Yésus. 53A nga vaa wô Krôa, a vute wô éfumulu éndelé a bôôé wô e soñ é mbe mfa'an akôm, môt a ngenane te bôéban été. 54Môs ôte ô mbe e môse ba kômesane *sabat, a *sabat a ye'e taté.
55Binga, e ba bebiene baa be Yésus be nga so Galilé be nga ke nsamba Yôsep, be yene soñ a avale ba bôôé e mbime Yésus, 56a be nga bulan asu ya kômesane mimbon a beôlobinda. Wôna e nté *sabat a nga tabe, be nga wo'on ane abendé e né.
Nu geselecteerd:
Lk 23: BDCB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Bible en langue Bulu © L'Alliance Biblique du Cameroun, 2007, 2015.
